‘Lu Nen Ken Dooshima U Aôndo’

“Luun nen ken dooshima u Aôndo. Kegh nen mhôônom ma zungwen ma Ter wase Yesu Kristu [a ishima i veren keghen] uma u tsôron la.”—YUDA 21.

1, 2. Yehova tese se dooshima na nena, man er nan se fe ser sea er nyi je kpa una gba den tsô ér se lu ken dooshima na ga?

 YEHOVA AÔNDO tese se dooshima sha igbenda kpishi. Ikyav i hemban cii i tesen ér se doo Yehova ishima yô, ka nagh ku iwom ku a ne sha ci wase la. Uumace doo un ishima kpishi je yô, a tindi Wan na u môm môm la shin tar ér a va kpe sha ci wase. (Yoh. 3:16) Yehova er kwagh ne sha ci u a soo ér se lu uma gbem sha won, shi a soo ér dooshima na a lu se a iwasen gbem sha won kpaa!

² Nahan kpa, se fatyô u henen ser, nyityô kwagh i se tsough u eren cii kpa Yehova una de ér se lu ken dooshima na her tsôô? Ei. Sha ci u i wa se kwagh ken Yuda 21 ér: “Luun nen ken dooshima u Aôndo. Kegh nen mhôônom ma zungwen ma Ter wase Yesu Kristu [a ishima i veren keghen] uma u tsôron la.” Kwagh u i kaa ér ‘luun nen ken dooshima u Aôndo’ la tese ér gba u se shir a shir ave ga. Tsô kanyi i gbe u se er ve se lu ken dooshima u Aôndoo?

Se Er Nan Ve Se Lu ken Dooshima u Aôndoo?

3. Yesu yange kaa ér gba u una er nyi keng ve una lu ken dooshima u Ter naa?

³ Se zua a mlumun sha mpin ne ken mkaanem ma Yesu iyol na ôr hen tugh mbu masetyô mbu uma na shin tar la. Yange kaa ér: “Aluer ne wa atindi Am ikyo yô, né lu ken dooshima Wam; er Mo kpaa M we atindi a Terem ikyo, man M luun ken dooshima Na nahan.” (Yoh. 15:10) Er ivur ne i tese nahan, Yesu yange fa ér gba u una wa atindi a Yehova  ikyo keng ve una ya ikyar i dedoo vea Ter na ye. Aluer kape kwagh u Wan u Aôndo u lu vough la yange lu la yô, doo u se kpa kwagh wase una lu nahan ga zee?

4, 5. (a) Se tese jighilii ser Yehova doo se ishima nena? (b) Er nan ve se lu a ityôkyaa i ia na ve se venda u kuran atindi a Yehova ga?

⁴ Jighilii yô, ka se tese ser Yehova doo se ishima sha u kuran atindi a na. Apostoli Yohane ôr kwagh ne nahan wener: “Ka dooshima u Aôndo ne, ka u se̱ kuran atindi a Na, man atindi a Na yô, a yuhwa ga.” (1 Yoh. 5:⁠3) Sha mimi yô, ior kpishi nyian mba soon u kuran atindi a orgen ga. Nahan kpa, ver ishima sha ishember i “man atindi a Na yô, a yuhwa ga” la. Yehova ngu kaan ér se er kwagh u a taver a gande se agee ken inya ga.

⁵ U tesen ikyav yô, u kaa a ma ijende you wer nana tôô ikyav mbi u fe wer nana fatyô u tôôn mbi ga yôô? Ei, u er nahan ga. Yehova hembe zungwen se mhôônom shi hembe kaven mbamyen asev kpaa. Bibilo na se ibumun ér Yehova “umbur er se lu vuulevu . . . yô.” (Ps. 103:14) Una fatyô u kaan a vese ér se er kwagh u a fe ér se kôr cio u eren ga ze. Nahan se mba a ma ityôkyaa i se venda u kuran atindi a Yehova ga. Kpa se mba ongo imo na sha ci u kwagh ne ka a na se ian i tesen Ter wase u sha la ser a doo se ishima sha mimi shi se soo u lun ken dooshima na.

Iyua i Vesen i Yehova a Ne Se Yô

6, 7. (a) Kanyi i lu imoshima? (b) Tese ikyav er imoshima ia wase se u lun ken dooshima u Aôndo yô.

⁶ Ken botar u se lu ker ne, se mba tsough akaa kpishi a se er, aa a bende a m-ongo u ungwan imo i Aôndo la. Se er nan ve se fa ser akaa a se tsough u eren la ka a sha ishima i Aôndoo? Yehova na se iyua i ia wase se kpishi u ungwan imo na yô. Iyua shon yô, ka imoshima. Kanyi i lu imoshima? Ka kwagh u a wasen se u timen sha anza ase man aeren a ase kua akaa a se tsough u eren la. Imoshima ngi er se ijir, ngi wasen se u timen sha akaa a se soo u eren la, shin u tôvon sha kwagh u se vande eren shi gbidyen kwar nengen aluer ka u dedoo shin ka u bo yô.​—⁠Ôr Mbaromanu 2:​14, 15.

⁷ Se yar tom a imoshima yase sha inja nena? Nenge ase ikyav i tesen ne. Orgen mough zende angahar ngu karen hen zege taaikyôngo. I dugh gbenda ken taaikyôngo ne ga, gbenda toho tsô kpaa ga, ikyav i tesen or gbenda kpa ngi ga. Nahan kpa, or ne tsume ga. A tsume ga sha ci u nyi? Sha ci u ngu a or u a ne nan jighjigh, u nan vande zan hen ijiir i a lu zan la yô. Una lu vea or ne ga yô, ma a tsum ma a saa toho. Kape se uumace kpa i lu je la, luun er sea lu a imoshima ga yô, ma se tsumen hanma shighe u se soo u eren kwagh u vough shin u dedoo kua u perapera cii.

8, 9. (a) Ka mbamyen mba imoshima yase mba nyi i doo u se fa? (b) Se er nyi ve imoshima yase ia lu se a inja sha mimi?

⁸ Kpa imoshima yase ngi a mbamyen di vough er ortesen gbenda nahan. Aluer ortesen gbenda la fa taaikyôngo la tsembelee ga yô, alaghga una tsume a or u a lu tesen nan gbenda la. Se kpa aluer se de ser asaren a asema a ase a mgbeghan se u eren kwagh yô, kanyi ia eree? Alaghga asaren a ase a bo aa fatyô u nzughul a imoshima yase. Bibilo ta se icin ér: “Ishima i wa atseregh je hemba hanma kwagh cii.” (Yer. 17:9; Anz. 4:23) Kwagh ugen yô, aluer gbenda nzughul ortesen we gbenda la yô, alaghga una tsume a we. Shi aluer u nyiman gbenda a na je u venda u dondon un, u yem ape u hen wer ka gbenda la yô, alaghga u tsume je u saa toho. Se kpa aluer se suur sha Bibilo i i̱ lu Mkaanem ma Aôndo, ma ma tesen se kwagh u se er la ga yô, alaghga imoshima yase tseegh yô ia wase se a kuma ga. (Ps. 119:105) Kwagh er vihi yô, ken tar u nyian ne, ior kpishi asaren a ve hemba gban ve ishima nahan mba fe veren ishima sha akaawan a a lu ken Mkaanem ma Aôndo la ga, shin mba veren a ver ishima sha a ga kuaa. (Ôr Mbaefese 4:​17-19.) Ka nahan ve mbakpishiv ve eren akaa a vihin tsung, shin er ve lu a imoshima nahan je kpaa ye.​—⁠1 Tim. 4:⁠2.

⁹ Se soo ser mayange je se lu er ve nahan  ga! Kpa, se na nen Mkaanem ma Aôndo ian ser ma tese imoshima yase shi ma tsaase i sha er ia wase se sha mimi yô. Doo u se ungwan imoshima yase, kpa se lumun ser asaren a ase a bo la a̱ hemba se ga. Heela tseegh ga, se mba we imoshima i anmgbianev asev mba doon se ishima, mba nomso man mba kasev ikyo kpaa. Ka se nôngo tsung ser mayange je se er kwagh u nan ve gbev mbu nôngon ga, gadia se fa ser imoshima i anmgbianev asev mbagenev ngi yangen ve u eren akaa agenegh a se eren yô.​—⁠1 Kor. 8:12; 2 Kor. 4:2; 1 Pet. 3:⁠16.

10. Ka igbenda ityar i nyi se time sha mi hegene?

¹⁰ Hegen se nenge nen sha igbenda itiar i se fatyô u tesen ser Yehova doo se ishima sha u ungwan imo na yô. Imoshima yase ngi wasen se sha igbenda i itiar ne cii, kpa kwagh u hiihii yô, saa akaawan a Aôndo a a lu ken Bibilo la aa hemen i ve ia lu se a iwasen ye. Igbenda i itiar shon i se ongo imo i Yehova sha ci u a doo se ishima yô, ka i je ne: (1) Mba ve doo Yehova ishima la, se kpa ve doo se ishima, (2) se mba ne mbautahav icivir, man (3) se mba nenge ser se lu wang sha ishigh ki Aôndo.

Mba Ve Doo Yehova Ishima la Se Kpa ve Doo Se Ishima

11. Doo u mba ve doo Yehova ishima la, se kpa vea doo se ishima sha ci u nyi?

¹¹ Hiihii yô, mba ve doo Yehova ishima la se kpa ve doo se ishima. Ka kwagh u mba i doo u vea lu azende a ase la je se lu ôron heen ye. Uumace mba er soso nahan. Er soso ka a kura zar kwagh u i we un shimi la nahan, kape se kpa se dondon aeren a mba ve lu ikyua a vese je la. Orgban wase fa er azende a ase aa fatyô u vihin se shin wasen se yô, gadia se mba vough ga, nahan a wa se kwagh doo kpen kpen. A kaa ér: “Zende a mbafankwagh imôngo, nahan we kpaa ú hingir orfankwagh, kpa ijende i abumeaior yô, ia zua a ican.” (Anz. 13:20; 1 Kor. 15:33) Mô wase môm nan soo u ‘zuan a ican’ ga. Se cii se soo u ‘hingir mbafankwagh.’ Or môm kpa nana fatyô u  seer Yehova kwaghfan hemban u a lu a mi la ga, shi or môm nana fatyô u tsaren Yehova aeren a bo ga. Nahan kpa, a ver se ikyav i dedoo sha kwagh u mba i doo u vea lu azende a ase yô. Hen ase sha kwagh ne​—⁠ka unô nahan ve lu azende a Yehovaa?

12. Ka unô ior Yehova a ker ijende a ve?

¹² Yehova yange yila tertamen Aberaham ér “huror Wam.” (Yes. 41:⁠8) Or ne yange ver ikyav i dedoo i jighjigh u nan, shi lu orperapera u ungwan imo i Aôndo kpaa, yange lu orjighjigh kpôô. (Yak. 2:​21-23) Ka imbaor i Yehova a ker ijende a nan je la. Nyian kpa ka amba la á ye ikyar a ve ye. Aluer ka amba a ior a Yehova a ker ijende a ve ne yô, u nenge wer doo u se kpa se kôron ijende a ior sha kwaghfan shi se zenden a mbafankwagh sha er se hingir mbafankwagh ga he?

13. Shighe u se soo u kôron ijende yô, kanyi ia wase se u tsuan azende a injaa?

¹³ Kanyi ia wase ú u kôron ijende a ior mba dedoo? Aluer u time sha akav a ken Bibilo yô, kwagh ne una wase u kpen kpen. Hen ase sha kwagh u ikyaryan i Naomi vea kwase u wan na Rutu, man ikyaryan i Davidi vea Yonatan shin ikyaryan i Timoteu man Paulu la. (Rutu 1:​16, 17; 1 Sam. 23:​16-18; Fil. 2:​19-22) Ior mba se ter heen ne cii yange ve ya ikyar ayol a ve taveraa sha ci u ityôkyaa i vesen i môm: Hanma ve yô, Yehova doo nan ishima sha mimi. U fatyô u zuan a ior mba Yehova a doo ve ishima er we nahan, mba u ya ikyar a ve kpa? Fa wer, tiônnongo u Kristu ngu a ior kpishi mba Yehova a doo ve ishima, mba u fatyô u yan ikyar a ve yô. Azende angara nahan aa tuur we ér u er kwagh u vihin Yehova ga. Kpa aa wase ú u ungwan imo i Yehova, shi u seer yan ikyar a na shi u lôô ken jijingi kpaa. (Ôr Mbagalatia 6:​7, 8.) Azende ne aa wase u u za hemen u lun ken dooshima u Aôndo.

Naan Mbautahav Icivir

14. Ka akaa a nyi a ne ve ka i taver se u nan mbautahav icivir yumu?

¹⁴ Gbenda u sha uhar u se tesen ser Yehova doo se ishima yô ka sha kwagh u nan mbautahav icivir. Gba keng u se na mbautahav icivir. Kpa er nan ve ashighe agen ka i taver se u nan ve icivir yumu? Hiihii yô, uumace mba ve lu a tahav sha a vese la mba vough ga. Heela tseegh ga, se kpa se mba vough ga. Se mba a isharen i hemban ato ken a vese.

15, 16. (a) Hii nan i lu a inja u nan mba Yehova a ver ve ér ve nengen sha ior nav la iciviri? (b) Ka kwagh u injaa u nyi se hen sha gbenda u Yehova yange nenge mhembe u Mbaiserael hemba Mose ato laa?

¹⁵ Alaghga u kaa wer, ‘Er i taver se u nan mbautahav icivir yum yô, ityôkyaa shi ngi i se zer hanger akughur ser se na ve icivir keng-nee?’ Mlumun sha mpin ne gba zua sha kwagh u hementor. Ka an u soo wer nana lu tor wouwe? Aluer ka Yehova se soo ser a lu tor wase yô, gba u se tese icivir sha tahav mbu a lu a mi sha a vese la. Kpa aluer se mba nan tahav mbu Yehova icivir ga yô, se fatyô u kaan sha mimi ser ka un a lu Tor wase je kpa? Heela tseegh ga, Yehova hemen se ashighe kpishi sha ikyev i uumace mba ve lu vough ga, mba a ver ve ér ve nengen sha ior nav la. Nahan aluer se hemba mbahemenev mban ato yô, Yehova una nenge ihyembeato yase la nena?​—⁠Ôr 1 Mbatesalonika 5:​12, 13.

¹⁶ U tesen ikyav yô, zum u Mbaiserael za Mose ivever iyol shi hemba un ato yô, Yehova kaa wener ka un je ve hembe un ato ye. (Num. 14:​26, 27) Aôndo gema ga. Aluer se hemba ior mba a ver ér ve hemen se la ato yô, ka un je se lu hemban un ato ye!

17. Ka ieren i dedoo i nyi nahan i doo u se lu a mi hen mbahemenev mba ken tiônnongo?

¹⁷ Apostoli Paulu pase gbenda u dedoo u i gbe u se eren kwagh a mbahemenev mba ken tiônnongo u Kristu yô. A nger wener: “Ungwan nen imo i mbahemenev enev, hide nen a ayol a en ijime hen ve gadia mba kuran uuma enev er ka ior mba vea za pase kwagh u ve er la keng nahan. Ve̱ er nahan saan saan i̱ de lu sha ishima i vihin ga, gayô, á lu ne a inja ga.” (Heb. 13:17) Sha kpôô yô, gba u se nôngo kwagh kpoghuloo ve se lu a ishima i ungwan  imo i mbahemenev asev shi wan ayol a ase sha ikyev ve ye. Kpa umbur wer, doo u se nôngo sha er se za hemen u lun ken dooshima u Aôndo yô. Aluer ka awashima wase la yô, se gba nen uwer u ungwan imo i mbahemenev asev ga.

Lu Wang sha Ishigh ki Aôndo

18. Yehova soo er se lu wang sha ci u nyi?

¹⁸ Gbenda u sha utar u se tese ser Yehova doo se ishima yô, ka u nôngon sha er se lu wang sha ishigh nagh yô. Mbamaren ka ve nôngo tsung ér mbayev vev ve lu wang. Ka ve er nahan sha ci u nyi? Kwagh u hiihii yô, gba hange hange u wanye nana lu tsembelee sha er a kpe nan iyol yô. Kwagh ugen yô, wanye ka nana lu tsembelee yô, ior ve wuese tsombor u nan shi ve fa kpaa ér wan la doo mbamaren mba nan ishima shi ve wa nan ikyo kpaa. Ka atôakaa a á ne ve Yehova kpa a soo ér se lu wang je la. A fa wener aluer se mba wang yô, a kpe se iyol. Shi a fa wener ka sea lu wang nahan kwagh la a na ior ve kav mlu-wang na u un a lu Ter wase u sha la. Kwagh ne ngu hange hange; alaghga ior mbagenev vea nenge er se lu kposo a ikpelaior i ken tar u ú hôngor yum ne nahan vea soo u va civir Aôndo wase.

19. Er nan se fe ser mlu u wang u sha iyol ngu a inja?

¹⁹ Ka sha igbenda i nyi nahan i gbe u se lu wang-na? Gba u se lu wang sha hanma gbenda cii. Yehova ngise pase Mbaiserael ér doo u vea lu wang sha iyol. (Lev. 15:31) Tindi u Mose la ôr kwagh u haan ihyôghonough kera man u kiren ikyav mbi kwaghyan man u ôôn ave man angahar kua akondo kpaa. (Eks. 30:​17-21; Lev. 11:32; Num. 19:​17-20; Dut. 23:​13, 14) Yange i umbur Mbaiserael ér, Yehova Aôndo ve ka icighan Aôndo​—⁠inja na yô “ngu wang,” “ngu tsembelee,” “a acôghor iyol shio.” Gba u mbacivir icighan Aôndo ne cii vea lu wang er un kpa a lu wang nahan.​—⁠Ôr Levitiku 11:​44, 45.

20. Gba u se lu wang sha igbenda i nyi?

²⁰ Nahan yô, doo u se lu wang kimi man ken won kpaa. Se mba nenge ser mbamhen asev ve lu wang. Se mba kor atindi a Yehova a we sha kwagh u aeren a wang la, shin er tar u se lu ker ne u soo ijimba yum nahan kpaa. U hemban cii je yô, ka se hanger ser mcivir wase a lu wang, mayange je se mba lumun ser atesen a kwaghaôndo u aiegh a hôngor se ga. Shi icintan i i lu ken Yesaia 52:11 la hungur se mayange ga. Ivur la kaa ér: “Mough nen, mough nen, due nen ken ijiir la kera, de benden nen ma kwagh u hôngorough ave ga; due nen ker atô na kera; wanger nen ayol a en.” Nyian ne, mcivir wase ngu wang, gadia se venda u nyôron iyol ken mcivir u aiegh. Ka nahan ve, se eren uiniongo mba kwaghaôndo u aiegh man ugurgur vev mba tar cii u eren la ga ye. Sha kpôô yô, ka ican kpishi u lun wang. Kpa ior mba Yehova ka ve nôngo kpoghuloo ér vea lu wang, sha ci u kwagh ne ngu a wase ve u lun ken dooshima u Aôndo her.

21. Se er nan ve se lu ken dooshima u Aôndo here?

²¹ Yehova soo er se lu ken dooshima na gbem sha won. Nahan kpa, gba u se asange asange se nôngo sha afatyô wase cii sha er se lu ken dooshima u Aôndo her Yô. Se er kwagh ne sha u dondon ikyav i Yesu la, nahan tesen ser Yehova doo se ishima sha u kuran atindi a Na. Aluer se er nahan yô, se lu a vangertiôr ser ma kwagh môm “una fatyô u paven se a dooshima u Aôndo u a lu ken Kristu Yesu Ter wase la je ga.”​—⁠Rom. 8:​38, 39.

Ú Umbur Kpa?

• Imoshima yase ia wase se u lun ken dooshima u Aôndo nena?

• Doo u mba ve doo Yehova ishima la, se kpa vea doo se ishima sha ci u nyi?

• Ka a inja u nan mbautahav icivir sha ci u nyi?

• Mlu u wang ngu ior mba Aôndo a inja nena?

[Mbampin Mba Ngeren u Henen]

[Ngeren u kiriki/Foto peeji 20]

Takerada U Wasen Se U Lun A Aeren A Dedoo

Sha mkohol u vesen u inyom i 2008 man i 2009 la, i due a takerada u kuman peeji 224, itinekwagh i takerada shon yô ér ‘Lu Nen ken Dooshima u Aôndo.’ Kanyi i lu awashima u takerada u he nee? I er takerada ne sha u u̱ wase Mbakristu ve kav atindi a Yehova shi ve soo a kpaa, nahan u hemba veren ishima sha aeren a i doo u Orkristu nana lu a mi la. Aluer se ôr takerada u ‘Lu Nen ken Dooshima u Aôndo’ ne vighe vighe yô, ua seer taver jighjigh u se ne ser u dondon atindi a Yehova ka kwagh u hemban cii u i doo se er hegen yô, shi una va se a uma u tsôron ken hemen kpaa.

Heela tseegh ga, i er takerada ne sha er a wase se se fa ser, u ungwan imo i Yehova la ka kwagh u yuhwan se a yuhwa ikyav ga. Kpa, gema ka gbenda u tesen Yehova ser a doo se ishima kpishi. Nahan yô, takerada ne u mgbegha se u pinen ayol a ase ser, ‘Kanyi jim i ne ve m ongo imo i Yehovaa?’

Ashighe kpishi ior ka vea undu dooshima u Yehova sha ibume yô, i lu sha ci u ve nyôr iyol ken ma ieren i bo, ka lu sha ci u atesen a nôngo u Yehova doo ve ga ze. Nahan yô, doo u se taver dooshima wase man iwuese i se lu a mi sha atindi a Yehova a ne se kua akaawan a na aa a tesen se kwagh u se eren ayange ayange la! Se na jighjigh ser, takerada u he ne ua wase iyôngo i Yehova sha tar jimin cii u tilen dông, eren kwagh u vough shi tesen ér Satan ka or u aie, man u hemban cii je yô, takerada ne ua wase se u lun ken dooshima u Aôndo her!​—⁠Yuda 21.

[Foto u sha peeji 18]

“Aluer ne wa atindi Am ikyo yô, né lu ken dooshima Wam; er Mo kpaa M we atindi a Terem ikyo, man M luun ken dooshima Na nahan”