U Zuan a Akaa a Injaa a i Yer La

ILU nahan u zua a kwagh u injaa u i yer un hen ijiir i i lu inja er imba kwagh la ma i lu her ga vee? Ka kwagh u yange er Orshiada u Yehova ugen, u i yer un ér Ivo Laud ken tar u Estonia, sha iyange i Maaci 27, 2005 je la. Yange lu wasen Kwaseshiada u beenyol ugen, iti na ér Alma Vardja, u hemben nortyumbe. Er ve hembe kpekpe u ken won u nortyumbe shon yô, ve nenge a ityôgh ki genegh ki i cir kpande sha mi vegher môm yô. Mba tee kpande ne sha yô, ve nenge a ihyura i gbanger kuman aseva 4 shi lihen kuman aseva 50 shi zan shimi kuman aseva 4, i cir avur a ikyon sha zwa u ihyura ne. (1) Ihyura ne lu a akaa a injaa a i yer shimi yô. Akaa a injaa shon lu nyi? Lu an nan yer á?

Yange ve dugh akaa a injaa a i yer shin ihyura ne, a i kange tsembelee i wa ken imbulugh mba lun civirii yô. (2) I wa ityakerada i Mbashiada mba Yehova ken imbulugh  mba shon, hemban je yô, ungeren mba Iyoukura mba timen sha mi, kua ungeren mba timen sha mi mba ken inyom i 1947 la kpaa. (3) Yange i nger ngeren mban sha ave tsembelee ken zwa u Estonia. Ken imbulugh mbagen i nenge a akav a tesen or u yange nan yer ngeren mba shon yô. Lu nom u Alma, Villem Vardja, yange nger kwagh sha mbampin mba dasenda pine un shighe u ve kôr un la ye. Shi yange i zua a ngeren mba sha kwagh u anyom a nom u Alma tsa ken purusu la kpaa. Er nan ve i wuhe un ken purusuu?

Villem Vardja lu a ityom kpishi ken Tiônnongo u Mbashiada mba Yehova u ken gar u Tartu la. Ken masejime yô, va lu a ityom ken Tiônnongo u Otepaa ken tar u Estonia kpaa. Estonia lu môm ken ityar i yange i zom cii i yilan ér Soviet Socialist Republics la. A shi nan kpa, yange fa mimi cii man Ityav mbi Tar cii Mbi sha II mbira ye. Anyom nga kar yô, sha iyange i Disemba 24, 1948 la, gomoti u ityemimôngo u ken tar u Estonia kôr Anmgbian Vardja sha ci u jighjigh u nan na. Udasenda tôv un shi ve er un ican kpishi sha er vea kighir un a na ve ati a anmgbianev mbagenev yô. Yange i na un ian i palegh iyol na ken atejir kpaa ga, tsô maa i na zwa ér i za wuhe un anyom pue ken afo a mbakwarev a ken tar u Russia.

Villem Vardja civir Yehova sha jighjigh zan zan kar kpen sha iyange i Maaci 6, 1990. Kwase na fa henpe yange ver ityakerada la tsô kpaa ga. A shi nan kpa, yange ôr kwase na henpe koso ityakerada la ga, sha er una kura un sha ikyev i dasenda, aluer ve va u va tôvon kwase na yô. Er nan ve yange yer ityakerada laa? Lu sha ci u dasenda mba vihin tu mba i yilan ve ér Soviet State Security Committee shin KGB la yange ve gba va anden hen uyaav mba Mbashiada mba Yehova gaegh tsô, ve keren ityakerada i kwaghaôndo. Adooga Anmgbian Vardja yer ityakerada la sha er aluer KGB kura ityakerada igen purututu yem a mi kpa, kwaghyan u ken jijingi una ban anmgbianev nav mbagen ga yô. Yange i vande zuan a ityakerada igen i í yer la ken wangernyom u inyom i 1990 la. I vande zuan a ityakerada ne igen ken imbusutariyan i tar u Estonia, ken gar u Tartu. Í kpa lu Villem Vardja yer í ye.

Er nan se yer ityakerada ne ser akaa a injaa? Sha ci u ityakerada i yange i nger sha ave kure kure shi i yer ukôpi mba í tsembelee ne pase iwuese i Mbashiada mba Yehova lu a mi sha kwaghyan u ken jijingi u ve zuan a mi sha shighe la yô. (Mat. 24:45) U ngu zuan a ityakerada i kwaghaôndo u mimi hen haregh wou hegen nahan doo u kpa? Ityakerada shon igen yô ka Iyoukura i í gberen ken zwa u Estonia kua ijô igen i hemban iyenge 170 la.