Uma U Tsôron Shin Tar, Ka Ishimaverenkeghen I Aôndo A Ne yô
Uma U Tsôron Shin Tar, Ka Ishimaverenkeghen I Aôndo A Ne yô
“I gbihi akaa a i gbe a cii ken dang . . . Kpa lu sha ishimaverenkeghen.”—ROM. 8:20.
1, 2. (a) Ishimaverenkeghen i zuan a uma u tsôron shin tar la ngi se kwagh u vesen sha ci u nyi? (b) Er nan ve ior kpishi ve lu a akpelan a tan sha kwagh u uma u tsôron shin tara?
ALAGHGA ú umbur er yange saan we iyol zum u ú fa wer ica a kera gba ga tsô uumace vea kera bee iyol ga shi vea kpe mayange ga, kpa vea lu uma shin tar gbem sha won yô. (Yoh. 17:3; Mpa. 21:3, 4) Nahan saan we iyol u pasen mbagenev ishimaverenkeghen you i i har sha Ruamabera la, gadia ishimaverenkeghen i uma u tsôron la ka kwagh u vesen ken loho u dedoo u se pasen ne. Ishimaverenkeghen ne i wase se u lun a mnenge u vough sha kwagh u uma.
2 Mbakristu mbaaiev kpishi mba pasen kwagh u ishimaverenkeghen i zuan a uma u tsôron shin tar la ga. Shin er Bibilo i tese ér uma kpen nahan kpa, ucôôci kpishi mba tesen kwagh u a lu ken Ruamabera ga yô. Ka ve kaa ér zum u or ka nana kpe yô, uma u nan a kpe ga, kpa a za hemen u lun ken tar u ujijingi. (Esek. 18:20) Sha ityôkyaa ne yô, ior kpishi mba a akpelan a tan sha kwagh u uma u tsôron shin tar. Nahan alaghga se pine ser: Bibilo tese kwagh u ishimaverenkeghen i zuan a uma u tsôron shin tar la je kpa? Aluer Bibilo tese yô, lu hanma shighe Aôndo hii pasen uumace kwagh u ishimaverenkeghen laa?
‘I Gbihi ken Dang Sha Ishimaverenkeghen’
3. Aôndo yange pase awashima na sha ci u or, hii shighe u gba nan la je nena?
3 Aôndo yange pase awashima na sha ci u uumace hii shighe u gba or la je. Yange tese wang ér gba u Adam una ungwan imo na ve una lu uma gbem sha won ye. (Gen. 2:9, 17; 3:22) Akpelan nga ga, tsombor u Adam u sha ayange a tsuaa la fa mgbe u or gba ken isholibo la, gadia ve nenge a ikyav wang. Gbenda kera lu u nyôron ken sule u Eden ga, shi ior lu been iyol, kpen kera. (Gen. 3:23, 24) Shighe kar yô, ayange a uma u or maa pande. Adam tsa sha won anyom 930. Shem u yange war mngerem ma deemee la tsa sha won anyom 600 tseegh, wan na Arpakeshadi gema tsa sha won anyom 438. Tera, ter u Aberaham yange tsa sha won anyom 205. Ayange a Aberaham cii lu anyom 175, wan na Isaka tsa sha won anyom 180, Yakob di gema tsa sha won anyom 147. (Gen. 5:5; 11:10-13, 32; 25:7; 35:28; 47:28) A shi nan kpa, ior kpishi yange ve kav er i hii ve or kera lu tsan kpishi ga yô, gadia ve fa er ian i lun uma gbem sha won la saa yô! Nahan ma ityôkyaa lu i nan ve ishimaverenkeghen i hiden zuan a uma u tsôron u saa ve laa?
4. Lu sha ityôkyaa i nyi mbajighjigh mba tsuaa mbara na jighjigh ér Aôndo una hide a averen a Adam ta kera laa?
4 Mkaanem ma Aôndo kaa ér: ‘I gbihi orumace u i gbe la ken dang kpa lu sha ishimaverenkeghen.’ (Rom. 8:20) Ka ishimaverenkeghen i nyi? Kwaghôron u profeti u ken Bibilo u hiihii la je ôr kwagh u “vor” u ua ‘cagh iyô ityough’ yô. (Ôr Genese 3:1-5, 15.) Ka sha ityendezwa i vor la je uumace mba jighjigh lu a ishimaverenkeghen ér Aôndo una undu awashima na sha ci ve ga ye. Ityendezwa ne na Abel man Noa ve na jighjigh ér Aôndo una hide a averen a Adam yange ta kera la. A shi nan kpa yange ve kav er “u caghen vor la ikishinguhar la” lu kwagh u haan awambe inya yô.—Gen. 4:4; 8:20; Heb. 11:4.
5. Kanyi i tese ér Aberaham yange na jighjigh a mnder u shin kuu?
5 Time ase sha kwagh u Aberaham. Zum u i kar Aberaham yô, a lumun u “[nan] nagh sha Isaka, . . . wan na u môm môm la.” (Heb. 11:17) Yange lumun u eren kwagh ne sha ci u nyi? (Ôr Mbaheberu 11:19.) Lu sha ci u a na jighjigh a mnder u shin ku! Aberaham lu a ityôkyaa i nan jighjigh a mnder u shin ku. Kera je kpa, Yehova vande hiden Aberaham a tahav mbu tseren tsombor her, nahan un vea kwase na Sara ve mar wan u nomso ken iyolbeen. (Gen. 18:10-14; 21:1-3; Rom. 4:19-21) Shi Aberaham lu a mkaanem ma Yehova ken ishima, gadia Aôndo vande kaan a na ér: “Ka ken Isaka je á va yilan er tsombor wou ye.” (Gen. 21:12) Nahan Aberaham lu a atôakyaa a dedoo a veren ishima ér Aôndo una nder Isaka shin ku.
6, 7. (a) Yehova yange tôndo zwa a Aberaham ér nyi? (b) Ityendezwa i Yehova er a Aberaham la na uumace ishimaverenkeghen nena?
6 Yehova yange er ityendezwa a Aberaham sha kwagh u “vor” na la sha ci u jighjigh na u nan taveraa la. (Ôr Genese 22:18.) Ken masejime yô, i va kav er i lu Yesu Kristu a lu vegher u vesen u “vor” la yô. (Gal. 3:16) Yehova kaa a Aberaham ér una seer “tsombor” na, ua ngee iyenge “er asan a Sha man er waarawa u shin kpezegemnger nahan.” Aberaham yange fa iyenge ne ga. (Gen. 22:17) Nahan kpa shighe kar yô, í va pase ingyegh kira. Ka Yesu Kristu man mba 144,000 mba vea tema tor a na imôngo ken Tartor na la ve lu “tsombor” la ye. (Gal. 3:29; Mpa. 7:4; 14:1) Ka sha ikyev i Tartor u Mesiya la man “akuraior a sha won cii, aa zua a averen” ye.
7 Aberaham yange ma fatyô u kaven inja i ityendezwa i Yehova er a na la ga. Nahan kpa, Bibilo kaa ér: “a lu keghen gar u a lu a imagh” jim jim la. (Heb. 11:10.) Gar la ka Tartor u Aôndo. Nahan gba u a va nder Aberaham shin ku ve una zua a averen sha ikyev i Tartor la ye. Ka sha mnder u shin ku la Aberaham una zua a uma u tsôron shin tar ye. Shi mba vea war Armagedon kua mba a va nder ve shin ku la cii vea zua a uma u tsôron.—Mpa. 7:9, 14; 20:12-14.
“Jijingi u A Lu ken a Mo Ngu Torough a Mo”
8, 9. Er nan ve se fe ser takerada u Yobu ôr kwagh u atsan a yange ya la tseegh tsô ga?
8 Orgen lu, iti na ér Yobu, un lu uma shighe u Yosev, wan u Aberaham u sha kov u sha utar kpe kera, Mose di lu a hingir profeti ga la. Takerada u Yobu, u a shi nan kpa lu Mose nger la pase er i hii ve Yehova de ér Yobu a ya ican man er kwagh shon za kure la kpaa. Nahan kpa, takerada u Yobu la ôr kwagh u atsan a na a yan tseegh tsô ga, u ôr kwagh u ikyaa i í bende a uumace kua mbatyomov mba shaav kpaa. Takerada la wase se u fan ér Yehova hemen sha perapera, shi u pase er ikyaa i yange Diabolo va a mi ken Sule u Eden la í bende a mimi man uma u mbacivir Aôndo mba shin tar cii yô. Shin er Yobu fa ityôkyaa i lu yan ican ga nahan kpa, mayange de ér akar a na a atar la a na un u henen ér un undu mimi na ga. (Yobu 27:5) Kwagh ne a̱ taver jighjigh wase shi a̱ wase se u fan ér se fatyô u tilen sha mimi wase dông shi kenden a mtemtor u Yehova sha.
9 Zum u iorov mba utar mba ve senge ér mba surun Yobu ishima mbara lam a na bee kera yô, “Elihu wan u Barakel, Orbushi, hii kwaghôron.” Lu nyi i mgbegha un u ôron kwagha? A kaa ér: “M mgbough a akaaôron; jijingi u a lu ken a mo ngu torough a mo.” (Yobu 32:5, 6, 18) Shin er kwagh u jijingi mgbegha Elihu ôr la kure zum u Yehova hide Yobu a akaa a na her cica cii nahan kpa, mkaanem nam mara ma a inja hen mbagenev kpaa. Ma na mbananjighjigh cii ityôkyaa i lun a ishimaverenkeghen.
10. Kanyi i tese ér ashighe agen Aôndo ka a na or môm loho, kpa loho la u gema u lu a inja hen uumace jimin ciilii?
10 Ashighe agen Yehova ka a na or môm loho, kpa loho la u gema u lu a inja hen uumace jimin cii. Se fatyô u nengen ikyav i kwagh ne sha kwaghôron u profeti u Daniel ôr sha mnyam ma ma cier Nebukadinesar, tor u Babilon sha kwagh u zegekon u i gber la. (Dan. 4:10-27) Er mnyam mara kure sha Nebukadinesar nahan kpa, ma lu tesen kwagh u vesen u una va er ken hemen yô. Ma tese ér, hii ken inyom i 607 C.S.Y. * (Cii man Shighe u Yesu) la, anyom 2,520 aa karen yô, Aôndo una hide a mtemtor na sha tar, sha ikyev i tartor u ken tsombor u Tor Davidi la. Nahan, ken inyom i 1914 la Aôndo ver Yesu Kristu tor u tartor na sha. Lu hen shighe la Aôndo hide a mtemtor na sha tar ye. Hen ase er ica a kera gba ga tsô hemen u tartor la ua kure ishimaverenkeghen i uumace mba ungwan imo i Aôndo yô!
“Yima Nan, Nana̱ De Senen Shin Ihungwa Ga”
11. Mkaanem ma Elihu tese ér Aôndo kegh iyol u eren nyi?
11 Elihu ngur lamen a Yobu yô, a ôr kwagh u ‘ortyom u Sha, ortafinta, môm ken dubu, u una tese or kwagh u a lu vough, u nana er yô.’ Nahan aluer ortyom ne ‘sôn Aôndo sha u i̱ doo Un a na’ di ye? Elihu kaa ér: “[Aôndo] Una zungwe nan mhôônom, Una kaa er, ‘Yima nan, nana̱ de senen shin ihungwa ga. M zua a ipaan ve. Inyam i nan ia hingir hegh á hemba i wanye kpaa; nana hide nana hingir er sha ayange a nan lu iyev la yô.’ ” (Yobu 33:23-26) Mkaanem mara tese ér Aôndo kegh iyol u lumun “iwom” shin “ipaan” sha ci u uumace mba ve gem asema la.—Yobu 33:24.
12. Mkaanem ma Elihu na uumace jimin cii ishimaverenkeghen i nyi?
12 A shi nan kpa Elihu yange kav kwagh u ipaan la tsembelee ga, di vough er uprofeti mbagenev kpa yange ve kav hanma kwagh u ve nger la ga nahan. (Dan. 12:8; 1 Pet. 1:10-12) Nahan kpa, mkaanem ma Elihu mara tese ér ishimaverenkeghen ngi ér iyange igen yô, a na Aôndo nagh ku ipaan, nahan una yima uumace sha ikyev i iyolbeen man ku. Mkaanem ma Elihu man na se ishimaverenkeghen i va lun uma gbem sha won. Takerada u Yobu shi tese ér á va nder mbakpenev shin ku.—Yobu 14:14, 15.
13. Mkaanem ma Elihu mara ma Mbakristu a inja nena?
13 Nyian kpa, mkaanem ma Elihu ma Mbakristu umiliôn imôngo mba ve lu a ishimaverenkeghen i va waren mtim u bo tar ne la a inja. Mbabeenyol mba vea war mbara cii vea hide vea lu er sha ayange a ve lu iyev la nahan. (Mpa. 7:9, 10, 14-17) Heela tseegh ga, sar mbananjighjigh mba ve lu a ishimaverenkeghen ne u nengen er a va nder mbakpenev shin ku, vea hide a hingir er sha ayange a ve lu iyev la yô. Nahan kpa, gba u Mbakristu mba i ishigh ve mkurem, mba ve lu a ishimaverenkeghen i zuan a uma u kpen ga sha la vea na nagh ku ipaa ku Kristu la jighjigh. Mba ve lu “iyôngo [i Yesu] igen,” ve lu veren ishima u va lun uma gbem sha won shin tar la kpa gba u vea er nahan.—Yoh. 10:16; Rom. 6:23.
A Tim Ku Sha Won Kera
14. Ka nyi i tese ér yange gba u Mbaiserael vea lu a kwagh u hemban Tindi u Mose la ve vea lu a ishimaverenkeghen i zuan a uma u tsôrono?
14 Tsombor u Aberaham yange u hingir ikyurior shighe u Aôndo ya ikyur a ve la. Shighe u Yehova lu nan ve Tindi la, a kaa ér: ‘Waan nen akaawan a Am man akaaôron a Am a jirigh ikyo, a or á er sha mi yô, nana lu uma sha a’ la. (Lev. 18:5) Nahan kpa, er Mbaiserael kera wa ikyo u zan sha gbenda u Tindi shon tese la ga yô, Tindi kange ve, nahan gba u a yima ve sha ikyev i Tindi.—Gal. 3:13.
15. Ka iveren i ken hemen i nyi Jijingi mgbegha Davidi nger kwagh sha mini?
15 Shighe u Mose kpe kera la, Yehova shi mgbegha mbangeren Bibilo mbagenev ôr kwagh u ishimaverenkeghen i zuan a uma u tsôron la. (Ps. 21:4; 37:29) Ikyav i tesen yô, orpasalmi Davidi kure icam na igen sha kwagh u mzough u mba civir Aôndo sha mimi ken Shion sha mkaanem man, ér: “Ka ker je TER A ne iveren ye, ka uma u tsôron je la.”—Ps. 133:3.
16. Yehova yange er ityendezwa sha kwagh u mlu u tar u ken hemen la sha ikyev i Yesaia ér nyi?
16 Yehova yange mgbegha Yesaia ôr kwaghôron u profeti sha kwagh u uma u tsôron shin tar. (Ôr Yesaia 25:7, 8.) Ku man isholibo shile sha uumace vough er ikyondo i civir (inja er bologo) i or nan cimin ker nan lu fantyô u ôôn ga nahan. Kpa Yehova pase ior nav wang ér a va tim ku man isholibo sha won kera.
17. Kwaghôron u profeti pase ér Mesiya una er nyi i bughun gbenda u zuan a uma u tsôrono?
17 Shi time sha kwagh u Tindi u Mose yange kaa ér i er a kpev u Asasel la. Hanma inyom yô, sha Iyange i nan Iwom la, pristi u tamen ‘á penda ave na ahar cii sha ityough ki kpev u uma la, á pase afer a Mbaiserael cii sha mi, kua akaabo a ve, nahan asorabo a ve la cii á haa sha kpev la, maa kpev la á yem a mi ken deserti.’ (Lev. 16:7-10, 21, 22) Yesaia tsenga pasen ér kape Mesiya u una va la una tôô mbamzeyol asev cii sha iyol na je la; una tôô “angev” man “atsan” kua “isholibo i ior kpishi” sha iyol na, nahan una bugh gbenda u zuan a uma u tsôron.—Ôr Yesaia 53:4-6, 12.
18, 19. Ka ishimaverenkeghen i nyi i te iwanger sha mi ken Yesaia 26:19 man Daniel 12:13?
18 Yehova yange kaa a nongoior na Mbaiserael sha zwa u Yesaia ér: “Mbakpenev Ou vea lu uma; akom a am kpaa aa nder. Nder nen, wa nen icam, ne mba ne tem shin vuulevu; gadia avure a Ou ka avure a iwanger je, man tar kpaa ua due a ujijingi mba mbakpenev.” (Yes. 26:19) Ruamabera u ken Zwa Heberu la tese kwagh u ishimaverenkeghen i mnder u shin ku man uma u shin tar la wanger wanger. Ikyav i tesen yô, shighe u Daniel zurum anyom deri la, Yehova pase un wang ér: “Ú mem, man ú mough ú tile sha kwar wou, sha mkur u ayangegh.”—Dan. 12:13.
19 Er Marta lu a ishimaverenkeghen i mnder u shin ku la yô, a ôr kwagh a Yesu sha kwagh u anngô na u lu kpe wener: “M fa, una nder sha mnder u sha iyange i masetyô la.” (Yoh. 11:24) Ityesen i Yesu man kwagh u jijingi mgbegha mbahenen nav nger la gema ishimaverenkeghen nee? Hegen kpa Yehova ngu nan uumace ishimaverenkeghen i va zuan a uma u tsôron shin tar la here? Se time sha mbamlumun mba sha mbampin mban ken ngeren u a dondo ne.
[Ngeren u shin kpe]
^ Ôr ityough 6 ki takerada u ken zwa Buter u i yer ér: Pay Attention to Daniel’s Prophecy! la.
Ú Fatyô u Pasen Kpa?
• Yange “i gbihi” uumace “ken dang,” kpa lu sha ishimaverenkeghen i nyi?
• Kanyi i tese ér Aberaham lu a ishimaverenkeghen i mnder u shin kuu?
• Mkaanem ma Elihu ôr a Yobu la na uumace ishimaverenkeghen i nyi?
• Ruamabera u ken Zwa Heberu ôr kwagh u ishimaverenkeghen i mnder u shin ku man i uma u tsôron shin tar var var nena?
[Mbampin Mba Ngeren u Henen]
[Foto u sha peeji 5]
Mkaanem ma Elihu ôr a Yobu mara na se ishimaverenkeghen ér Aôndo una yima uumace sha ikyev i iyolbeen man ku
[Foto u sha peeji 6]
Í pase Daniel wang ér ‘una mough a tile sha kwar na, sha mkur u ayangegh’