Yange Ú Vande Eren Tomoo? Ú fatyô u Hiden shi Eren U Kpa?

YANGE ú vande eren tom sha ian i vesen ken tiônnongo u Kristuu? Alaghga u vande lun diakon shin ortamen. Adooga u vande eren tom u pasen ior kwagh sha hanma shighe la. Mimi je, yange u zua a msaanyol man mkom ken ityom you la, nahan kpa va hingir kpee u ú de u eren ityom ne.

Alaghga yange gba u ú de u eren tom u i na u la sha er u hide u nenge sha tsombor wou yô. Sha vegher ugen di yô, adooga iyolbeen shin angev na u u de tom u ú lu eren la. Aluer kwagh ngu nahan kpaa, kwagh hemba u a hemba je ve ga. (1 Tim. 5:⁠8) Ken derianyom u hiihii la, Filibu er tom u mishen, kpa shighe kar yô, mough yem twev ken tar u Sesaria, za lu her sha u una nenge sha tsombor na yô. (Aer. 21:​8, 9) Zum u bee iyol kera yô, Tor Davidi u Iserael u tsuaa la kaa a wan na Solomon ér a tema un sha ikyônough ki torough. (1 Utor 1:​1, 32-35) Nahan cii kpa, kwagh u Filibu man Davidi cii yange doo ior shi Yehova kpa yange doo un a ve, di vough er nyian kpa kwagh ve a doo ior her nahan.

Alaghga yange i ngohol ma tom hen a we kera sha ci u ú er kwagh u vough ga, shin sha ci u mbamzeyol mba u lu a mi hen tsombor la. (1 Tim. 3:​2, 4, 10, 12) Adooga yange u hen wer i dugh u sha iantom kera sha inja ga, man zan zan hegen je kpa, ishima ngi vihin we sha kwagh ne her.

U Fatyô u Keren u Hiden Eren Tom

Aluer i dugh u sha iantom kera nahan, u fatyô u hiden shi eren u kpa? Ashighe kpishi je u fatyô u hiden eren u. Kpa cii man u hide u er u yô, gba keng u ú ker u eren u. (1 Tim. 3:⁠1) Er nan i doo u ú lu a isharen i eren nahana? Ka ityôkyaa shon i môm i yange i na ve u tsegha iyol you hen Aôndo, nahan u hingir u soon Yehova kua mba ve civir un la, ia na u fatyô u hiden eren nahan ye. Aluer u lumun u tesen imba dooshima ne sha u hiden eren tom yô, Yehova kpa una yar tom a mfe u yange u vande lun a mi la, kua u ú zough a mi shighe u i ngohol tom hen a we kera la.

Umbur ibumun i Yehova na Mbaiserael zum u a ngohol ityom ve kera la. Mkaanem nam kaa ér: “Mo TER M gem kposo ga, ka nahan man ne ônov mba Yakob kpaa, i tim ne ga ye.” (Mal. 3:⁠6) Mbaiserael yange ve doo Yehova ishima kpishi shi soo ér una seer yaren tom a ve. Kape we kpa i sar Yehova u yaren tom a we ken hemen je la. Kanyi kwagh i doo u ú er sha kwagh ne hegene? Ka ikyaryan i dedoo i or ye vea Aôndo la ia hemba wasen nan u eren ityom i Aôndo ye, ka mfe u marami u or nan lu a mi sha kwagh la ga. Nahan er hegen i lu a seer nan we ityom ken tiônnongo ga yô, hemba veren ishima sha u nôngon taver mlu wou vea Yehova.

Aluer ka u ú ‘taver iyol’ ken jighjigh yô, gba keng u ú “ker . . . TER kua agee a Na kpaa.” (1 Kor. 16:13; Ps. 105:⁠4) Gbenda môm u ú er kwagh ne yô, ka sha u eren msen a ishima i môm hen Aôndo. Zum u ú lu lamen a Yehova sha kwagh u a lu zan we iyol yô, pase un er i lu u ken ishima la shi sôn jijingi na. Aluer u er nahan yô, u kporom ikyua a Yehova shi kwagh ne una taver we ishima kpaa. (Ps. 62:8; Fil. 4:​6, 13) Gbenda ugen u ú taver jighjigh wou u nan yô, ka sha u seer henen Mkaanem ma Aôndo. Aluer u pande ityom you hingir kpuaa yô, alaghga u fatyô u seer henen Bibilo  you i sha tseeneke man i hen tsombor la, nahan u fatyô u eren kwagh u yange taver we u eren yum la.

Nahan kpa u ngu môm ken Mbashiada mba Yehova her. (Yes. 43:​10-12) Ian i civirigh i hemban doon cii i hanma wase nana fatyô u zuan a mi yô, ka u lun “mbashirentom a Aôndo imôngo.” (1 Kor. 3:⁠9) Gbenda u hemban doon u ú taver ikyaryan you vea Yehova kua mba u pasen kwagh a ve imôngo yô, ka u seer eren tom u kwaghpasen.

U Wan Ishima a Mbamhen Ou

Alaghga kunya ua kôr u shin u vaa afanyô shighe u i ngohol ma tom hen a we kera yô. Adooga u lu keren ishô sha aeren a ou la. Nahan kpa, aluer mbatamen kegh ato a we, kpa ve nenge ér u kera kuma u eren tom la ga ye? Alaghga u lu a mbamhen mba kpeegh, nahan vea lu yangen we u keren gbenda u ú kuma u shi hiden eren tom her, shin a taver we u henen kwagh sha kwagh u a er u la. De se time sha akaa a yange er Yobu man Manase kua Yosev la, nahan se nenge er akaa shon aa wase se u wan ishima a mbamhen mba kpeegh yô.

Yobu yange a sôn Yehova sha ci u mbagenev shi lu ortamen man orjir sha ayange a uter mbatsev la. (Yobu 1:5; 29:​7-17, 21-25) Kpa sha shighe ugen la, Yobu hingir icanor man ônov nav kpe cica cii, shi gba icôron uange kpaa. Heela tseegh ga, yange kera gba ior kwagh ga. Yobu kaa ér: “Mba m lu tamen a ve la, mba nahan mo tar.”​—⁠Yobu 30:⁠1.

Yobu yange nenge ér un ngu a ishô, nahan soo u palegh iyol na sha ishigh ki Aôndo. (Yobu 13:15) Kpa, Yobu lumun u keghen Yehova, nahan zua a iveren. Yange fa wener doo u a kôôm un, hemban je yô, shighe u lu yan ican la. (Yobu 40:​6-8; 42:​3, 6) Er Yobu hide a iyol na ijime yô, Aôndo hemba veren un doo doo cii.​​—⁠Yobu 42:​10-13.

Aluer i ngohol iantom hen a we kera sha ci u ú er ma isholibo yô, alaghga a taver we u lu henen wer, Yehova man anmgbianev ou mba ken Kristu vea de u a kwaghbo la sha mimi shi vea hungur a mi je kpaa-o? Aluer kwagh ngu nahan yô, umbur kwagh u Manase, Tor u Yuda la. Yange “er ifer kpishi sha ishigh ki TER, sha u bamen Un.” (2 Utor 21:⁠6) Nahan kpa, Manase tema tor zan zan kar kpen ken jighjigh u nan. Kwagh ne yange er nena?

Ken masejime yô, Manase lumun tsaha. Er Yehova ta un icin kwa imôngo kpa venda sha apera yô, Yehova de Mbaashiria kange un sha mshirim yem a na ken tar u icaa, ken Babilon. “Shighen u a lu ken ican la yô, a zamber a TER, Aôndo na, a hire a iyol na ijime tsung je, sha ishigh ki Aôndo u uter nav.” Mgemshima u due ken atô u ishima i Manase la na yô, hingir u eren aeren a dedoo, nahan i de un kwaghbo na la.​—⁠2 Kron. 33:​12, 13.

Mba hidi mba ne or ityom i í ngohol hen a nan kera la cii kwa môm ga. Nahan kpa, shighe ka una karen yô, i hide i hii u nan we ityom kpuaa kpuaa. Aluer u ngohol ityom ne shi u ngu nôngon kwagh sha afatyô wou yô, a seer nan we ityom igen kpaa. Kpa u ngu wer ka u kaan ér, u hide u zua a ityom ne cica cii fele er u soo la ga. Alaghga u  tagher a mbaagbe. Nahan kpa, aluer u na iyol you shi u taver ishima yô, u zua a averen kpishi.

Hen ase sha ikyav i wan u Yakob, Yosev ver la. Zum u Yosev lu anyom 17 la, anngôôv nav tee un ken kpan a ityôkyaa shio. (Gen. 37:​2, 26-28) Kpa sha mimi je, ka imba kwagh i Yosev hen ér ônov mba ter na vea er a na ne ga. Nahan kpa, yange lumun a mbamlu nav, man sha iveren i Yehova yô, a “hingir u nengen sha ya u orvesen na.” (Gen. 39:​2, NW ) Ken masejime i va wuhe Yosev ken gaadi. Kpa yange tile sha jighjigh hen Yehova heregh, nahan Yehova lu a na, kwagh ne na yô, i va gema mbakwarev mba ken gaadi cii i wa un sha ikyev.​—⁠Gen. 39:​21-23.

Yosev yange fa er anyom a un tse ken gaadi la cii aa kure awashima u Aôndo nahan ga. Yange za hemen u eren kwagh u fatyô la cii. Kwagh ne na yô, Yehova kura tsombor u Vor ua va ker la. (Gen. 3:15; 45:​5-8) Er a fatyô u veren ishima ér mô wase môm nana er tom u vesen u Yosev er la ga nahan kpa, Bibilo tese ér Yehova ngu uwegh ken aan a tom a i ne ior Nav la. Dondo ikyav i Yosev la sha u wan iyol keghen a kegh u ngohol ityom.

Hen Kwagh sha Mbamtaver mba Ú Tagher a Mi La

Yobu man Manase kua Yosev cii yange ve tagher ishigh a mbamtaver mba vihin kpishi. Ve mba utar mban cii lumun kwagh u Yehova na ian ér a tser ve la, shi ve cii ve hen akaa a injaa ken atsan a ve ya la. We di u hen nyi?

Ver ishima sha kwagh u alaghga Yehova una soo u tesen we la. Shighe u Yobu lu yan ican la, yange hemba veren ishima sha iyol na, nahan hungur a akaa a vesen. Nahan kpa, er Yehova kôôm un sha dooshima yô, a sôr inja, nahan a kaa ér: “M gba ôron kwagh u m kav ga tsô.” (Yobu 42:⁠3) Aluer ishima vihi u sha ci u i ngohol ityom i í ne u la yô, ‘de nengen sha mlu wou i̱ hemban er ma u nenge la ga, kpa nenge sha mnenge u mimi.’ (Rom. 12:⁠3) Alaghga tsô Yehova soo u kôôm we sha gbenda u ú lu a kav tsembelee ga yô.

Lumun tsaha. Adooga sha hiihii la Manase una nenge ér, i tsaha un kar ikyaa inya. Nahan kpa, a lumun tsaha shon shi gema ishima, nahan de ieren na i bo la. Er ishima i lu u ker sha ma tsaha u i ne u la cii kpa, ‘Hide a iyol you ijime sha ishigh ki Ter man Una kende u sha ye.’​—⁠1 Pet. 5:6; Yak. 4:⁠10.

Waan ishima shi keghen a kegh iyol u ngohol ityom kpaa. Adooga atsan a Yosev ya la yange ma na un u kôron anmgbianev nav ihyom shi ma ker gbenda u oron iyev kpaa. Nahan kpa, gema lu a kwaghfan man mhôônom ma zungwen. (Gen. 50:​15-21) Aluer u tagher a mbaagbe yô, wa ishima. Lumun Yehova a tese u.

Yange u vande eren tom sha ian i vesen ken tiônnongo u Kristuu? Yô, na Yehova ian a ver u sha aan a injaa ken hemen. Seer taver ikyaryan you vea Yehova. Pande ishimavihin you sha u wan ishima shi hiden a iyol you ijime kpaa. Keghen a kegh iyol u eren nyityô tom i a na u cii. Fa wer “TER . . . Una nyume mbazan jighilii la ma kwagh u dedoo ga.”​—⁠Ps. 84:⁠11.

[Mkaanem ma sha peeji 30]

Lu nomsoor sha jighjigh u nan sha u eren msen a ishima i môm

[Foto u sha peeji 31]

Gbenda u hemban doon u taver ikyaryan you vea Yehova yô, ka sha u seer eren tom u pasen kwagh

[Foto u sha peeji 32]

Na Yehova ian a ver u sha aan a injaa ken hemen