M Zua A Kwagh U Injaa Ken uma

Kwaghôron U Gaspar Martínez

Kwaghôron wam u tiônôô ne bende sha kwagh u yange m lu wanye u kungun ican hen anijiir u ugen ken toho, kpa m va hingir u zuan a kwagh u injaa ken geri, man lu kwagh u injaa u m ver ishima u zuan a mi jim jim ga yô.

Í MAREM ken kwavanyom u sha 1930 la hen anijiir ugen ken toho, u̱ m vese her yô. Anijiir ne ka iombortar u tiôntar u Rioja ken tar u Spain; ngu vegher u ken imbusutarimese i tar u Spain. Yange va gba u me de makeranta shighe m lu anyom pue la, kpa hen shighe ne m fa u ôron takerada shi ngeren kwagh. Hen shighe ne cii, m zenden a iyôngo ken toho shi m kahan iyiav hen an-inya u tsombor wase, mo vea anngôôv av mba nomso man mba kasev, se iorov ataratar.

Er se lu ken ibanave kpishi yô, se nenge ser u lun a inyaregh shi ngeen a akaa la ka kwagh u vesen kpishi. Tsô se gba tômon akaa a ior mbagenev lu a mi hemba a ase la. Nahan kpa, sha kwagh u bishôp u côôci yase ôr yô, lu hen angar wase la je “ior hemba wan ikyo sha kwaghaôndo hen haregh na cii ye.” Yange fatyô u fan ér ior kpishi vea va undu kwaghaôndo u Fada ga.

M Ker Kwagh u Una Lum a Inja Yô

Yange m va vôso Mercedes, wankwase ugen u se lu hen angar môm yô. Ica i gbe ga yô, se hingir a wan u nomso sha ave. Nahan ken inyom i 1957 la, se mough se yem hen zege geri u Logroño, u a lu ikyua ikyua a ijiir yase yô. Ken masejime yô, tsombor wam cii mough va kohol mo. Er m lu or u fan tomaveegh ga yô, ica i gba ga cii tsô m nenge mer ityom i m eren la yina u van mo a kwagh u una kuma u koson tsombor wam yô. Tsô m gba keren inja tom i me er ve a wasem yô. Shin er m fa tom u me ker jim ga nahan kpa, m za hii u keren ken iyou i koson ityakerada hen geri la.

Ayange nga kar yô, m ungwa kwagh u Bibilo i henen sha rediô, i̱ ka i hen a ior mba ve nger ve pin sha tashan u rediô la. M ngeren m pin yô, ngôôr ga je maa mba eren kwaghaôndo u Evangelical Protestants mbagenev va hen ya wam. Er m za adua ken côôci ve kuma kwa har shin kwa tar yô, m nenge ior mba lun tagher tagher ken côôci la lu tan gesa ayol a ve. M nengen nahan yô, m cir gbenda ve, m mase kuren ikyaa mer ukwaghaôndo cii ieren ve ngi i môm.

Ashe Am Bugh

Ken inyom i 1964 la, gumor ugen va hen ya wase, í yilan un ér Eugenio. Yange lu Orshiada u Yehova, man kwaghaôndo u Mbashiada mba Yehova la kpa m vande ungwan kwagh na sha won ga. Kpa gema gbam ishima kpishi u lamen sha akaa a ken Bibilo. Yange m hen mer m fa Ruamabera tsema tsema. M ngur lamen a na yô, m yar tom a avur a Bibilo a yange m hen kwagh sha mi ken kwaghhenen wam u ngeren pinen sha tashan u rediô la. Shin er m lu sendegh kaan mer aeren agen ken kwaghaôndo u Protestanti la nga sha mi  nahan kpa, jighilii yô, m na jighjigh a aeren shon ken ishima yam ga.

Er Eugenio tema imôngo a mo kwa har man sha ashighe ne cii se lam naleghaa yô, m lumun a mfe u fa Mkaanem ma Aôndo tsema tsema la. Shin er hen makeranta ar hen ape yange m hen m kighir la ga, kpa lu bughun ruamabera ôron shi pasen inja i kwagh u ruamabera a er la vough vough yô, kpiligh mo iyol u nengen kpishi. Eugenio yar tom a Bibilo sha u tesen mo ér se mba ken ayange a masetyô, man ica ia kera gba ga tsô, Tartor u Aôndo u a gema tar ua hingir paradiso. Yange sagher mo iyol u ungwan kpen kpen.​—⁠Ps. 37:​11, 29; Yes. 9:​6, 7; Mat. 6:​9, 10.

Tsô m kaa mer a̱ hen Bibilo a mo. M ngur henen Bibilo yô, lu akaa kpuaa tseegh m vande lun a an-mfe sha mi ye, ikpelaakaa igen cii lum kwagh u he, shi lu kwagh u kôron mo ken ishima tsung. Kwagh ne nam ishimaverenkeghen i me suur sha mi sha ayange a uma wam cii yô. Tom wam ú keren maa kure. U keren mer me lu a kwagh ave la kera lu kwagh u vesen ken uma wam ga, shi u yan ican keren ityom kpishi la kpa hingir mo beerkwagh. Gadia angev man ku jimin je kpa, ka u a va kar a mi kera.​—⁠Yes. 33:24; 35:​5, 6; Mpa. 21:⁠4.

Fese je maa m hii u ôron anngôôv av kwagh u m lu henen la, m lu pasen ve gbar gbar mer Aôndo tôndo zwa ér una gema tar u hingir paradiso, nahan uumace mbaperapera ve tsôr ker.

Tsombor Wam Ngohol Mimi u Bibilo

Kera ngôôr ga je maa se mbagenev kpishi se gema zuan hen ya u anngô u terem u kiriki sha iyange i Lahadi atetan, timen sha uityendezwa mba Bibilo. Nahan hanma kasua se tôô ahwa ahar gayô atar u timen sha uityendezwa mba Bibilo. Er Eugenio nenge anngôôv av ngee kpishi, shi ve lu a isharen kpaa yô, a sôr ian i una nenge sha hanma or vea tsombor u nan doo doo yô.

Anngôôv av mbagenev lu hen angeri u Durango. Angeri ne gema gba ica a vese er ukilomita 120 nahan, Mbashiada lu her ga. Iwer itiar ngi kar yô, m tôô ian i anyangem kpuaa sha ci u za tan ve iwanger sha kwagh u kwaghaôndo wam u he ne. Hen ian la, se mba kuman ityough pue se lu teman imôngo hanma iyange aikighe, nahan m tsa lamen a ve hanma tugh kaka. Ve cii yange doo ve u ungwan. Vannya wam u kôvora la been yô, m mase undun ve a ukôpi mba Bibilo man ityakerada i pasen Bibilo. Hii hen shighe la zan zan yem ken hemen, se lu masen lamen sha telefon shi ngeren uwashika.

Yange Mbashiada mba Yehova mba ze hen Durango, ape or ve ugen môm lu a vande za pasen kwagh ga la yô, ve zua a iorov 18 mba sar ve kpishi, shi ve lu keghen ér i hen Bibilo a ve yô. Yange saan Mbashiada iyol kpishi u sôron ian i henen Bibilo a hanma or vea tsombor u nan.

Zan zan hen shighe ne, Mercedes soo u henen mimi ga, kpa u ngu wer yange lu eren a er zôzô sha u ngohol ityesen i Bibilo keng ga, kwagh u hemba zan un iyol yô, lu mciem ma lu cian ior la. Hen shighe la, i cir tom u Mbashiada mba Yehova ken tar u Spain, nahan lu henen ér mbautahav vea va zenda ônov asev mba nomso mba uhar ken makeranta, nahan se hingir agbilinaior hen ijiir yase. Kpa er á nenge tsombor wase cii lu ngohol ityesen i Bibilo yô, un kpa soo u henen i.

Nahan ken atô u anyom ahar, iorov 40 tsegha ayol a ve u civir Aôndo hen tsombor wam, i er ve batisema sha ci u ikyav i mtsegh la, ve hingir Mbashiada. Sha kpôô yô, tsombor wam cii yange u soo u eren kwagh u mo kpa m wa ishima u eren ken uma wam yô. Nahan yange m nenge mer m er kwagh u injaa jim jim. Yange se zua a iveren i Aôndo kpishi.

M Lu Been Iyol Seer, Averen kpa Lu Seer

Hen shighe la, m yese ônov asev mba nomso uhar shi m wase tiônnongo u hen ijiir yase la tom zan zan anyom 20. Shighe u mo vea Mercedes se undu ya wase se yem hen zege geri u Logroño la, lu iorov 100,000 lu hen geri shon ye, Mbashiada mba Yehova gema lu her er iorov 20 nahan tseegh. Ica i lu a gba ga je maa m hingir u lun a ityom ave ken tiônnongo.

Nahan, shighe u m lu anyom 56 la, i cir kômpeni u m eren tom her la. Er kwagh ne er se abur abur yô, m kera lu a tom u yaren ga. Tso er m vande lun a isharen i eren tom u pasen kwagh hanma shighe la man va lu nahan yô, m hingir pania. Penshen u yange m ngohol kpa gba ikyev ga, lu u se fatyô u koson ayol a ase a mi tsembelee ga. Lu tom u esen ayou u Mercedes eren la wase se ye. Se  lu nôngon a uma, ugbayol mba hange hange mbara ban se mayange ga. M ngu pania zan zan hegen, Mercedes kpa ashighe agen ngu a tôô ishuen pania. Ka i saan un iyol u eren tom u pasen kwagh kpen kpen.

Gumkwase ugen mba yer un ér Merche, yange hen Bibilo shighe u lu iyev la. Nahan ken anyom a asember karen ne, Mercedes lu nan gumkwase ne umagazin asev hanma shighe. Un kpaa lu ôron ityakerada yase sha gbashima, nahan Mercedes nenge ér mimi u Bibilo ngu un kwagh u vesen ken ishima her. Ken masejime yô, Merche va lumun ér i hen Bibilo a na shi lu zan hemen a kwaghhenen tsembelee. Kpa nom na, Vicente lu or u man msôrom kpishi, nahan una zua a tom hen ijiir kpa, ica i gba ga tsô, i zenda un her kera. Kwagh ne na yô, lu a inyaregh ki una wase tsombor na ga; ihyundugh ki msôrough nagh kira nôngo u duen un kwase.

Kwase wam yange wa Merche kwagh ér a̱ ôr nom na Vicente a lam a mo, nahan yange va lam a mo. Ve hen a mo acin imôngo yô, a lumun ér i hen Bibilo a na. Vicente maa hii u geman inja, ashighe agen á kera ma msôrom ga je i kuma ayange nongo. Ayange a na a hôron msôrom ma man va kporom nyôr kasua jimin shin hemba nahan je kpaa. Ken masejime yô, va de u man msôrom kpum kpum. Nahan bem gba hen tsombor na, shi saan un iyol je lu ashe tugh ga. Un vea kwase na man wan ve u kwase cii mba ken Canary Islands hegen, mba wasen tiônnongo u kiriki u a lu ker la tom kpoghuloo je.

M Hen sha Kwagh u Injaa u M Er ken Uma Wam Yô

Shin er anngôôv av mbagenev mba ve hen ityesen i Bibilo tsuaa mbara ve kpe hegen nahan kpa, gôgô tsombor wase ngu zan hemen u vesen, shi Aôndo na se iveren mgbeghaa je. (Anz. 10:22) Ka kwagh u iemberegh kpishi u nengen er ior mba ve hii u henen Bibilo vea ônov vev kua ônov mba ônov vev anyom 40 ken ijime la cii ve lu zan hemen u civir Yehova taveraa nahan!

Hegen ne m ngu a anmgbianev mba sha tsombor kpishi mba ve lu Mbashiada yô, mbakpishiv ken a ve ka mbatamen, mbagenev ka udiakon shi mbagenev ka upania. Wan wam u iunda vea kwase na mba eren tom shin afishi a branci a Mbashiada mba Yehova hen Madrid, ken tar u Spain. Shighe u m hingir Orshiada la, ingyegh yasegh kuma er 3,000 nahan ken tar u Spain. Hegen se hemba ingyegh 100,000. M zua a iember ken tom u pasen kwagh hanma shighe la kpishi, nahan m wuese Aôndo kpishi sha ci u mkom u m zough a mi ken tom na ne. Shin er m fe takerada i kom ga nahan kpa, shighe ugen ka m er tom u ortamen u nengen sha ningir sha anshighe kpeghee la.

M hide m za hen anijiir u yange i maren m vese her la anyom nga a kar kpishi ga. Yange m ze yô, m nenge ior mough her sha cica nôngo u been. Er ibanave kange num a ior hen anijiir la yum yô, ior cii va yevese undu utsa vev mba kahan iyiav man uya vev sha ci u keren mkpeyol. Kpa kwagh gema er doo yô, se mbakpishiv mba se undu ijiir la cii se zua tom u injaa u civir Yehova la. Se fa ser kwagh u injaa ngu ken uma, shi aluer se mba civir Yehova yô, se zua a iember i been mayange ga la.

[Foto u sha peeji 32]

Hanma or hen tsombor u Anmgbian Martínez nôngo u lun ken mimi