Mcivir U Hen Tsombor Ngu Hange Hange Sha Ci U Myom!

NENGE er “ityav mbi iyange i vesen i Aôndo, Uhembanagee la” mbia cier iyol sha wono! (Mpa. 16:14) Profeti Mika nger kwagh u ityav mbira sha injakwagh wang nahan wener: “Iwo ia sough. . . , apev kpaa aa pav ikwe, er ikpayough ka i sough sha usu nahan, man er mngerem ma i ur shin ijiir i tingir nahan.” (Mika 1:⁠4) Kwagh ne una va a mtim u nyi sha mbara mba ve vende u civir Yehova laa? Mkaanem ma Aôndo kaa ér: “Mba TER A woo ve la, vea lu hen inya, á hii sha ikighirtar ngin zan zan á za ar ikighirtar ngira.”​—⁠Yer. 25:⁠33.

Sha ci u icin tan ne yô, doo u mbayaav, kua mbamaren mba ve lu yesen ônov ve tswen mbara vea pine kwagh u ônov vev mba ve vese ve kom u gbidyen kwar sha kwagh ayol a ve la ér, ‘Vea war Armagedon kpa?’ Bibilo pase wang ér vea war, aluer mba per ken jijingi shi ve fatyô u tilen ken jijingi dông sha anyom a ve vough yô.​—⁠Mat. 24:⁠21.

Mcivir u hen Tsombor la Ka Kwagh u Hange Hange

Gba u we ormaren u nôngo sha afatyô wou cii u yese ônov ou “sha mkôôm man kwaghwan u Ter.” (Ef. 6:⁠4) Nahan u we henen Bibilo a tsombor wou la ka kwagh u hange hange. Se soo ser mbayev asev mba kiriki ve lu er Mbakristu mba ken Filipi, mba Paulu wuese ve sha ci u ve waan kwaghôron u Yehova ikyo a mkighir shio la nahan. A nger ér: “Ne mbadoon mo ishima, er ne vande lun a ikyo i wan gbem nahan, i̱ de lu sha shighe u mo m lu a ven la tseegh ga kpa i̱ hemba a hemba hegen er m lu a ven ga ne; eren nen tom sha myom wen a mciem man ikyarikyase iyol.”​—⁠Fil. 2:⁠12.

Ônov ou mba we atindiakaa a Yehova ikyo shighe u ú undu ve tseegh hen ya la kpa? Man ken makeranta di ye? Ú wase ônov ou nan ve vea fa atindi a Yehova sha er shighe u ú lu a ve ga je kpa aa kura ve?

Mcivir u hen tsombor una wase wan wou u lun a jighjigh u una wase nan sha gbaa ne yô. Sha ityôkyaa ne yô, de se time sha akaa atar a i gbe hange hange u ú er ve mcivir u hen tsombor wou una za ikyura yô.

Henen Kwagh a Tsombor Wou Hanma Shighe

Bibilo tese ér Aôndo ver shighe u mbatyomov mba ve lu ônov nav la ve zough sha ishigh nagh yô. (Yobu 1:⁠6) We kpa er a ônov ou nahan. Tsua iyange man shighe ver sha ci u Mcivir u hen Tsombor wou aikighe, nahan dondon shighe shon vough vough. Heela tseegh ga, tsua shighe ugen ver sha u nengen sha mbamzeyol mba abur abur mbara.

Iwer ia imôngo kar kpa, de hingir u henen Bibilo a tsombor wou tsere tse tsere ga. Umbur wer, hemba kan hange hange u ú hen Bibilo a ônov ou cii. Nahan kpa, Satan soo u kôron ve. (1 Pet. 5:⁠8) Aluer u de Mcivir u hen Tsombor, u a lu kwagh u injaa ne kar u hen tugh môm, u gema u tôô ian i aikighe la u nenge televishen, shin u er ma tom u zuan a inyaregh yô, Satan hôn u dugh di je ve.​—⁠Ef. 5:​15, 16; 6:12; Fil. 1:⁠10.

Tese sha Gbenda u a Wase Ônov Ou Yô

Mcivir u hen Tsombor u i eren aikighe la a de lu sha ci u henen takerada tseegh tsô ga. Kpa tesen ônov ou sha gbenda u a wase ve yô. U er kwagh ne nena? Ashighe agen u fatyô u tsuan atineakaa a a zough sha kwagh u ônov ou vea tagher a mi ken hemen yô. U tesen ikyav yô, shighe ugen u fatyô u tôôn ian i u henen Bibilo a tsombor wou la karen iyol vea ônov ou sha ci u tom u pasen kwagh. Mbayev mba kiriki ka vea eren kwagh u ve fe u eren tsembelee yô, i maa ve iyol. Aluer mba karen ve iyol sha gbenda u lamen a or shi mba henen kwagh u vea er zum u or vende u ungwan loho ve yô, vea  hemba pasen kwagh vangertiôr shighe u ve lu eren tom u pasen kwagh u Tartor sha igbenda kposo kposo la.​—⁠2 Tim. 2:⁠15.

Shi u fatyô u karen iyol vea ônov ou sha gbenda u vea fatyô u nôngon a mkighir u mbakov ve yô. U fatyô u duen a itinekwagh i timen sha mi vea tsombor wou ken ityough ki sha 15 ki takerada u Questions Young People Ask​—⁠Answers That Work, Tihi u sha 2 la. Itinekwagh i i kaa ér “Peer-Pressure Planner,” i i lu sha peeji 132 kua 133 la na mbamhen shi ngi a aan sha ci u mbayev ou vea tsua mbamlumun mba ve lu sha ishima ve yô. Ishember kwagh i i lu shin kpe sha peeji 133 la wa agumaior kwagh ér: “Rehearse your responses with a parent or a mature friend.” Nahan er nan u kera we iyolkaren er i ngin nahan ken Mcivir u hen Tsombor wou aikighe la sha er u karen iyol vea ônov ou sha ashighe ashighe ga?

Mcivir u hen tsombor ka ian i dedoo i mbamaren vea pase tsombor ve mbamtsera mba ve lu sha u eren akaa a ken jijingi yô. Sha vegher ne yô, u zua a mpase u vough ken takerada u Questions Young People Ask​—⁠Answers That Work, Tihi u sha 2 la, ityough ki sha 38 ki ki lu a itinekwagh ér “What Will I Do With My Life?” la. U nguren timen sha ityough kin yô, wase wan wou a fa er i hembe doon u una tsua u civir Yehova ken uma na jimin cii yô. Taver ônov ou asema ve lu a isharen i eren tom u pania shin tom u Betel shin isharen i zan Makeranta u Tsaase Mbashiren Tom, gayô keren u eren ma tom ugen u pasen kwagh hanma shighe.

Kwaghwan: Mbamaren mbagenev mba i gbe ve ishima u ônov vev ve tsua u civir Yehova ken uma ve jimin cii yô, ka ve penda ishima sha ityom i ônov mbara vea a va er la je ve kera umbur u wuese ônov vev sha kwagh u ve lu hilan eren la kpaa. Sha kpôô yô, doo u taver ônov ou ishima wer ve tsua u eren ityom i dedoo, er tom u Betel shin tom u mishen man amba a tom a ngara nahan. Nahan kpa, wea eren nahan yô, de kumbur a wan wou sha akaa a u lu veren ishima keghen wer a er la, nahan a hingir u yinan ishima ga. (Kol. 3:21) Gba u ú umbur hanma shighe wer, ka wan wou u nomso shin u kwase iyol na una tsua a ishima na ér, Yehova a doo un ishima ye, i de lu sha ci u ú soo wer Yehova a doo un ishima ga. (Mat. 22:37) Ker igbenda i wuese wan wou sha kwagh u nan eren tsembelee la, nahan de gem ishima you cii veren sha kwagh u nan lu eren ga la ga. Lu a iwuese sha hanma kwagh u Yehova a er cii. Nahan de wan wou a tsua a ishima na u wuese Yehova sha erdoo na la.

Tese sha Gbenda u a Maa Ônov Ou Iyol Yô

Kwagh u sha utar u una na ve Mcivir u hen Tsombor u i eren aikighe la una za ikyura yô, ka u eren un sha gbenda u a maa tsombor iyol yô. U er kwagh ne nena? Alaghga ashighe agen u fatyô u keghen ato ungwan ma tser u iniumbe shin nengen tser u vidio u Mbashiada mba Yehova ve er yô vea tsombor wou, nahan timen sha mi. Shin ne fatyô u ôron avur a Bibilo imôngo, hanma wen ôron ivur Bibilo.

Ngeren mbagenev ken Iyoukura man Awake! mba a atineakaa a injaa a timen sha mi hen tsombor. U tesen ikyav yô, alaghga u yar tom a ngeren u a lu a itinekwagh ér “How Would You Answer?,” u a lun sha peeji 31 u hanma Awake! la. Mbamgber mba Iyoukura mbagenev ka ve lu a ngeren u a lu a itinekwagh ér “Sha ci u Agumaior” la. Ken mbamgber mba Iyoukura mba nan ior ken won mbagenev yô ka i due a itinekwagh ér, “Tese Ônov Ou” sha ci u mbayev nomso man mba kasev mba kiriki.

 Ngeren mba ken Awake! mba ve lu a itinekwagh ér “Young People Ask” mbara vea doo ne mbamaren mba ônov enev ve lu hian a hia la kpishi, di vough er takerada u Young People Ask, Tihi u sha 2 la kpa una doo ne nahan. Ú timen ken takerada la yô, de undun akwati u a kaa ér “What Do You Think?,” u a lu ken mbee u hanma ityough ki takerada shon la ken inya ga. Akwati la ngu sha ci u hiden kengese kwagh u ú hen ken ityough kira la tseegh ga. Mbampin mba ve lu ken mbaakwati mbara cii vea fatyô u lun atôakaa a timen sha mi hen tsombor.

Nahan kpa, ver ishima de gem kwaghhenen u hen tsombor la a hingir shighe u kighir wan wou, pinen un mbampin kpishi wer a na mbamlumun ga. U tesen ikyav yô, aluer wan wou nger kwagh sha upeeji mba ve lu a itinekwagh ér “My Journal” la, shin sha ajiir a i pine mpin ken takerada shon ér nana nger kwagh u nan we ken ishima u eren kpa nan soo ér orgen nana fa ga la yô, de nôngon wer u kighir nan nana ôr ngeren u nan la mbagenev ve ungwa ga. Ngeren u kaa ér “A Note to Parents,” a lu sha peeji 3 ken takerada shon la kaa ér: “Aluer u soo wer ônov ou mba ve lu hian a hia ve nger akaa a ve we ishima u eren la shin takerada ve la gbar gbar yô, de kera ze ve iyol wer ve ôr u kwagh sha mi keng keng ga. Nahan alaghga vea va ôr u kwagh u ve nger la a ishima ve.”

Aluer u ngu henen kwagh a tsombor wou hanma shighe shi u ngu tesen kwagh sha gbenda u wasen ônov ou man sha gbenda u a maa ve iyol yô, Yehova una ver iniôngon you la doo doo. Shighe u injaa u ú ver sha ci u tsombor wou ne una na ônov ou vea lu per shi vea tile ken mcivir u mimi dông.

[Ngeren u Kiriki u a lu sha peeji 31 la]

Yar Tom A Mbamhen Ou

“Mo vea orya wam yange sea henen kwagh vea ônov asev mba kasev mba kiriki yô, se time sha ngeren u i lu wan agoyol shami sha ci u mkombo u tiônnongo la, nahan se na ônov asev tom ser ve kpela foto u saven kwagh u se hen la. Ashighe agen yô, se er iniumbe sha avur a Bibilo agen, gayô se kar iyol er se due u za pasen kwagh ken won ve se lam a ior yô. Yange se hen kwagh a ve sha gbenda u a hemba ve u kaven ga, shi a doo ve, shi a wase ve man a hôm ve kpaa yô.”​​—⁠J.M., United States.

“Yange se soo u wasen wan u orgen u m lu henen Bibilo vea na yô ser a fa er yange i yaren tom a ihurenruamabera sha ashighe a tsuaa la yô, nahan se kough unamba mba tesen ityough ki takerada man avur a ken takerada u Yesaia cica cii kera, maa se gber ngeren u Yesaia la cii sha ikyatakerada. Se tôô upeeji mba ikyatakerada ne cii se zor sha nôngo vough vough hingir ihurenruamabera u lihen gôgônan, se gema se tôndo ankon ker atôôn ahar se kange sha avegher a ahar a ihurenruamabera la. Nahan wan la nôngo ér una er kwagh u Yesu yange er ken shinagoge ken Nasareti la. Ngeren u Luka 4:​16-21 kaa ér Yesu yange ‘bugh [ihurenruamabera i Yesaia la] hen ijiir’ i a lu keren la. (Yes. 61:​1, 2) Nahan kpa, wan la ngur nôngon ér una er nahan yô, taver un u zuan a Yesaia 61 ken gôgô ihurenruamabera u se na un, lu a unamba mba tesen ityough ki takerada shin avur kpaa ga la. Kpiligh wan ne iyol er Yesu yange fa u yaren tom a Uihurenmbaruamabera yô, tsô a kaa ér: ‘Yesu lu or u numben a mi ga!’ ”​​—⁠Y.T., Japan

[Foto u sha peeji 30]

Iyolkaren ia fatyô u wasen ônov ou, nahan vea nôngo a mkighir u mbakov

[Foto u sha peeji 31]

Tesen ônov ou sha gbenda u a maa ve iyol a Mcivir u hen Tsombor u aikighe la yô