Lu Saan Saan shi Eren Aôndo Tom Ngeegh

YEHOVA soo ér u lu saan saan. (Ps. 100:⁠2) Er u lu môm ken mbatomov nav yô, alaghga we kpa u ngu eren tom ngeegh je. Alaghga yange u lu a ityom ave kpishi shighe u ú tsegha iyol you hen Aôndo la ga, kpa hegen afaerenga tom u uke man ityom i ken tiônnongo ia na yô, u tôô ikyav hegen kpishi. Shi adooga ishima ia na u ibo zum u ú kera fetyô u eren Aôndo tom er yange u wa ishima u eren nahan la ga yô. Nahan u er nan ve u lu a mnenge u vough shi u lu a ‘iember i ú ember TER la’ here?​—⁠Neh. 8:⁠10.

U ngu ken ashighe a ican nahan mbamtaver kpishi vea bende a we, sha nahan yô, doo u ú sôr akaa u ver vough. Kwaghwan u apostoli Paulu wa sha kwagh ne la ngu hange hange, a kaa er: “Nenge nen vighe vighe er ne zenden yô, i̱ de lu er mbalanenkwagh nahan ga, kpa i̱ lu er mbafankwagh nahan. Man waan nen ian yen ikyo, gadia ayange ne ka a bo je.”​—⁠Ef. 5:​15, 16.

Se er nan ve se dondo kwaghwan ne, nahan se tsua akaa a se er la sha inja shi se henen kwagh sha tseeneke shi se nengen sha tsombor shi se pasen kwagh shi se eren tom u uke kua ityom i hange hange igen kpaa vough voughloo?

U umbur iember i yange u zua a mi shighe u ú tsegha iyol you shi i er u batisema la kpa? Yange u zua a iember sha ci u ú fa Yehova kua mbaawashima nav. Alaghga yange tôô u iwer imôngo u henen Bibilo kpoghuloo ve u va zua a mkav man iember la ye. Kpa iniôngon you la lu gbilin ga. Bibilo i henen la na uma wou hemba doon.

Gba u ú za hemen u yan kwaghyan u ken jijingi ve u lu a iember you her ye. Aluer taver we u zuan a shighe u ôron shi henen Bibilo yô, hide nenge sha gbenda u ú vihin shighe wou la. Aluer hanma iyange yô, u ngu ôron Bibilo shi gbidyen kwar sha mi miniti kpuaa tseegh kpa, u fatyô u seer kporom ikyua a Yehova, man kwagh la una wase u u̱ lun a iember kpee.

Mbacivir Aôndo kpishi vea fatyô u keren shighe sha u vea er ityom i hange hange, nahan vea kera vihin shighe ve sha akaa aa a lu a inja ga la ga. Pine iyol you wer, ‘Ka ahwa a me ka m vihi sha u ôron ityakerada i taregh shin upipambaabaver, shin nengen televishen, shin ungwan ityougholov shin eren ma iniumbe i doon mo ishima?’ Ambaakaa la nga a doo u eren kpen kpen, aluer i er a akuma akuma yô. (1 Tim. 4:⁠8) Wea nenge wer u ngu vihin  shighe wou sha inja ga yô, sôr gbenda u ú vihin shighe wou la.

Nom ugen u a lu a mbayev utar shi a lu ortamen ken tiônnongo yô, mba yer un ér Adam, a pase kwagh u ka a wase un yô, ér: “Ka m nôngo mer me lu uma akuma akuma. Ka m palegh ahumbe a man a yan shighe gbing la kua ikyav mbi ken iyou mbi i gbe u me veren ishima sha mi hanma shighe la. U ngu wer msaanyol vihim a vihi ishima ga, kpa m soo di a soo iemberyolough i kpelegh kpelegh ga tsô.”

Aluer u gbidye kwar sha akaa a dedoo a aa due ken kwagh u ú tsough u eren la yô, kwagh ne una seer iember i u lu a mi la shi una wase u u̱ lun a mnenge u vough kpaa. U tesen ikyav yô, anmgbian ugen u i yer un ér Mariusz, a lu ortamen shi a lu a mbayev utar la, kaa ér: “Yange m hiin Bibilo i henen yô, m hingir u lun a ishimaverenkeghen mer mlu wam u ken hemen una doo. Zan zan nyian kpa, ashighe agen ka m tagher a mbamtaver man mbamtaver mban kpishi ka Yehova tseegh a fe ve ye. Kpa m ngu wuese un sha iwasen i a nem i keghen akaa a ken hemen saan saan la.”

Er Mariusz nahan, mnenge u vough una dugh hanma ishimanyian cii ken or kera ga. Kpa una na a lu u ken ishima kposo, shi u hemba fan kwagh u ú er shighe u ú tagher a mbamtaver yô. Bibilo kaa ér: “Ayange a mbayanican cii, nga nyoon iyol, kpa ishima i saan saan yô, i ye iniongo gbem je.” (Anz. 15:15) Shi hen sha dooshima u Aôndo a vande tesen we kera la. Aluer u er nahan yô, kwagh la una na Aôndo a doo u ishima shi u seer zuan a iember kpaa.​—⁠Mat. 22:⁠37.

Tsombor ka ua ver Yehova kua mbaawashima nav hiihii ken uma yô, iember ve í seer. Ka vea lu a aeren a Orkristu yô, ayôôso a pande shi mtem ve ken tsombor a hemba doon. Aluer u er nahan yô, tsombor wou ua lu ijiir i bem man mzough vea dumbur yô.​—⁠Ps. 133:⁠1.

Tsombor ka ua eren akaa a ken jijingi imôngo yô, ve seer zuan a iember i mimi. Mariusz pase wener: “Shighe u se hen tsombor cii ka se lu imôngo la gbam kwagh kpen kpen. Kwase wam ka a suem kpishi. Ka a gba sha mi yô, a lu vea mo ikyooso ikyooso shighe u m lu pasen kwagh shin m lu sôron agirigi u anumbegh, ape a va er mbamkohol mba vesen la kpaa, shi ka mea za naan kwaghôron ken atôônanongo agen kpa, undun mo ga. Kwagh ne ka a taver mo ishima kpen kpen.”

Ruamabera wa tindi ér Mbakristu ve nenge sha mbamgbe mba icombor ve mba sha iyol la. (1 Tim. 5:⁠8) Kpa, aluer tom u uke ya ú shighe man tahav kar ikyaa inya yô, ua yange ú u eren tom u Aôndo saan saan. Aluer kwagh ngu nahan yô, er msen hen Yehova sha kwagh ne. (Ps. 55:22) Mbagenev nenge ér aluer ka u vea vande keren tartor u Aôndo yô, a gba u vea de tom u ve eren la vea ker ugen. Orkristu môm kpa nana de deen ér inyaregh ki nana zua a mi sha ma tom u nan eren sha agee a nan cii shi u ye nan shighe la u yange nan u veren ishima sha akaa a ken jijingi aa a hembe lun hange hange la ga.​—⁠Anz. 22:⁠3.

Alaghga u nenge wer doo u ú nger mbamshi man mbamtsera mba ve lu ken tom u ú eren shin u we ishima u va eren la. Inyaregh ki zuan a mi man tom u nan mkom ka akaa a injaa. Nahan kpa, tom u ú lu eren hegen la wase ú u nengen sha ugbayol mba tsombor wou mba ken jijingi kpa? Time sha kwagh ne sha mimi, nahan tsua u eren kwagh u una na u hemba veren ishima sha ikyaryan you vea Yehova yô.

Aluer u ngu eren tom u ú yangen we u vesen ken jijingi yô, gba u ú ker tom ugen. Mbakristu mbagenev kpishi de u eren ityom igen i van ve inyaregh kpishi la sha er vea zua a shighe u eren akaa a ken jijingi yô. Anmgbian ugen ken tar u Poland kaa ér: “Er ashighe kpishi kômpeni wam tindin mo u za eren kpenga ken won yô, hingir kpee u me de tom la. Kwagh ne na yô, m lu a shighe kuma u me nenge sha akaa a ken jijingi tsembelee shin sha tsombor wam kpaa ga.” Hegen ne, ngu eren tom hen ijiir i í kera ye un shighe shin agee er kômpeni u tse la nahan ga yô.

I Saan We Iyol u Wasen Mbagenev

Yesu yange kaa ér “u nan a na kwagh hembe saan iyol a u ngohol a ngohol kwagh.” (Aer. 20:35) Mbakristu mba a aan kpishi a nan mbagenev kwagh. Ashighe agen yô, ahan a sen vea or shin u zuan uwegh vea nan, gayô u wuese nan sha tom u injaa u nan er ken mcivir u Aôndo la tseegh kpa una na a saan we man or la iyol.

Apostoli Paulu yange taver mba ve lu Mbakristu a na imôngo la asema ér: “Taver nen mba ve yen  ishima la asema, wasen nen mba ve taver ga yô.” (1 Tes. 5:14) Alaghga a lu mba asema a yen ve mbara er vea fatyô u nôngon a uzayol sha tahav vev tseegh ga nahan. U fatyô u wasen amba la kpa? Wea nenge wer mô ken anmgbianev ou nan ngu saan saan ga yô, taver nan ishima. U eren nahan la, we kpa ishima ia taver we. Uzayol mbagenev ka mba orumace môm kpa nana fatyô u sôron ga yô. Nahan kpa, u fatyô u zungwen vea nan sha mimi shi taver anmgbian wou ishima wer nana ker iwasen i Yehova i í gbe inya mayange ga la. Mba vea er nahan yô, mayange vea va ahenge ga.​—⁠Ps. 27:10; Yes. 59:⁠1.

Kwagh ugen u ú fatyô u eren yô, ka u lôhôn or u nan ban a msaanyol la wer nana due kwaghpasen vea we. Shighe u Yesu tindi mbahenen mba 70 la, a tindi ve “uhar uhar.” (Luka 10:⁠1) U lumun wer kwagh ne yange una wase mba i tindi ve la u taver ayol a ve asema ga he? U fatyô u dondon gbenda u duen kwaghpasen iorov uhar uhar ne sha u wasen mbagenev sha er vea hide a zua a msaanyol nyian kpa?

Se mba a atôakyaa nyian kpishi a nan se ishimanyian. Nahan cii kpa, Paulu wa se kwagh ér: “Ember nen ken Ter gbem, shi me kaa mer, ember nen.” (Fil. 4:⁠4) Er Aôndo a doo u ishima, u ongo imo na, shi u taver ishima u eren tom u a ne u ér u eren la yô, uma wou ngu a awashima. Kwagh ne ve u a iember. Heela tseegh ga, Yehova wasen we u nôngon a mbamtaver kua uzayol mba u tagher ishigh a mi la.​—⁠Rom. 2:​6, 7.

Se na jighjigh ser se mgbôghom a tar u he u Yehova a tende zwa u van a mi la. Kwagh la una va a averen kpishi shi una na se atôakyaa wuee a lun a iember kpaa. (Ps. 37:34) Nahan se lu saan saan, se hungur er hegen je kpa Yehova a lu nan se averen kpishi la ga. Nahan se fatyô u ‘civir TER a iember ken ishima.’​—⁠Ps. 100:⁠2.

[Foto u sha peeji 8]

(Wea soo u nengen a foto u tesen ijiir la yô, nenge ken takerada)

Alaghga a gba u ú nyôôso gbenda u ú ser shighe wou u ver la sha er u za hemen u lun saan saan yô

IEMBERYOLOUGH man GURGUR

U NENGEN SHA YA man TSOMBOR

TOM

MBAMKOMBO MBA MBAKRISTU

KWAGHHENEN U SHA TSEENEKE

TOM U PASEN KWAGH

[Foto u sha peeji 10]

U ngu sha ian i u wase mbagenev vea hide a lu saan saan kpa?