Hemen U Satan Ua Guusu Inya Kpee je
Hemen U Satan Ua Guusu Inya Kpee je
“Mkpeyol una lu hen orifer ga.”—ORPA. 8:13.
1. Ijir í a va ôr aferaior la ka loho u surun ior ishima sha ci u nyi?
ICA a gba ga tsô a ôr aferaior ijir. A tsaha ve sha aferakaa a ve er la. (Anz. 5:22; Orpa. 8:12, 13) Loho la ka ú surun ior ishima, hemban je yô, mba kwagh u perapera a doo ve ishima la man mba aferaior a nzughul a ve la. Iferor u vesen ken mbaaferev u a ôr nan ijir yô, ka Satan Diabolo, u a lu ter u iferkwagh la.—Yoh. 8:44.
2. Er nan ve yange gba u shighe a kar cii ve a mase kuren ikyaa i ken Eden laa?
2 Lu ihyagh iv Satan ken ishima ve mee uumace ve venda hemen u Aôndo ken Eden ye. Kwagh la na yô, mbamaren asev mba hiihii mbara kohol Satan u vendan hemen u Yehova, u a kom u hemen tswen la, nahan ve hingir mbaasorabo sha ishigh nagh. (Rom. 5:12-14) Akperan nga ga, Yehova fa er ilyahan man ihyembeato ve la ia za a ve a kure yô. Nahan kpa, gba u a pase mbatyomov mba shaav cii kua uumace kpaa, kwagh u una va due ken ihyembeato ve la kpee. Sha nahan yô, yange gba u shighe a kar cii ve a mase kuren ikyaa ne shi a tese wang ér mbahembanato mbara yange ve er kwagh u sha mi ga ye.
3. Se mba nengen ugomoti mba uumace nena?
3 Er uumace venda hemen u Yehova yô, gba u vea ver ugomoti vev. Apostoli Paulu yange ngur ngeren mbananjighjigh mba ken Roma washika yô, a yila ugomoti mbara ér “tahav mbu [se] lu mbu sha ikyev la.” Sha ayange a Paulu la, tahav mbura lu gomoti u Roma, sha ikyev i Tor u tartor ú Mbaroma cii, u i yilan iti na ér Nero, u tema tor hii ken inyom i 54-68 la. Paulu kaa ér tahav er mbura nahan, “ka Aôndo je A ver ye.” (Ôr Mbaromanu 13:1, 2.) Kwagh ne tese ér Paulu lu tan ikyaa a hemen u uumace ér u hemba doon a hemen u Aôndo shinii? Mayange ga. Kpa lu kaan ér, er Yehova a ne hemen u uumace ian ér u lu her yô, Mbakristu ve na tahav mbu Aôndo a “ver” la icivir, nahan ve lu sha ikyev i mbahemen mba tar ne.
Gbenda u Zan ken Mtim
4. Pase er i hii ve i lu u hemen u uumace ua za ikyura mayange ga yô.
4 Nahan cii kpa, hemen u uumace u ú lu sha ikyev i Satan ne ngu yemen u za timin. Sha ci u nyi? Ityôkyaa i môm yô, hemen la har sha kwaghfan u Aôndo ga. Ka Yehova tseegh a lu a kwaghfan u vough ye. Sha nahan yô, ka un tseegh una fatyô u hemen sha inja vough ye. (Yer. 8:9; Rom. 16:27) Yehova fe gbenda u hemban doon u eren kwagh hanma shighe cii, ngu er uumace mba ashighe kpishi ka ve gba bo cii ve ve mase henen kwagh sha mbamtsum vev la ga. Gomoti u a dondo kwaghwan u Yehova ga cii, una za ikyura mayange ga. Sha ityôkyaa la tseegh, a awashima u ifer u Satan la ga je kpa, lu u sha hiihii la je, hemen u Satan u sha ikyev i uumace la ua za ikyura ga.
5, 6. Lu nyi i tuur Satan ve hingir u hendan a Yehovaa?
5 Or u fan kwagh ka nan palegh u eren ma kwagh u una va a kwaghbo la. Aluer nan norom sha kwagh shon yô, nana kav lanegh ku nan. Akaa a á vande eren ken ijime la tese ér u hendan a Orgbanakaa u hemban cii la ka ibume kwagh. (Ôr Anzaakaa 21:30.) Nahan kpa, er iyolgengese kua ihagh i iv ken Satan yô, a gema ijime a Yehova. Tsô Diabolo nômbo ikyôr ngu yemen norototo sha gbenda u una za kure ken mtim yô.
6 Icihi i Satan la yange i tsar tor u Babilon ugen; i nger mkaanem ma yange ta ihagh ôr la, ér: “Me kôndo Sha, me kende ikônough yagh ki torough Sha je; kia kar asan a Aôndo sha je; me tema sha Uwo u Mkohol, ken zuer u imbusutarimese, me kôndo sha, me kar abeen a hemban gban ca la, me hingir er Uhembansha nahan.” (Yes. 14:13-15) Tom u tor la wa ave sha ibume la saa ishe, shi tartor u Babilon kure ken kunya kpishi. Kape Satan man tar na kpa ica a gba ga tsô vea tim kera gburu gburu je la.
Er Nan Ve Yehova Na Mbahendan a Na Ian I Lun sha Tseeneke Ve?
7, 8. Mne u Yehova a hila ne iferkwagh ian ne va a mbamtsera mba nyi?
7 Alaghga a taver mbagenev u kaven er hii ve Yehova yange uumace u tan ikyaa a Satan ga, shi de ér ve dondo gbenda ugen u hemen ior ú ua za kure ken mtim la yô. Er a lu Aôndo u hemban sha yô, yange ma hemba un u yangen ve ga. (Eks. 6:3) Nahan kpa, a de. Yehova yange kure ikyaa sha kwaghfan na ér aluer un hila na orumace ian sha ihyembeato la yô, kwagh u injaa una due ker ken hemen. Nahan ken masejime yô, a paa Yehova iyol, a tese ér ngu orhemen u perapera man u dooshima, shi uumace mba jighjigh vea zua a mtsera ken ieren i Aôndo ne.
8 Nenge imba kwaghbo u tsombor u uumace ma u palegh, luun er yange vea vende imeen i Satan shi vea vende u undun hemen u Aôndo za lun sha tseeneke ve la sha wono! Nahan kpa, mbamtsera mba ken ian i Yehova a ne uumace ér ve hemen ayol a ve la. Kwagh ne wase mbaasemaamimi u nengen er u ungwan imo i Aôndo shi suur sha a na la, i lu ieren i sha kwaghfan yô. Uumace ndera karen atô a ugomoti kposo kposo anyom deri imôngo hegen, kpa ityô gomoti i môm ngi a wase ve vough ve ga. Mimi u kwagh ne seer taver jighjigh u mbacivir Aôndo ve ne ér gbenda u Yehova a hemen la ka u hemban doon cii la. Ka mimi, mne u Yehova a ne hemen u ifer u Satan ian ne va a ican sha uumace, kua mba ve civir Aôndo sha mimi la kpaa. Nahan kpa, mne u Aôndo a hila ne iferkwagh ian ne shi va mbacivir Aôndo sha mimi a mbamtsera kpaa.
Ihyembeato I̱ I̱ Ve Yehova a Icivir La
9, 10. Pase er hemen u Satan u ve Yehova a icivir yô.
9 U nan uumace ian ér ve dondo Satan shi ve hemen ayol a ve la va a ilyahan sha hemen u Yehova sha gbenda môm kpaa ga. Kwagh la gema va un a va a iwuese! Yiase tese wang ér mkaanem ma Yeremia, ma jijingi mgbegha un ve ôr ér uumace kuma u hemen ayol a ve ga la, ka ma mimi. (Ôr Yeremia 10:23.) Heela tseegh ga, Ihyembeato i Satan la hemba nan Yehova ian i tesen aeren Na a dedoo la ken igbar. Sha nena yôô?
10 Er se lu nengen a mvihi u hemen u Satan yô, se mba hemban nengen a aeren a Yehova a vough la tseer tseer cii. Sha gbenda ne yô, mbara mba a doo ve ishima la mba hemban nengen a na tseer tseer cii. Sha kpôô yô, er i lu inja er cimin ken ato nahan kpa, jighilii yô, hemen u Satan va Aôndo a icivir. Hemen la tese kwagh u injaa u Yehova a er sha u been ilyahan i í laha mtemtor na la. U tesen ér kwagh ne ka mimi yô, de se time nen sha aeren a Yehova agen tsô se nenge er hemen u Satan u ifer la u ne Yehova a seer tesen aeren a na ne sha igbenda igen yô.
11. Yehova tese dooshima na nena?
11 Dooshima. Ruamabera kaa a vese ér “Aôndo ka dooshima.” (1 Yoh. 4:8) Hiihii yô, mgbe u Aôndo a gbe uumace la jim kpa, ka gbenda u a tese dooshima na yô. Heela tseegh ga, m-er u í er se sha gbenda u cieryol man u kpilighyol la kpa tese dooshima u Aôndo. Yehova shi na uumace ya u doonashe u lun a hanma kwagh u nan ve msaanyol cii. (Gen. 1:29-31; 2:8, 9; Ps. 139:14-16) Kpa yange ifer nyer ken tsombor u uumace yô, Yehova tese dooshima sha igbenda i he. A er kwagh ne nena? Apostoli Yohane ôr kwaghôron u Yesu ér: “Gadia tar ne doo Aôndo ishima je, nahan A na Wan Na u môm môm la sha er anti or u nan ne Un jighjigh yô, nana̱ de timin ga kpa nana̱ zua a uma u tsôron.” (Yoh. 3:16) Aôndo yange ma tese dooshima hen uumace sha gbenda ugen u hemban doon a u tindin wan na u môm môm la sha u a va wam mbaasorabo yôô? Shi dooshima u Yehova tese sha gbenda u vesen ne ngu ikyav hen uumace, a na ve ian i tesen imba dooshima u Aôndo u tangen iyol ga la ken uuma vev hanma iyange, er Yesu er nahan.—Yoh. 17:25, 26.
12. Yehova tese tahav nav sha nyi gbenda?
12 Tahav. Ka “Aôndo, Uhembanagee” la tseegh a lu a tahav mbu gban uma ye. (Mpa. 11:17; Ps. 36:9) Zum u i mar or la, uma u nan ka a hii er kwa pipaa u lun eng nahan. zum u nan kpe la, ka nan iv kwa pipaa la a akaa a yange nan tsua la, man aeren a nan man hanma kwagh u yange er nan ken uma u nan, u na ve nan lu imba or i nan lu la, shi nan lu a inja i nan lu a mi la kpaa. Akaa ne cii Yehova una fatyô u koson a ken mhen na. Shighe a va kuman yô, Yehova una fatyô u shi hiden nderen or la, a imba uma u nan vande lun a mi la vough. (Yoh. 5:28, 29) Shin er vande lun awashima u Aôndo u uumace ve kpeen ga nahan kpa, ku gema na Yehova ian i tesen ér un ngu a tahav mbu nderen mbakpenev je kpaa, shin ku. Sha mimi yô, Yehova ka “Aôndo, Uhembanagee.”
13. Yehova yange tese ér un ngu imbor i ijirôron i mimi sha nagh ku Yesu kura nena?
13 Ijirôron i mimi. Yehova eren aie ga, shi eren kwagh sha ifer kpaa ga. (Dut. 32:4; Titu 1:2) Eren kwagh sha jighjigh man sha mimi hanma shighe cii, ka a lu u una er nahan kwagh la una va un a ican je kpaa. (Rom. 8:32) Nenge er yange a kôr un iyol u nengen wan na u ishima ishima la kpen sha kon u mtsaha, inja er ngu or u lahan Aôndo la sha wono! Nahan kpa, er uumace mba ve yen ne ve doo un shima yô, Yehova yange kegh iyol ér una de kwagh u vihin tsung ne a er sha er una kende a ijirôron na i mimi la sha yô. (Ôr Mbaromanu 5:18-21.) Tar u ú mgbough a ifer ker ne na Yehova ian i tesen ér un ngu imbor i ijirôron i mimi.
14, 15. Ka sha igbenda igen i nyi nahan Yehova a tese kwaghfan na u hemban cii kua ishimawana?
14 Kwaghfan. Adam man Ifa yange mba gbe ken isholibo nahan maa Yehova pase gbenda u una kar a kwaghbo u ihembeato ve i ve a mi la kera yô. (Gen. 3:15) Kwagh u Yehova er ave ave la, kua mpase u lu pasen awashima na hen mbatomov nav kure kure la, na kwaghfan na due ken igbar. (Rom. 11:33) Kwagh môm kpa una tagher Aôndo u sôron akaa za kuren vough ga. Ken tar u u mgbough a ijimba man ityav mbi nôngon man ikyaanorom man ihyembeato man msange u sha dooshima man imanger, shi i zungwen or mhôônom ga ne, Yehova zua a ian gbanger gbanger i tesen akaa a a gbe la kwagh u a lu kwaghfan jim jim yô. Orhenen Yakobu kaa ér: “Kwaghfan u a dugh Sha yô, hiihii ka u wang, shi ka u bem kpaa, man u sar sar, man u norom ikaa ga, a iv a mhôônom ma zungwen kua atam a dedoo, ka u sangen sha dooshima ga man shi u imangeregh kpaa ga.”—Yak. 3:17.
15 Ishimawan. Ishimawan i Yehova ma i dugh ken igbar nahan ga, luun er gba u una er kwagh sha myen man asorabo kua mbamgbe mba uumace ga yô. Er Yehova kegh a kegh iyol u eren nahan anyom udubu imôngo yô, tese ér aeren ne dumbur ken a na sha gbenda u hemban cii, man doo u se wuese un kpishi sha kwagh la. Apostoli Peteru kaa vough nahan ér se fa “er ishima i wan i Ter wase la i lu myom yô.”—2 Pet. 3:9, 15.
16. Er nan ve mkegh u Yehova a keghen iyol u den kwaghbo la a lu kwagh u nan se iember i vesene?
16 Keghen Iyol u Den Kwaghbo. Se cii se mba mbaasorabo shi se mba nenge gbev sha akaa kpishi. (Yak. 3:2; 1 Yoh. 1:8, 9) Sha kpôô yô, doo u se wuese Yehova sha ci u den “kwaghbo wuee”! (Yes. 55:7) Shi time ase sha ikyaa i mimi ne kpaa: Er i mar se ken asorabo, se yen yô, se mba sha ian i zuan a iember shighe u Aôndo a de se kwaghbo yô. (Ps. 51:5, 9, 17) Ka sea nengen a ieren i Yehova i kundun iyol la nahan kwagh na a hemba doon se ishima, shi ishima i hemba taver se u dondon ikyav na shighe u se lu eren kwagh vea mbagenev yô.—Ôr Mbakolose 3:13.
Er i Hii Ve Tar Ne u Lu Uange Yô
17, 18. Hemen u Satan kanshio u eren nyi akaa?
17 Ken uderimbaanyomov mba karen mban cii, tar u Satan jimin cii, inja na yô, ka gbenda u a hemen je la, u gba bo acin imôngo. Ken inyom i 1991 la, ipipaabaver i The European la kaa ér: “Tar ne gba angev shinii? Een, u gba yumu, kpa . . . ka sha ikyev i Aôndo ga; lu ior i tar ne na u angev ye.” Sha kpôô yô, ka pe i lu je la! Satan mee mbamaren asev mba hiihii mbara, nahan ve tsua hemen u or, ve gema ve venda hemen u Yehova. Tso ve gema ve tsua gbenda u hemen ior u mayange ua za ikyura ga yô. Mnyoon man ican i ior ve lu yan sha tar cii la tese ér hemen u uumace gba bouange.
18 Hemen u Satan ngu keren mkpeyol u mbagenev ga. Nahan kpa, u keren mkpeyol u mbagenev ga la una fatyô u hemban dooshima, u a lu imaagh ki hemen u Yehova la ga. Hemen u Satan kanshio u van a bem man iember man mkor. Sha nahan yô, hemen u Yehova hemba doon a hemen u Satan ica je! Se mba a ikyav i tesen sha ayange a ase ne ér kwagh ngu nahanaa? Een, se mba a mi er i tese ken ngeren u dondon ne nahan.
Kanyi Se Hen sha Kwagh u Hemen, sha u Ôron . . .
• Anzaakaa 21:30?
• Yeremia 10:23?
[Mbampin Mba Ngeren u Henen]
[Ufoto u sha peeji 25 la]
Hemen u Satan wase uumace ma shighe môm kpaa ga
[Ngeren mba pasen orngeren]
U.S. Army photo
WHO photo by P. Almasy
[Foto u sha peeji 26 la]
Yehova ngu a tahav mbu nderen mbakpenev shin ku je kpaa
[Foto u sha peeji 27 la]
Yehova tese dooshima man ijirôron i mimi sha nagh ku Wan na la