Se Mba Hingir Kwagh U Yehova Sha Ci U Mlumun Na U Sha Mhôôn
Se Mba Hingir Kwagh U Yehova Sha Ci U Mlumun Na U Sha Mhôôn
“Se mba kwagh u Ter.”—ROM. 14:8.
1, 2. (a) Ka ian i civirigh i nyi se lu a mi? (b) Ka mbampin mba nyi se time sha mini?
YEHOVA yange na ikyurior i Iserael icivir i vesen shighe u kaa a ver ér: “Akuraior a sha won cii, ka ne né hingir kwagh Wam iyol Yam je ye” la. (Eks. 19:5) Mba ve lu ken tiônnongo u Kristu nyian la kpa i na ve icivir i hingir kwagh u Yehova. (1 Pet. 2:9; Mpa. 7:9, 14, 15) Man icivir ne ia lu se a iwasen gbem sha won.
2 U se hingir kwagh u Yehova la ka ian i civirigh tseegh ga, a wa tom kpa ker. Kpa alaghga mbagenev vea pine ayol a ve ér: ‘Me fatyô u eren kwagh u Yehova a soo ér m er la je he? Aluer m er isholibo nahan, una tam keraa? Aluer m hingir kwagh u Yehova nahan, shi me eren kwagh sha ishima yam je he?’ Doo u se hen sha akaa ne. Nahan kpa, doo u se hii timen sha mpin ne, ér: Aluer se hingir kwagh u Yehova yô, ka mbamtsera mba nyi se zua a mini?
U Hingir Kwagh u Yehova la Ve Se a Msaanyol
3. Mtsough u Rahabi tsua u civir Yehova la wase un nena?
3 Mtsera ngu sha ci u mba ve hingir kwagh u Yehova mbara je he? Time ase sha kwagh u agbagakwase ugen u lu ken gar u Yeriko u tsuaa la, iti na ér Rahabi. A shi nan kpa, yange i yese un ken mcivir u hôngorough u mbaaôndo mba Mbakanaan la. Nahan kpa, yange ongo mhembe u Yehova hemba ityar kpishi ityav sha ci u Iserael la yô, a kav er Yehova a lu Aôndo u mimi yô. Sha nahan yô, a lumun u nan uma na sha u una kura ior mba Aôndo tsua ve la shi gema uma na cii wa sha ikyev ve. Bibilo kaa ér: “Rahabi, agbagakwase la kpaa, kape i na un ishô sha aeren je la gadia a nyôr a mbatyomov man a due a ve sha gbenda ugen kposo.” (Yak. 2:25) Rahabi yange zua a mbamtsera kpishi, gadia i ngohol un hingir môm ken ior mba Aôndo mba lun wang, mba Tindi u Aôndo tese ve dooshima kua ijirôron i mimi yô. Nenge er yange a saan un iyol u undun uma na u tse la sha wono! Yange vôso Oriserael ugen mar wannomso, iti na ér Boashi, shi yese un hingir or u eren Aôndo tom dông.—Yos. 6:25; Rutu 2:4-12; Mat. 1:5, 6.
4. Rutu yange zua a mtsera sha mtsough u tsua u civir Yehova la nena?
4 Rutu u ken tar u Moabi kpa, yange tsua u civir Yehova. A shi nan kpa, shighe u lu wanyekwase la, civir aôndo u tar u Moabi, u i yilan ér Chemosh la man mbaaôndo mbagenev kpaa, nahan kpa va hingir u fan Yehova, Aôndo u mimi, shi vôso Oriserael ugen u yange za hen tar na sha u za keren ijiir i waren yô. (Ôr Rutu 1:1-6.) Ayange nga kar yô, Rutu vea kwase u anmgbian u nom na, iti na ér Orpa, ve mough u yemen Yerusalem vea Naomi, ngô u noov vev, kpa Naomi kaa aa kasev mbauhar mban ér ve hide ve yem sha uyaav vev. A lu ve ican kpishi u lun ken tar u Iserael. Orpa yô, “hide hen ityô na kua hen aôndo na kpaa,” kpa Rutu yô, hide ijime ga. Rutu yange er tom a jighjigh u nan na shi fa or u soo u lun kwagh u nan yô. A kaa a Naomi ér: “De zem iyol wer, m̱ de u zan a we, m̱ undu u, m̱ hide ga; gadia henpe ú za cii, mo kpaa me za; henpe ú za tsa la, ka her mo kpaa me tsa ye; ior ou ka ior av; Aôndo wou kpaa ka Aôndo wam.” (Rutu 1:15, 16) Er Rutu tsua u civir Yehova yô, Tindi u Aôndo va un a mtsera, sha ci u tindi shon kaa ér i eren a kasev mba côgholov man mbaatsanev kua mba ve lu a inya ga la cii doo doo. Er Yehova wa un ken akper a na yô, a zua a msaanyol man mkor kua mkpeyol kpaa.
5. Ka nyi u nenge a mi ken ior mba ve civir Yehova sha jighjigh laa?
5 Alaghga u fa ior mbagenev mba ve tsegh ayol a ve sha ci u Yehova shi ve civir un sha jighjigh anyom imôngo hegen yô. Pine ve ve̱ pase u mbamtsera mba ve zough a mi sha u civir un la. Shin er or môm nan ban a mbamzeyol ga nahan kpa, mkaanem ma orpasalmi man ka ma sha inja vough je. Ma kaa ér: “Saan ior mba TER A lu Aôndo ve la, iyol.”—Ps. 144:15.
Yehova Kighir Se Ér Se Er Kwagh u a Gande Se Agee ken Inya Ga
6. Doo u se cia ser se kan shio u eren kwagh u Yehova a soo hen a vese la ga sha ci u nyi?
6 Alaghga u hen wer u fatyô u eren kwagh u Yehova a soo hen a we ga. Ka ican ga u or henen ér u civir Aôndo shi kuran atindi a na shi lamen ken ti na la ka zegekwagh u nana kôr cio u eren ga yô. Ikyav i tesen yô, Mose yange hen ér un kuma u a tindi un ér una za lam a Mbaiserael man tor u Igipiti ga. Kpa Aôndo yange ker ér Mose a er kwagh u ganden tahav nav ken inya ga. Yehova ‘tese un kwagh u una er yô.’ (Ôr Ekesodu 3:11; 4:1, 10, 13-15.) Er Mose lumun iwasen i í na un la yô, a zua a msaanyol u eren ishima i Aôndo. Kape se kpa Yehova a keren ér se er kwagh u hemban tahav asev ken inya ga je la. A fa er se yen yô, shi a soo u wasen se kpaa. (Ps. 103:14) Aluer se mba civir Aôndo sha u dondon Yesu yô, a kpe se iyol shi a lu se ican u eren nahan kpaa ga, sha ci u imba ieren ne ka i wase mbagenev shi i na i saan Yehova iyol. Yesu kaa ér: “Va nen her a Mo, . . . Mo Me na ne mmem. Tôô nen igbur Yam sha ayol a en, va hen nen kwagh sha ikyev Yam, gadia M ngu ishima legh legh, man M kehen ityough kpaa ga.”—Mat. 11:28, 29.
7. Ú fatyô u lun vangertiôr wer Yehova una wase ú u eren kwagh u a soo hen a we la sha ci u nyi?
7 Aluer se za hemen u suur sha Yehova yô, una naan se ishimataver hanma shighe cii. Ikyav i tesen yô, sha marami u Yeremia je, lu or u cian ashe. Sha nahan yô, shighe u Yehova tsua un ér a lu profeti na la, Yeremia kaa ér: “Uwu! Tere, AÔNDO! M fa u ôron kwagh dedoo ga, gadia mo m ngu wanye je.” Shighe kar yô, shi a kaa ér: “Me kera ôr kwagh ken iti Na kpaa ga.” (Yer. 1:6; 20:9) Nahan cii kpa, Yehova na Yeremia ishimataver, nahan a fatyô u pasen loho u ú doo mbagenev u ungwan ga yô kuma anyom 40. Yehova yange taver un ishima sha mkaanem man var var, ér: “M ngu a we sha u waren we man u yiman we.”—Yer. 1:8, 19; 15:20.
8. Se tese ser se suur sha Yehova nena?
8 Yehova una fatyô u nan se ishimataver i eren kwagh u a soo hen Mbakristu nyian yô, di vough er yange na Mose man Yeremia ishimataver nahan. Kwagh u vesen yô, ka u suur sha Aôndo. Bibilo kaa ér: “Suur sha TER a ishima you cii, de yier sha mkav wou ga. Umbur Un sha ijende you cii, Un kpaa Una kôôm igbenda you.” (Anz. 3:5, 6) Se fatyô u tesen ser se suur sha Yehova aluer se lumun iwasen i a ne se ken Mkaanem nam man ken tiônnongo la yô. Aluer se de ser Yehova a tese se kwagh u se er ken uma yô, kwagh môm una fatyô u yangen se u civir un sha mimi ga.
Yehova Kor Ior Nav Asange Asange
9, 10. Ka mkor u nyi Pasalmi 91 a tende zwa a mini?
9 Shighe u mbagenev ve soo u tseghan ayol a ve sha ci u Yehova yô, alaghga mhen u ve henen ér vea er isholibo shi vea yina sha ikyaren, shi Yehova una venda ve la, ngu a na i taver ve u eren nahan. Kpa kwagh gema er doo yô, Yehova ka a nenge sha a vese doo doo sha er una kura ikyaryan yase i dedoo vea na yô. De se nenge er i pase kwagh ne ken Pasalmi 91 yô.
10 Pasalmi hii kaan ér: “Or u nan tem ken ijiir i yeren i Uhembansha yô, nana tsa ken mure u Uhembanagee cii. Me kaa a TER mer: U ngu ijiir yam i yeren man iyouutya yam, Aôndo wam u m suur sha a We ne. Gadia ka Wen, Una yima u sha kwar u orhônoninyon” ye. (Ps. 91:1-3) Aluer u nenge yô, Yehova tôndo zwa heen ér una kura mba ve soo un shi ve suur sha a na la. (Ôr Pasalmi 91:9, 14.) Ka mkor u nyi yange Yehova lu ôrono? Yehova yange kura mbacivir un mbagenev mba sha ayange a tsuaa la sha iyol, man sha ashighe kpishi er kwagh ne nahan sha u una kura tsombor u gba u a va mar Mesiya u ityendezwa ker la. Nahan cii kpa, yange i wuhe ior mbajighjigh ken gaadi, shi i na ve atsan kpoghuloo shi Diabolo na i wua ve sha u vihin jighjigh u ve na Aôndo la. (Heb. 11:34-39) Ve zua a ishimataver i i̱ wase ve u wan ishima la, sha ci u Yehova kura ve ken jijingi sha u ve de te mtil ve u sha mimi la kera ga yô. Sha nahan yô, se fatyô u kaan ser Pasalmi 91 ngu ôron kwagh u mkor u ken jijingi.
11. “Ijiir i yeren i Uhembansha” la kanyi, man ka unô Aôndo a kor ve hen ijiir shono?
11 “Ijiir i yeren i Uhembansha” i Orpasalmi a ter la ngi ôron kwagh u mkor u ken jijingi u sha injakwagh. Mba ve tem hen ijiir i yeren i Aôndo yô, ka ve zua a mkor sha hanma kwagh cii kua hen hanma or u nan lu keren u vihin jighjigh ve kua dooshima u ve lu a mi sha Aôndo la. (Ps. 15:1, 2; 121:5) Ka ijiir i yeren, sha ci u mba banen a jighjigh fa i ga. Hen ijiir ne Yehova ka a kura ior mba ve kaan ér: ‘U ngu Aôndo wam u m suur sha a we yô’ la. Aluer se za hemen u lun hen ijiir i yeren ne yô, ishima ia kera nyian se ser Aôndo una venda se, nahan se gba ken to u Satan u a lu “orhônoninyon” la ga.
12. Ka akaa a nyi aa fatyô u vihin ikyaryan yase vea Aôndoo?
12 Ka akaa a nyi aa fatyô u vihin ikyaryan yase vea Aôndoo? Orpasalmi ter akaa kpishi, akaa shon agen yô, ka “bouange u a zenden ken ime . . . [man] mtim u timin sha iyange sha tembe.” (Ps. 91:5, 6) Ior kpishi gba ken hôn u “orhônoninyon” sha u keren u lun sha tseeneke ve. (2 Kor. 11:3) A kôr mbagenev sha hua u eren man iyolgengese kua uyôughyôughmbaakaav mba keren. Mbagenev di a tsume a ve sha ityesen i kwaghaôndo u aiegh man i gbaduen man i sha kwagh u soon tar tsung la. (Kol. 2:8) Shi mbagenev kpishi gba ken hôn u ijimba i eren. Ubombauangev mba ken jijingi mban na ior umiliôn imôngo u kera soon Aôndo ga.—Ôr Pasalmi 91:7-10; Mat. 24:12.
Er u Kura Mdoo u Aôndo a Doo Ú Ishima la Yô
13. Yehova kor se sha akaa aa a fatyô u vihin se ken jijingi la nena?
13 Yehova kor ior nav sha akaa aa a fatyô u vihin ve ken jijingi la nena? Pasalmi kaa ér: “Una wa mbatyomov Nav kwagh sha a we, er ve̱ kuran we sha igbenda you cii.” (Ps. 91:11) Mbatyomov mba shaav mba kor se shi mba nengen sha a vese sha er se fatyô u pasen loho u dedoo yô. (Mpa. 14:6) Dugh mbatyomov sha je kpa, mbatamen mba kôr se sha u i de tsughun se sha mbamhen mba aiev ga yô. Ka ve er kwagh ne sha u haren ityesen ve gbang sha Ruamabera. Ka ve na mba ve lu nôngon u palegh aeren a tar la iwasen asange asange. (Titu 1:9; 1 Pet. 5:2) Shi “wanakiriki u jighjigh man u fan kwagh” ne se kwaghyan u ken jijingi sha u una kura se sha ikyev i ityesen i gbaduen man asaren a ijimbagh man mzenda u zendan inyaregh ityô kua itizan man asaren agen kpishi. (Mat. 24:45) Kanyi i wase ú u palegh ubombaakaav mbagenev mbara?
14. Se fatyô u zuan a mkor hen Aôndo nena?
14 Aluer se soo u lun ken “ijiir i yeren” i Aôndo sha u a na se mkor yô, gba u se er nyi? Gba u se za hemen u kuran ayol a ase sha akaa a aa fatyô u vihin se ken jijingi la, di vough er ka se kura ayol a ase sha er se tôô angev shin se er aikyôr shin mbaaferev vea vihi se iyol ga nahan. Sha nahan yô, doo u hanma shighe se yaren tom a akaa a Yehova a lu tesen se ken ityakerada yase man ken mbamkombo mba tiônnongo man sha mbamkohol sha u kuran se la. Se ker kwaghwan hen mbatamen. Shi anmgbianev asev mba nomso man mba kasev ka vea tese anza a dedoo nahan, i wase se kpishi. Sha kpôô yô, u lun ikyua a tiônnongo la ka a wase se se hingir mbafankwagh.—Anz. 13:20; ôr 1 Peteru 4:10.
15. U ngu a vangertiôr wer Yehova una kura u sha hanma kwagh u una fatyô u vihin ikyaryan you vea na sha ci u nyi?
15 Ityôkyaa i môm ngi i ia na se u henen ser Yehova una kura se sha hanma kwagh u una vihi mlu wase vea na la ga. (Rom. 8:38, 39) A kura tiônnongo sha ikyev i mbaihyomov mba kwaghaôndo man mba patii mba lun a tahav kpishi, mba awashima ve i lu u wuan se keng ga, kpa i lu u vea pav se vea icighan Aôndo wase yô. Ityendezwa i Yehova ne i gbe ken inya ga. I kaa ér: “Hanma ityumugh ki i var sha ci u vihin we iyol, ikyôr ia lagh ki ga.”—Yes. 54:17.
Ka An Nan Ne Se Ian i Eren Kwagh u Se Soo?
16. Tar ne ua fatyô u nan se ian i eren kwagh u sha ishima yase ga sha ci u nyi?
16 Aluer se hingir kwagh u Yehova nahan, se fatyô u eren kwagh u sha ishima yase je he? Kwagh gema er vihi yô, u lun kwagh u tar la una na se lu a lu ken uikyangen. Yehova tile paleghaa a tar ne shi aôndo u vihin tu u a hemen u la kôr ior ikpan. (Yoh. 14:30) Ikyav i tesen yô, tar u Satan na inyaregh taver kpishi u zuan a mi, nahan ú na ior hingir u lun ken uikyangen. (Nenge Mpase 13:16, 17.) Shi isholibo ngi a tahav mbu tsughun ior, geman ve hingir ikpan i i̱. (Yoh. 8:34; Heb. 3:13) Shin er alaghga mbananjighjighga vea kaa ér u peren atindi a Yehova la ne se u eren kwagh sha ishima yase nahan kpa, ka i ngôôr ga tsô nyityô or u nan ongo imba ityesen la nan hingir kpan u isholibo shi nan er a uma u nan dang dang kpaa.—Rom. 1:24-32.
17. Ka mlu u ken uikyangen ga u nyi Yehova a ne se?
17 Sha gbenda ugen di yô, aluer se na ayol a ase hen Yehova yô, una wase se se kera lu ken nyityô ikyangenev mbi mbia fatyô u vihin se iyol ga. Se fatyô u tôôn kwagh ne karen sha or u nan gbe angev mbu mbua fatyô u wuan nan, kpa nan gem nan har uma u nan sha or u nan fe twersôron tsembelee ér nana sôr nan angev mbu shon yô. Se cii se gba bouange u isholibo u mbamaren asev ve tsar se la. Saa se wa ayol a ase sha ikyev i Yehova, se na jighjigh ken nagh ku Kristu ve, se fatyô u lun a ishimaverenkeghen i hemban tahav mbu isholibo shi va lun uma gbem sha won ye. (Yoh. 3:36) Aluer se za hemen u henen sha kwagh u Yehova yô, se seer nan un jighjigh, di vough er ka sea fa ser ma ortwer nan fa twersôron tsembelee ve se seer nan jighjigh ser nana er se twer tsembelee nahan. Sha nahan yô, doo u se za hemen u henen Mkaanem ma Aôndo zulee. Aluer se er nahan yô, kwagh la una wase se se soo un sha gbenda u se kera lu a mciem u hingir kwagh na ga yô.—1 Yoh. 4:18.
18. Ka injar i nyi mba ve hingir kwagh u Yehova la vea zua a mini?
18 Yehova na hanma or cii ian i tsuan u eren kwagh u nan soo yô. Mkaanem nam kaa ér: “Tsuwa uma sha er ú lu uma, we a tsombor wou; er TER, Aôndo wou, A̱ doo u ishima” yô. (Dut. 30:19, 20) A soo ér se tese ser se soo kwagh na a ishima yase. Aluer se hingir kwagh u Aôndo sha ci u kwagh na doo se ishima yô, se zua a msaanyol, nahan se kera lu ken uikyangen ga.
19. U hingir kwagh u Yehova la ka mhôônom ma zungwen ma Aôndo sha ci u nyi?
19 Er se lu ior mba eren isholibo yô, ityôkyaa je kpa se mba a mi i hingir kwagh u Aôndo u a lu vough la ga. Ka sha mhôônom ma Aôndo tseegh kwagh una fatyô u eren nahan ye. (2 Tim. 1:9) Sha nahan yô, Paulu nger wener: “Shin sea lu uma, kpa ka sha ci u Ter se lu uma ye, shin sea kpe kpaa, ka sha ci u Ter se kpe ye, nahan yô, shin sea lu uma shin sea kpe kpaa se mba kwagh u Ter.” (Rom. 14:8) Mayange afanyô nga a se va vaa ken hemen ser yange se hingir kwagh u Yehova ga.
Ú Na Mlumun Wer Nyi?
• Ka akaa a nyi a lu mbamtsera mba hingir kwagh u Yehovaa?
• Se mba ker cio u eren kwagh u Aôndo a soo hen a vese sha ci u nyi?
• Yehova kor mbacivir un nena?
[Mbampin Mba Ngeren u Henen]
[Ufoto u sha peeji 8 la]
Pine mbagenev ve pase u mtsera u ve zough a mi sha u hingir kwagh u Yehova la
[Foto u sha peeji 10 la]
Ka sha igbenda igen i nyi nahan Yehova a kor se?