Ú Nengen Wer Yehova Ka Teru Kpa?

“TERE, tese se u eren msen.” Zum u môm ken mbahenen mba Yesu pine un mpin la yô, a kaa ér: “Zum u nea eren msen yô, kaa nen ner: Tere, i̱ tsegha iti You.” (Luka 11:1, 2) Yesu yange una soo yô ma yilan Yehova sha atiatom a vesen, er “Uageegh” man “Ortesen Uhembancii” man “Orgban” man “Or u tsan sha won” kua “Tor u tsôron” nahan. (Gen. 49:25; Yes. 30:20, NW; 40:28; Dan. 7:9; 1 Tim. 1:17) Nahan kpa, Yesu gema tsua u yilan Yehova ér “Ter.” Sha ci u nyi? Alaghga tsô lu sha ci u Yesu yange soo ér se kporom ikyua a Or u hemban sha won cii vough er wanye u kiriki ka nan kporom hen ter u nan u lun a dooshima nahan.

Nahan kpa, ka i taver mbagenev kpishi u henen ér Aôndo ka Ter ve. Kwasekristu ugen, mba yer un ér Atsuko, * a kaa ér: “Yange m er batisema anyom kar imôngo je kpa taver mo kpishi u kporom hen Yehova shi lamen a na ken msen er ka terem nahan.” Atsuko pase ityôkyaa i i ne ve i taver un u nengen ér Yehova ka Ter na yô, a kaa ér, “Me fatyô u umbur kwa u masetyô u terem u sha marami yange tesem dooshima jighilii ga.”

Ken ashighe a ican a ayange a masejime ne, “dooshima” u ma wan nana soo er ter u nan a tese nan la ban kpishi je. (2 Tim. 3:1, 3) Ka nahan ve ka i lu ior kpishi ken ishima vough er Atsuko nahan ye. Nahan kpa, doo se kpishi u fan ser, se mba a atôakyaa a nengen Yehova ser ngu Ter wase u lun a dooshima.

Yehova Ka Orkoson Se u Lun a Dooshima

Aluer se mba nengen Yehova ser ka Ter wase yô, gba u se fa kwagh na vie vie. Yesu kaa ér: “Ma or fa Wan ga, saa Ter tseegh, man shi ma or fa Ter kpaa ga, saa Wan, man shi hanmô u Wan [a] we ishima u pasen nan yô.” (Mat. 11:27) Gbenda u hemban doon u fan imba Ter i Yehova a lu yô, ka u henen sha kwagh u Yesu a pase se sha kwagh u Aôndo u mimi la. Tsô Yesu yange pase nyi sha kwagh u Tere?

Er Yesu nenge ér ka Yehova a lu Imbor i uma na yô, a kaa ér: “M [ngu] uma ken Ter.” (Yoh. 6:57) Se kpa ka Ter a ne se uma ye. (Ps. 36:9; Aer. 17:28) Lu nyi i na ve Yehova na mbagenev uma? Lu dooshima mgbegha un gaa? Er Ter wase u sha la a ne se iyua ne yô, doo u se kpa se soo un.

Gbenda u vesen u Aôndo a tese uumace dooshima yô, ka nagh ku ipaan ku yange na sha Yesu la. Nagh ku ipaan la na yô, hingir u uumace mba asorabo mban kpa vea fatyô u yan ikyar vea Yehova kangenaa ken Wan na u ishima ishima la. (Rom. 5:12; 1 Yoh. 4:9, 10) Shi er Ter wase u sha la a kur uityendezwa nav yô, se fatyô u lun a vangertiôr ser, ica a gba ga tsô mba a doo ve ishima shi ve ongo un cii vea ember “mlu u engem u lun a ikyangenev ga u ônov mba Aôndo la.”—Rom. 8:21.

Shi hanma iyange yô, Ter wase u sha la ngu a “er iyange Na i̱ due i̱ ta sha” a vese. (Mat. 5:45) Taver u kaan ér saa se er msen keng ve Aôndo una na iyange ia due ye. Kpa kwagh gba se a iyange, shi mtsee u i̱ la kpa ngu a doo se kpishi. Heela tseegh ga, Ter wase ka or u koson se u hemban cii, gadia a fa akaa a kwagh a gbe se a mi la je er se lu a sôn un ga la. Nahan yô, doo u se tôô shighe se hen sha gbenda u Ter wase u sha a nengen sha akaa a á gbe la aa iwuese ga he?—Mat. 6:8, 26.

 Ter Wase Ka “Orkuran u Lun a Mhôônom”

Profeti Yesaia yange kaa a ior mba Aôndo ér: “Shin iwo ia kar kera, man agungu kpaa aa kpegher nahan kpaa, erdoo Wam a we yô, una kar hen a we kera ga; ikyuryan Yam i bem kpaa ia kpegher ga, kape Yehova, Orkuran ne u lun a mhôônom, A kaa la.” (Yes. 54:10, The Bible in Living English) Msen u Yesu yange er hen tugh nav mbu masetyô shin tar la tese ér sha mimi je Yehova ka “Orkuran u lun a mhôônom.” Yesu yange er msen sha ci u mbahenen nav ér: “Mba shin tar ne heregh; Mo yô, M ngu van hen We, Icighan Ter. . . . kuran ve ken iti You.” (Yoh. 17:11, 14) Nahan Yehova ngu kuran mbadondon mba Yesu zan zan nyian.

Gbenda môm u Yehova a kor se sha ikyev i uhôn mba Satan nyian yô, ka u nan se kwaghyan u ken jijingi u sha ashighe ashighe sha ikyev i “wanakiriki u jighjigh man u fan kwagh.” (Mat. 24:45) Aluer se soo u ‘huwan ikyav mbi utyav mbi Aôndo cii iyol’ yô, gba hange hange u se yaan kwaghyan u a ne se agee ne. U tesen ikyav yô, hen ase sha kwagh u “jighjigh u nan” u se fetyô “u pirin avaan a usu a orbo . . . a mi cii” la. (Ef. 6:11, 16) Jighjigh u nan wase la kor se sha akaa a vihin mlu wase u ken jijingi la, man kwagh ne tese tahav mbu Ter wase a kor se a mi la.

Se seer kaven mhôônom ma Ter wase u sha la sha u timen sha gbenda u Wan u Aôndo yange eren uma na shighe u lu shin tar la. Ver ishima sha kwagh u i nger ken Marku 10:13-16 la. Ken ivur la, i ôr kwagh u Yesu yange ôr a mbahenen nav yô, ér: “De nen mbayev mba kiriki, ve̱ va her a Mo.” Mbayev mba kiriki mbara mba ve hen Yesu yô, a kuve ve shi a ver ve doo doo kpaa. Sha kpôô yô, yange a saan ve iyol kpen kpen! Shi er Yesu a kaa ér: “U nan nenge a Mo yô, nan nenge a Ter je ve” yô, se fa ser Aôndo u mimi soo ér se va hen a na.—Yoh. 14:9.

Yehova Aôndo ka Imbor i dooshima u been mayange ga. Ngu Orkoson se u hemban cii, kua Orkuran se u a fatyô u tôôn un karen sha ma orgen ga, u a soo ér se kporom hen a na yô. (Yak. 4:8) Sha nahan yô, Yehova ka Ter u hemban doon je ka u tunan ga!

Se Mba Zough a Iwasen Kpishi!

Ka sea suur sha Yehova ser ka Ter wase u sha u lun a dooshima man u zungwen mhôônom yô, se zua a iwasen kpishi. (Anz. 3:5, 6) Yesu yange zua a iwasen sha u suur sha Ter na a ishima na i môm. Kristu yange kaa a mbahenen nav ér: “M ngu tswen ga kpa ka Mo vea Un u A tindim la.” (Yoh. 8:16) Hanma shighe yô Yesu luun a vangertiôr ér Yehova una wase un. U tesen ikyav yô, shighe u i lu eren Yesu batisema la, Ter na ôr kwagh a na kundu kundu u tesen ér un ngu a na. A kaa ér: “Ngun ka Wan Wam u ishima ishima, u i doom a Na yum yô.” (Mat. 3:15-17) Shi cii man Yesu kpe la, a yila sha imo i taver ér: “Tere, M na jijingi Wam sha ikev You.” (Luka 23:46) Mayange Yesu gba uwer u suur sha Ter na ga.

Se kpa se fatyô u eren nahan. Er Yehova a te ikyaa a vese yô, shi kanyi je se ciaa? (Ps. 118:6) Yange hoghol Atsuko u se vande ôron kwagh na la u suur sha tahav nav shighe u a tagher a mbamzeyol yô. Nahan kpa, kwase ne hii u henen kwagh u uma u Yesu man tom na u pasen kwagh la, man yange hemba veren ishima sha ikyar i kangenaa i Yesu ya vea Ter na u sha la. Nahan lu nyi i due kere? Atsuko kaa ér: “Yange m hen m fa inja i u or lun a Ter shi suur sha nan la.” Shi a seer wener: “M zua a msaanyol man bem u mimi. Sha kpôô yô, ityôkyaa ngi i ishima ia nyian se sha ma kwagh ga.”

Aluer se nenge ser Yehova ka Ter wase nahan, kwagh la una seer wasen se nena? Mbayev ka ve soo mbamaren vev shi i doo ve u eren ishima ve kpaa. Dooshima yange mgbegha Wan u Aôndo u “eren akaa a doon Un gbem.” (Yoh. 8:29) Aluer se kpa Ter wase u sha la doo se ishima yô, se eren kwagh sha kwaghfan shi se “sughun” un gbem.—Mat. 11:25; Yoh. 5:19.

Ter Wase ‘Kôr Uwegh Asegh ku Yanegh’

Ter wase u sha shi na se “Orsurunshima,” ka icighan jijingi je la. Yesu kaa ér icighan jijingi una “za a ven ken mimi cii.” (Yoh. 14:15-17; 16: 12, 13) Icighan jijingi u Aôndo una hemen se sha ci u fan Ter wase tsembelee. Icighan jijingi una wase se u yôhôr “ayou a utya,” inja na yô, ka u kuren ikyaa sha kwagh a u vanden kaven i tsembelee shio shin mbamhen mba kpeghee, gayô mbamnenge mba shami ga je la, nahan ‘se haa hanma mhen abata sha u a̱ wa Kristu ikyo’ yô. (2 Kor. 10:4, 5) Nahan yô, se sôn nen Yehova a na se “Orsurunshima” u i tende zwa la, shi se lu nen a vangertiôr ser ‘Ter wase u A lu Sha la Una na mba ve sen Un la Icighan Jijingi’ na. (Luka 11:13) Shi ka a inja u se sônon ser icighan jijingi a wase se se seer kporom hen Yehova.

Wanye u kiriki ka nana zenden ikyooso ikyooso vea ter u nan yô, nan kera cie kwagh ga shi ka nan nenge ér kwagh u eren nan ngu ga. Aluer mimi je u nenge wer Yehova ka Ter u yô, u fatyô u lun a vangertiôr ken mkaanem ma surun ishima man. Ma kaa ér: “Mo, TER, Aôndo wou, M kôr uwegh ough ku yanegh; M kaa a we Mer: De cie ga, M wasen we.” (Yes. 41:13) Ú fatyô u zuan a ian i vesen i “zenden” vea Aôndo gbem sha won. (Mika 6:8) Za hemen u eren ishima i Yehova tsô u zua a dooshima man iember kua mkor u a lu ken u nengen Yehova wer ngu Teru la.

[Ngeren u shin kpe]