Ikyagh ki Tomough ki Wasen Agumaior u Umbur Orgban Ve

ORFANKWAGH Solomon yange nger kwagh anyom kar 3,000 hegen, a kaa ér: “Umbur u A gbe u la sha ayange a iyev ou.” (Orpa. 12:1) Agumaior a ken Kristu zua a ikyagh ki tomough ki genegh hegen ki kia wase ve u eren kwagh la yô. Yange i due a takerada u i yer ér Questions Young People Ask—Answers That Work, Tihi u sha 2 la sha Mkohol u Vesen u Mbashiada mba Yehova, u lu a itinekwagh ér “Jijingi u Aôndo a Hemen We” la (Takerada shon ka u ken zwa Buter). Yange i er mkohol ne tar sha won cii, hii ken May 2008 zan zan Janawari 2009.

Mbahemenev mba Shin Tine nger agumaior washika ken atô u igbende i sha ishi i takerada ne. Vegher ugen u washika shon kaa ér: “Se mba eren msen tsung ser akaa a i er ken takerada ne a wase ú sha er ú hemban mbamkighir man ameen a agumaior nyian a tagher a mi la, shi a tese ú er ú er ve ú fatyô u eren akaa sha ishima i Aôndo kpaa yô.”

Mbamaren soo ér vea yese ônov vev “sha mkôôm man kwaghwan u Ter.” (Ef. 6:4) Nahan kpa, shighe u mbayev kpishi ka vea hian a hia la, ka ve lu a fa kwagh u ve lu sha mi jighilii ga, nahan ve soo ér i waan ve kwagh. Aluer u ngu ormaren u lun a wan u nan lu hian yô, u wase wan wou la una hemba zuan a iwasen ken takerada ne nena? Se due a mbamhen mbagenev sha kwagh ne shin heen.

▪ Zua a kôpi wou u takerada ne shi fa kwagh u i nger ker la tsembelee. Kwagh ne hemba u gban ôron u tseegh tsô la. Nôngo u fan gbenda u i ôr akaa ker la. I er takerada ne sha gbenda u ua tsaase mbayev vea lu a “mkav u ken ishima” yô, a u gban ôron ve mkposo u kwagh u dedoo man kwagh u bo tseegh tsô la. (Heb. 5:14) Shi takerada ne na ve mbamhen er vea er ve vea tile dông sha ci u kwagh u mimi yô. Ikyav i tesen yô, Ityough ki sha 15 ki ki lu a itinekwagh ér “Me Er Nan Ve Me Palegh Mkighir u Mbakovo?” la, ôr kwagh hemba di u kaan a agumaior ér a hen u kaan ér ei tseegh tsô la. Ityough kira tese igbenda i vea fatyô u yaren tom a Bibilo man mbamlumun mba vea wase ve vea fa u ‘ôron kwagh a hanma or’ u nana soo u kighir ve yô.—Kol. 4:6.

▪ Yar tom a mbampin mba takerada ne u pin or u ôron, mba i gbe u nana na mbamlumun sha mi la. Shin er mbampin mban ve lu sha ci u agumaior nahan kpa, er nan we kpa u nger mbamlumun sha mbampin mban ken kôpi wou shighe u i doo u ú er  nahan yô ga? * Ikyav i tesen yô, zum u ú lu timen sha mbampin mbauhar mba ve er kwagh u ishiôr, ve lu sha peeji 16, mba i gbe u or u ôron nana na mbamlumun sha mi la yô, nôngo umbur er yange i lu u shighe u ú lu er wan wou la. Alaghga hen ajiir a i undu aan her la, u fatyô u ngeren mbalumun sha mbampin mbara sha gbenda u wea lu wanye kpa ma u nger nahan la. Nahan u fatyô u pinen iyol you wer: ‘Mbamnenge av sha itinekwagh ne gema ken anyom aa a kar ne nena? Ka kwaghfan u nyi m zough a mi hii shighe u m lu hian a hia la je, shi me fatyô u tesen wan wam kwaghfan shon tsembelee nena?’

▪ Tese icivir sha akaamyer a wan wou u a lu hian a hia la. Avegher a takerada ne u pin mbampin mba i gbe u or u ôron nana na mbamlumun sha mi la, i er avegher shon sha gbenda u aa mgbegha wan wou u ngeren kwagh sha itinekwagh i í er kwagh sha mi la shin takerada na, shin una hen kwagh sha itinekwagh shon ken ishima. Awashima wou yô ka u fan kwagh u a lu wan wou ken ishima la, ka u nôngo wer u fa akaamyer a á nger shin takerada na la ga. Takerada ne due a mhen sha ci u mbamaren ken ngeren u a lu sha peeji 3, u a lu a itinekwagh ér “Kwaghwan sha ci u Mbamaren” la ér: “Aluer u taver mbayev ou ishima ve nger mbamlumun vev mba mimi mbara shin takerada ve yô, u lu tesen icivir sha akaamyer a ve. Shighe una karen yô, alaghga ve ayol a ve vea ôr u akaa a ve nger shin takerada ve la.”

Takerada u Henen Bibilo a mi hen Tsombor

Young People Ask, Tihi u sha 2 la ka takerada u injaa u a fatyô u yaren tom a mi ken Mcivir u hen Tsombor yô. Er i pin mpin sha hanma ikyumhiange ken takerada ne ga yô, u yar tom a u nena? Er nan u ker gbenda u hemban doon cii u ú yar tom a mi u henen kwagh a mbayev ou ga?

Ikyav i tesen yô, alaghga icombor igen ia soo u karen iyol shighe u i lu henen kwagh u “Er u Wa Agoyol sha Mkighir u Mbakov Yô,” sha peeji 132 man 133 la. Alaghga mpin u hiihii la una wase wan wou u nomso shin u kwase u fan mkighir u nana tagher a mi ve a hemba taver nan la. Mpin u sha uhar la di tese shighe u alaghga nana tagher a mkighir shon yô. Ne timen sha akaa a aluer wan wou er ishima i mbakov shin a er ishima ve ga ve aa due ker la yô, u fatyô u pinen un er una lam paase paase shin una pase mtil na, gayô una ôr mbakov kwagh u kôron ve ken ishima shighe u ve soo u kighir un yô. Wase wan wou u nomso shin u kwase a fa u duen a mhen sha kwagh shi a wa iyol sha mbamlumun mba a lu un ican u nan ga shi una na ve a vangertiôr kpaa yô.—Ps. 119:46.

Ikyagh ki Tomough ki Wasen Mbayev u Lamen Vea Mbamaren Vev

Young People Ask, Tihi u sha 2 la taver mbayev asema ér ve lamen vea mbamaren vev. Ikyav i tesen yô, ngeren u a lu a itinekwagh ér “Me Lam a Baba shin Mama sha Kwagh u Yavaor Nena?” (peeji 63-64) man u a lu a itinekwagh ér “Lamen a  Mbamaren Ou!” (Peeji 189) la, ve due a mbamhen mba injaav sha gbenda u hiin kwaghôron a ormaren sha atineakaa a á biishi a kwagh u yavaor yô. Wanyekwase ugen u a lu anyom 13 yô nger wener: “Takerada ne taver mo ishima u lamen a mbamaren av sha akaa a a lum ken ishima la, kua akaa a yange m er la je kpaa.”

Takerada ne tese igbenda igen i lamen kpaa. Ken mkur u hanma ityough cii, ngeren u kiriki ugen ngu her u a lu a itinekwagh ér “U Nenge Nena?” yô. Ngeren ne ngu sha u saven timen sha akaa a i hen la tseegh ga, kpa tsombor ua fatyô u yaren tom a atôakaa a ngeren ne shighe u ú lu lamen imôngo yô. Ngeren u kiriki ugen ngu ikyua a mkur u hanma ityough u a lu a itinekwagh ér “Kwagh u Ú We Ishima u Eren Yô!”. Ngeren ne ngu a ijiir i agumaior aa fatyô u ngeren igbenda jighilii i vea kar sha mi ve vea dondo kwagh u ve hen ken ityough kira yô. Vegher u masetyô u hanma ngeren u “Kwagh u Ú We Ishima u Eren Yô!” la kaa ér: “Kwagh u m soo mer me pine ormaren shin mbamaren av sha itinekwagh ne yô ka . . . ” Kwagh la una wase mbayev u keren kwaghwan u injaa hen mbamaren vev.

Ôr Kwagh u Una Kôr Mbayev ken Ishima Yô!

Er u lu ormaren yô, awashima wou ka u ôron kwagh u una kôr wan wou ken ishima yô. Young People Ask, Tihi u sha 2 la una wase ú u eren kwagh ne. Nenge ase er ter ugen yange yar tom a takerada ne sha u seer lamen iliam i kôron ken ishima vea wan na u kwase yô.

“Mo man Rebekah se mba a ajiir a ka se soo u zenden shin nahan ikyekye gayô nahan mato zan her yô. M nenge mer ahumbe a man nahan ne ka a na un ian i ôron mo kwagh u a lu un ken ishima la.

“Vegher u hiihii u takerada ne u̱ yange se hii henen yô lu washika u Mbahemenev mba Shin Tine man “Kwaghwan sha ci u Mbamaren.” Er i tese sha peeji 3 nahan, yange m soo mer wan wam u kwase a fa ér una fatyô u ngeren hanma kwagh u a lu un ken ishima cii shin takerada na. M keren u fan kwagh u a nger shimi la ga.

“Yange m na Rebekah ian i tsuan mtom ma a soo ér se hen la kua gbenda u a soo ér se hen ma la kpaa. Môm ken mtom ma hii tsuan yô lu ki ki kaa ér ‘Doo u Me Er Anumbe a sha Kômputaa?’ la. Mayange m hen mer una tsua itinekwagh la cuku ga! Nahan kpa, gema lu a ityôkyaa i i na ve tsua itinekwagh shon yô. Azende na kpishi eren anumbe a ipila sha kômputa. Yange m fa cuku mer ipila man iliam i dang ngi ken iniumbe la ga! Kpa kwagh ne cii due ken igbar shighe u se hen “Kwagh u Ú We Ishima u Eren Yô,” u a lu sha peeji 251 la yô. Ngeren la wase Rebekah u wan iyol sha mlumun u una na hanma or u nana soo u kighir un sha u a er iniumbe la yô.

“Hegen Rebekah kera yeren mo kwagh u a nger shin takerada na ga. Ka sea henen kwagh yô se za hemen u lamen ayol a ase. Ka m ôr, mea been yô un di kpa a ôr, shi ka a soo u lamen sha hanma kwagh cii, kua ufoto man ngeren mba kiriki kpaa. Kwagh ne ka a nam ian i pasen un er yange i lum shighe u m lu er un nahan la, shi un di kpa a ôrom er akaa a lu nyian yô. Ka a soo u ôron mo hanma kwagh!”

Aluer u ngu ormaren yô, yange i due a takerada ne nahan doo u je ka u tunan ga. Hegen u ngu a ian i yaren tom a u doo doo. Awashima u Mbahemenev mba Shin Tine yô ka u Questions Young People Ask—Answers That Work, Tihi u sha 2 la a lu tsombor wou a iwasen. Yô, takerada ne u wase hanma or cii, hemban je yô agumaior a ase a doon se ishima kpishi ne u zan hemen u ‘zenden sha icighan jijingi.’—Gal. 5:16.

[Ngeren u shin kpe]

[Ngeren u kiriki u a lu sha peeji 30 la]

Kwagh u Ikyaior Igen i Lu Ôron Yô

“Takerada ne ka takerada u ú doo u or nana ôr, nana time sha kwagh u nan lu ôron la shi nana nger atôakaa a nan er la shin inya kpaa yô. I er u sha er or nana fatyô u gbidyen kwar sha mi sha tseeneke u nan,sha er nana tsua akaa a nana er ve uma u nan una hemba doon yô.”—Nicola.

“Ior ka ve shi kighir mo ér m lu a ishiôr, man ka i lu kwagh u dedoo je mbagenev ken a ve ve keren sha ci wam ye. Vegher u hiihii u takerada ne wasem u kaven mer, aluer or a ôr nyi kpa, ka a kuma u me lu a ishiôr ga.”—Katrina.

“Ngeren u a kaa ér ‘Kuma Ú u Eren Batisema Vee?’la wasem u hemban nengen batisema wam mer ka beerkwagh ga cii. A mgbegham u hiden nengen sha gbenda u m henen kwagh shi m eren msen la.”—Ashley.

“Shin er mbamaren av ve tesem hii shighe u m lu iyev la je nahan kpa, takerada ne wasem u henen sha akaa a a doo u me er ken uma wam yô iyol yam. Shi u wasem u hemban lamen a mbamaren av gbar gbar cii.”—Zamira.

[Foto u sha peeji 31 la]

Mbamaren, ôr fa nen kwagh u i nger ken takerada ne tsembelee

[Foto u sha peeji 32 la]

I lu gbashima wen u ôron kwagh u una kôr mbayev enev ken ishima yô