Mbampin mba Mbaôron Takerada Ne Ve Pin La

Ka atôakyaa a nyi nahan aa na ve alaghga a gba u a hide a er or batisemaa?

Alaghga atôakyaa agen aa na yô, or u i vande eren nan batisema nana nenge ér batisema u nan la ngu a inja ga, nahan nana soo ér i kimbir eren nan batisema. U tesen ikyav yô, adooga shighe u yange i er or batisema la, nan lu eren aferakaa ken myer, aa luun er nan vande eren batisema kera yô, ma i dugh nan ken tiônnongo kera yô. Or la nana fatyô u tseghan iyol i nan hen Aôndo ken imba mlu laa? Luun er imba or la yange nan de ieren i nan i Ruamabera a vende la cii ve nan tsegha iyol i nan yô, iyoltseghan la ma i lu i sha inja. Sha nahan yô, alaghga or u yange i er nan batisema zum u nan lu eren kwaghbo u vesen la, nana hide a hen sha mi zulee, nahan nana nenge ér gba hange hange u nana kimbir eren batisema.

Or u yange i er nan batisema shighe u nan lu eren isholibo ga, kpa nan va er kwaghbo u a kom u kômatii u ôron ijir una tema a nenge sha mi di ye? Aluer nan kaa ér yange nan kav kwagh u nan lu eren shighe u i er nan batisema la tsembelee ga di ye? Zum u mbatamen ve tem vea or u nan er kwaghbo la yô, ve de er kwagh u tesen ér ve nenge ér batisema u nan la ngu a inja ga ze, shi ve de pin nan mnenge u nan sha kwagh u iyoltseghan man batisema u nan ga. Kera ga je kpa, yange nan ungwa kwaghôron u pasen mluainja u batisema, u a har sha Bibilo yô. Shi nan na mbamlumun gbar gbar sha mbampin mba sha kwagh u iyoltseghan man batisema u eren la. Shi nan za musan akondo, i mir nan shin mnger. Sha nahan yô, ka a inja u nan jighjigh ér yange nan kav er kwagh u nan lu eren la lu beerkwagh ga yô. Nahan mbatamen vea nenge sha kwagh u nan, vough er ka i nenge sha kwagh u mba ve er batisema nahan.

Aluer or la nan kaa ér batisema u nan la ngu nan a inja ga yô, mbatamen ve tese nan kwagh u i er ken Iyoukura (zwa Buter) i Maaci 1, 1960, peeji 159 man 160 la, kua i Febewari 15, 1964, peeji 123 zan zan 126, ape i er kwagh u or kimbir eren or batisema vighe vighe la. Aluer or soo u kimbir eren batisema sha ci u atôakyaa agen, (er alaghga yange nan lu a mfe u Bibilo sha shighe u i er nan batisema la tsembelee ga nahan yô), ngula ka kwagh u nana tsua iyol i nan yô.

Ka akaa a nyi nahan i doo u Mbakristu vea gbidye kwar sha mi sha kwagh u u̱ tsan ijiir i môm vea mbageneve?

Hanmaor soo u lun a ijiir i tsan. Nahan kpa, ior kpishi nyian mba a uya vev ayol a ve ga. Mlu u inyar u or shin gbong gbong u nan gayô atôakyaa agen aa na yô, alaghga a gba u tsombor u nan kua anmgbianev mba nan mba sha ter kpaa vea tsaan imôngo. Ken ityar igen yô, anmgbianev mba sha ngô man mba sha ter cii ka ve kohol ve njoghol ken iyou i môm, nahan i hingir ican u zuan a ian eren kwagh ken iuv.

Ka tom u nongo u Yehova u ngeren atindi kpuun sha kwagh u ajiir a tsan a vough sha ci u hanmaor ken tiônnongo sha tar cii ga. Doo u Mbakristu vea hen sha akaawan a Bibilo sha er aa wase ve u fan aluer Aôndo lumun a imba ijiir i ve tse la man or u ve tse vea nan la kua gbenda u ve eren a ijiir ve la kpaa yô. Akaawan shon agen kanyi?

 Kwagh u vesen u i gbe u se hen sha mi yô, ka er mlu wase vea mbagenev mba se lu hen ya môm a ve la una bende a vese shi una bende a mlu wase u ken jijingi la. Ior mba se lu a ve imôngo hen ya la ka unô ioro? Ka ior mba civir Yehovaa? Mba dondon atindi a Bibilo ken uuma vev kpa? Apostoli Paulu nger ér, “De tsughun nen ayol a en ga, ujende mba bov mba vihin mbamlu mba dedoo.”—1 Kor. 15:33.

Bibilo pase ér Yehova venda ijimba man idya i eren. (Heb. 13:4) Nahan nyityô ijiir i tsan i a gba u nomsoor vea kwase mba ve vese ayol a ve ga vea tsaan imôngo er ka nom man kwase nahan cii, ia doo Aôndo ga je ka u henen a hen ga. Orkristu nana soo u lun hen ijiir i í eren idya shin ijimba ga.

Heela tseegh ga, mba ve soo ér Aôndo a lumun ve la cii Bibilo wa ve kwagh ér ve̱ ‘yevese idya.’ (1 Kor. 6:18) Sha nahan yô, ka a inja u Mbakristu vea palegh nyityô ijiir i vea tsaan ve vea tagher a imeen i eren idya la cii. U tesen ikyav yô, tôô ase wer Mbakristu kpishi mba tsan hen ya môm. Kwagh ne una fatyô u nyôron a ve ken kwaghboo? Man gema shighe u kwase man nomsoor mba ve vese ayol a ve ga ve va hingir u lun hen ya ve tseegh, sha ci u ior mbagenev mba hen ya ga di ye? Kape kwase man nomsoor mba ve lu sôôr a sôôr ayol a ve la kpa vea lu hen ya môm ve, vea lu tsenen ayol a ve sha kwaghbo je la. Ka ieren i sha kwaghfan u palegh imba ijiir i tsan la.

Shi mba ve pav ivaa kpa, aluer ve za hemen u lun hen ya môm yô, a lu shami ga. Er i vande hoghol ve a mlu u kwase man nom la yô, vea ngôôr nyôron iyol ken ieren i ijimbagh ga.—Anz. 22:3.

Kwagh u hange hange u masetyô u i gbe u or nana lu a mi ken ishima yô, ka mnenge u ior mba hen haregh la vea nenge kwagh u nan tsough u eren la. Aluer Orkristu ngu tsan mape man ior hingir u lamen sha mi geseghee yô, doo u nana wa ikyo sha kwagh la, aluer nan nenge ér mtse u nan hen ijiir la ngu vough je kpaa. Mayange se soo ser ieren yase i va a ilyahan sha iti i Yehova ga. Apostoli Paulu yange nger ér: “De ne nen Mbayuda anzughul ga shin Mbagrika shin nongo u Kristu u Aôndo kpaa ga, di er mo kpaa, ken hanma kwagh cii m eren kwagh u doon ior cii nahan, gadia ka mtsera wam iyol yam m lu keren ga, kpa ka u mbagenev kpishi sha u ma ve war yô.”—1 Kor. 10:32, 33.

Mba ve soo u kuran atindi a perapera a Yehova yô, alaghga a lu ve ican u zuan a ijiir i tsan, i í doo sha ci u Orkristu yô. Nahan kpa, gba u Mbakristu vea ‘Karen vea faan kwagh u a doo Ter ishima yô.’ Gba u vea nenge ér ma kwagh u hôngorough ngu zan hemen hen uya vev ga. (Ef. 5:5, 10) Sha nahan yô, doo u Mbakristu vea er msen hen Aôndo sha er una hemen ve yô, shi vea er hanma kwagh u ve fetyô cii sha u kuran anmgbianev vev sha akaa a aa hôngor ve la kua akaa a van a ilyahan sha iti i dedoo i Yehova la kpaa.