Yar Tom A “Sanker U Jijingi” Tsema Tsema
Yar Tom A “Sanker U Jijingi” Tsema Tsema
“Tôô nen . . . sanker u Jijingi, ka mkaanem ma Aôndo je la.”—EF. 6:17.
1, 2. Doo u se er nyi sha mgbe u kwagh a hembe gban sha mbapasenkwagh u Tartor nee?
YESU yange nengen a ikpelaior i i lu ken ibanave i ken jijingi la yô, a kaa a mbahenen nav ér: “Sunda ngee je, kpa mbasundan yô, mba di kpeghee tsô. Nahan yô, sôn nen Ter u sunda, A̱ tindi mbatomov ken sunda Na.” Yesu ôr kwagh ne sha ityumbuzwaagh tseegh ga. Yange er mkaanem mara been yô, “a yila mbahenen Nav mba pue kar uhar mbara,” a tindi ve ér ve za er tom u pasen kwagh shin tom u “sunda.” (Mat. 9:35-38; 10:1, 5) Shighe kar yô, Yesu “ver mbagenev akunduatargber, tindi ve uhar uhar” ér ve kpa ve za er tom shon.—Luka 10:1, 2.
2 Kape nyian kpa kwagh a hembe gban sha mbapasenkwagh u Tartor je la. Iyenge i mba yange ve va mkombo u M-umbur tar sha won cii ken inyom i tom i 2009 la yô lu iorov 18,168,323. Ingyegh kin hemba iyenge i Mbashiada mba Yehova jimin cii je hemba miliôn 10. Sha kpôô yô, iyiav mbi ken ishule via kuma u sundan. (Yoh. 4:34, 35) Sha nahan yô, se er nen msen se sôn mbatomov. Kpa se er kwagh u zuan sha msen wase la nena? Se er kwagh ne sha u eren tom u pasen kwagh u Tartor shi geman ior hingir mbahenen ne tsema tsema man sha gbashima kpaa.—Mat. 28:19, 20; Mar. 13:10.
3. Jijingi u Aôndo eren tom u vesen sha u wasen se u seer fan tom u pasen kwagh nena?
3 Se vande henen ken kwaghhenen u a kar la er i lu jijingi u Aôndo u a hemen se la a wasen se u “ôron kwaghôron u Aôndo vangertiôr” yô. (Aer. 4:31) Jijingi la shi una wase se u lun mbafantom. Gbenda môm u se fatyô u seer fan u pasen kwagh yô, ka u yaren tom a ikyagh ki tomough ki Yehova Aôndo a ne se la tsembelee, ka Bibilo i i̱ lu Mkaanem nam je la. Lu sha ikyev i icighan jijingi i nger Bibilo ye. (2 Tim. 3:16) Ka Aôndo a ne i nger loho u ker la ye. Sha nahan yô, aluer se mba pasen ior mimi u ken Ruamabera la tsema tsema yô, se lu tesen ser icighan jijingi ngu hemen se. Kpa cii man se time sha gbenda u se er kwagh ne yô, de se vande henen sha tahav mbu Mkaanem mara ma lu a mi la.
‘Mkaanem ma Aôndo ma Tem Gbilin Ga’
4. Loho u Aôndo u u lu ken Bibilo la ua fatyô u geman uma u or nena?
4 Mkaanem shin loho u Aôndo ngu a tahav kpen kpen! (Heb. 4:12) U ôron sha injakwagh yô, loho u ú dugh ken Bibilo la hemba esen a hanma sanker u umace ve var cii, sha ci ka u nyôr zan zan u pav akuhe a mshiam sha injakwagh. Mimi u ken Ruamabera ka a nyôr ken atô u or, zan zan a za bende a mbamhen mba nan man ishima i nan, nahan a pase kwagh u nan lu jim jim yô. Mimi u ken Bibilo una fatyô u geman inja i or sha tahav mbu a lu mi la. (Ôr Mbakolose 3:10.) Sha mimi yô, Mkaanem ma Aôndo ma a fatyô u geman uma u or.
5. Bibilo ia fatyô u hemen se sha igbenda i nyi, man kanyi ia gema a due kere?
5 Heela tseegh ga, Bibilo ngi a kwaghfan u a fatyô u zuan a mi ma ijiir igen ga yô. Ngi a akaawan a injaa a aa wase ior u nôngon a mbamzeyol ken botar ne yô. Mkaanem ma Aôndo ma wanger gbenda wase hegen tseegh ga, kpa ma wanger gbenda wase ken hemen kpaa. (Ps. 119:105) Bibilo ngi i wase se kpishi shighe u se lu nôngon a mbamzeyol shin i gbe u se tsua ior mba se kôr ijende a ve shin iemberyolough i se er shin tom u se er shin ikyondo i se hua man ambaakaa la nahan yô. (Ps. 37:25; Anz. 13:20; Yoh. 15:14; 1 Tim. 2:9) Aluer se mba dondon akaawan a ken Mkaanem ma Aôndo yô, se fatyô u lun vea mbagenev imôngo doo doo. (Mat. 7:12; Fil. 2:3, 4) Ka sea de ser mkaanem ma Aôndo ma ta iwanger sha gbenda wase sha inja kwagh yô, se fa er akaa a se tsough u eren la aa va bende a vese ken hemen yô. (1 Tim. 6:9) Shi Ruamabera tsengaôron se kwagh u Aôndo a we ishima u va eren ken hemen yô, nahan kwagh la wase se u eren uma u a gbe a zough sha awashima la yô. (Mat. 6:33; 1 Yoh. 2:17, 18) Aluer or de ér akaawan a Aôndo a hemen nan ken uma yô, nana ember uma u injaa kpen kpen!
6. Bibilo ka ikyagh ki nôngon ityav a mi ki ageegh ken ityav yasegh mbi ken jijingi nena?
6 Shi hen ase er Bibilo i lu ikyagh ki nôngon ityav a mi ki ageegh ken ityav yasegh mbi ken jijingi yô. Paulu yila Mkaanem ma Aôndo ér “sanker u Jijingi.” (Ôr Mbaefese 6:12, 17.) Ka a yar tom a loho u Bibilo sha inja yô, u wase u saghen ior ken ikyangenev mbi Satan kera. Ka sanker u timin a tim ior ga, kpa ka u yiman ve a yima. Nahan doo u se fa u yaren tom a mi tsema tsema ga he?
Pase Kwaghôron la Jighilii
7. Ka hange hange u se hen u yaren tom a “sanker u jijingi” tsembelee sha ci u nyi?
7 Saa orshoja nana hen u yaren tom a ikyagh ki nôngon ityav a mi ki nanegh shi nana kar iyol tsembelee ve nana fatyô u yaren tom a ki sha inja ye. Kape u yaren tom a “sanker u jijingi” ken ityav yasegh mbi ken jijingi la kpa i lu vough je la. Paulu nger ér: “Nôngo sha gbashima u veren iyol you sha ishigh ki Aôndo er or u i kar nan nan kom yô, ortom u i gba u nana ya kunya ga yô, or u nan pasen kwaghôron u mimi la jighilii.”—2 Tim. 2:15.
8, 9. Kanyi ia wase se ve se fa kwagh u Bibilo i lu ôrono? Tese ikyav.
8 Kanyi ia wase se ve se ‘pasen kwaghôron u Bibilo jighilii’ ken tom wase u pasen kwaghaa? Cii man se pase mbagenev kwagh u Bibilo i er la wang yô, gba u se ayol a ase se vande fan Bibilo a wanger se wang. U se er nahan yô, gba u se fa avur a Bibilo aa a kase ivur i se lu ôron kwagh sha mi la. Inja na yô, a gba u se fa ishemberti shin hwange-kwaghôron gayô akumahiange aa a lu ken hemen shin ken ijime i ma ishemberti shin hwange-kwaghôron shin akumahiange a se lu ôron kwagh u á la.
9 Gba u se time sha kwagh u i nger cii man ma ivur Bibilo la, man kwagh u i nger ken hemen u ivur shon la ve se fa kwagh u ivur Ruamabera shon i lu ôron la ye. Se nenge a ikyav i kwagh ne ken mkaanem ma Paulu ma ma lu ken Mbagalatia 5:13 la. A nger ér: “Gadia ne yô, anmgbianev, i yila ne sha u ne̱ lu ken uikyangen ga, kpa mlu wen u ne lu ken uikyangen ga la yô, a̱ de hingir ityôkyaa i iyolough ga, kpa eren nen ayol a en tom sha dooshima.” Lu mlu u ken uikyangen ga u nyi Paulu lu ôron kwagh na heenee? Yange lu u duen ken ikyangenev mbi isholibo man ku kera shin lu u duen ken ikyangenev mbi jighjigh u nan u aiegh shin lu ma ikyangenev mbigen lu ôron kwagh u mbi yee? Avur aa a kase ivur ne la tese ér Paulu lu ôron kwagh u mdugh u ‘duen ken ifan i tindi kera.’ (Gal. 3:13, 19-24; 4:1-5) Yange lu ôron kwagh u mlu u ken uikyangen ga u Mbakristu la. Mba yange ve tese iwuese sha mlu u ken uikyangen ga mbara cii dooshima mgbegha ve u eren tom sha ci u mbagenev. Mba ve lu a dooshima ga la di gema nyôr u eren angereke shi zôhôn zwa.—Gal. 5:15.
10. Aluer se soo u fan kwagh u Ruamabera tsembelee yô, kanyi i gbe u se tôv se fa, man se tôv kwagh shon nena?
10 Se fatyô u kaven mkaanem ma ma kase kwagh u i lu ôron la sha gbenda ugen kpaa. Mkaanem ma ma kase kwagh u se lu ôron jim jim la wa akaa agen a a bende a kwagh shon u se lu ôron la kpa ker. Aluer se soo u fan kwagh u ma ivur ruamabera tsembelee yô, gba u se tôv se fa or u nan nger ruamabera shon man shighe u yange i nger un la kua akaa a yange lu zan hemen shighe u i nger un la kpaa. Shi aluer se fa er i hii ve yange i nger ruamabera shon yô, a wase se, shi aluer gba shimi yô, se fa aeren man anza a ior mba yange ve lu uma hen shighe u i nger ruamabera shon la, kua akaa a yange gba ve ishima la man kwaghaôndo u ve eren la kpaa. *
11. Shighe u se lu tan iwanger sha ma ivur ruamabera yô, doo u se wa ikyo nena?
11 U “pasen kwaghôron la jighilii” la hemba di u tan or iwanger sha avur a Ruamabera sha inja vough tseegh tsô la. Doo u se wa ikyo sha er se yar tom a Bibilo sha u tan ior mciem iyol ga yô. Er se fatyô u yaren tom a Ruamabera sha u paase mimi iyol, vough er Yesu yange yar tom a mi shighe Diabolo lu meen un la nahan kpa, Bibilo ka akpa u gbidyen mbaungwan se a mi ser ve keghen ato sha kwagh u se lu ôron ve ga. (Dut. 6:16; 8:3; 10:20; Mat. 4:4, 7, 10) Se dondo nen kwaghwan u apostoli Peteru ne, ér: “Tsegha nen Kristu ken asema a en, A̱ lu Ter, waan nen ago iyol veren nen a ver sha u né na imo sha mpin u hanma or u nana pine ne ityôkyaa i ishimaverenkeghen i i lu ken a ven la, kpa i̱ lu sha ishima i legh legh man sha mcie kpaa.”—1 Pet. 3:15.
12, 13. Ka “ayou a utya” a nyi nahan mimi u ken Mkaanem ma Aôndo una fatyô u yôhôrô? Tese ikyav.
12 Aluer se pase or ma ivur Bibilo tsembelee yô, mimi u ken Mkaanem ma Aôndo la una er nyi? (Ôr 2 Mbakorinte 10:4, 5.) Mimi u ken Ruamabera una fatyô u “yôhôr ayou a utya,” ka atesen a aiegh a i pase á ken igbar man aeren a bo kua kwaghfan u uumace mba ve yen ne je la. Se fatyô u yaren tom a Bibilo sha u karen a mbamhen mba “i kende a mi sha, sha u yisan kwaghfan u Aôndo” la cii kera. Se fatyô u yaren tom a atesen a Bibilo sha u wasen mbagenev u geman mbamhen vev sha er vea zua sha mimi u Bibilo yô.
13 Ikyav i tesen yô, nenge ase kwagh u kwase ugen u ken tar u India, u lu anyom 93 la. Hii shighe u lu iyev la je, i tese un na jighjigh a ityesen i or ka nana kpe yô i hide i mar nan la. Wan na u lu ken tar ugen la yange hiin u henen Bibilo a na sha u ngeren un uwashika yô, kera taver un u ngohol kwagh u lu henen sha kwagh u Yehova man mbaawashima nav la ga. Nahan kpa, er lumun a ityesen i or ka nana kpe yô i hide i mar nan la gbang gbang yô, yange lumun a kwagh u wan na nger un sha kwagh u mlu u mbakpenev la ga. Kwase la kaa ér: “Taver mo kpishi u kaven avur a Ruamabera ou la. Ukwaghaôndo mbagenev cii mba tesen ér kwagh ngu ken a vese u a kpen ga yô. M na jighjigh mer iyol i or ngi kpen, kpa jijingi u nan, u i nengen a mi ga la yô, ka i hide i mar un ken iyol igen, man kwagh ne ngu a er nahan je i kuma kwa 8,400,000. A er nan ve kwagh ne una lu mimi ga? Ukwaghaôndo kpishi mba tesen kwagh u mimi gaa?” “Sanker u jijingi” una fatyô u yôhôr imba jighjigh u nan taveraa la kpa? Wan na yange seer lamen a na ken Ruamabera sha kwagh ne, nahan usati mba kar yô, kwase ne nger ér: “Hegen yô m ngu masen kaven mimi u sha kwagh u kuu. Saan mo iyol kpishi u fan mer, shighe u a va nder mbakpenev la, se zua ishigh a mbadoon se ishima mba ve kpe la. M ngu veren ishima mer Tartor u Aôndo ua tema van ga.”
U Sendegh Kwagh a Ior ken Mkaanem ma Aôndo sha Kwaghfan
14. Inja i u sendegh kwagh a or sha kwaghfan la ér nyi?
14 U yaren tom a Bibilo tsema tsema ken tom u pasen kwagh la saa di sha u ôron a ôr avur a ruamabera tseegh tsô ga. Paulu yange “sendegh” kwagh a ior sha kwaghfan, nahan doo u se kpa se eren nahan. (Ôr Aerenakaa 19:8, 9; 28:23.) Inja i u “sendegh” kwagh a or sha kwaghfan yô, ka u “geman ishima i nan sha er nana lumun a kwagh u ú ôron nan la yô.” Or u i sendegh kwagh a nan sha kwaghfan la “ka nan lumun a kwagh la je nan hingir u suur sha kwagh shon.” Ka sea sendegh kwagh a or sha kwaghfan sha u nana ngohol ityesen i Bibilo yô, se gema ishima i nan, nahan nan hingir u suur sha ityesen shon. Kpa gba u se wase or u se lu pasen nan kwagh la nana fa mimi u kwagh u se lu ôron la ve se kôrcio u eren kwagh ne ye. Ka igbenda i se fatyô u eren kwagh ne je i dondo shin heen ne.
15. Ú ôr kwagh u Bibilo sha gbenda u icivirigh nena?
15 Ôr ior kwagh u Mkaanem ma Aôndo sha gbenda u icivirigh. Zum u ú soo u ôron ma ivur Bibilo yô, hemba veren ishima sha u tesen mnenge u Aôndo sha kwagh u ne lamen sha mi la. U pinen or mpin shi nana naan mlumun yô, u fatyô u kaan a nan wer, ‘De se ker mnenge u Aôndo sha kwagh ne.’ Shin u fatyô u pinen nan wer, ‘Aôndo ôr nyi sha ikyaa nee?’ Aluer u vande ôron kwagh nahan cii u mase ôron ma ivur Bibilo yô, or u ú lu lamen a nan la nana kav ér Bibilo due hen Aôndo shi kwagh la una wase nan u lun a icivir sha Bibilo. Hemba doon u se er nahan shighe u se lu pasen or u nan ne jighjigh a Aôndo kpa nan fe kwagh u Bibilo i tese tsembelee ga yô.—Ps. 19:7-10.
16. Kanyi ia wase ú u pasen Bibilo tsembelee?
16 De er a ôr avur a Bibilo tseegh ga; pase avur shon kpaa. Yange lu ikye i Paulu u ‘pasen shi tesen’ ior akaa ken Ruamabera. (Aer. 17:3) Avur a Ruamabera ka a nôngo u ôron akaa hemban kwagh môm tseegh, nahan alaghga a gba u ú ter atôakaa a á gbe a zough sha kwagh u ne lu lamen sha mi la yô. U fatyô u eren kwagh ne sha u shi teren asember a a er kwagh u ú lu ôron la, shin pinen or u ú lu lamen a nan la mbampin mba vea wase nan u kaven asember shon yô. U been yô, pase inja i ivur Bibilo shon. U eren nahan cii yô, wase nan nana nenge er avur a Bibilo la a bende a nan jighilii yô.
17. U ôr kwagh a ior ken Ruamabera sha gbenda u a kuma ve nena?
17 Ôr kwagh a ior ken Ruamabera sha gbenda u a kuma ve yô. Paulu yange yar tom a zamber u sha ishima i môm shi hen sha kwagh a ior sha mimi sha er una ‘ôr kwagh ken Ruamabera’ yô. (Aer. 17:2, 4) Nôngon sha er u ôron kwagh u una kôr mbaungwan a we ken ishima yô, vough er Paulu nahan. Pine nan mbampin mba tesen ér kwagh u nan gba u ishima, sha er u fa kwagh u a lu nan ken ishima yô, vough er ka i ‘kese mngerem’ ma zan nahan. (Anz. 20:5) Palegh kwaghôron u kpôghôô. Kpa pase nan kwagh wang shi i lu sha gbenda u ú ngu timen a time sha kwagh shon vea nan kpaa. Yar tom a akav a kuman sha u suen kwaghôron wou. Kwaghôron wou la a har sha Mkaanem ma Aôndo. Hemba doon u ôron ivur Bibilo i môm pasen i tsembelee shi tesen ikyav sha u tan iwanger sha ivur shon a u ôron avur ahar shin atar a u pasen á shio la. Aluer u yar tom a akav a tan iwanger sha kwagh u ú lu ôron la yô, aa ‘seer nan zwa wou ityesen.’ (Anz. 16:23) Ashighe agen yô, a gba u ú ker akaa agen ken ityakerada yase sha er u seer pasen or kwagh tsembelee yô. Kwase u lun anyom 93 u se vande ôron kwagh na la yange soo u fan er i hii ve ityesen i uma (shin jijingi) u or kpen ga la i dumbur yô. Mfe u yange fa ape ityesen shon hii man er i hii ve i nyôr ken ukwaghaôndo mba tar ne kpishi la lu hange hange, sha ci u kwagh ne yange wase u geman ishima na sha er una lumun kwagh u Bibilo i tese sha ikyaa ne yô. *
Za Hemen u Yaren Tom a Bibilo Tsema Tsema
18, 19. Gba u se za hemen u yaren tom a “sanker u jijingi” tsema tsema sha ci u nyi?
18 Bibilo kaa ér: “Mluashe u tar ne ngu karen kera.” Nahan udangmbaiorov mba vihin inja seer a seer. (1 Kor. 7:31; 2 Tim. 3:13) Nahan ka hange hange u se za hemen u yaren tom a “sanker u Jijingi, ka mkaanem ma Aôndo je la” sha u yôhôr “ayou a utya” a min.
19 Doo se kpishi er se lu a Bibilo i i̱ lu Mkaanem ma Aôndo la, shi yaren tom a loho u i̱ u ageegh la sha u môghon atesen a aiegh kpa geman ôron kwagh u una kôr mbaasemaamimi ken ishima yô! Ma iyou i utya i môm kpa hemba taver a loho u Bibilo ga. Nahan yô, de se za nen hemen u yaren tom a “sanker u jijingi” tsema tsema ken tom u pasen kwagh u Tartor u Aôndo a ne se ne.
[Ngeren mba shin kpe]
^ Ngeren mba vea wase se u fan kwagh u ityakerada i Bibilo yô ka “All Scripture Is Inspired of God and Beneficial,” man Insight on the Scriptures, kua ngeren mba i dugh a mi ken Iyoukura, er “Mkaanem ma Yehova Ma Uma Je” la nahan.
^ Ôr antakerada u Ka Nyi ka i Er Se Zum u Se Kpe Laa? la sha peeji 5-16.
Ú Hen Nyi?
• Mkaanem ma Aôndo ma a tahav nena?
• Se er nan ve se ‘pasen kwaghôron u mimi la jighilii’?
• Loho u Bibilo ua fatyô u eren a “ayou a utya” nena?
• Ú seer fan u sendegh kwagh a ior sha kwaghfan ken tom u pasen kwagh nena?
[Mbampin Mba Ngeren u Henen]
[Ngeren u kiriki/Foto u sha peeji 12 la]
Er Se Sendegh Kwagh a Ior ken Mkaanem ma Aôndo sha Kwaghfan Yô
▪ Tese icivir sha Bibilo
▪ Pase avur a Ruamabera
▪ Ôr kwagh ken Ruamabera sha gbenda u a kuma ve yô
[Foto u sha peeji 11 la]
Gba u ú hen u yaren tom a “sanker u jijingi” tsema tsema