Mbampin Mba Mbaôron Takerada Ne Ve Pin La

Kwagh u Esekiel 18:20 a ôr ér, “wan una ya ican sha ci u ibo i ter na ga” la, nyiman a nyiman kwagh u Ekesodu 20:5 a kaa ér Yehova “tsahan mbayev sha ci u iferkwagh i uter” laa?

Avur ne nyiman a nyiman ayol a á ga. Ivur i hiihii la ngi hemban ôron kwagh u Aôndo una pine hanma or kwagh u nan er la, i sha uhar la di ngi pasen ér alaghga kwaghbo u una due ken isholibo i or nan er la, una tser mbayev mba nan kpaa.

Mkaanem ma i nger ken ityough 18 ki Esekiel la tese ér, ka kwagh u Aôndo una pine hanma or sha ieren i nan la i lu ôron jighilii ye. Ivur i sha 4 la kaa ér, “or u nan eren isholibo yô, ka nan nana kpe ye.” Kpa or u nan eren “perapera, [nan eren] kwagh u a lu sha tindi vough man [u] sha mimi kpaa” la di ye? I kaa ér “Nana lu uma kpee je.” (Esek. 18:5, 9) Sha nahan yô, or u nan vese nan kom u a pine nan kwagh u nan er la yô, gba u a ôr nan ijiir “sha aeren a nan.”—Esek. 18:30.

Se fatyô u tesen ikyav i tindi ne sha kwagh u er Orlevi u i yilan un ér Koraki la. Ityom i vesen i Yehova na Koraki shighe u Mbaiserael lu eren zende ken taaikyôngo la, kuma un ga. Er Koraki gba nôngon ér una ngohol ityom i pristi sha ci na yô, un kua mbagenev hingir u hemban Mose man Aron, mba ve tile sha ityough ki Yehova mbara, ato. Er ve gengese iyol shi ve soo u eren tom u i na ve ga yô, Yehova wua Koraki kua mba ve hemba ato vea na la. (Num. 16:8-11, 31-33) Nahan kpa, ônov mba Koraki yô, lu uwegh sha ihyembeato la  ga. Aôndo yange tsaha ve sha isholibo i ter ve ga. Er ve tile sha mimi hen Yehova yô, kwagh la na i war uuma vev.—Num. 26:10, 11.

Nahan kpa, hide icin i í te ken Ekesodu 20:5, i í lu vegher môm ken Atindi a Pue la di ye? Heen kpa, gba u se time sha akaa a a er cii man kwagh u i nger ken ivur ne la. Yehova yange ver ikuryan i Tindi vea ikyurior i Iserael. Mbaiserael mba ongo mkaanem ma ikyuryan shon yô, ve kaa ér: “Akaa a TER A kaa cii, sé er.” (Eks. 19:5-8) Ikyurior la cii maa hingir u yan ikyar kangenaa vea Yehova. Sha nahan yô, lu ikyurior la jimin cii i lu ôron i̱ mkaanem ma i nger ken Ekesodu 20:5 la ye.

Zum u Mbaiserael vea za hemen u nan Yehova jighjigh yô, ikyurior la i zua a mtsera man averen kpishi kpaa. (Lev. 26:3-8) Nahan kpa, shighe u ikyurior i Iserael yange ia venda Yehova shi ia yem u civir mbaaôndo mba mimi ga la, Yehova a kera kura i shi a ver i doo doo ga, nahan ikyurior la i hingir u yan ican kpishi. (Mbaj. 2:11-18) Sha mimi yô, er ikyurior la lu civir akombo nahan kpa, mbagenev ken ve za hemen u tilen sha mimi shi kuran atindi a Aôndo. (1 Utor 19:14, 18) Ashi nan kpa, mbajighjigh mbagenev ya ican sha ci u asorabo a ikurior la, nahan kpa Yehova tese ve erdoo na.

Zum u Mbaiserael za hemen u peren atindi a Yehova sha apera, nahan i hingir u lahan iti na ken akuraior yô, Yehova kange ishima u tsahan ior nav sha u den ér i yem a ve ukyangen ken tar u Babilon. Sha mimi yô, tsaha ne yange u bende a ior nav asange asange man nongoior la jimin cii. (Yer. 52:3-11, 27) U ôron kwagh haan mbabov kera yô, Bibilo tese ér isholibo i Iserael jimin cii er la yange i kehe je yô, iferkwagh i uter er la bende a ikyov ve itiar shin inyiin gayô ikyov i hemban nahan je kpaa, er Ekesodu 20:5 a tese nahan.

Shi Mkaanem ma Aôndo ôr akaa a a er icombor kposo kposo sha ci u ieren i bo i mbamaren la. Pristi u Tamen Eli yange er kwagh u vihin Yehova ishima sha u den ér mbayev nav mba ve lu “udangmbaiorov” mbawan ijimba la ér ve za hemen u eren tom u pristi. (1 Sam. 2:12-16, 22-25) Er Eli hemba nan ônov nav icivir a Yehova yô, Aôndo na zwa sha u i tim tsombor na kera, u de kera eren tom u pristi u tamen ga, man kwagh ne yange er nahan, hii sha wan na u kov u sha utar, u i yilan un ér Abiatar la. (1 Sam. 2:29-36; 1 Utor 2:27) Kwagh u yange er Gehashi la tese ikyav i tindi u ken Ekesodu 20:5 la. Yange yar tom a ian na i lun wanakiriki u Elisha la sha inja ga, sha u keren mtsera u iyolough sha angev mbu i bee Naaman, Kurutya u tar u Shiria la yô. Yehova yange ôr un ijir sha ikyev i Elisha kaa ér: “Imande i Naaman la ia hire ia kôr u kua tsombor wou cii gbem sha won.” (2 Utor 5:20-27) Sha nahan yô, kwaghbo u va ken isholibo i Gehashi er la, bende a ônov nav kpaa.

Er Yehova a lu Orgban kua or u nan uma yô, ngu a hanma ian cii i tsuan gbenda u hemban doon man u vough u una tsaha or yô. Akav a se time sha mi sha heen ne tese ér alaghga kwagh u a dugh ken isholibo i uter la una fatyô u benden a mbayev shin icombor ve. Nahan kpa, Yehova ka a “ungwa mliam ma mba ican i er ve la” shi ior mba ve sen un a ishima i môm yô, ngu a yima ve shi a na ve ishimasurun je kpaa.—Yobu 34:28.

[Foto u sha peeji 29 la]

I tsaha Koraki kua mba ve dondon un ken ihyembeato la sha ieren ve la