Ú Den Wer Yehova a Pine U Kwagh Kpa?

BIBILO ngi a mbampin uderi imôngo mba vea wase or u tôvon mbamhen mba nan man mbaawashima mba nan yô. Jim je yô, Yehova yaren tom a mbampin sha u tesen se akaa a mimi a a lu se inja yô. U tesen ikyav yô, Yehova yange yar tom a mbampin sha u tan Kain icin sha er una sôr ieren na i bo la yô. (Gen. 4:6, 7) Ashighe agen yô, mpin u Yehova môm tseegh kpa yange a na or nan er kwagh sha inja. Profeti Yesaia ungwa Yehova pine ér: “Ka an Me tindi nan, man ka an nana za sha ci Wasa?” Tsô a kaa ér: “Mo ne, tindim.”—Yes. 6:8.

Yesu, Ortesen u Hemban la kpa yange yar tom a mbampin sha gbenda u injaa. I nger mbampin mba Yesu pine yô ken ityakerada i Bibilo i ivangeli la hemba 280. Shin er sha shighe ugen la Yesu pine mba ve puun un la mbampin sha u cirin ve zwa nahan kpa, ashighe kpishi pinen mbampin ér i kôr mbaungwan a na ken ishima, nahan ve hen sha kwagh u mlu ve vea Aôndo. (Mat. 22:41-46; Yoh. 14:9,10) Kape apostoli Paulu, u nger ityakerada i Bibilo 14 ken Ruamabera u ken zwa Grika la kpa yar tom a mbampin sha u wasen mbagenev u kaven mkaanem ma Aôndo je la. (Rom. 10:13-15) U tesen ikyav yô, washika na u yange nger hen Mbaromanu la ngu a mbampin ker wuee. Mbampin mba Paulu vea wase mbaôron uwashika mba a nger la u fan “mze u ikpelaakaa man mfe man kwaghfan u Aôndo.”—Rom. 11:33.

Mbampin mbagenev mba sha ci u nan mlumun sha mi, kpa mbagenev di yô, mba sha ci u wasen or u henen sha kwagh zumbee. Ityakerada i Ivangeli la ôr kwagh u mbampin mba Yesu pine wuee sha u wasen or u henen sha kwagh la. Sha anshighe ugen la, Yesu wa mbahenen nav kwagh ér: “Ver nen ishima, kuran nen ayol a en sha kwa u Mbafarishi kua kwa u Herode la.” (Mar. 8:15; Mat. 16:12) Mbahenen mba Yesu kav inja i kwagh u ôr ve la ga, tsô ve gba anyiman ker ayol a ve ér ngu kaan nahan sha ci u ve hungur u tôôn bredi yum. Nenge ase gbenda u Yesu yar tom a mbampin ken kwaghôron na a ve la. “A kaa a ve ér: Ka nyi man ne henen ner, ka er ne tee bredi ga? Ne mba a kav ga, man mfe kpaa ne fa gaa? Ne shi ne mba a asema a cighir her tsôô? Ne mba a ashe, kpa ne mba nengen gaa? Shi ne mba a ato, kpa ne mba ongo gaa? . . . Nahan kpaa ne mba a kav gaa?” Mbampin mba Yesu pine la lu mba wasen mbahenen nav u henen sha inja i kwagh u ôr ve la jighilii.—Mark 8:16-21.

“Me Pine U Kwagh”

Yehova yange pine wanakiriki na, Yobu mbampin sha u kôôm mhen na. Yehova yar tom a mbampin kpishi sha u tesen Yobu er Orgban na a hembe un i yem zende zende yô. (Yob. Ityou.  38-41) Yehova ver ishima ér Yobu a na mlumun sha hanma mpin una ungwaa? Bee nahan ga. Ambampin er “Shighe u M tim imagh ki taregh la, u lu hana?” nahan ve lu sha u wasen Yobu u henen sha kwagh je ka ashe tugh ga. Yange pin Yobu mbampin kpoghuloo nahan cii yô, Yobu kera zua a zwa ga. A gema a kaa di tsô ér: “Me kaa U nyi? M wa uwegh zwa.” (Yobu 38:4; 40:4) Yobu kav inja i kwagh u i lu ôron un la nahan hide a iyol ijime. Nahan kpa, Yehova lu tesen Yobu u hiden a iyol ijime tsô ga. Shi i kôôm mhen u Yobu kpaa. Sha nyi gbenda?

Shin er Yobu lu “or u mimi, u perapera” nahan kpa, ashighe agen yô, kwaghôron na a tese ér ngu a mhen u kpeegh, nahan Elihu zôhô a na sha ci u “a na ishô iyol na sha ishigh ki Aôndo yum.” (Yobu 1:8; 32:2; 33:8-12) Nahan mbampin mba Yehova pine Yobu la kpa kôôm mnenge na. Er Aôndo lu lamen a Yobu ken ura u hiar la, a kaa ér: “Ka an nan we mhen ime sha akaaôron a sha mfe ga laa? Yô, ta ikyondo uya  hegen er nomsoor yô; Me pine u kwagh, yô, we, pasem.” (Yobu 38:1-3) Yehova maa yar tom a mbampin u pasen kwagh u kwaghfan na u a lu a ikighir ga la kua tahav nav mbu i nengen a mi ken ityom na i kpilighyol la. Iwanger i Yehova ta la wase Yobu u hemban nan jighjigh ken ijirôron i Yehova man gbenda na u a eren akaa la. Er lu Aôndo u hemban agee la iyol na pine Yobu mbampin yô, kwagh la ta Yobu ihindi iyol kpen kpen!

Gbenda u se De Ser Yehova a Pine Se Kwagh La

Se di ye? Se kpa se fatyô u zuan a mtsera ken mbampin mba i nger ken Bibilo laa? Een, se fatyô! Aluer se hide se gbidye kwar sha mbampin mbara yô, kwagh la una fatyô u van se a mbamtsera mba ken jijingi mgbeghaa. Mbampin mba tan ihindi iyol mba i nger ve ken Mkaanem ma Aôndo la mba môm ken akaa a á ne Mkaanem ma Aôndo ma doo yum yô. Sha kpôô yô, “mkaanem ma Aôndo . . . ma tem gbilin ga . . . ka ma kar mbamhen kua mbaawashima kpaa.” (Heb. 4:12) Gba u se hide a mbampin mbara sha ayol a ase inja er ka Yehova a lu pinen se ve nahan, ve se hemba zuan a iwasen cii ye. (Rom. 15:4) De se time nen sha akav agen.

“Orjirigh u tar cii, Una kera er vough gaa?” (Gen. 18:25) Aberaham yange pine Yehova mpin ne shighe u gba u Aôndo una ôr Sodom man Gomora ijir la. Aberaham nenge wener mayange Yehova una er iferkwagh sha u timin mbaperapera a mbaaferev imôngo ga. Mpin u Aberaham la tese ér yange lu a jighjigh u nan taveraa ken perapera u Yehova.

Alaghga a sar ior mbagenev u keren ahaba sha kwagh u ajir a Yehova a ken hemen, er sha kwagh u mba vea war Armagedon shin mba a nder ve shin ku mbara nahan. Doo u se umbur mpin u Aberaham la, se kera de ser mbamhen mbara nahan ve za se ishima iyol ga. Aluer se fa Yehova er a lu Ter wase u Sha u mgboughon a erdoo shi se na jighjigh taveraa ser er ijir sha mimi shi zungu mhôônom, vough er Aberaham kpa na jighjigh nahan yô, kwagh ne una na se kera vihi shighe man agee sha agbilinakaa a nan se ishimanyian shin akperan a nan iyolkpen shin anyimanakaa a gbilinigh la ga.

“Ka an wen je sha ishima i nyian i nan la, nana fatyô u seer ishiva i môm sha ityaven i nan ase?” (Mat. 6:27) Shighe u Yesu lu lamen a ikpelaior i mbahenen nav kpa lu ker la, a pine mpin ne u tesen er i gbe u vea wa ayol a ve sha ikyev i Yehova yô. Ayange a masetyô a botar ne va a akaa a nan se ishimanyian kpishi, kpa u haren ishima sha akaa ne la una seer ayange a uma wase ga, shi una na uma wase una hemba lun se a inja ga.

 Zum u ishima i nyian se sha kwagh wase ayol a ase shin sha kwagh u mbadoon se ishima yô, u̱ umbur mpin u Yesu la una wase se u lun a mnenge u vough sha akaa a á ne ve ishima i nyian se la. Mpin ne una wase se u been a ishimanyian man mbamhen mba kpeegh mba nan se iyolkpen man mtumeyol u ken ishima la. Er Yesu na se ibumun nahan, Ter wase u sha u a koson inyon i purugh shi a woho ahu a ken toho iyol la, fa akaa a kwagh a gbe se a mi yô.—Mat. 6:26-34.

“Or á fatyô u veren usu sha vanger u nan, man akondo a nan á hia ga kpa?” (Anz. 6:27) I nger kwaghwan u ter ugen u a lu tesen wan na kwaghfan yô ken Anzaakaa ityough i môm zan zan ityough ki sha utaankarunyiin la. Mpin u se nger sha heen ne ôr kwagh u kwaghbo u ka a due ken idya i eren la. (Anz. 6:29) Aluer se va kav ser se mba hian a orgen sha gbenda u ijimbagh shin se mba henen sha asaren a bo sha kwagh u yavaor yô, mpin ne a̱ wase se u lun tsevaa, palegh kwaghbo u una due ker la. Mpin ne una wase se u palegh ijimba tseegh ga, kpa una wase se shighe u i mee se ér se er kwagh u a lu u shami ga cii yô. Sha kpôô yô, mpin ne sue kwaghwan u Bibilo u a kaa ér: ‘Or nana sunda kwagh u nan lee la’ wang!—Gal. 6:7.

“We, u ngu nyi man u ne wanye u orgen ibo?” (Rom. 14:4) Ken washika u Paulu nger hen Mbaromanu la, a ôr kwagh u zayol ugen u due ken tiônnongo u sha derianyom u hiihii yô. Er Mbakristu mbagenev due ken iniongoior kposo kposo yô, ve soon u gban ijir sha akaa a mbananjighjigh a ve imôngo eren shin tsuan u eren la. Mpin u Paulu ne umbur ve ér ve ngohol ayol a ve doo doo, ve de Yehova a ijirôron.

Nyian kpa, kape ior mba Yehova ve dugh ken akuraior kposo kposo shi mbamlu vev kpa ve lu kposo kposo je la. Nahan cii kpa, Yehova va a vese imôngo ken mzough u dedoo. Se mba eren kwagh u suen mzough la kpa? Aluer se mba gban ijir sha akaa a imoshima i anmgbianev asev i lumun ve u eren la fele yô, a doo u se pine ayol a ase mpin u Paulu u se ter sha heen ne!

Mbampin Mba Kporom a Vese hen Yehova

Akav a se ter sha heen kpuaa ne tese tahav mbu mbampin mba ve lu ken mkaanem ma Aôndo la ve lu a mi yô. U timen sha hanma mpin la una wase se u yaren tom a ve ken uma wase sha gbenda u injaa. Shi er se lu ôron Bibilo la, se zua a mbampin mbagenev mba vea fatyô u wasen se yô.—Nenge ngeren u kiriki u a lu sha peeji 14 la.

Aluer se de ser mbampin mba injaa mba i pin ken Mkaanem ma Aôndo la ve bende a vese tsung yô, kwagh la una wase se u henen kwagh ken asema ase u a zough sha igbenda i perapera i Yehova yô. Yehova yange pin Yobu mbampin been yô, Yobu kaa ér: “Lu m ungwa agwa Wou sha m-ongo u ken ato; kpa hegen yô, ashe am nenge a We.” (Yobu 42:5) Sha kpôô yô, Yehova hingir or jim jim hen Yobu, inja er ngu nengen a Na sha ashe na kpôghôô nahan. Apostoli Yakobu yange va pase kwagh ne ér: “Kporom nen hen Aôndo, Un kpaa, Una kporom her a ven.” (Yak. 4:8) Nahan yô, se de nen hanma vegher u Mkaanem ma Aôndo man mbampin mba ve lu ken ma la kpa a wase se u vesen ken jijingi shi hemban ‘nengen’ a Yehova wang!

[Ngeren u kiriki u a lu sha peeji 14 la]

U Pinen iyol you mbampin mba ve dondo shin heen ne una wase u u nengen akaa er Yehova kpa a nengen a la nena?

▪ “Iniav mbi nanden kua mbi sôngon, doo TER ishima er ikyo i wan sha imo i TER nahan kpa?”—1 Sam. 15:22.

▪ “Wen u A er ishe yô, Una nenge ga ha?”—Ps. 94:9.

▪ “Ka hanma shighe ú de mnyama, we oruhwe, man ka hanma shighe man ú nder ken mnyam ouwe?”—Anz. 6:9.

▪ “Ishima vihi u sha inja je kpa?”—Yona 4:4.

▪ “Gadia aluer or á zua a tar cii, kpa uma u nan una gema á saa nan yô, á doo nan sha nyi?”—Mat. 16:26.

▪ “Ka an nana pav se a dooshima u Kristu?”—Rom. 8:35.

▪ “Ka nyi u lu a mi i u ngohol a ngohol ga?”—1 Kor. 4:7.

▪ “Ka nyi mzough i lu hen iwanger a ime?”—2 Kor. 6:14.

[Foto u sha peeji 15 la]

Yobu yange hen nyi sha mbampin mba Yehova pine un laa?