Ú Umbur Kpa?

U ôr Iyoukura mba i sember gberen la nahan ve doo u kpa? Nenge ase aluer u fatyô u nan mlumun sha mbampin mban yô:

• Hii nan ve yange gba u Mesiya una kpe?

Ku u Yesu la tese ér or u vough nana fatyô u civir Aôndo sha mimi, shin er nana tagher a ameen a Satan una va a mi sha a nan kpoghuloo la nahan kpaa. Heela tseegh ga, Yesu kimbi injar i isholibo i tsombor u Adam u ye dyako i i̱ la, nahan a bugh gbenda u zuan a uma u tsôron.—12/15, peeji 22-23.

• U lamen a mbayev sha gbenda u wasen ve la wa nyi kere?

U lamen a mbayev sha gbenda u wasen ve la hemba di u gban ôron kwagh a ve tsô la. A wa u pinen ve mbampin shi wan ishima keghen ato ungwan er vea na mbamlumun yô. Ior kpishi kav ér ashighe a ve ye kwaghyan a mbayev vev imôngo la ka aan a dedoo a lamen a ve.—1/15, peeji 18-19.

• Ka atôakyaa a nyi nahan aa na ve alaghga a gba u a hide a er or batisemaa?

Kwagh a fatyô u lun nahan, aluer shighe u í er or batisema la, nan lu eren aferakaa ken myer, a luun er yange nan vande eren batisema kera cii ve nan er a yô, ma i dugh nan ken tiônnongo kera yô.—2/15, peeji 22.

• Ken injakwagh i Yesu ôr sha kwagh u ivor i bo man i dedoo la, mlee shin mte u ivor i dedoo la tile sha ityough ki nyi?

Yesu u a lu “Wan u or” la yange sôr ijiir i lôôn ivor shighe u lu eren tom na u pasen kwagh u Tartor shin tar la. Nahan hii sha iyange i Pentekosti u inyom i 33, sha shighe u i shighe Mbakristu mkurem ve hingir ônov mba Aôndo mba ve lu ônov mba Tartor la je, i lôô vor u dedoo la.—3/15, peeji 20.

• Í kura uwua u sha injakwagh i Yesu la i za ombo sha wuna u Yehova nena? (Mat. 13:30)

Injakwagh ne kure sha mi ken atô u shighe gôgônan, ken ayange a mkurtar ne. I kura ônov mba Tartor, mba ve lu uwua mbara, i za ombo sha wuna u Yehova shighe u i ve a ve ken tiônnongo u Kristu u i hidi i ver la, shin shighe u ve kpe, nahan ve ngohol injar ve i yemen sha la.—3/15, peeji 22.