Er Yehova A Yaren Tom A icighan Jijingi Sha U Kuren Awashima Na yô

“Kwaghôron Wam, u a dugh ken zwa Wam . . . [la] ikyôr ia lagh un sha kwagh u M tindi un u eren yô.”—YES. 55:11.

1. Tese ikyav i mkposo u a lu hen ato u ago a wan man awashima la.

 TÔÔ ase wer orgen vea kwase na soo u maan ya shi lun a tsombor u lun saan saan kpaa. Gba u vea nôngo kwagh shi vea vande wan iyol ve vea er kwagh u ve soo ne ye. Ve wa ago tsuaa, nahan ve na jighjigh ér vea kure isharen ve ne keng. Kpa, aluer i de ma ve tom shin ma kwagh u ganden ve tahav er aahe nahan er ve, shin angev kôr ma ve gayô ku wua ma ve yô, ago a wan ve la cii aa saa ishe. Kpa Yehova yô, ka nahan ga. Kwagh u a we ishima u eren bundu mayange ga. Vanden wan ago iyol sha kwagh ér una fa aluer un ngu a tahav man kwaghfan u kuren akaa a a gbe un ishima u eren la ga.

2, 3. (a) Awashima u Yehova wa nyi man nyi kere, shi yange sôr mzeyol u due ken isholibo i Adam man Ifa la nena? (b) Doo u se fa gbenda u Aôndo a kuren awashima na la vighe vighe shi se eren akaa a a zough sha mi kpaa sha ci u nyi?

² Yehova eren kwagh u i gbe un ishima u eren la sha u wan agoyol sha mi, ér a lu nyi je ia er kpa una gema uwegh ga ze; kpa kuren a kure awashima na er shighe a lu zan tesen la. (Ef. 3:11) Awashima na ne wa kwagh u Yehova yange soo u eren sha ci u uumace man tar sha hiihii la kpa ker. Yange soo ér tar ne u hingir paradiso u uumace mba lun vough vea lu ker bem bem shi a saan ve iyol gbem shawon yô. (Gen. 1:28) Zum u Adam man Ifa er isholibo yô, Yehova er kwagh sha kwagh la sha u nengen ér un sôr akaa un ver vough sha er awashima na la  una kure vough yô. (Ôr Genese 3:15.) Yehova kaa wener kwase na u sha ikyav la una mar Wan shin “vor,” u ken hemen yô, ua tim Satan u a lu mise u isholibo la shi ua kar a mbamzeyol mba a ve a mi la cii kera yô.—Heb. 2:14; 1 Yoh. 3:8.

³ Ma tahav mbu shaav shin mbu shin tar môm mbua fatyô u yangen Aôndo u kuren awashima na ga. (Yes. 46:9-11) Se ôr nahan sha ci u nyi? Sha ci u icighan jijingi ngu uwegh sha u kuren awashima na la. Tahav mbu ma kwagh ugen una fatyô u yangen mbu ga ne mbua na “ikyôr ia lagh” awashima u Aôndo. (Yes. 55:10, 11) Doo u se fa gbenda u Aôndo a kuren awashima na la vighe vighe shi se eren akaa a a zough sha mi kpaa. Mlu wase u ken hemen la har sha m-iv u awashima shon. Kwagh ugen yô, aluer se fa er Yehova a yaren tom a icighan jijingi yô, kwagh la una taver jighjigh u nan wase. Yô, de se time nen sha tom u icighan jijingi yange er man kwagh u a lu eren hegen shi u una va er ken hemen sha u keren awashima u Aôndo yô.

Tom u Icighan Jijingi Yange Er Yô

4. Yehova yange pase awashima na kure kure nena?

⁴ Sha ayange a i lu ngeren Bibilo la, Yehova pasen awashima na kure kure. Sha hiihii la, Vor u ityendezwa la lu “kwaghmyer.” (1 Kor. 2:7) Anyom nga karen er 2,000 nahan yô, Yehova shi hide ter kwagh u vor ne. (Ôr Genese 12:7; 22:15-18.) Yehova yange er ityendezwa a Aberaham, i lu u ia va iv sha gbenda u vesen yô. Mkaanem ma ‘sha ci u tsombor wou’ la tese ér Vor la ua due ken uumace, ken tsombor u Aberaham. Se fa tsembelee ser shighe u í pase kwagh u Vor ne vindi vindi la, Satan tema lu kenger zulee. Orihyom la yange soo u timin shin vihin tsombor u Aberaham la kpee, nahan yangen m-iv u awashima u Aôndo la je ka u tunan ga. Kpa lu u imba kwagh ne ia fatyô u eren ga, sha ci u jijingi u Aôndo u i nengen a mi sha ashe ga la lu eren tom. Lu eren tom sha igbenda i nyi?

5, 6. Yehova yange yar tom a jijingi na sha u kuran mba ken tsombor u lu a va mar Vor ker la nena?

⁵ Yehova yange yar tom a jijingi na sha u kuran mba ken tsombor u a va mar Vor ker la. Yehova kaa a Aberam (shin Aberaham) ér: “Mo M ngu u perutya.” (Gen. 15:1) Mkaanem mara lu ma gbilinigh ga. Ikyav i tesen yô, time sha kwagh u er ken inyom i 1919 C.S.Y. (Cii man Shighe u Yesu), shighe u Aberaham man Sara yem twev u tsan gbem ga ken tar u Gera la. Er tor u Gera u i yilan un ér Abimeleki la fa er Sara lu kwase u Aberaham ga yô, a kua a na ér una gema un a hingir kwase na. Satan yange lu keren gbenda u yangen Sara u maren Aberaham vor a mfe ve shioo? Bibilo ôr se ga. Kpa kwagh u i̱ er se yô ér, Yehova er kwagh sha kwagh la fese. Yange ta Abimeleki icin ken mnya ér a de benden Sara uwegh iyol ga.—Gen. 20:1-18.

⁶ Lu shighe ne tseegh Yehova kura ve ga. Yehova yima Aberaham man mba hen tsombor na sha ashighe kpishi kpishi. (Gen. 12:14-20; 14:13-20; 26:26-29) Er orpasalmi lu ôron kwagh u Aberaham man mba hen tsombor na la, a kaa ér: “[Yehova] lumun ma or nzughul a ve ga, A zôhô a utor sha ci ve kpaa, lu kaan er: De [benden] nen mba M shigh ve mkurem la ave ga, mbaprofeti Av kpaa de eren nen ve kwagh u vihin ga.”—Ps. 105:14, 15.

7. Yehova yange kura ikyurior i Iserael sha igbenda i nyi?

⁷ Yehova yange kura ikyurior i Iserael i̱ tsuaa, i̱ lu u a va mar Vor u ityendezwa ker la sha ikyev i jijingi na nena? Yehova na Iserael Tindi na, Tindi ne kura mcivir u mimi shi kura Mbayuda sha er ve de vihin ken jijingi man sha ieren kua sha iyol ga yô. A er kwagh ne sha ikyev i jijingi na. (Eks. 31:18; 2 Kor. 3:3) Sha shighe u Mbaajiriv la, jijingi u Yehova na nomsombaiorov mbagenev tahav mbu yiman Iserael sha ikyev i mbaihyomov nav. (Mbaj. 3:9, 10) Uderimbaanyomov kar zan zan mba va maren Yesu, u lu vegher u vesen u vor u Aberaham la yô, icighan jijingi shi lu uwegh sha mkor u i kura Yerusalem man Betelehem kua tempel, mba lu u a yar tom a mi sha u kuren akaaôron a uprofeti a sha kwagh u Yesu la.

8. Kanyi i tese ér icighan jijingi lu eren tom jighilii ken uma man tom u Wan u Aôndoo?

 ⁸ Icighan jijingi lu uwegh jighilii sha kwagh u uma u Yesu man tom na. Icighan jijingi yange er tom ken iyav mbu iniunkwase Maria, nahan i̱ er kwagh u i gbe je a lu a er ga yô. I̱ na kwase u yina yô, wa iyav mar Wannomso u lu a myen ga yô. Wan ne yô, lu u una kpe sha ci u isholibo ga. (Luka 1:26-31, 34, 35) Jijingi la va kura Yesu u lu anikyundan la, sha er a de kpen ku kôgh ga yô. (Mat. 2:7, 8, 12, 13) Shighe u Yesu kuma anyom 30 la, Aôndo shighe un mkurem sha icighan jijingi, maa tsua un ér a ya dyako u ikyônough ki torough ki Davidi shi wa un tom u pasen kwagh. (Luka 1:32, 33; 4:16-21) Icighan jijingi na Yesu tahav mbu eren uivande kua mbu been ior angev shi nan ikpelaior kwaghyan shi nderen mbakpenev kpaa. Ityom i ageegh ne lu tsengan tesen averen a se fatyô u veren ishima u va zuan a mi sha ikyev i hemen Yesu yô.

9, 10. (a) Icighan jijingi yange er tom ken mbahenen mba Yesu mba sha derianyom u hiihii la nena? (b) Ka gbenda u kuren awashima u Yehova u nyi yange i pase kwagh u ú ken derianyom u hiihii laa?

⁹ Hii ken Pentekosti u 33 la je, Yehova yar tom a jijingi na sha u shighen mba ve lu vegher u vor u Aberaham u kiriki la mkurem, mba ve kpishi ve due ken tsombor u Aberaham ga la. (Rom. 8:15-17; Gal. 3:29) Icighan jijingi yange er tom ken mbahenen mba Yesu mba sha derianyom u hiihii la, nahan i̱ wase ve u pasen kwagh a ishima i tseen shi i̱ na ve tahav mbu eren ityom i ageegh kpaa. (Aer. 1:8; 2:1-4; 1 Kor. 12:7-11) Sha kpôô yô, mne u i na ve uiyua mba ken jijingi mba eren uivande la tese gbenda u he u Yehova una kure awashima na la. Yehova kera soo ér ior ve civir un er ve civir Aôndo ken tempel ken Yerusalem uderimbaanyomov mba karen ken ijime la nahan ga. Yange gema ishima na ver sha tiônnongo u Kristu u i sember bughun la. Hii shighe la je, Yehova ngu yaren tom a tiônnongo u i shigh un mkurem la sha u kuren awashima na.

¹⁰ Se ter di igbenda kpuaa tseegh tsô, i Yehova yar tom a icighan jijingi sha ayange a tsuaa la sha u tesen ér awashima na una kure kpee, a bunde ga yô. Igbenda shon yô, lu u kuran ior nav shi nan mbagenev tahav shi shighen ve mkurem sha icighan jijingi. Hide sha ayange ase ne di ye? Yehova ngu yaren tom a jijingi na hegen sha u kuren awashima na nena? Gba u se fa kwagh ne sha ci u se soo ser se eren akaa ikyooso ikyooso a jijingi. De se time ase nen sha igbenda inyiin ken igbenda i Yehova a lu yaren tom a jijingi na nyian yô.

Tom u Icighan Jijingi a Eren Nyian Yô

11. Kanyi i tese ér icighan jijingi ka tahav mbu wasen ior mba Aôndo u lun wang-na, man u tese wer jijingi ngu hemen we nena?

¹¹ Kwagh u hiihii yô, icighan jijingi wasen ior mba Aôndo u lun wang. Mba ve eren ishima i Yehova shi i lu u vea zua a mtsera ken awashima na cii, gba hange hange u vea lu a ieren i wang. (Ôr 1 Mbakorinte 6:9-11.) Mbagenev mba ve hingir Mbakristu yô, ngise ve lu mba eren ijimba man mbadyarev kua nomso mba yaven a nomso mbagenev gayô kasev mba yaven a kasev. Asaren a a ne ior ve eren aeren a bo la aa fatyô u wan amise ken a ve. (Yak. 1:14, 15) Nahan kpa, i “ôô” asorabo a ambaaior la kera, sha ci u ve tese ér ve gema uuma vev sha er vea er ishima i Aôndo yô. Kanyi ia na or u Aôndo a doo nan ishima u palegh mhen u eren kwagh sha ci u asaren a bo laa? Mbakorinte u Môm 6:11 kaa ér “Jijingi u Aôndo wase” una wase se u eren nahan. Aluer ieren you ngi wang yô, u ngu tesen wer u na jijingi la ian i eren tom dông ken uma wou.

12. (a) Esekiel ôr ken mpase na u sha mnenge la ér Yehova hemen nongo na nena? (b) U fatyô u tesen wer u ngu eren kwagh ken mzough vea jijingi nena?

¹² Kwagh u sha uhar yô, Yehova yaren tom a jijingi na sha u hemen nongo na, zan a u sha gbenda u a soo la. Ken mpase u sha mnenge u Esekiel la, a nenge a vegher u nongo u Yehova u sha, u i kar u sha ikyekyeutya i i̱ lu yemen hemen hemen sha u za kuren awashima u Yehova la. Kanyi ka i kôôm ikyekye ne sha u i yem  sha gbenda u í soo ér i yem laa? Ka icighan jijingi. (Esek. 1:20, 21) Gba u se umbur ser nongo u Yehova ngu ker avegher ahar, vegher u sha man vegher u shin tar. Aluer ka icighan jijingi a hemen vegher u sha la yô, vegher u shin tar la kpa ka nahan. Aluer u ngu ungwan imo i vegher u nongo u Aôndo u shin tar ne shi u ngu dondon kwagh u ú kaa a vese ér se er la yô, u ngu tesen wer u ngu zan a ikyekyeutya i Yehova la imôngo shi u ngu eren tom ken mzough vea icighan jijingi na kpaa.—Heb. 13:17.

13, 14. (a) Ka unô ve lu “kov ne,” u Yesu ter kwagh u ú laa? (b) Na ikyav i tesen er icighan jijingi a lu eren tom sha u pasen mimi mba ken Bibilo wang yô. (Nenge ngeren u a lu a itinekwagh ér “U Ngu Kaven Iwanger i í Lu Tan Seer a Seer la Kpa?” la)

¹³ Kwagh u sha utar yô, Yehova ngu a yar tom a icighan jijingi sha u wasen se u kaven mimi mba ken Bibilo. (Anz. 4:18) Magazin ne ka gbenda u vesen u “Wanakiriki u jighjigh man u fan kwagh” a yar tom a mi ica i gbe hegen sha u pasen mimi mba ve lu ken Bibilo la kure kure yô. (Mat. 24:45) Ikyav i tesen yô, time ase sha mkav u se zough a mi sha kwagh u mba ve lu “kov ne,” u Yesu ter kwagh u ú la. (Ôr Mateu 24:32-34.) Lu kov u nyi Yesu ôr kwagh tere? I pase ken ngeren u a lu a itinekwagh ér “Mve u Kristu la Ngu U a Inja Kpa?” la ér Yesu lu ôron kwagh u mbaaferev ga, kpa lu ôron kwagh u mbahenen nav mba zurum u a shighe ve mkurem sha icighan jijingi la. * Mbadondon mba Yesu mba i shighe ve mkurem ken derianyom u hiihii man mba sha ayange a ase ne cii, vea lu mba vea nenge a ikyav la tseegh ga kpa shi vea kav inja i ikyav shon i tesen ér Yesu ‘mgbôghom shi a nangem sha hunda’ la.

¹⁴ Mpase ne ngu tesen se nyi? Shin er se fe shighe u “kov ne” ua lu zan zan a za kighir jighilii ga nahan kpa, gba u se kav akaa agen sha kwagh u ishember i “kov” la kpaa. Ashighe kpishi ka a ôron kwagh u kov yô, ka kwagh u ior mba lun anyom kposo kposo mba ve lu uma hen shighe môm la i ôron ye. Shighe ve ne lihen yum ga shi ngu a lu a ikighir kpaa. (Eks. 1:6) Sha nahan yô, se kav mkaanem ma Yesu ôr sha kwagh u “kov ne” la nena? A shi nan kpa, lu ôron ér mba i shigh ve mkurem, mba ve lu uma shighe u i hii u nengen a ajinge a ikyav la ken inyom i 1914 la, vea lu uma her zan zan mbagenev mba i shighe ve mkurem mba ve nenge a mhii u ikyav la ga, kpa vea gema a nenge mhii u zegecan la vea kar kohol ve. Kov la yange u lu a mhii shi ua kar kera kpee a bunde ga. M-iv u akaa a wasen se u fan ikyav ne a lu ivin la tese ér mayange zegecan kera shi  ica ga. Aluer u za hemen u eren kwagh torough torough shi u ngu kuran kpaa yô, u lu tesen wer u ngu lumun a mkav u he u se lu seer zuan a mi sha kwagh u mimi u ken Bibilo la shi icighan jijingi ngu hemen we kpaa.—Mar. 13:37.

15. Kanyi i tese ér ka icighan jijingi a ne se tahav mbu pasen loho u dedoo?

¹⁵ Kwagh u sha unyiin yô, icighan jijingi ne se tahav mbu pasen loho u dedoo. (Aer. 1:8) Ma kwagh ugen u a lu suen mpase u i lu pasen loho u dedoo tar sha won cii ne je kpa ngu ga. Hen sha kwagh ne. Alaghga u ngu môm ken mbara mba mciem yange ma na ve, ve gba henen ér ‘Mayange me fatyô u pasen kwagh sha uya uya ga!’ yô. Nahan kpa, hegen u ngu eren tom la sha gbashima. * Mbashiada mba Yehova mba ve civir un sha jighjigh kpishi za hemen u pasen kwagh, shin er i lu tôvon ve a ican gayô hendan a ve nahan kpaa. Ka icighan jijingi u a Aôndo tseegh una fatyô u nan se tahav mbu hemban akaa a wan se mbaagbe, shi eren akaa a sha agee a ase tseegh yô ma se fetyô u eren ga la ye. (Mika 3:8; Mat. 17:20) Aluer u ngu pasen kwagh kpoghuloo yô, u lu tesen wer u ngu eren kwagh gungur môm vea jijingi la.

Tom u Icighan Jijingi Una Er ken Hemen Yô

16. Se fatyô u lun a vangertiôr ser Yehova una kura ior nav shighe u zegecan la sha ci u nyi?

¹⁶ Ken hemen yô, Yehova una yar tom a icighan jijingi na sha igbenda i kpilighyol sha u kuren awashima na. Hiihii yô, time sha kwagh u mkor u Aôndo una kura se sha ikyev i jijingi na la. Er se vande henen nahan, Yehova yange yar tom a jijingi na ken ijime sha u kuran ior asange asange kua ikyurior i Iserael jimin cii. Sha nahan yô, se mba a ityôkyaa i vesen i nan jighjigh ser una va yar tom a jijingi na u ageegh la sha u kuran ior nav sha shighe u zegecan u a mgbôghom la. Gba u se ker a ker ahaba sha kwagh u Yehova una er sha u kuran se hen shighe la ga. Kpa se fatyô u lun a vangertiôr ser, ken hemen yô, mba Yehova a doo ve ishima cii una nenge sha a ve shi jijingi na una lu sha a ve kpaa.—2 Kron. 16:9; Ps. 139:7-12.

17. Yehova una yar tom a Icighan jijingi na ken tar u he la nena?

¹⁷ Yehova una yar tom a icighan jijingi na ken tar u he u una va a mi la nena? Hen shighe la a yar tom a jijingi la sha u ngeren uihyurenmbaruamabera mbahev mba a bugh mbara. (Mpa. 20:12) Ka akaa a nyi aa lu ken uihyurenmbaruamabera mba shono? A shi nan kpa, vea pase akaa a Yehova una soo ér se er ken anyom dubu la dike dike. U ngu veren ashe u va ôron akaa aa lu ken uihyurenmbaruambera mbara kpa? Saan se iyol u keghen tar u he la kpen kpen. Shighe u Yehova una yar tom a icighan jijingi na sha u kuren awashima na sha tar man uumace mba ve lu sha mi la, a doo se u ember uma je a zua ga.

18. U kange ishima u eren nyi?

¹⁸ Mayange i de hungur se er awashima u Yehova a pase la una kure kpee nahan ga, sha ci u ngu yaren tom a icighan jijingi na u a lu tahav mbu hemban sha won cii la sha u kuren awashima la. We kpa awashima la wa u ker. Nahan yô, kange ishima you sha u sônon Yehova jijingi na shi den wer a hemen we ken akaa a u eren cii. (Luka 11:13) Aluer u er nahan yô, u lu a ishimaveren i va lun uma gbem sha won ken Paradiso shin tar, er Yehova wa ishima sha hiihii la.

[Ngeren mba shin kpe]

Baver We Kpa?

• Yehova yange yar tom a icighan jijingi na sha ayange a tsuaa la sha igbenda i nyi sha u zan hemen u kuren awashima naa?

• Yehova ngu yaren tom a jijingi na nyian nena?

• Yehova una va yar tom a jijingi na ken hemen sha u kuren awashima na nena?

[Mbampin Mba Ngeren u Henen]

[Ngeren u kiriki u a lu sha peeji 10 la]

U Ngu Kaven Iwanger i í Lu Tan Seer a Seer la Kpa?

Yehova za hemen u tan iwanger sha mimi mba ken Bibilo sha ci u ior nav. Ka akaa agen a nyi nahan i te iwanger sha mi ken Iyoukura?

▪ Injakwagh i Yesu ôr sha kwagh u kwa la na mpase u dedoo sha kwagh u gbenda u or hingir orhenen u Kristu la nena? (Mat. 13:33)—Julai 15,2008, peeji 19-20.

▪ I yila Mbakristu mba ve lu a ishimaverenkeghen i yemen sha la i kighir hanma shighe?—Janawari 15, 2008, peeji 22-23.

▪ U civir Yehova “ken jijingi” la, inja na er nyi? (Yoh. 4:24)—Agusutu 1, 2002, peeji 9.