Ne Agumaior, Seer Taver Isharen Yen I Civir Yehova la
Ne Agumaior, Seer Taver Isharen Yen I Civir Yehova la
“Umbur u A gbe u la sha ayange a iyev ou.”—ORPA. 12:1.
1. Yange i lôhô mbayev mba kiriki ken Iserael ér ve er nyi?
PROFETI u Yehova, Mose yange kaa a upristi man mbatamen mba Iserael, anyom a karen ken ijime er 3,500 nahan ér: “Kohol ior, nomso man kasev man mbayev mba kiriki . . . , ve̱ ungwa, ve̱ hen ve̱ cian TER, Aôndo wou, ve̱ waan akaaôron a tindi ne cii ikyo, ve̱ eren sha mi.” (Dut. 31:12) Ka ior mba yange gba u a kohol ve ken mcivir je ne: nomso man kasev man mbayev mba kiriki. Mbayev mba kiriki kpa i kaa a ve ér ve ungwa, ve hen shi ve dondo gbendatesen u Yehova.
2. Yehova yange tese ér kwagh u agumaior a ken tiônnongo u Kristu u tsuaa la gba un ishima nena?
2 Ken derianyom u hiihii la, Yehova za hemen u tesen ér kwagh u mbayev mba kiriki mbaciviraôndo gba un ishima. U tesen ikyav yô, yange mgbegha apostoli Paulu nger akaawan sha ci u agumaior jighilii ken uwashika mba nger hen atôônanongo la. (Ôr Mbaefese 6:1; Mbakolose 3:20.) Agumaior a ken Kristu a yange er tom sha akaawan la yô, seer lun a iwuese hen Ter ve u sha u lun a dooshima la, nahan un kpa ver ve doo doo.
3. Agumaior nyian nga a tese ér sar a u civir Aôndo nena?
3 Nyian kpa i lôhô agumaior ér a va kohol imôngo sha u civir Yehovaa? Een! Nahan yô, doo ior mba Aôndo cica cii u nengen er agumaior a civir Aôndo sha tar kpishi a lu eren sha kwaghwan u Paulu ne yô. A kaa ér: “Sé wa nen ayol a ase ikyo, sé taver nen ayol a ase asema u lun a dooshima man aeren a dedoo. Se̱ de bundu nen mbamkohol asev mba aduaav er mbagenev ve eren nahan la ga, kpa sé taver nen asema ayol a ase, i̱ seer eren nahan er ne nenge iyange la i lu mgbôghom yô.” (Heb. 10:24, 25) Heela tseegh ga, mbayev kpishi mba pasen loho u dedoo u Tartor u Aôndo vea mbamaren vev imôngo. (Mat. 24:14) Shi hanma inyom yô, agumaior udubu imôngo ka a tese ér Yehova doo a ishima kpishi sha u eren batisema, nahan zuan a averen a a lu sha u hingir orhenen u Kristu la.—Mat. 16:24; Mar. 10:29, 30.
Lumun u Civir Yehova Hegen
4. Agumaior aa kuma anyom a me ve aa lumun u civir Aôndoo?
4 Orpasenkwagh 12:1 kaa ér: “Umbur u A gbe u la sha ayange a iyev ou.” Gba u ne agumaior ne gande ne kuma nan ve ne lumun u civir Yehovaa? I tese anyom a or a lu ve nana kuma u civir Yehova ken Ruamabera ga. Nahan yô, de henen wer u ngu wanye, nahan u ngu a kuma u ú ungwa imo i Yehova shi u civir un ga, maa hiden ijime ga. Anyom a ou aa lu nan nan kpa, mba taver we ishima ér u lumun u civir Yehova a atimbir shio.
5. Mbamaren vea wase mbayev vev u vesen ken jijingi nena?
5 Ne mbagenev kpishi, ormaren shin mbamaren enev wase ne u vesen ken mimi. Nahan we kpa kwagh wou ngu er kwagh u Timoteu u ngise la nahan. Hii shighe u lu iyev la je, ngô na Unise man ngô u ngô na Loisi, tese un icighanruamabera. (2 Tim. 3:14, 15) A shi nan kpa, mbamaren ou mba tesen we icighanruamabera sha u henen Bibilo a we shi eren msen vea we shi mba ze mbamkombo mba tiônnongo man mbamkohol mba ior mba Aôndo vea we shi mba dugh kwaghpasen vea we kpaa. Jighilii yô, u tesen we igbenda i Aôndo la ka tom u vesen u Yehova iyol na a ne mbamaren ou yô. U ngu a iwuese sha mdoo u ú doo ve ishima shi kwagh wou a gbe ve ishima la kpa?—Anz. 23:22.
6. (a) Pasalmi 110:3 tese ér ka mcivir u nyi a doon Yehovaa? (b) Hegen se time sha nyi?
6 Nahan kpa, er ne agumaior ne lu vesen la, Yehova soo ér ne “kar er ishima i Aôndo i lu yô man kwagh u a doo man a kom u lumun un man shi a lu vough la kpaa yô,” di vough er Timoteu kpa er nahan. (Rom. 12:2) Aluer u er nahan yô, ú eren akaa vea tiônnongo sha ci u mbamaren ou soo ér u er nahan ga, kpa a lu sha ci u ú soo u eren ishima i Aôndo. Aluer u ngu civir Yehova sha ishima you yô, a doo un a we. (Ps. 110:3) Nahan u tese wer, sar ú u taver isharen you i ungwan imo i Yehova shi dondon gbendatesen na la nena? Se time sha igbenda itiar i u fatyô u eren kwagh ne yô. Igbenda shon yô ka, kwaghhenen man msen kua ieren you. Se time sha igbenda ne môm môm.
Fa Er Yehova a Lu Or Kpôô Kpôô Yô
7. Yesu yange ver ikyav i orhenen Ruamabera nena, man lu nyi i wase un u eren kwagh nee?
7 Gbenda u hiihii u ú tese wer u soo u seer taver isharen you i civir Yehova yô, ka u ôron Bibilo hanma iyange. Aluer u ngu ôron Mkaanem ma Aôndo hanma shighe yô, u fatyô u kuren mgbe wou u ken jijingi shi zuan a mfe u injaa u ken Bibilo la. (Mat. 5:3) Yesu ver se ikyav sha kwagh ne. Shighe u lu anyom pue kar ahar la, mbamaren nav za zua a na ken tempel, “tema her atô u mbatesen, lu ungwan ve, man shi lu pinen ve akaa.” (Luka 2:44-46) Er Yesu lu wanye la je, lu a mkav man isharen sha Ruamabera. Lu nyi i wase un u eren nahana? Ngô na, Maria man ter-ikyoson na, Yosev, yange ve er tom u vesen je ka u henen a hen ga. Maria man Yosev lu mbacivir Aôndo mba ve tese Yesu igbenda i Aôndo hii shighe u lu iyev la je yô.—Mat. 1:18-20; Luka 2:41, 51.
8. (a) Ka hanma shighe nahan i doo u mbamaren vea hii u tesen mbayev vev u soon Mkaanem ma Aôndoo? (b) Ôr kwagh u a tese mluainja u tesen mbayev hii iyev vev je yô.
8 Kape nyian kpa mbamaren mba cian Aôndo ve kav mluainja u tesen mbayev vev sha er mimi u Bibilo una hii u saren ve shighe u ve lu iyev la je la. (Dut. 6:6-9) Ka kwagh u Kwasekristu ugen, mba yer un ér Rubi, er shighe u mar wan na u iunda, Joseph je la. Hanma iyange yô, yange a ôr takerada u i yer ér Takerada Wam ú Akaaôron a Bibilo la Joseph a ungwa. Er lu vesen la, Rubi wase un u umbur avur a ruamabera kpishi. Ityesen ne yange i lu Joseph a iwasen kpa? Yange hiin a hii u lamen nahan, a gba pasen akaaôron a Bibilo ken mkaanem nam. Kom anyom ataan yô, a na kwaghôron na u hiihii ken Makeranta u Henen Tom u Hemen u Aôndo.
9. Bibilo i ôron shi henen sha kwagh u ú er la ngu hange hange sha ci u nyi?
9 Aluer ne agumaior ne soo u seer vesen ken jijingi yô, i lu ikye yen i ôron Bibilo hanma iyange shi eren nahan shighe u ne lu vesen a vese la, zan zan shighe u ne hingir mbaganden la kpaa. (Ps. 71:17) Bibilo i ôron ia wase ne u vesen ken jijingi sha ci u nyi? Nenge ase kwagh u Yesu yange kaa a Ter na ken msen ne, ér: “Man uma u tsôron yô, ka u ve̱ fa U, We Aôndo u mimi tswen, man shi Un u U tindi la, ka Yesu Kristu.” (Yoh. 17:3) Sha kpôô yô, aluer ne seer zuan a mfe u Yehova yô, ne hemba nengen Yehova ner ka or jim jim shi una hemba doon ne ishima kpaa. (Heb. 11:27) Nahan yô, hanma kwa u ne er ivur Bibilo yô, tôô nen shighe la sha u seer henen kwagh u Yehova. Pine iyol you wer: ‘Ivur ne tesem nyi sha kwagh u Or u Yehova a lu? Ivur Bibilo ne tese ér m doo Aôndo ishima shi kwagh wam gba un ishima nena?’ Aluer u tôô shighe u hen sha mbampin mban yô, kwagh la una wase ú u fan er Yehova a henen kwagh shi i lun un ken ishima la man kwagh u a soo hen a we la kpaa. (Ôr Anzaakaa 2:1-5.) Nahan a “tese u tsung sha er u na jighjigh, NW” a akaa a u hen ken Ruamabera la yô, vough er gumor Timoteu nahan, shi kwagh ne una mgbegha ú u civir Yehova a ishima you kpaa.—2 Tim. 3:14.
Msen Seer Taver Mdoo u Yehova a Doo Ú Ishima La
10, 11. Msen una wase ú u seer taver isharen you i civir Aôndo la nena?
10 Gbenda u sha uhar u ú seer taver isharen i u lu a mi i civir Yehova a ishima i môm yô ka mbamsen mba u eren la. I kaa a vese ken Pasalmi 65:2 ér: “We, u U ongo msen, ka hen a We man uuma cii vea va ye.” Shighe u Mbaiserael lu ikyurior i Aôndo ya ikyur a ve la je kpa, ushirmbaiorov vea va ken tempel sha u va civir Yehova yô, ve er msen hen a na. (1 Utor 8:41, 42) Aôndo ka u sangen a sange ga. Mba ve kor atindi a na cii mba a vangertiôr ér una ungwa mbamsen vev. (Anz. 15:8) Sha mimi yô, “uuma cii” mba ve ve hen Yehova la kua ne agumaior kpa ker.
11 Ne fa er iliam i dedoo i maan azende a taver yô. A shi nan kpa, ka i doo ú u pasen ijende you i ishima ishima mbamhen ou man akaa a zan we iyol kua er i lu u ken ishima la. Kape ka wea eren msen a ishima you i môm ve u lu lamen vea Orgban we je la. (Fil. 4:6, 7) Pase Yehova er i lu u ken ishima la, di vough er ka u pase mbamaren ou shin azende ou a ishima ishima er i lu u ken ishima nahan. Jighilii yô, gbenda u ú eren msen hen Yehova la gba zua a gbenda u ú nengen un la. Aluer ikyaryan you vea Yehova seer taver yô, kape u hemban eren msen hen a na sha inja je la.
12. (a) Msen u injaa wa nyi man nyi kere? (b) Kanyi ia wase ú u fan wer Yehova ngu ikyua ikyua a wee?
12 Nahan kpa fa wer, msen u injaa saa sha mkaan tseegh tsô ga. A wa mlu u ken atô u ishima you la kpa ker. Ú eren msen yô, tese wer Yehova doo u ishima tsung shi u ne un icivir kpishi shi u suur sha a na a ishima you cii kpaa. U nguren nengen er Yehova a ongo mbamsen ou yô, u mase kaven wer, “TER ngu ikyua ikyua a mba ve yer Un cii.” (Ps. 145:18) Yehova una kporom ikyua a we shi una na u agee sha er u hendan a Diabolo shi u tsua akaa a vough ken uma wou yô.—Ôr Yakobu 4:7, 8.
13. (a) Ikyar i anmgbian u kwase ugen ya vea Aôndo la wase un nena? (b) Ikyaryan you vea Aôndo wase ú u hemban mbamkighir mba mbakov wou nena?
13 Time ase sha kwagh u tahav mbu anmgbian u kwase ugen, mba yer un ér Cherie, yange zua a mi ken ikyaryan na vea Yehova la. Shighe u lu ken kôleeji la, a zua a uiyua kpishi sha ci u mfe takerada na la shi fa anumbe a eren tsembelee kpaa. Shighe u bee makeranta la, i na un takerada u zan makeranta u vesen gbilin. Cherie kaa ér: “Takerada ne lu imeen hen a mo, shi mbatesen se anumbe kua mba se zaan makeranta imôngo la lu kighir mo kpoghuloo ér m lumun u zan makeranta u vesen gbilin.” Nahan kpa, yange kav ér, aluer un za makeranta u vesen yô, una kera zuan a shighe u civir Yehova ga, sha ci u a gba u una waan iyol shi una henen u eren anumbe. Nahan Cherie er nena? A kaa ér: “Yange m er msen hen Yehova, nahan m venda u zan makeranta u vesen gbilin, kpa m gema m hii u eren tom u pania u keke.” A er tom u pania u keke ne ka anyom ataan je ne. A kaa ér: “Mayange je m vaa afanyô ga. Mfe u m fe mer, kwagh u m tsough u eren ne doo Yehova ne na yô, saan mo iyol. Jighilii yô, aluer u ngu vanden keren Tartor u Aôndo yô, akaa agen ne cii a seer ne a.”—Mat. 6:33.
Ieren You i Dedoo la Tese Ér Ú Ngu a “Ishima i Mimi”
14. Ieren you i dedoo la ngi hange hange hen Yehova sha ci u nyi?
14 Gbenda u sha utar u ú tese wer u ngu civir Yehova a ishima you yô ka sha ieren you. Yehova ngu a ver agumaior a a lu wang sha aeren la doo doo. (Ôr Pasalmi 24:3-5.) Gumor Samuel yange venda u dondon aeren a ijimbagh a ônov mba Eli u lu Pristi u Tamen la. Yehova nenge ieren i dedoo i Samuel la. Bibilo kaa ér: “Samuel wanakiriki la vese, TER kua ior kpaa lumun un.”—1 Sam. 2:26.
15. Ka atôakyaa agen a nyi a ne ve ne lu a aeren a dedoo?
15 Se mba ken tar u ior mbawan ayol a ve ikyo tseegh man mbagengese iyol man mbahemban mbamaren ve ato man mbalun a ishughun ga man mbalun wang ga, man anomaior a bo man mba iember i iyolough i hembe doon ve a Aôndo la ve dumbur yô. Se ter aeren a Paulu ôr ér ior vea lu a mi ainge la kpuaa tsô. (2 Tim. 3:1-5) Nahan er ne lu ken tar u bo ne yô, a lu ne ican kpishi u lun a aeren a dedoo. Nahan kpa, hanma kwa u ne vende u eren kwaghbo, ne gem ne er kwagh u dedoo yô, ne mba tesen ner ne tile ken vegher u Yehova sha kwagh u or u nan kom u hemen sha won cii ne. (Yobu 2:3, 4) Shi ne zua a kom kpaa, gadia ne fa ner, ne mba eren sha kwaghwan u Yehova u kundu kundu ne, ér: “Wan wam, lu orfankwagh, na i saan mo iyol, sha er me gema me kaa imo a or u a laham yô.” (Anz. 27:11) Heela tseegh ga, er ne fe ner Yehova lumun a ven yô, isharen i ne lu a mi i civir un la ia hemba taver a taver cii.
16. Anmgbian u kwase ugen yange na saan Yehova iyol nena?
16 Anmgbian u kwase ugen, mba yer un ér Carol, yange var a akaawan a Bibilo shighe u lu gumkwase ve lu zan makeranta la, man wanyemakeranta ugen nenge ieren na i dedoo la. Lu nyi i eree? Mbayevmakeranta mba ken klase u Carol yange ve shi nahan un tar, sha ci u imoshima na i Bibilo i tsaase i la lumun un u ember uiniongo mba kwaghaôndo shin uiniongo mba civir tar ga yum. Sha ashighe la cii, á zua a ian i pasen mbagenev kwagh u a ne jighjigh a mi yô. Anyom nga kar imôngo yô, wankwase ugen u ve lu klase môm yô tindi un a kaade, nger sha mi ér: “Ka m shi veren ishima u zuan a we shi sughun we kpaa. Yange m nenge a ieren you i dedoo la, kua mtil u ú tile dông sha u palegh uiniongo mba eren la. Ka we u lu Kwaseshiada u Yehova u yange m hii zuan a nan ye.” Ikyav i dedoo i Carol la yange i bende a wankwase u ve lu klase môm ne je yô, un kpa va hii u henen Bibilo ken masejime. A nger ken kaade u tindi Carol a mi la ér, un er batisema un hingir Kwaseshiada anyom 40 ken ijime. Ne agumaior a ne var a akaawan a Bibilo nyian er Carol nahan yô, ne fatyô u wasen mbaasemaamimi u va fan Yehova.
Agumaior A Á Lu Wuese Yehova Yô
17, 18. (a) U nengen agumaior a ken tiônnongo wou nena? (b) Kanyi i lu keghen agumaior a cian Aôndo ken hemenee?
17 Doo se nongo u Yehova tar sha won cii u nengen er agumaior udubu imôngo a lu civir Yehova sha gbashima yô. Agumaior ne nga a seer taver isharen i a lu a mi u civir Yehova la sha u ôron Bibilo hanma iyange shi eren msen shi eren kwagh u a zough sha ishima i Aôndo yô. Agumaior a a veren ikyav i dedoo ne nga a na i saan mbamaren vev iyol kua ior mba Yehova cii.—Anz. 23:24, 25.
18 Ken hemen yô, agumaior a a lu civir Aôndo sha mimi la aa lu ken mba vea war a nyôr ken tar u he u Aôndo a tende zwa la. (Mpa. 7:9, 14) Ken tar u he la, vea za hemen u zuan a averen kpishi, gadia vea seer lun a iwuese hen Yehova shi vea civir un gbem sha won kpaa.—Ps. 148:12, 13.
Ú Fatyô u Pasen Kpa?
• Agumaior aa fatyô u civir Aôndo sha mimi nyian nena?
• Aluer u soo u zuan a iwasen ken Bibilo i ôron yô, u̱ henen sha kwagh u ú er ken Bibilo la ngu hange hange sha ci u nyi?
• Msen una wase ú u kporom hen Yehova nena?
• Kanyi ngi i due ken ieren i dedoo i Orkristu laa?
[Mbampin Mba Ngeren u Henen]
[Foto u sha peeji 5 la]
Ka ikye you u ôron Bibilo hanma iyange kpa?