Haran Tse-ijiir U Mbayiase Eren Akaa Her Kpoghuloo yô

MBA ve fe akaa a ken Ruamabera yô, ka a teren iti i Haran maa ve umbur kwagh u Aberaham, tertamen u lu orjighjigh la. Er Aberaham mough hen Ur lu yemen ken tar u Kanaan vea kwase na Sara man ter na, Tera man Loti, wan u anngô na u nomso yô, ve za haa afo hen Haran. Shighe u ve lu ken Haran la, Aberaham hingir u lun a akaa kpishi. Ter u Aberaham kpen kera yô, Aberaham shi mough hen Haran gba yemen ken tar u Aôndo tôndo zwa a na la. (Gen. 11:31, 32; 12:4, 5; Aer. 7:2-4) Shighe kar yô, Aberaham tindi wanakiriki na u vesen ken Haran shin ma ijiir i i lu ikyua a Haran ér a za er kwase sha ci u Isaka. Yakob, wan u wan u Aberaham u nomso la kpa yange za lu hen gar u Haran anyom imôngo.—Gen. 24:1-4, 10; 27:42-45; 28:1, 2, 10.

Ken kwaghsuen u Tor Senakeribi, tor u Ashiria sue a Tor Hesekia, tor u Mbayuda sha u tan un mciem iyol la, a ter Haran ken “akuraior” a yange utor mba Shiria tim a yô. Lu gar la tseegh i yilan ér “Haran” ga, kpa lu iti i ipaventar la jimin cii. (2 Utor 19:11, 12) Kwaghôron u profeti u Esekiel ter Haran ér a lu môm ken ajiir a vesen a tar u Tiru eren kasua a a yô, nahan tese je ér Haran lu ijiir i vesen i eren kpenga her.—Eze. 27:1, 2, 23.

Hegen ne, Haran hingir angar u cuku, ngu ikyua a gar u Şanlıurfa, u a lu sha ityoughkitaregh ki tar u Turkey la. Nahan kpa, sha anshighe ugen la, gar u Haran u tsuaa la lu ijiir i í eren akaa her kpoghuloo yô. Haran ngu môm ken ajiir kpeghee a i ter a ken Bibilo, shi i yer a sha ati la zan zan nyian yô. Mbaashiria yange ve yilan Haran ér Harranu, inja na yô ér, “Gbenda” shin “Gbenda u ior karen sha mi gudu gudu.” Kwagh ne tese ér Haran lu ijiir i igbenda i vesen kar her, i ior duen sha agar a vesen va yamen kasua her yô. Ngeren mba sha ikpande awen mba i dugh shin inya hen gar u Haran tese ér, ngô u Tor Nabonidus, tor u Babilon la lu pristi u tamen u kwase ken tempel u Sin, aôndo u uwer, u̱ tar u Haran la. Ior mbagenev kaa ér Nabonidus yange hide maa tempel ne. Shighe la kar yô, ityartor i vesen hemen tar cii sha adondo adondo kar yem, kpa Haran lu her.

Nyian ne, akaa kpishi gema ken Haran, kera ngu er a lu sha ayange a tsuaa la ga. Haran lu gar u za ikyura kpishi, shi ashighe agen a lu ior a inja tsung yô. Nahan kpa, nyian ne Haran hingir anijiir u lun a ayou a lun haav gbilititi di tsô. Ayou a mbayiase maan la cii hingir alôgh hen ikyasen u Haran la. Ken tar u he u Aôndo una va a mi la, Aberaham man Sara man Loti kua mbagenev kpishi mba yange ve lu ken Haran cii a nder ve shin ku. Ior mban vea hemba ôron se kwagh u Haran, ijiir i mbayiase eren akaa her kpoghuloo la.

[Foto u sha peeji 20]

Atse a Haran

[Foto u sha peeji 20]

Ayou a lun a haav mbu gbilititi

[Foto u sha peeji 20]

Gar u Haran jimin cii ainge