Za Hemen u Eren Tom sha Mkav Wou u ken Ishima La

KA SEA nenge or u fan anumbe a eren, nana dughun igyônôgyô fele fele shi nana eren kwagh shon tsembelee nahan, i doo se kenger kpen kpen! Bibilo taver Mbakristu ishima ér ve tsaase mkav ve u ken ishima la, er oranumbegh u dughun igyônôgyô kpa ka nan kar iyol nahan.

Ken washika u apostoli Paulu nger hen Mbaheberu la, a kaa ér: “Kwaghyan u taver yô, ngu sha ci u mbaganden, ka ve mba ve er tom sha mkav u ken ishima [inja na jighilii yô ér, “alegh a henen kwagh”], hoghor ve [er oranumbegh u dughun igyônôgyô nahan] u paven kwagh u dedoo a kwagh u bo.” (Heb. 5:14) Hii nan ve Paulu taver Mbaheberu mba ve lu Mbakristu mbara ishima ér ve tsaase mkav ve er oranumbegh u dughun igyônôgyô ka nan kar igbila i nan iyol nahan laa? Se fatyô u tsaase mkav wase u ken ishima la nena?

“Kuma u Ma Ne Lu Mbatesen”

Shighe u Paulu lu nan mpase sha kwagh u ian i Yesu a lu sha mi i “Zegepristi u sha inja i Melkisedeki” la, a nger ér: “Sha kwagh ne yô, se mba a kwaghôron her kpishi, man a cimin u pasen kpaa gadia ne hingir mba ungwan tumbuluu. Gadia shighe yô, kuma u ma ne lu mbatesen je, kpa i shi i gba ne u orgen nana ôr ne atôakaa a hiihii a sha akaaôron a Aôndo la, ne hingir mba kwagh a gbe ne u man atumba, kera ka kwaghyan u taver ga.”—Heb. 5:10-12.

Ikyav tese ér, Mbayuda mbagenev mba ve hingir Mbakristu sha derianyom u hiihii la za hemen ken mkav ve ga, shi ve fatyô u zan ikyura ken jijingi kpaa ga. U tesen ikyav yô, yange taver ve u lumun a iwanger i í lu tan sha kwagh u Tindi man kwagh u icôngo la. (Aer. 15:1, 2, 27-29; Gal. 2:11-14; 6:12, 13) Lu mbagenev ican u den aeren a uter a i eren ken hanma sati sha Iyange i Memen kua a i eren kwa môm ken inyom sha Iyange i nan Iwom la. (Kol. 2:16, 17; Heb. 9:1-14) Sha nahan yô, Paulu taver ve ishima ér ve tsaase mkav ve u ken ishima la sha er vea fatyô u paven kwagh u dedoo a kwagh u bo yô, shi a kaa a ve ér ve ‘za hemen sha mlu u vian la.’ (Heb. 6:1, 2) Alaghga tsô kwaghwan na ne yange mgbegha mbagenev u henen sha gbenda u ve lu eren tom a mkav la, shi adooga kwagh ne wase ve u vesen ken jijingi. Hide se di ye?

Tsaase Mkav Wou u ken Ishima La

Se fatyô u tsaase mkav wase u ken ishima la sha er se hingir mba vian ken jijingi nena? Paulu kaa ér ka sha u ‘eren tom’ sha mkav shon. Er mbaanumbev mba dughun igyônôgyô ka ve er anumbe sha u karen igbila ve man iyol ve iyol sha u vea fatyô u dughun igyônôgyô tsembelee nahan, doo u se kpa se tsaase mkav wase u ken ishima la sha er se fatyô u paven kwagh u dedoo a kwagh u bo yô.

Profesôr u tweregh u ken Harvard Medical School, u a fe u sôron ihyundugh tsembelee yô, iti na ér John Ratey, kaa ér: “Kwagh u hemban doon cii u or nana ér a mhirinim ma nan yô, ka u tsaase ma.” Orhemen gbaa u kwaghhenen u i yer ér Center on Aging, Health and Humanities, u hen George Washington Universtity la, iti na ér Gene Cohen, kaa ér: “Zum u se tsaase mhirinim asev yô, aveghemakaa a nderan uma aa a lu ker la ka a seer wan amise shi menden angbirav mbagenev, nahan ujuan mba mhirinim ma shon kpa ve seer ngeen.”

Sha nahan yô, se lu eren kwagh sha kwaghfan aluer se mba tsaase mkav wase u ken ishima la shi seer mfe u se fe Mkaanem ma Aôndo la yô. Aluer se er kwagh ne yô, se hemba fan u eren “ishima i Aôndo vough.”—Rom. 12:1, 2, NW.

 Lu a Isharen i Yan “Kwaghyan u Taver”

Aluer saa se u ‘zan hemen sha mlu u vian la’ yô, gba u se pine ayol a ase ser: ‘M ngu kaven mimi u ken Bibilo la seer a seer kpa? Mbagenev mba nengen mo ér m ngu or u vian ken jijingi kpa?’ Ka i doo ngô u nan wanikyundan na atumba man kwaghyan u anikyundanev er a lu iyev la. Kpa aluer anyom kar kpishi kpa wan ne venda u yan kwaghyan u taver yô, a za ngô na iyol. Kape se kpa ka sea nenge or u se henen Bibilo a nan, nana vese zan zan nana ar sha iaven i tseghan iyol i nan shi eren batisema ve, i doo se je la. Kpa aluer or la nan de u zan hemen u vesen ken jijingi shighe u nan er batisema kera la di ye? Shi a doo se a nan kpa? (1 Kor. 3:1-4) Tica ka nan ver ishima ér, shighe a karen yô, orhenen u he ne kpa nana hingir tica.

Aluer ka u se yar tom a mkav wase u ken ishima la sha u henen sha kwagh yô, gba u se time sha kwagh shon, man gba u se nôngo kwagh kpoghuloo ve se fatyô u eren nahan ye. (Ps. 1:1-3) Gba u mayange se de ser, akaa a danen se, er televishen u nengen shin akaa agen a se soon u eren, a ka a yange se u eren tom a mkav wase tsembelee la nahan, a̱ ya shighe u ma se yar tom a mi u henen sha akaa a a hembe lun a inja la ga. Aluer se soo ser se seer tsaase mkav wase u ken ishima la yô, gba hange hange u se lu a isharen i henen Bibilo kua ityakerada i “wanakiriki u jighjigh man u fan kwagh” la, shi se nôngo se iv isharen la kpaa. (Mat. 24:45-47) U seer sha Bibilo i ôron sha tseeneke wase hanma shighe la yô, doo u se ver shighe sha ci u Mcivir u hen Tsombor wase shi se henen atineakaa a vesen a ken Bibilo kpaa.

Ortamen u zenden sha ugen ken tar u Mexico, iti na ér Jerónimo, kaa ér un we a wa ahô a henen hanma mgber u Iyoukura u i dugh a mi ga. Shi a ver shighe sha u henen kwagh vea kwase na. Jerónimo kaa ér, “Er se vese ayol a ase ne, se mba er Bibilo imôngo hanma iyange cii, shi ka se yar tom a ityakerada i wasen se u henen Bibilo, er antakerada u i yer ér ‘Good Land’ la nahan.” Orkristu ugen, iti na ér Ronald, a pase wener un den ér Bibilo i ôron ken tiônnongo la i kar un ga. Shi ngu a tsua ityôkwagh i môm shin atôakaa ahar ken Bibilo a una time sha mi shighe gôgônan sha tseeneke na yô. Ronald kaa ér: “U eren nahan ne na yô, m hingir u veren ishima sha kwagh ugen u i gbe u me hen ken hemen la.”

Se di ye? Se mba veren shighe kpishi sha u henen Bibilo shi gbidyen kwar sha Mkaanem ma Aôndo kpa? Se mba tsaase mkav wase u ken ishima la shi se mba tesen ser se mba tsuan akaa a se soo u eren la sha kwaghfan, er atindi a ken Ruamabera a tese nahan la kpa? (Anz. 2:1-7) Yô, se cii se lu nen ior mba vian ken jijingi, mba ve lu a mfe man kwaghfan u ior mba ve eren tom sha mkav ve u ken ishima, nahan i hoghor ve u paven kwagh u dedoo a kwagh u bo la.

[Foto u sha peeji 23]

Se mba tsaase mkav wase u ken ishima la sha u ‘eren tom’ sha mkav shon