“Doo U Né Lu Ken Icighanmlu Man Né Lu Civir Aôndo Nena?”

“Er akaa cii á va sough kera nahan yô, doo u né lu ken icighanmlu man né lu civir Aôndo nena?” —2 PET. 3:11.

1. Washika u Peteru u sha uhar la yange taver Mbakristu mba sha ayange a na la ishima sha shighe vough sha ci u nyi?

 SHIGHE u jijingi mgbegha apostoli Peteru nger washika na u sha uhar la, tiônnongo u Kristu lu vanden wan ishima a mtev u sha ican kpishi, kpa mayange tiônnongo ndôhôr ga shi kwagh ne yange un u seer vesen ga. Nahan Diabolo yar tom a ayom a na agen a yange vanden yaren tom a mi tsembelee yô. Er Peteru pase nahan, Satan yange nôngo ér una vihi nongoior u Aôndo sha ikyev i mbatesen mba aiev, mba “ashe a ve iv a idya” shi “ve via ishima sha hua u eren” la. (2 Pet. 2:1-3, 14; Yuda 4) Sha nahan yô, washika u Peteru u sha uhar la ka washika u taver se ishima ér se za hemen u civir Aôndo sha mimi.

2. Kanyi 2 Peteru ityough 3 a hembe ôrono, man ka mbampin mba nyi i doo u se pine ayol a ase?

² Peteru nger ér: “Sha mnenge wam yô, ka vough u me umbur ne akaa me nder ne sha ayange a m hira lu shir ken tenti ne. Gadia m fa myôhôr u tenti wam una va yôhôr ne, kera shi ica ga . . . Me nôngo tsung sha u me va kar kera yô, hanma shighe né fatyô u umbur akaa ne” yô. (2 Pet. 1:13-15) Peteru yange fa er zurum u una kpe yô, kpa soo ér ma i ze hemen u umbur akaawan a na la. Nahan i nger akaawan la ken  Bibilo sha er hanmô wase nyian nana fatyô u ôron yô. Ka ityough ki sha 3 ki washika u Peteru u sha uhar la jighilii je ki lu se a inja ye, sha ci u ki hemba ôron kwagh u “ayange a masejime” a tar ne kua mtim u a va tim usha man tar u sha injakwagh la. (2 Pet. 3:3, 7, 10) Ka kwaghwan u nyi Peteru a lu a mi sha ci wase? Se dondo kwaghwan na la nena ve, Yehova una lumun se?

3, 4. (a) Lu ishemberkwagh i nderen ior asema i nyi Peteru ôrô, man yange ta icin ér nyi? (b) Ka atôakaa a atar a nyi se lu timen sha mini?

³ Peteru er kwagh u a va sough tar u Satan ne kera, been yô, a kaa ér: “Nahan yô, doo u né lu ken icighanmlu man né lu civir Aôndo nana?” (2 Pet. 3:11, 12) Kwagh ne tese wang ér, Peteru lu pinen a pine mpin ga, kpa lu ôron a ôr kwagh u nderen ior asema. Peteru fa er i lu mba ve eren ishima i Yehova shi ve lu a aeren a doon un la tseegh vea war sha “iyange i iyevoron,” i i lu van la yô. (Yes. 61:2) Nahan yô, apostoli ne za hemen kaa ér: “Ne mbadoon mo ishima, er ne vande fan kwagh ne nahan yô, kuran nen i̱ de kera kôron ne i̱ urugh ne sha mtsum u mbalumun atindi ga la er né gba sha mtil wen la ga yô.”—2 Pet. 3:17.

⁴ Er Peteru lu môm ken mba ve “vande fan” kwagh ne nahan yô, yange fa er lu u ken ayange a masejime yô, a gba u Mbakristu vea hemba kuran ayol a ve cii sha er vea za hemen u tilen sha mimi yô. Shighe kar yô, apostoli Yohane pase ityôkyaa wang. Yange tsenga nengen ityav mbi lu u a daa Satan sha a gbihi un shin tar la man er “ishima [ia] vihi un tsung” a mba ve ‘kor atindi a Aôndo shi ve lu eren shiada sha kwagh u Yesu kpaa’ la nahan. (Mpa. 12:9, 12, 17) Mbatomov mba Aôndo mbajighjigh mba i shigh ve mkurem la man mbajighjigh mba ken “iyôngo igen” mba ve lu akar a ve la vea hemba. (Yoh. 10:16) Kpa gema se asange asange di ye? Se za hemen u tilen sha mimi kpa? Aôndo una sue se u eren nahan aluer se mba nôngon sha afatyô wase cii ser (1) se lu a aeren a Kristu, shi (2) se lu wang a acôhgor iyol ken jijingi man sha iyol shio, shi (3) se lu a mnenge u vough sha kwagh u ameen yô. De se time nen sha atôakaa ne.

Lu a Eren a Orkristu

5, 6. Ka aeren a nyi i doo se nôngo sha afatyô wase cii se lu a mini, man er nan ve i gbe u saa se ‘nôngo ngeelee’ ve se lu a á?

⁵ Ken mhii u washika u Peteru u sha uhar la je, a nger ér: “Nôngo nen ngeelee je, sha jighjigh wen u nan la, seer nen aeren a dedoo, sha aeren a dedoo la, seer nen kwaghfan; sha kwaghfan la, seer nen u kôron iyol tsaha; sha tsaha u kôron la, seer nen ishima i taver; sha ishima i taver la, seer nen mcivir u civir Aôndo; sha mcivir u civir Aôndo la seer nen u doon a anmgbianev man sha u doon a anmgbianev la yô, seer nen dooshima. Gadia aluer akaa ne aa lu ken a ven man á ngee je, á dumbur yô, aa na er ken mfe u ne fa Ter wase Yesu Kristu la né kera lu gbilin shin mbaumen atam ga, ze.”—2 Pet. 1:5-8.

⁶ Mimi je, saa se ‘nôngo ngeelee’ ve se er akaa a aa wase se u lun a aeren a Kristu la ye. U tesen ikyav yô, saa se nôngo tsung ve se zaan mbamkombo mba Mbakristu cii, shi se ôron Bibilo ayange ayange shi se za hemen u henen kwagh sha tseeneke wase sha ashighe a se ver la vough vough ye. Shi a gba u se er tom taveraa shi se yaren tom a shighe wase sha inja ve se eren Mcivir u hen Tsombor wase aikighe hanma shighe shi una doo shi una wase tsombor ye. Kpa se nguren eren akaa sha ashighe a se ver la vough vough yô, a kera taver se u lun a aeren a dedoo ne ga, hemban je yô zum u se zough a mbamtsera la.

7, 8. (a) Ior mbagenev ôr akaa sha kwagh u Mcivir u hen Tsombor u aikighe la ér nyi? (b) Mcivir u hen tsombor wou ngu wasen we nena?

⁷ Anmgbian u kwase ugen nger sha kwagh u Mcivir u hen Tsombor ér: “Ngu a wase se u henen sha atôakaa kpishi.” Ugen di shi kaa ér: “U ôron kwagh sha mimi yô, yange m soo mer mkombo u henen takerada la a de kur ga. Lu mkombo u hemba doon mo je la. Kpa er se gem eren Mcivir u hen Tsombor wase tugh ainge ne, m nenge mer Yehova fa shighe u  kwagh a gbe se yô, kua kwagh u a gbe se la kpaa.” Orya ugen kaa ér: “Mcivir u hen Tsombor la wase se kpishi. Mo vea kwase wam ka sea er mkombo ne sea lam sha akaa a wasen se nahan i saan se iyol kpen kpen! Se nenge ser se mba hemban umen ityamegh ki icighan jijingi la cii, nahan se mba seer zuan a msaanyol ken tom wase u pasen kwagh la.” Ugen di shi kaa ér: “Ônov asev mba keren akaa ken ityakerada yase ayol a ve shi mba henen kwagh kpoghuloo kpaa, nahan doo ve. Mcivir u hen Tsombor ne na yô, se mba a vangertiôr ser, Yehova fa mbamgbe asev shi ongo mbamsen asev kpaa.” We kpa u nenge kwagh u dedoo u Yehova a ne se ne nahanaa?

⁸ De deen wer akaa a kiriki a bunde ú u eren mcivir u hen tsombor ga. Orgen vea kwase na ve kaa ér: “Ken usati mba unyiin mba ve kaa ne, hanma iyange i Tomanyiin yô, kwagh yange a er hen tsombor wase tugh je er se fatyô u henen kwagh ga nahan, kpa se de ser kwagh shon a yange se kwaghhenen ma shighe môm ga.” Jighilii yô, adooga ashighe agen a gba u ú nyôôso shighe wou. Nahan kpa, mayange de hôron Mcivir u hen Tsombor wou aikighe ga, kasua môm kpa de her ga!

9. Yehova yange koso Yeremia nena, man ikyav na la tese se nyi?

⁹ Kwagh u ngise er profeti Yeremia la ka ikyav i tesen hen a vese. Yange zua a kwaghyan u ken jijingi u lu keren la hen Yehova, nahan a wuese tsung. Kwaghyan la wase un u pasen kwagh sha ishima i wan hen mbara mba doo ve u ungwan ga la. A kaa ér: “Kwaghôron u TER . . . hingir mo ken ishima er usu u hian, u i cir u ken akuhe am yô.” (Yer 20:8, 9) Kwaghyan la shi wase un u wan ishima sha ashighe a ican a yange kuusu sha mtim u Yerusalem la. Nyian ne, se mba a ngeren u Mkaanem ma Aôndo jimin cii. Aluer se mba timen ken ngeren ne sha gbashima shi se mba lun a mnenge u Aôndo sha kwagh yô, se fatyô u wan ishima eren tom u pasen kwagh la a iember shi tilen sha mimi her shighe u se tagher a ameen yô, shi se za hemen u lun wang ken jijingi man sha iyol kpaa, vough er Yeremia nahan.—Yak. 5:10.

“Lu Wang a Acôghor Iyol” Shio

10, 11. Er nan ve i gbe u saa se nôngo kwagh tsung ve se lu “wang a acôghor iyol ga,” man kwagh ne wa nyi man nyi kere?

¹⁰ Er se lu Mbakristu yô, se fa er se lu ken ayange a masejime yô. Sha nahan yô, kpiligh se iyol er tar u mgbogh a akaa a ndôhôr Yehova ishima, inja er hua man ijimba man ipila nahan ga. Se fatyô u kaan ser ayom a Satan a eren cii, awashima na yô, ér: ‘Aluer un fatyô u tan mbacivir Aôndo mciem iyol ga yô, alaghga una vihi ve.’ (Mpa. 2:13, 14) Nahan gba u se dondo kwaghwan u Peteru u sha dooshima ne, ér: ‘Nôngo nen tsung sha u á kohol ne ken bem sha ishigh ki Aôndo né lu wang a acôghor iyol ga yô.’—2 Pet. 3:14.

¹¹ Ishember i “nôngo nen tsung” la ngi kwagh môm a ishember i Peteru vande teren ken kwaghwan na u a kaa ér i ‘nôngo ngeelee’ la. Nahan tese wang je ér, Yehova, un u na Peteru mbamhen mban ér a nger la, a fa er i gbe u se nôngo kwagh tsung ve se lu “wang a acôghor iyol ga” man hôngor u tar u Satan ne ua bende se iyol ga yô. U nôngon kwagh tsung la kua u kuran ishima yase sha er asaren a bo aa ngohol i̱ ga yô. (Ôr Anzaakaa 4:23; Yakobu 1:14, 15.) Shi kwagh ne kua u hendan a mba i kpiligh ve  iyol a mlu wase u Mbakristu, ve “gbe lamen sha a [vese] dang tsô” la.—1 Pet. 4:4.

12. Kanyi Luka 11:13 a ne se vangertiôr sha mini?

¹² Er se lu mbaasorabo yô, ka i taver se kpishi u eren kwagh u vough. (Rom. 7:21-25) Saa se suur sha Yehova, u a ne mba ve sen un sha mimi mbara icighan jijingi na ve se fatyô u veren ishima keghen ser se za ikyura u eren kwagh u injaa ye. (Luka 11:13) Jijingi la di ngu a gema a yese aeren a a doo Aôndo ishima la ken a vese shi ngu a wase se u nôngon a atsan kua ameen a karen jighjigh wase u nan, a a lu seer a seer hegen, er iyange i Yehova i mgbôghom ne.

Ameen a̱ Taver Jighjigh Wou u Nan

13. Shighe u ameen a tser se yô, kanyi ia wase se u taver ishima?

¹³ Er se lu ken tar u tse ne yô, sea er nan kpa ameen atô kposo kposo aa tser se. Ameen a de ne u ishimavihin ga, kpa gema tôô wer ameen a a tser u la ka ian i u tese wer Aôndo doo u ishima shi u seer nan un jighjigh kua Mkaanem nam je la. Orhenen Yakobu nger ér: “I lu ne kwagh u iember tseegh shighe u ameen atô kposo kposo aa va tser ne yô, gadia ne fa, mkar u i lu karen jighjigh wen u nan la ka a na ishima i taver.” (Yak. 1:2-4) Shi umbur kpaa wer, “mba ve civir Aôndo la Ter fa u yiman ve ken imeen.”—2 Pet. 2:9.

14. Ikyav i Yosev la seer taver we ishima nena?

¹⁴ Nenge ikyav sha kwagh u yange er Yosev, wan u Yakob, u anngôôv nav tee un za hingir kpan la. (Gen. 37:23-28; 42:21) Yosev yange undu jighjigh na u nan sha ci u kwaghbo u vihin tsung u er un laa? Yange ishima vihi un a Aôndo sha ci u a de kwaghbo tser un yumuu? Mkaanem ma Aôndo na mlumun ér, ei! Kpa Yosev tagher a ameen kighir heela tseegh ga. Shighe kar yô, shi i wa un aie iyol ér a nôngo ér una yav a kwase sha igyosough, maa i wuhe un ken purusu. Kwa ne kpa, mayange Yosev de ér jighjigh na u nan a tenger ga. (Gen. 39:9-21) Kpa gema de ameen la seer taver un ishima, nahan a zua a mtsera kpishi.

15. Kwagh u Naomi la tese se nyi?

¹⁵ Ka mimi, ameen aa fatyô u nan se ijungwen shin ishimanyian je kpaa. Alaghga tsô kape Yosev kpa yange a zungwe shi ishima i nyian un ashighe agen je la. Mbatomov mba Aôndo mba jighjigh mbagenev kpa yange ve zungwe shi ishima i nyian ve. Nenge ase Naomi, u nom na kua ônov nav mba nomso uhar cii saa ku la. A kaa ér: “De kera yerem nen ner, Naomi ga, yilam nen ner, Mara [inja na ér “kwagh u vihin”]; gadia Uhembanagee cii, erem kwagh u vihin yum.” (Rutu 1:20, 21) Kwagh u Naomi ôr la lu u sha gbaaôndo shi lu sha ci u kwagh u tser un la. Nahan kpa, a nôngo gbev ken jijingi ga, shi a de ér mtil sha mimi na  a tenger kpaa ga, er Yosev nahan. Nahan Yehova na kwase u injaa ne iveren kpishi. (Rutu 4:13-17, 22) Kwagh ugen yô, ken tar u Paradiso u ua va la, Yehova una bee a hanma kwaghbo u Satan kua tar na u bo ne u er cii. “Á kera umbur akaa a tsuaa la ga, man shi aa kera va or ken ishima kpaa ga.”—Yes. 65:17.

16. Doo u se eren msen nena, man ka sha ci u nyi?

¹⁶ Sea tagher a ameen nan nan kpa se hemba a, sha ci u mdoo u se doo Aôndo ishima la. (Ôr Mbaromanu 8:35-39.) Shin er Satan una de nôngon ér iyol i kpe se ga nahan kpa, aluer se ‘kundu ishima’ shi se mba ‘geng ge geng kpaa, sha u se fatyô u eren msen yô,’ una kôrcio ga. (1 Pet. 4:7) Yesu kaa ér: “Nahan kuran nen shi eren nen msen hanma shighe cii, sha er né kuma u waren akaa a á va er la cii, man né tile sha ishigh ki Wan u or yô.” (Luka 21:36) Umbur wer ishember i “msen,” i Yesu ter la ka msen u eren sha gbashima. Er Yesu ta se icin ér se eren msen sha gbashima yô, lu kaan a vese var var ér shighe u se lu ker ne ka shighe u se tile sha ishigh nagh man ki Ter na tsevaa yô. Ka mba vea tile sha gbenda u Aôndo a lumun a mi la tseegh vea lu a ishimaverenkeghen i va waren iyange i Yehova ye.

Eren Tom u Yehova sha Gbashima

17. Aluer tom u pasen kwagh taver hen haregh wou yô, ikyav i dedoo i uprofeti mba tsuaa la ia wase u nena?

¹⁷ Ka sea eren ityom i ken jijingi yô, se zua a mmem. Kwagh ne umbur se mkaanem ma Peteru man, ér: ‘Doo u né lu ken icighanmlu man né lu civir Aôndo nana?’ (2 Pet. 3:11) Kwagh u vesen ken aeren a civir Aôndo ne yô, ka u yôôn loho u dedoo. (Mat. 24:14) Sha ajiir agen yô, alaghga tom u pasen kwagh ne ua taver kpishi, sha ci u ior vea soo u ungwan ga shin vea hendan a vese, shin vea tume ityough ken akaa a ve eren ayange ayange la. Mbatomov mba Yehova mba sha ayange a tsuaa la kpa gba u vea waan ishima a aeren ne. Nahan kpa, mayange ve yina ishima ga, ve lu za ôron ve loho u Aôndo “tugh man tetan.” (2 Kroniku 36:15, 16; Yer. 7:24-26) Lu nyi i wase ve u wan ishima? Yange ve lu a mnenge u Yehova sha tom u a wa ve la, lu mnenge u taregh ga. Shi ve nenge ér u yilan ve sha iti i Yehova la kpa lu icivir i vesen.—Yer. 15:16.

18. Tom u pasen kwagh u Tartor la ua bende a mkende u a va kende a iti i Yehova sha la nena?

¹⁸ Se kpa se mba a ian i civirigh i yôôn iti i Yehova kua awashima na. Hen ase sha kwagh ne: Tom u pasen kwagh u se eren ne na yô, sha iyange i vesen i Yehova la, mbaihyomov nav vea fatyô u kaan ér ve fa kwagh na kua mbaawashima nav ga ze. Vea fa er i lu Yehova iyol na a lu nôngon num a ve yô, er Farao u tsuaa la kpa fa nahan. (Eks. 8:1, 20; 14:25) Sha iyange la, Yehova una na mbatomov nav mbajighjigh icivir sha u pasen wanger wanger ér yange ve lu uicuwan nav kpôô kpôô.—Ôr Esekiel 2:5; 33:33.

19. Se tese ser sar se u civir Yehova sha mimi shighe u a lu wan ishima a uumace ne nena?

¹⁹ Peteru yange ngeren washika na u sha uhar la za zurum u kuren yô, a nger hen anmgbianev nav mba ken Kristu ér: “Fa nen er shima i wan i Ter wase la i lu myom yô.” (2 Pet. 3:15) Er Yehova a lu wan ishima yô, se za nen hemen u civir un sha mimi. Se er kwagh ne nena? Ka sha u lun a aeren a doon un la man u lun ‘wang a acôghor iyol shio,’ shi lun a mnenge u vough sha kwagh u ameen shi lun a ityom kpishi ken tom u Tartor. Aluer se er nahan yô, se kuma u va zuan a averen a been mayange ga, a ken ‘Usha mba hev man tar u he’ la.—2 Pet. 3:13.

Baver We Kpa?

• Se er nan ve se lu a aeren a Kristuu?

• Se er nan ve se lu ‘wang a acôghor iyol shio’?

• Se hen nyi hen Yosev man Naomi?

• U eren tom u pasen kwagh la ka kwagh u civirigh sha ci u nyi?

[Mbampin Mba Ngeren u Henen]

[Foto u sha peeji 9]

Kanyi ia wase ne noov u lun a aeren a Kristu ken a ven man icombor yene?

[Ufoto u sha peeji 10]

Gbenda u Yosev nôngo a ameen la tese se nyi?