“Jijingi Tev . . . Akaacimin A Aôndo”

“Jijingi tev akaa cii, zan zan akaacimin a Aôndo je kpaa.”—1 KOR. 2:10.

1. Ka tom u icighan jijingi u nyi Paulu a te iwanger sha mi ken 1 Mbakorinte 2:10, man ka mbampin mba nyi ve dugh sha kwagh nee?

 SE MBA a iwuese kpishi sha tom u icighan jijingi u Yehova a eren la! Ruamabera pase ér jijingi ka iyua shi ka orwasen shi eren shiada shi eren msen sha ci wase. (Yoh. 14:16, NW; Aer. 2:38; Rom. 8:16, 26, 27) Apostoli Paulu ta iwanger sha tom u injaa ugen u icighan jijingi a eren yô. A kaa ér: “Jijingi tev akaa cii, zan zan akaacimin a Aôndo je kpaa.” (1 Kor. 2:10) Sha kpôô yô, Yehova pasen mimi mba ve cimin u kaven la sha ikyev i jijingi na. A iwasen i icighan jijingi shio yô, ma se fetyô u kaven mbaawashima mba Yehova ga. (Ôr 1 Mbakorinte 2:9-12.) Nahan kpa, mbampin gema due sha kwagh ne. Ka ve je ne: Jijingi tev “akaacimin a Aôndo” nena? Lu sha ikyev i unô Yehova pase akaacimin ne sha derianyom u hiihii laa? Jijingi tev akaacimin sha ayange a ase ne nena, man eren kwagh ne sha ikyev i unô?

2. Lu u jijingi u una er tom sha igbenda i ihiar i nyi?

² Yesu yange pase igbenda ihiar i jijingi una er tom yô. Er shighe va kuma u Yesu una kpe la, a kaa a mbaapostoli nav ér: “Orwasen, ka Icighan Jijingi je la, u Ter Una tindi ken iti Yam yô, ka Un je, Una tese ne akaa cii, man shi Una umbur ne akaa a M er ne cii kpaa ye.” (Yoh. 14:26, NW) Nahan lu u icighan jijingi una er tom u ortesen man u or u umbur Mbakristu akaa. Er a lu er ka ortesen yô, una wase Mbakristu u kaven akaa a ve vande fan ga la. Shi er a lu er ka or u umbur Mbakristu akaa yô, una wase ve u umbur shi dondon akaa a i pase ve la vough.

Sha Derianyom u Hiihii La

3. Ka mkaanem ma Yesu ma nyi ma tese ér a lu pasen “akaacimin a Aôndo” la kure kuree?

³ Yesu iyol na yange tese mbahenen nav akaa  a mimi kpishi a a lu ve kwagh u he yô. Nahan kpa, akaa shi her kpishi a gba u vea hen yô. Yesu kaa a mbahenen nav ér: “Akaa shim kpishi a ma M er ne yô, kpa ne kôr a cio hegen ga. Kpa zum u Un, Jijingi u mimi la, Una va va yô, Una hemen ne Una za a ven ken mimi cii.” (Yoh. 16:12, 13) Nahan yô, Yesu tese ér a lu pasen akaacimin a ken jijingi kure kure sha ikyev i icighan jijingi.

4. Icighan jijingi yange er tom sha iyange i Pentekosti u inyom i 33 la er ka ortesen kua or u umbur Mbakristu akaa nahan nena?

⁴ Sha iyange i Pentekosti u inyom i 33 la, “jijingi u mimi” sen sha Mbakristu mba kuman er iorov 120 nahan, mba ve kohol imôngo ken Yerusalem la. Yange i ungwa amo shi i nenge a akav a tesen ér jijingi sen sha a ve. (Aer. 1:4, 5, 15; 2:1-4) Mbahenen ôr “uzegembaakaav mba Aôndo” ken ijô kposo kposo. (Aer. 2:5-11) Shighe ne lu shighe u pasen kwagh u he. Profeti Yoel yange tsengaôron ér a haa icighan jijingi sha ior. (Yoel 2:28-32) Ior yange ve nenge a mkur u kwaghôron u profeti ne sha gbenda u mô ve môm kpa vande veren ishima ér una kure ga yô, nahan apostoli Peteru hemen sha u pasen inja i kwagh u yange er la. (Ôr Aerenakaa 2:14-18.) Sha nahan yô, icighan jijingi er tom u ortesen sha u pasen Peteru ér kwagh u mbahenen nenge er la, lu mkur u kwaghôron u profeti u tsuaa la. Jijingi shi er tom u or u umbur Mbakristu akaa, gadia Peteru ôr kwaghôron u Yoel tseegh ga, a ôr upasalmi uhar mba Davidi kpaa. (Ps. 16:8-11; 110:1; Aer. 2:25-28, 34, 35) Sha mimi yô, akaa a mba ve kohol imôngo ve nenge shi ve ungwa la lu akaacimin a Aôndo.

5, 6. (a) Lu mbampin mba hange hange mba sha kwagh u ikyuryan i he mba nyi gba u a na mbamlumun sha mi, er Pentekosti u inyom i 33 la kar kera laa? (b) Lu unô ve due a akaa a yange gba u a nenge sha mi laa, man i kure a nena?

⁵ Akaa lu her kpishi a yange gba u a ta iwanger sha mi sha ci u Mbakristu mba sha derianyom u hiihii la yô. Ikyav i tesen yô, mbampin yange ve due sha kwagh u ikyuryan i he, i í hii kwagh u i sha iyange i Pentekosti la. Ikyuryan i he la i lu sha ci u Mbayuda man mba ve hingir Mbayuda la tseegh-lee? Atôatyev kpa lu u a nyôr a ve ken ikyuryan i he ne shi a shighe ve mkurem sha icighan jijingi shinii? (Aer. 10:45) Lu u a vande tsôngon nomso mba ve lu Atôatyev la shi vea kuran Tindi u Mose la keng ve vea hingir Mbakristu yee? (Aer. 15:1, 5) Mbampin mban lu mba hange hange. Yange gba u a tôv sha akaacimin ne sha iwasen i jijingi u Yehova. Kpa lu u jijingi shon una er tom ken unô?

⁶ Lu anmgbianev mba vian ken jijingi due a hanma ikyaa i gba u a nenge sha mi la ye. Peteru man Paulu kua Barnaba ve lu hen mkombo u mbahemenev mba shin tine nyôr la, nahan ve pase er Yehova a gem eren kwagh a Atôatyev aa a lu ipusu la yô. (Aer. 15:7-12) Mba tim sha kwagh ne er i pase ken Ruamabera u ken Zwa Heberu la yô, mbahemenev mba shin tine mban tsua kwagh u vea er yô, sha iwasen i icighan jijingi. Tsô ve nger atôônanongo washika ve pase a kwagh u ve kure la.—Ôr Aerenakaa 15:25-30; 16:4, 5; Ef. 3:5, 6.

7. Lu sha ikyev i nyi i pasen akaa a mimi a cimin laa?

⁷ Yange i ta iwanger sha akaa agen kpaa ken ngeren mba Aôndo mgbegha Yohane man Peteru man Yakobu man Paulu ve nger la. Kpa ken hemen, sha shighe u i nger Ruamabera u Mbakristu i bee kera la, uiyua mba ôron akaaôron a profeti la kure shi Aôndo de u pasen ior akaa sha ivande. (1 Kor. 13:8) Nahan kpa, lu u jijingi una za hemen u eren tom u ortesen man u or u umbur Mbakristu akaa her shinii? Lu u una za hemen u wasen Mbakristu u tôvon akaacimin a Aôndoo? Akaaôron a profeti tese ér jijingi una za hemen u eren nahan.

Sha Shighe u Mkurtar

8, 9. Ka unô yange lu u vea engem sha u zuan a mfe u ken jijingi sha shighe u mkurtara?

⁸ Zum u ortyom ugen lu ôron kwagh u shighe u mkurtar yô, a kaa ér: “Mba ve lu a kwaghfan yô, vea engem er iengem i sha kwavaôndo nahan, mba ve gem ior kpishi vea hingir  mbaperapera, vea engem er asan nahan zan zan gbem sha won. . . . Man mfe kpaa una seer.” (Dan. 12:3, 4) Ka unô yange gba u vea lu a kwaghfan shi vea engeme? Yesu yange ôr kwagh ken injakwagh na i ivor i dedoo man i bo la, u una wase se u kaven kwagh ne yô. Er lu ôron kwagh u “mkurtar” la, a kaa ér: “Shighe la mbaperapera vea engem er ka iyange nahan sha tartor u Ter ve.” (Mat. 13:39, 43) Ken mpase u Yesu na la, a tese ér ka “mbaperapera” ve lu “ônov mba tartor” shin Mbakristu mba i shigh ve mkurem la ye.—Mat. 13:38.

⁹ Mbakristu mba i shigh ve mkurem mbara cii vea engeme? A fatyô u kaan ér ve cii vea engem, sha ci u Mbakristu cii vea er tom u pasen kwagh shi geman ior hingir mbahenen la, shi vea taver mbagenev asema ken mbamkombo. Mba i shigh ve mkurem mbara vea lu ikyav hen mbagenev sha gbaa ne. (Sek. 8:23) Heela tseegh ga, lu u a va pase akaacimin hen shighe u mkurtar la. Yange i “cir” kwaghôron u profeti Daniel nger la zan zan shighe shon. (Dan. 12:9) Lu u jijingi una tôv sha akaacimin ne nena, man a lu sha ikyev i unô?

10. (a) Ka sha ikyev i unô jijingi a pasen akaa a mimi a cimin la ken ayange a masetyô ne? (b) Pase er yange i ta iwanger sha akaa a mimi a sha kwagh u tempel u vesen u Yehova u ken jijingi la yô.

 ¹⁰ Ka a kuma u a ta iwanger sha ma kwagh u ken jijingi ken ayange a ase ne yô, icighan jijingi ngu a wase ior mba vian ken jijingi mba hen ijiirtamen i Mbashiada mba Yehova, mba ve til sha ityough ki “wanakiriki u jighjigh man u fan kwagh” la, u kaven akaacimin a i vande kaven ga la. (Mat. 24:45; 1 Kor. 2:13) Mbahemenev mba Shin Tine jimin cii ka ve time sha akaa a i hidi i ne mpase shami la. (Aer. 15:6) Ka ve gber kwagh u ve hen la sha ci u iwasen i hanma or cii. (Mat. 10:27) Shighe ka una karen yô, i gba u alaghga a seer tan iwanger sha akaa agen, man akaa ne kpa ka i pase a sha mimi.—Nenge ngeren u a lu itinekwagh ér  “Er Icighan Jijingi Pase Inja i Tempel u ken Jijingi Yô” la.

Er U Zua a Mtsera sha Tom u Jijingi a Eren Nyian Yô

11. Mbakristu cii mba zough a iwasen nyian sha tom u icighan jijingi a eren sha u pasen akaacimin a Aôndo la nena?

¹¹ Mbakristu mba jighjigh cii mba zough a iwasen sha tom u icighan jijingi a eren sha u pasen akaacimin a Aôndo la. Er lu sha ayange a Mbakristu mba sha derianyom u hiihii la nahan, nyian kpa ka se hen kwagh shi shighe a karen yô, se umbur kwagh shon shi se er tom sha kwagh u icighan jijingi a wase se u kaven la. (Luka 12:11, 12) Saa se hen makeranta a za nyôr sha azenger keng ve se kav akaa a mimi a ken jijingi a cimin a i gber la ga. (Aer. 4:13) Se fatyô u seer zuan a mkav sha akaacimin a Aôndo nena? Time ase sha mbamhen mba i dugh a mi heen kpuaa ne.

12. Ka hanma shighe i doo u se sôn icighan jijingi?

¹² Sôn Aôndo icighan jijingi. Cii man se time sha kwagh u ken Ruamabera yô, doo u se hii sônon ken msen ser icighan jijingi a hemen se. Aluer se mba tswen shin shighe vese se ga je kpa, doo u se er nahan. Mimi je, aluer se sôn Ter wase u sha la a iyol hiden a mi ijime nahan yô, a doo un. Er Yesu pase nahan, aluer se sôn Yehova icighan jijingi na a ishima i môm yô, una na se mgbeghaa.—Luka 11:13.

13, 14. Ago a wan sha mbamkombo nga wasen se u kaven akaacimin a Aôndo nena?

¹³ Wa agoyol sha mbamkombo. Ka sha ikyev i nongo u wanakiriki la se zough a “kwaghyan sha ashighe ashighe” ye. “Wanakiriki” ne kur tom na sha u gberen ityakerada i pasen Bibilo shi tesen er a henen kwagh shi a zaan mbamkombo vough vough yô. Ka a kaa a “anmgbianev” ér ve hen ma kwagh yô, atôakyaa a vesen ka a lu a a ne ve i kaa ér ve hen kwagh shon yô. (1 Pet. 2:17; Kol. 4:16; Yuda 3) Aluer se nôngo sha afatyô wase cii se dondo kwagh u i kaa a vese ér se er la yô, se lu eren kwagh ken ijoughave vea icighan jijingi.—Mpa. 2:29.

¹⁴ Shighe u se lu wan agoyol sha mbamkombo mba Mbakristu yô, doo u se ôr avur a Bibilo a i ter la, shi se nôngo u kaven kwagh u hanma ivur i lu ôron sha kwagh u se lu henen la. Aluer se mba eren nahan yô, se lu fan Bibilo seer kure kure. (Aer. 17:11, 12) Aluer se mba ôron avur a Bibilo yô, se lu a kwagh ken ishima u icighan jijingi una wase se u umbur yô. Kwagh ugen yô, aluer se bugh ma ivur Bibilo se ôr yô, se fatyô u kôron ijiir i ivur la i lu la ken  ityough, nahan shighe u soo u zuan a i kpa a kera lu se ican ga.

15. Er nan i doo u se za hemen u ôron ngeren mba ken ityakerada yase cica ciilii, man ka u er kwagh ne nena?

¹⁵ Za hemen u ôron ityakerada yase cii. Se mba henen ngeren mbagenev ken mbamkombo ga, kpa i nger ve sha ci u mtsera wase. Mbamgber mba ken umagazin asev mba se ne ior ken won la je kpa, i nger ve sha ci u mtsera wase. Ken tar u shighe a ban yum ne, ashighe kpishi ka i gba u se kegh or shin se kegh ma kwagh. Aluer se tôô ma takerada u se lu a ôr u ga shin u se hii a hii u ôron la se mba a mi yô, alaghga se fatyô u ôron ma ngeren ker shighe u se lu keghen kwagh shin ma or yô. Mbagenev ka ve ungwan icer i ityakerada yase shighe u ve lu zenden angahar shin ve lu shin mato yô, nahan ve kôr cio u ôron akaa i ngeren ken ityakerada yase la cii. Akaa a i tev sha mi tsembelee, kpa i gem i nger sha gbenda u mbafan takerada u ôron yum ga kpa vea fatyô u ôron la, aa wase se u seer lun a iwuese sha akaa a ken jijingi.—Hab. 2:2.

16. Ka mtsera u nyi se zua a mi sha u ngeren mbampin mba ve ve se ken ishima la shin takerada shi tôvon sha mini?

¹⁶ Gbidye kwar. Zum u ú er Bibilo shin ityakerada i pasen Bibilo yô, tôô shighe hen sha mi. Aluer u hen sha kwagh u i nger sha adondo adondo la zulee yô, alaghga mbampin vea va u ken ishima. U fatyô u ngeren mbampin mba shon shin takerada, nahan seer timen sha mi ken hemen. Ashighe kpishi ka sea tôvon sha akaa a a doo se yô, kwaghhenen wase a hemba zan shimi cii. Mkav u se zough a mi la una hingir kwagh wase u injaa u se fatyô u yaren tom a mi er se soo yô.—Mat. 13:52.

17. Ka u hen kwagh vea tsombor wou shin sha tseeneke wou nena?

¹⁷ Ver shighe u eren mcivir u hen tsombor. Mbahemenev mba Shin Tine taver se cii ishima ér se tsua aikighe môm gayô se ker ian igen ken hanma kasua sha ci u henen kwagh sha tseeneke wase shin vea tsombor wase. Mser u i hidi i ser ashighe a mbamkombo asev la, bugh se gbenda u dondon kwaghwan ne. Ka ne hen nyi sha shighe u Mcivir u hen Tsombor wen u aikighe laa? Mbagenev ka ve ôr Bibilo, ve tôv sha avur a ve lu a mbampin sha mi la shi ve nger mbampase mba ve zough a mi la tiônôô ken Ubibilo vev. Icombor kpishi ka i ver shighe u henen gbenda u ia er tom sha kwagh u i hen la yô. Mbayaav mbagenev ka ve tsua ngeren u ve nenge ér doo u tsombor ua time sha mi yô, shin ma ngeren ua te iwanger sha atineakaa shin sha mbampin mba tsombor u soo u timen sha mi la. Shighe a karen yô, ne fatyô u fan atineakaa agen a tsombor wen ua hen kwagh sha mi yô. *

18. Er nan i doo u se hire ijime sha u henen akaa a mimi a ken Mkaanem ma Aôndo a a cimin la ga?

¹⁸ Yesu yange kaa ér jijingi una er tom u orwasen. Nahan doo u se hire ijime sha u henen akaa a mimi a cimin a ken Mkaanem ma Aôndo la ga. Akaa a mimi ne nga ken “mfe u fan Aôndo” u a doo yum la, shi i lôhô se ér se tôv sha akaa a mimi shon. (Ôr Anzaakaa 2:1-5.) Ve pase “akaa a Aôndo A ser a sha ci u mba Un doo ve ishima la” tsembelee. Aluer se mba nôngon ser se seer kaven Mkaanem ma Yehova yô, icighan jijingi una wase se, gadia “jijingi tev akaa cii, zan zan akaacimin a Aôndo je kpaa.”—1 Kor. 2:9, 10.

[Ngeren u shin kpe]

Ú Na Mlumun Wer Nyi?

• Ka sha igbenda i ihiar i nyi jijingi a wasen se u tôvon “akaacimin a Aôndo”?

• Lu sha ikyev i unô icighan jijingi pasen akaa a mimi a cimin sha derianyom u hiihii laa?

• Icighan jijingi te iwanger sha akaa sha shighe wase ne nena?

• Aluer u soo u zuan a iwasen sha tom u jijingi a lu eren la yô, gba u ú er nyi?

[Mbampin Mba Ngeren u Henen]

[Ngeren u kiriki u a lu sha peeji 22]

 Er Icighan Jijingi Pase Inja i Tempel u ken Jijingi Yô

Môm ken “akaacimin a Aôndo,” a yange i pase sha derianyom u hiihii la yô, lu kwagh u i pase ér tabernakel kua utempel mba i va maa ken hemen la tile sha ityough ki kwagh u vesen u ken jijingi u kpôô kpôô la. Paulu yila kwagh u kpôô kpôô ne ér ‘tabernakel u mimi, u Ter A ver un, i kera lu or ga la.’ (Heb. 8:2) Tabernakel u mimi ne lu zege tempel u ken jijingi, u a lu gbenda u i ser i ver u van sha ishigh ki Aôndo, sha ikyev i nagh ku Yesu Kristu man tom na u pristi la.

Yange i ver “tabernakel u mimi” ne ken inyom i 29 shighe u i er Yesu batisema shi Yehova lumun un ér a hingir nagh ku vough la. (Heb. 10:5-10) Yesu yange kpen shi nderen shin ku yô, a nyôr ken Icighankpar u Hemban cii u tempel u ken jijingi la, a za a mtsera u nagh nagh kura “sha ishigh ki Aôndo.”—Heb. 9:11, 12, 24.

Apostoli Paulu nger kwagh u Mbakristu mba i shigh ve mkurem la hen ijiir igen ér mba “hingir icighantempel u Ter.” (Ef. 2:20-22) Tempel ne lu kwagh môm a “tabernakel u mimi” u Paulu yange va ôr kwagh na ken washika na u nger hen Mbaheberu laa? Ior mba Yehova yange ve hen ér tempel ne ngu kwagh môm a tabernakel u mimi la; ve hen nahan anyom imôngo je. Ka inja er yange i lu wan Mbakristu mba i shigh ve mkurem la agoyol shin tar ér ve hingir “awen” a ken tempel u Yehova u sha la nahan.—1 Pet. 2:5.

Nahan kpa, inyom i 1971 la mgbôghom yô, anmgbianev mba vian ken jijingi mba ken nongo u wanakiriki la hii u kaven ér tempel u Paulu ôr kwagh na ken takerada u Mbaefese la a fatyô u lun zege tempel u Yehova u ken jijingi la ga. Aluer ka Mbakristu mba i shigh ve mkurem mba i nder ve shin ku la yange ve lu “tabernakel u mimi” la yô, a gba u vea hii nderen shin ku sha shighe u “m-ande u Ter” la cii ve a mase veren tempel la ye. (1 Tes. 4:15-17) Kpa Paulu ôr kwagh u tabernakel la ér: ‘Kwagh ne lu tesen ikyav sha shighe ne.’—Heb. 9:9.

Yange mba tôôn kwagh u avur a Bibilo la a er la mba karen sha agen yô, i kav wang ér tempel u ken jijingi la mba maan un zan a mi ave ga, shi ka Mbakristu mba i shigh ve mkurem la ve lu “awen” a i lu sôron a shin tar sha u a maa tempel shon a mi ga. Kpa, Mbakristu mba i shigh ve mkurem la mba eren a er tom ken tembe u tempel kua ken Icighankpar u tempel u ken jijingi la, mba nan Aôndo “nagh ku iwuese.”—Heb. 13:15.

[Foto u sha peeji 23]

Se fatyô u seer mkav wase sha “akaacimin a Aôndo” nena?