Mlu U Tsevaa Ve A Injar I Dedoo

Ú LUN tsevaa sha u pasen kwagh shighe u ian i dugh hen haregh u tiônnongo wou kpa? Anmgbianev asev mba ken Kristu mba ken gar u zan iti, u i yer un ér Turku, á lu hen kpemnger ken tar u Finland la yange ve lu tsevaa, nahan ve zua a injar i dedoo.

Ken ashighe a ken ijime la, anmgbianev mba ken gar u Turku nenge nomsombaiorov mba ken veghertar u Ashia va hen gar la sha u va masen been tom sha igirgimnger i vesen i mba gban tso mba ken tar la lu gban yô. Shighe kar yô, anmgbian ugen za fa uhôtel mba ior mba ken tar u ken won mban lu tsan her la. Shi i ôr anmgbian ne ér, ka i za tôô mbatomov mban sha ubôôsu tugh tugh hen ijiir i ve tse la, i yem a ve shin kpemnger. Ave ave la je, anmgbian ne maa za ôr anmgbianev mba ken tiônnongo u lamen zwa Buter, u hen gar u Turku la.

Mbatamen mba hen tiônnongo la nenge ér, ian due i vea pase ikpelaior i i ve inya hen gar ve la loho u Tartor, nahan ve sôr ian fese i yôôn angwe ve ver. Sha iyange i Lahadi ken sati shon la je, mbapasenkwagh iorov pue due sha ahwa ataankarahar pepe za kohol hen ijiir i ubôôsu tilen la. Shighe u ve za nyôr her kyagh la, ve nenge a ortom môm ga. Lan ve ishima ve gba kaan ér: ‘Se va leti shinii? Shin tativ kera mba hen gar u Turku ne ga ase?’ Mba ngur henen nahan yô, ortom ugen va due her a ikyondo i tom iyol. Ka tem ga yô, ortom ugen kpa va, mbagenev kpa gba van. Ica i gbe ga yô, mbatomov va kohol hen ijiir i nyôron bôôsu la kpishi. Mbapasenkwagh mbara maa hii u pasen kwagh shi nan mbatomov mbara ityakerada i ken zwa Buter. Kwagh ka a er i doo yô, yange nôngo u tôôn mbatomov mbara cii ihwa jimin u nyôron bôôsu, nahan anmgbianev zua a shighe gôgônan u lamen a mbatomov kpishi. Mbatomov mbara ngohol antyakeradav 126 man umagazin 329 cii ve ubôôsu mbara mase moughon ye!

Injar i dedoo ne taver anmgbianev asema, nahan shi ve kimbir yôôn angwe ken sati u dondon la kpaa, shighe u ortamen u sôron atôônanongo va sôr tiônnongo ve la. Sha iyange la ura lu nôôn, kpa ortamen u sôron atôônanongo la er mkombo u duen kwaghpasen sha ahwa ataratar man tiôn pepe, maa mbapasenkwagh iorov 24 due ken ura gba yemen hen ijiir i ubôosu tilen la. Kwa ne yô, ve lu a ityakerada i ken zwa u Tagalog kpaa, sha ci u ve fa er mbavannya mbara kpishi lu ior mba ken tar u Philippines yô. Hen sev mbura, mbatomov mbara ngohol ityakerada 7 man antyakeradav 69 kua umagazin 479 cii ve ubôôsu mough u yemen shin kpemnger ye. Nenge er yange a saan anmgbianev mba nomso man mba kasev mba ve pase mbatomov mbara kwagh la iyol shi a maa ve iyol la sha wono!

Cii man mbatomov mbara ve hide ve yem ken ityar ve yô, anmgbianev mban za hen uhôtel mba ve lu her la ve za seer pasen ve kwagh u Tartor. Mbatomov mbara mbagenev kaa ér, Mbashiada mba Yehova vande pasen ve kwagh ken ityar igen. Nahan ve wuese anmgbianev er ve kar a ishima ve, ve pase ve kwagh ken tar u Finland nahan.

U ngu tsevaa sha u pasen kwagh sha aan a alaghga aa va due hen haregh u tiônnongo wen kpa? Ú karen a ishima you u pasen ior mba lamen ma zwa ugen kwagh kpa? Aluer u eren nahan yô, alaghga we kpa u zua a iember i anmgbianev mba ken tar u Turku zua a mi la.

[Foto u tesen ijiir/Foto u sha peeji 32]

(U soo u ôron ngeren ne cii yô, nenge takerada u)

FINLAND

HELSINKI

Turku