Tese Mbayev Ou Ve Soo Takerada u Ôron man Kwaghhenen

KA AKAA kpuaa tseegh a lu a tahav mbu kôôm mlu u mbayev u ken hemen la, i hembe u tesen ve takerada u ôron man kwaghhenen ye. Man u ôron takerada shi henen kwagh la ve a msaanyol kpishi! Kwagh u mbagenev ka vea umbur ve i doo ve yum yô, ka takerada u mbamaren vev ôron sha ci ve la. Takerada u ôron tseegh kpa ka kwagh u nan msaanyol, shi mbamtsera mba u ve a mi la kpa mba ne msaanyol. Takerada u ôron hemba ngun mbacivir Aôndo a iwasen cii, sha ci u ka Bibilo i henen i wasen ve u vesen ken jijingi ye. Ormaren u civir Aôndo ugen kaa ér, “Akaa aa a hembe lun se a inja yô, ka takerada u ôron man kwaghhenen.”

Aluer mbayev ou fa u veren ishima henen kwagh tsembelee yô, kwagh la una wase ve u yan ikyar vea Aôndo kangenaa. (Ps. 1:1-3, 6) Shin er i gbe u or nana fa takerada u ôron keng ve nana zua a myom ga nahan kpa, Bibilo tese se ér takerada u ôron ngu a mbamtsera mba ken jijingi kpishi. Ikyav i tesen yô, Mpase 1:3 kaa ér: “Saan or u ôron akaaôron a profeti ne iyol.” Kwagh ugen yô, ishima i veren sha kwagh ngi hange hange ken kwaghhenen, er Paulu a tese wang ken kwaghwan na u Aôndo mgbegha un wa Timoteu la nahan. A kaa ér: “Nôngo sha akaa ne, penda ishima sha mi.” Sha ci u nyi? “Sha u ior cii vea nenge mzehemen wou yô.”—1 Tim. 4:15.

Nahan kpa, u fan di takerada u ôron kua kwaghhenen tseegh tsô maa hingir ibumun i tesen ér or nana zua a mtsera sha u eren nahan ga. Ior kpishi fa u eren akaa ne, kpa mba yaren tom a mi ga; ka ve vihin shighe ve sha ityom i í lu a mtsera ga yô. Nahan mbamaren vea tese mbayev vev u lun a isharen i keren mfe u lun a mtsera la nena?

Dooshima Wou man Ikyav You

Ka a tesen mbayev kwagh sha dooshima yô, i maa ve iyol a mi. Orkristu ugen mba yer un ér Owen, un vea kwase na Claudia, ve ôr kwagh u mbayev vev nahan ér: “Yange ve veren ashe a shighe u kwaghhenen sha ci u ve nengen un ér ka shighe u injaa u vea zua a mkor man mkpeyol yô. Ve va gema nengen shighe ne ér ka shighe u eren a ve kundu kundu.” Mbayev ka vea nyôr anyom a uma a hembe taver, er anyom pue kar nahan je kpa, a tesen ve kwagh sha dooshima shighe u i henen kwagh hen tsombor yô, kwagh la a za hemen u benden a gbenda u ve nengen kwaghhenen la. Ônov mba Owen man Claudia ka upania hegen shi ve za hemen u zuan a mtsera sha mtese u i tese ve u soon takerada u ôron man kwaghhenen la.

Kwagh u vesen u dondon sha dooshima yô, ka ikyav i dedoo i mbamaren. Mbayev mba ve nengen mbamaren ve ôron takerada shi ve henen kwagh ashighe ashighe yô, ka ve hemba nengen akaa la ér ka akaa a sha gbaaôndo a i doo u vea eren ken uuma vev yô. Kpa aluer we ormaren iyol you kpa, ka i taver we u ôron takerada yô, a er nan ve u fatyô u veren ikyav i dedoo? Alaghga a gba u ú sôr akaa u ver vough sha er takerada u ôron ua lu môm ken akaa a hange hange a u eren yô. (Rom. 2:21) Aluer takerada u ôron ka kwagh u vesen u ú eren hanma iyange yô, ieren la ia bende a mbayev ou kpishi je. Aluer u tese ishimataver, hemban je yô, sha Bibilo i ôron man ago a wan sha mbamkombo shi henen kwagh hen tsombor yô, u lu tesen wang wer akaa ne nga u a inja.

 Nahan, dooshima wou man ikyav you la ka akaa vesen a aa wase u u̱ tesen mbayev ou u soon takerada u ôron yô. Kpa ka igbenda i nyi nahan u kar sha mi ve u fatyô u taver ve ishima?

Hii u Tesen Dooshima sha Takerada u Ôron

Ka igbenda injaa igen i nyi nahan u kar sha mi ve u fatyô u wasen mbayev u soon takerada u ôrono? Na ve ityakerada i ôron shighe u ve lu iyev la. Ortamen u ken Kristu ugen, u mbamaren nav wase un soo kwagh u takerada u ôron yô, due a mhen nahan ér: “Wase mbayev ou ve hoghor a ityakerada shi ve ôron i. Aluer kwagh ngu nahan yô, vea ya boki a ityakerada shi ia hingir kwagh u vesen ken uma ve.” Nahan ityakerada i pasen Bibilo amba er Hen Kwagh sha Ikyev i Ortesen Uhemban La man Takerada Wam ú Akaaôron a Bibilo nahan, ia doo mbayev ica ia gba cii ve vea mase fan u ôron takerada ye. Ka wea ôron ityakerada ne vea mbayev ou yô, ve fa u ôron shi lamen ken zwa u i nger takerada ker la tseegh ga, kpa shi ve kav “akaa a jijingi” kpaa.—1 Kor. 2:13.

Ôron takerada hanma shighe i̱ duen sha. Ver shighe u hanma iyange cii yô, u ôron takerada vea mbayev ou yô. Aluer u er nahan yô, u tese ve u yilan asemberatii sha inja shi u seer taver ieren i ôron takerada la ken a ve. Gbenda u ú er takerada la kpa ngu hange hange. Aluer takerada u ôron maa u iyol yô, ve kpa ua maa ve iyol. Sha kpôô yô, alaghga mbayev ou vea gema kaan a we ér u hide u ôr ve kwagh u ú vande ôron ve la. Er kwagh u ve kaa u la. Shighe a karen yô, vea soo u henen akaa a he kpaa. Kpa ver ishima sha er u kighir ve a takerada ôron ga yô. Yesu yange ver se ikyav i tesen mba ve keghen ato a na la “sha m-ongo ve vough.” (Mar. 4:33) Aluer u kighir mbayev ou ga yô, hanma kwa u i gbe u ne ôr takerada cii vea keghen a keghen, nahan a hemba lun we zange u kuren awashima wou u tesen ve wer ve soo takerada u ôron la.

Taver mbayev ishima u ôron takerada vea we, shi hide lam nen sha kwagh u ne er la. Ica ia gba ga tsô, mbayev ou vea fatyô u kaven asemberatii kpishi shi yilan a shi fan inja i a, nahan we kpa a saan we iyol. Aluer ne mba lamen sha kwagh u ne er la yô, kwagh ne una wase ve u zan ikyura. Takerada ugen u ú er kwagh u wasen mbayev hingir mbafan takerada u ôron tsembelee yô, kaa ér, ka a lamen vea mbayev yô, í wase ve u “henen asemberatii a i doo u vea fa sha er vea va tagher a mi shighe u ve lu ôron takerada kpa, vea fa inja i a” yô. Takerada la za hemen kaa ér: “Mbayev mba ve lu a vese ga, mba ve lu nôngon ér vea fa u ôron takerada yô, ka hange hange u lamen a ve, man aluer iliam la ka i injaa yô, a hemba wasen ve cii.”

Kaa mbayev ou ve ôron takerada we ungwan, shi taver ve ishima u pinen mbampin. U fatyô u pinen mbampin iyol you shi duen a mbamlumun mba a fatyô u nan sha mi yô. Aluer u er nahan yô, mbayev vea kav ér ka ken ityakerada i henen kwagh ye, shi kwagh ngu u asemberatii a ve lu ôron la a lu kaan yô. Gbenda ne ua hemba wasen cii, aluer kwagh u ú lu ôron la har sha Mkaanem ma Aôndo, ma ma lu takerada u hemban doon cii la yô.—Heb. 4:12.

Nahan kpa, i de hungur we er takerada u ôron u lu kwagh u ican ga. Or ka nan kar iyol sha mi shighe a kar cii ve nan mase fan u ôron u tsembelee ye. Nahan wuese mbayev mba takerada u ôron u lu doon ve seer a seer la kpishi. Aluer u ngu wuese mbayev ou yô,takerada u ôron ua hemba maan ve iyol cii.

Takerada u Ôron Ka Kwagh u Injaa man u Nan Msaanyol

Aluer u ngu tesen mbayev ou er vea henen kwagh yô, u wase ve u fan mluainja u takerada u ôron. Kwaghhenen wa u henen akaa a he shi kaven er akaa shon a gbe a zough la ker. Gba u or nana fa u henen kwagh tsembelee shi umbur kwagh u nan hen la shi yaren tom a mi kpaa. Wanye ka nana faan u henen kwagh shi nana kaven er nana yar tom a mi yô, kwaghhenen la a hingir kwagh u dedoo man u injaa hen a nan.—Orpa. 10:10.

Hii lamen sha akaa a a lu hange hange ken kwaghhenen la. Ashighe a tsombor a eren Mcivir u hen Tsombor aikighe shi u lamen imôngo sha ivur i sha hanma iyange la kua ashighe agen er a ngan nahan, ka aan a dedoo a tesen mbayev ou igbenda i vea fa u henen kwagh yô. U teman ijiir i môm shi henen itinekwagh i môm tseegh ken  anshighe kpuaa la, una tese ve u veren ishima sha kwagh, man kwagh ne ngu hange hange ken kwaghhenen. Heela tseegh ga, u fatyô u taver wan wou u nomso ishima wer a pase u er kwagh u a vande fan la a gbe a zough sha kwagh u a sember henen la yô. Kwagh ne una tese un u tôôn kwagh karen sha ugen. Hide u kaan a wan wou u kwase wer a savôron kwagh u a er la di ye? Kwagh ne una wase un u kaven kwagh u a er la shi umbur un kpaa. Gbenda ugen u wasen ve u umbur kwagh, u ú fatyô u tesen ve yô, ka u hiden nengen sha kwagh u i er la, inja na yô, ka u hiden ôron atôakaa a or nan er ken ma ngeren je la. Mbayev mba kiriki je kpa a fatyô tesen ve u ngeren akaa tiônôô shin inya shighe u ve lu henen kwagh shin ve nyer mkombo u tiônnongo yô. Ishima ve i veren sha kwagh la ia va ve a mtsera kpen kpen! Igbenda i taver ga i henen kwagh ne ia na kwaghhenen una doo kpishi, shi una lu u a inja kua mbayev kpaa.

Er akaa a aa na kwaghhenen una za hemen yô. Aluer tsee iyol hen ijiir i henen kwagh ga, shi usu ngu her wang, ayôôso kpa nga ga, shi kwaghteman kpa doo yô, a hemba lun ican ga u veren ishima sha kwaghhenen. Shi gbenda u mbamaren ve nengen kwaghhenen la kpa ngu hange hange. Ngô ugen kaa ér: “Ka hange hange u henen kwagh hanma shighe shi ôron takerada. Kwagh ne una wase mbayev ou u eren akaa sha inja. Ka ve fa kwagh u a doo u vea er sha ma shighe yô.” Mbamaren kpishi ka ve wa ataban ér i de eren kwagh môm shighe u kwaghhenen ga. Sha kwagh u orfantakerada ugen a kaa yô, kwagh ne ka kwagh u vesen u ngu a tese mbayev aeren a dedoo ken kwagh henen yô.

Pase ve var var er kwaghhenen a lu a inja yô. Kwagh u masetyô yô, wase mbayev ou ve nenge a mbamtsera mba kwaghhenen. Ityôkyaa i henen kwagh vea mbayev kpôô kpôô yô, ka u ve yar tom a kwagh u ve hen la. Anmgbian ugen u a lu gumor yô, lumun a kwagh ne. A kaa ér: “Ka mea nenge a mluainja u kwagh u m lu henen la ga yô, m hingir u nôngo a nôngo mer i maam iyol u henen kwagh shon. Kpa ka a lu kwagh u me fatyô u eren tom a mi ken uma wam yô, ngu a hingir kwagh u m soo mer me kav yô.” Agumaior nga a fa ér kwagh u ve lu henen la una wase ve u kuren ma kwagh u dedoo u ve we ishima u eren yô, ve wa ityough u henen kwagh shon. Ve gema veren ashe a kwaghhenen, er takerada u ôron nahan.

Iyua i Hemban Cii

Mbamtsera mba ve lu ken u tesen mbayev ou wer ve lu a isharen i ôron takerada ken la ngee je gande u ôron. Dugh mkom u mbayev vea zua a mi ken takerada u ôron la sha je kpa, mbamtsera mbagenev mba mbayev ou vea zua a mi yô, ka u zan ikyura ken makeranta man ken tom man u fan er vea eren kwagh vea mbagenev yô, man u kaven kwagh u tar u se lu shimi ne kua er wan nana luun kôôsôô vea ormaren la.

U hemban cii yô, aluer mbayev ou soo kwaghhenen yô, una wase ve vea hingir mbacian Aôndo. Aluer mbayev ou soo kwaghhenen yô, kwagh ne una wase u bughun ve ishima, nahan vea kav “igbanger man iniembe man mtav man mze” u akaa a mimi a ken Ruamabera la. (Ef. 3:18) Sha kpôô yô, mbamaren mba ve lu Mbakristu mba a akaa kpishi a i gbe u vea tese mbayev vev yô. Aluer mbamaren ver shighe shi mba nengen sha mbayev vev shi ve er hanma kwagh u ve fetyô cii sha u tesen ve gbenda u dedoo er ve lu iyev la yô, vea ver ishima ér ken hemen yô, mbayev vev vea hingir mbacivir Yehova. Aluer u tesen mbayev ou u veren ishima henen kwagh tsembelee yô, kwagh la una wase ve u yan ikyar i dedoo vea Aôndo shi vea lumun ér kwagh môm a vihi ikaryan shon ga. Sha nahan yô, u ngu a atôakyaa kpishi a sônon iveren i Yehova, er u lu nôngon wer u tese mbayev ou ve soo takerada u ôron man kwaghhenen la.—Anz.  22:6.

 [Ngeren u kiriki/Foto u sha peeji 26]

Takerada u Ôron . . .

• Zua a ityakerada i ôron

• Ôron i duen sha

• Taver mbayev ou asema u ôron vea we

• Lam nen sha kwagh u ne er la

• Kaa a mbayev ou ve ôr, we ungwan

• Taver mbayev ou asema ve pinen mbampin

Kwaghhenen . . .

• Ver ikyav i dedoo i ormaren

• Tese mbayev ou u . . .

○ Veren ishima sha kwagh u i lu henen la

○ Tôôn kwagh u i lu henen la kar sha ugen

○ Saven ôron kwagh u i hen la

○ Hiden nengen sha kwagh u i hen la

○ Ngeren akaa agen shin inya

• Er akaa a aa na kwaghhenen una za hemen yô

• Pase ve var var er kwaghhenen a lu a inja yô