‘Ver Ishima . . . u Tesen’

“NE MBA yerem ner: Ortesen man Ter kpaa; ne mba kaan sha mi, gadia kape M lu la.” (Yoh. 13:13) Mkaanem ma Yesu ôr a mbahemen nav ne tese ér yange eren tom u tesen ior. Nahan, Yesu wa mbadondon un tindi ne maa kôndo yem sha. A kaa a ve ér: ‘Nahan yô, za nen, za gema nen akuraior cii a̱ hingir mbahenen, . . . tesen nen ve u kuran akaa a M we ne kwagh sha mi cii.’ (Mat. 28:19, 20) Shighe kar yô, apostoli Paulu kpa ôr var var er u lun mbatesen Mkaanem ma Aôndo la i lu kwagh u vesen yô. Yange wa Timoteu, u lu ortamen ken Kristu la kwagh ér: ‘Ver ishima u ôron ior Bibilo man u wan kwagh man shi u tesen. . . . Penda ishima sha mi sha u ior cii vea nenge mzehemen wou yô.’—1 Tim. 4:13-15.

Nyian kpa, se mba hembe tesen ken tom wase u pasen kwagh la man ken mbamkombo asev mba Mbakristu, er sha ayange a tsuaa la nahan. Se er nan ve se ver ishima u tesene, man ka sha igbenda i nyi nahan kwagh ne una wase mbatesen Mkaanem ma Aôndo u seer fan ityesene?

Dondo Ortesen u Vesen La

Gbenda u Yesu tesen kwagh la yange u doo mba ve keghen ato a na la kpishi. Nenge ase er mkaanem nam yange ma bende a mba ve kohol ken shinagoge u ken Nasareti la yô. Orngeren Ivangeli, Luka nger ér: “Ve cii ve wuese Un, gba kpiligh ve iyol sha akaaôron a dedoo a a dugh ken zwa Na yô.” (Luka 4:22) Mbahenen mba Yesu yange ve dondon ikyav i Ortesen ve ver sha ci ve la. Sha nahan yô, apostoli Paulu taver anmgbianev nav mba ken Kristu ishima ér: “Lu nen mbakaven mo er mo kpaa, m kaven Kristu nahan.” (1 Kor. 11:1) Paulu yange hingir u ‘tesen akaa ken igbar man ken uya’ tsema tsema sha ci u lu dondon igbenda i Yesu pasen kwagh la.—Aer. 20:20.

U Tesen sha Tembe “Kasua”

Ú nenge a ikyav i tseer tseer i Paulu tesen kwagh ken igbar la ken Aerenakaa 17. Ijiir la ôr kwagh u zende u Paulu za ken gar u Atene, ken tar u Grika la. Hanma vegher u Paulu yange una gema ashe ken gar la cii yô, a nenge a akombo, sha godobi kpaa, sha ajiir a a lu ken igbar kpaa. Kwagh la vihi Paulu kpishi! Nahan kpa, a de ér ishima i vihi un i sar her ga. Gema “lu tesen . . . ken shinagoge, man shi mba ve kohol un sha kasua ayange ayange kpaa.” (Aer. 17:16, 17) Paulu ver se ikyav i dedoo kpen kpen! Hanma injaor i se zough a nan cii, sea lam a nan sha gbenda u puun nan a puu ga, kpa a lu sha icivir yô, se fatyô u paase gbenda u nana kegh ato a vese, nahan ken masejime yô, nana va due ken ikyangenev mbi kwaghaôndo u aiegh kera yô.—Aer. 10:34, 35; Mpase 18:4.

Ior kpishi mba Paulu lu pasen ve kwagh sha ityembe kasua la lu mba ve soo u keghen ato a na keng ga yô. Mbagenev ken a ve lu mbafankwagh mba mbamnenge vev lu kposo a akaa mimi a Paulu lu pasen la yô. Paulu yange una tagher a anyiman shighe u a lu pasen ve kwagh yô, a kegh ato a ungwa kwagh u ve lu ôron la. Mbagenev yilan un ér “Orlyam” (inja na yô ér, “oryaren ikyoo i kwaghôron”). Mbagenev kaa ér: “Ngu er ka or u pasen kwagh u mbaaôndo mba hev” yô.—Aer. 17:18.

Nahan kpa, iyol kpe Paulu sha akaa a ior lu ôron sha a na dang dang la ga. Kpa, yange mba va pin Paulu ér a ôr ve kwagh u ityesen na yô, Paulu maa tôô ian la ôr kwaghôron u tan ve iwanger, u a tese wang ér, yange fa igbenda i tesen ior kwagh tsema tsema yô. (Aer. 17:19-22; 1 Pet. 3:15) De se hide se sav nengen sha kwaghôron na la vindi vindi sha er se zua a mfe  u una wase se u seer tsaase igbenda yase i pasen kwagh yô.

Ôr Kwagh u Una Kôr Ior sha Mtema Yô

Paulu kaa ér: “Ne Mbaatene, m nenge sha hanma gbenda cii, ne mba civir mbaaôndo tsung je, gadia zum u m lu . . . kenger akaa a ne civir a yô, nahan m zua a atse agen a nanden nagh sha mi, i nger kwagh ne sha mi nahan ér: Ka sha ci u aôndo u i fe un ga la; yô, ka Un u ne civir Un sha lan ne m lu pasen ne kwagh Na ye.”—Aer. 17:22, 23.

Paulu yange ver ishima nenge hanma kwagh u lu hen ikyasen na la. Akaa a yange kpe iyol nenge a mi la wase un u fan kwagh u ior mba lu lamen a ve la. Se kpa aluer se ver ishima yô, se fa kwagh u orya u se lu lamen a nan la. U tesen ikyav yô, akaa a numben a mi hen ya shin akav a sha hunda aa fatyô u pasen we kwagh u orya. Aluer se kav ma kwagh u se fe ser ka mlu u orya yô, se fatyô u tsuan kwagh u se ôr a nan la sha inja, kua gbenda u se lam a nan la kpaa.—Kol. 4:6.

Paulu yange puun ior ken kwaghôron na ga. Nahan kpa, gema fa er ‘mciviraôndo’ u Mbaatene la har sha mfe u mimi ga yô. Paulu yange tese ve wang er vea er ve vea gema civir Aôndo u mimi la yô. (1 Kor. 14:8) Doo u se ôron kwagh wang wang shi se lamen a ior a u puun ve shio zum se lu yôôn loho u dedoo u Tartor yô!

Lamen a Ior sha Kwaghfan shi De Sangen a Sange Ga

Paulu za hemen u kaan ér: “Aôndo u A er tar man akaa a a lu kimi cii, tem ken utempel mba i maa sha ave ga, gadia Un ka Ter u Sha man tar. Man kera ka sha ave a ior kpaa i eren Un tom er kwagh gba Un sha ma kwagh ga, gadia ka Un je A ne uumace cii uma man iôôn kua akaa cii ye.”—Aer. 17:24, 25.

Heen ne Paulu lu ôron ve kwagh sha kwaghfan er i lu Yehova a ne se uma yô, a yila un ér “Ter u Sha man tar.” Se mba a ian i civirigh i wasen mbaasemaamimi mba ve lu ken ukwaghaôndo shi ve eren akaa a uter kposo kposo la ser ve kav er i lu Yehova Aôndo a lu imbor i uma yô!—Ps. 36:9.

Paulu shi kaa ér: “Ka sha [or] môm je man A er akuraior cii ye, . . . er A vande veren ve ashighe man akighir a mtem ve yô, sha u ve̱ ker Aôndo shin alaghga vea pev Un vea zua a Na kpaa, shin er A lu ica a hanmô wase ga nahan kpaa.”—Aer. 17:26, 27.

Gbenda u se tesen ior la ua fatyô u wasen ve u fan imba Aôndo u se civir la. Yehova sangen a sange ior ga, a na akuraior a sha tar cii ian ér a ‘pev Un a zua a Na.’ Kape se kpa se lamen a ior mba se zough a ve cii, se sange a sange ga je la. Ka se nôngon ser se wase mba ve ne jighjigh ér Orgbanakaa ngu, u a gbe akaa cii la ve ya ikyar a na kôôsôô sha er vea zua a averen a tsôron yô. (Yak. 4:8) Kpa, mba ve nyiman ér Aôndo ngu ga la di se wase ve nena? Se dondo ikyav i Paulu la. Nenge kwaghôron na u dondon ne.

“Gadia ka ken a Na man se lu uma man se tenger shi se tem kpaa ye, er mbadughunatsam enev mbagenev kpaa ve kaa nahan la er: Se mba tsombor Na je kpaa. Man er se lu tsombor u Aôndo je yô, doo u sé hen ser, Aôndo ngu er zenaria shin azurfa shin ma iwen i i koo i a kua sha kwaghfan man sha mhen u or nahan ga.”—Aer. 17:28, 29.

Heen ne, Paulu ter kwagh u mbadughunatsam mba Mbaatene fa ve shi lumun a ve la sha er Mbaatene mba lu pasen ve kwagh la vea kegh ato a na shi vea lumun a na yô. Se  kpa ka se nôngo ser se fa kwagh u ior sha u henen sha kwagh u se fe ser mba keghen ato a vese vea lumun a mi yô. Ikyav i tesen yô, injakwagh i Paulu ôr ken washika na u nger hen Mbaheberu la ia fatyô u wasen ior u nan jighjigh nyian kpaa. A kaa ér: “Hanma ya yô, or maa un a maa, kpa u A maa akaa cii yô, ka Aôndo.” (Heb. 3:4) Aluer se ker gbenda u orya nana hen sha injakwagh i taver ga ne yô, ia wase nan u kaven mimi u kwagh u se lu ôron nan la. Shi kwagh ugen ken kwaghôron u Paulu la u a tese ér yange fa u tesen ior kwagh tsema tsema yô, ka u taver ior asema.

Pase Var Var Er Shighe Wase Ne a Lu Shighe u Eren Kwagh Torough Torough Yô

Paulu kaa ér: “Aôndo wa ayange a mlan ve la ikyo ga; kpa hegen yô, ngu pasen ior sha hanma ijiir cii er ve̱ gema ishima, gadia A ver iyange i Una ôr tar cii ijir sha mimi, sha Or u A ver nan yô; sha kwagh ne yô, A na ior cii ikyav i mimi sha mnder u A nder Un shin mbakpenev la.”—Aer. 17:30, 31.

Er i lu sha kwaghfan je Aôndo a hila ne kwaghbo ian yô, a na se ian i tesen un kwagh u a lu se ken ishima jighilii yô. Gba hange hange u se pase var var er ashighe a se lu ker ne a lu torough torough yô, shi se ôr kwagh u averen a hemen u Tartor u sôôn van a mi la sha gbenda u a kuma ken ato yô.—2 Tim. 3:1-5.

Ka Ior Cii Ve Soo Loho Wase Ga

“Zum u ve ungwa kwagh u mnder u shin mbakpenev la yô, mbagenev gba nahan tar man mbagenev di yô, kaa er: Shighe ugen shi sé ungwa kwagh ne her a we. Nahan Paulu maa due her a ve kera. Kpa mbagenev var a na, na jighjigh; ken ve yô, lu Dioneshiu, or u Areopagu, man shi kwase ugen, iti na er Damari, man shi mbagenev a ve imôngo kpaa.”—Aer. 17:32-34.

Mbagenev ka ve lumun a kwagh u se lu tesen ve la fese je; mbagenev di yô, ka i gba u alaghga shighe a kar ve vea mase lumun a mhen wase ye. Kpa, aluer kwaghôron wase u wang man u taver ga la una wase or môm tseegh u fan Yehova kpa, doo u se wuese er Yehova a yar tom a vese u urugh ior van a mi hen Wan na yô!—Yoh. 6:44.

Akaa a Se Fatyô u Henen ken Kwaghôron u Paulu la Yô

Aluer se hen sha kwaghôron u Paulu yô, se zua a ityesen kpishi sha gbenda u yange pasen mbagenev akaa a mimi a ken Bibilo la. Aluer se ar sha ian i tilen nan kwaghôron u ken igbar ken tiônnongo yô, se fatyô u nôngon sha afatyô wase cii dondon Paulu sha u yaren tom a asember a sha mkav, a aa wase or u nan ne jighjigh ga la u kaven shi lumun a akaa a mimi a ken Bibilo yô. Doo u se pasen akaa a mimi wang, kpa se gema se palegh u puun akaa a or u nan ne jighjigh ga, u nan lu hen atô wase la nan ne jighjigh a mi yô. Heela tseegh ga, ken tom wase u pasen kwagh ken igbar la kpaa, se nôngon u ôron kwagh a ior var var man sha kwaghfan. Aluer se mba eren nahan yô, se lu dondon kwaghwan u Paulu, u a kaa ér se ‘ver ishima u tesen’ la sha mimi.

[Foto u sha peeji 30]

Ityesen i Paulu yange i wanger shi i taver u kaven ga shi tesen sha kwaghfan

[Foto u sha peeji 31]

Se mba dondon Paulu sha u keghen ato a mba se pasen ve kwagh la