Ú Umbur Kpa?

U ôr Iyoukura mba i sember gberen la nahan ve doo u kpa? Nenge ase aluer u fatyô u nan mlumun sha mbampin mban yô:

• Er nan ve Aôndo yange tsaha Aron sha ci u wanbua u a er la ga?

Aron yange per tindi u Aôndo wa sha kwagh u eev mbu civir la. (Eks. 20:3-5) Nahan kpa, Mose er msen hen Aôndo sha ci u Aron, man msen la yange lu a “agee kpishi” je. (Yak. 5:16) Aron vande tilen sha mimi anyom imôngo. Shi er ior kumbur a Aron ve er wanbua nahan kpa, ken masejime yô, a tese ér un lumun a mcivir u eev mbura ga, sha ci u a kohol ônov mba Levi cii, ve ta ikyaa a Yehova dông. (Eks. 32:25-29)—5/15, peeji 21.

• Kanyi ia wase Orkristu shin Kwasekristu u wan ishima a idya i ikyar u nana?

Aluer kwase shin nom u nan er idya la nan ngu yaren tom a akaawan a Bibilo ken uma u nan yô, ityôkyaa ngi i orshôô la nana lu henen ér nan ngu a ibo sha idya i ikyar u nan la ga. Aôndo fa er i gbe u a sur u ishima shi a taver we ishima yô. Una fatyô u surun we ishima sha ikyev i Mbakristu mbagenev.—6/15, peeji 30-31.

• Doo u se dondo mnenge u ikpelaior ga sha ci u nyi?

Ior i tar ne wa gbenda u Yehova a nengen kwagh u bo man u dedoo la sha ada ga. Er se lu Mbakristu yô, se mba dondon ikyav i Orhemen wase, Yesu Kristu, u yange na Ter na u sha icivir sha kon u mtsaha, “a kera wa kunya ikyô ga” la. (Heb. 12:2)—8/15, peeji 3.

• U tese mbayev ou vea soo takerada u ôron nena?

Ijiir i kundu kundu man ikyav i mbamaren ve ver i ôron takerada la ia wase mbayev vea soo takerada u ôron. Shi naan ve ityakerada i vea ôron yô. Ôron takerada i duen sha. Taver ve ishima ve ôron takerada vea we imôngo shi lamen sha akaa a ne er ken takerada la. Kaa mbayev ou ve ôr takerada ungwa shi taver ve ishima ve pine mbampin kpaa.—7/15, peeji 26.

• Lu sha ityôkyaa i nyi Yesu fatyô u den kwase ugen u i fa un sha asorabo a eren la asorabo a na?

Kwaghôron u profeti u Yehova hii ôron shighe u uumace mba hiihii mbara hembaato la tese awashima u Yehova lu a mi ér una ver vor shin Mesiya la. Er kwagh môm a lu u yangen Yehova kwagh u a we ishima u eren ga yô, yange er mkaanem ma i nger ma ken Genese 3:15 la maa, Aôndo nenge ér i na nagh ku ipaan kura. Shin er i lu a na nagh ku ipaan kura ga nahan kpa, er injar i nagh ku shon lu kwagh u bunden ga yô, i hii u yaren tom a ku sha u den mba ve gem ishima sha asorabo a ve la asorabo a ve, er kwase u eren asorabo yum ne nahan.—8/15, peeji 6.