Gba u Se Eren Kwagh sha Shighe sha ci u Nyi?

KA HANMA shighe i lun zange u eren kwagh faa, shin sha shighe ga. Akaa agen a alaghga aa yange se u eren kwagh sha shighe, a se fatyô u hemban yô, ka mgbeca u zende man mngee u akaahendan sha gbenda kua u lun a akaa a eren kpete kpete la. Nahan kpa, ka hange hange u eren kwagh sha shighe. Ikyav i tesen yô, er hen ijiirtom nahan, or u nan yaren tom faa yô ka i tôô ér nan ngu a gbashima shi nan ver ishima sha tom u nan kpaa. Kpa, or ka nana gba leti hen ijiirtom yô, kwagh la a bende a mbatomov mbagenev kua mdoom ma akaa a ve eren la man ityom i ve eren sha ci u ior la. Aluer wanyemakeranta gba leti yô, akaa agen aa kar nan u henen, man aluer nan za hemen u eren nahan yô, nana za ikyura ken makeranta ga. Shi aluer gba u ú nenge a ortwer man u za sha shighe ga yô, alaghga kwagh la una bende a twer u nana er u la.

Nahan kpa, sha ajiir agen yô, i tôô ér ka hange hange u eren kwagh sha shighe keng ga. Hen imba ijiir la nahan, a ngôôr hingir ikye yase u hanma shighe gban leti ga. Aluer ka nahan yô, gba hange hange u se lu a isharen i eren kwagh sha shighe. Se faan er i lu hange hange u eren kwagh sha shighe yô, a wase se u eren kwagh faa. Atôakyaa agen a eren kwagh sha shighe yô kanyi? Se kôrcio u eren kwagh sha shighe nena? Man ka mbamtsera mba nyi se eren kwagh sha shighe ve se zua a mini?

Yehova ka Aôndo u Eren Kwagh sha Shighe

Ityôkyaa i vesen i se soo ser se eren kwagh sha shighe yô, sar se u kaven Aôndo u se civir la. (Ef.  5:1) Yehova ver se ikyav i dedoo i eren kwagh sha shighe. Mayange gbe leti sha kwagh ga. Kur mbaawashima nav sha shighe u a ver la vough, soon ér shighe a kar ga. Ikyav i tesen yô, zum u Yehova soo u timin tar u mbaaferev sha mngerem ma deemee la, a kaa a Noa ér: “Er tso sha kon u gofer.” Shighe u mkur la va nangem yô, Yehova kaa a Noa ér a nyôr ken tsô la shi kaa a na ér: “Shi ayange ataankarahar, tsô Me nôô ura sha tar ayange akunduahar, atetan kua tugh kpaa; hanma kwagh u uma u M er cii, Me tim un sha won kera. Tsô ayange ataankarahar la, nga kar kera yô, mngerem lu sha won deemee” sha shighe la vough. (Gen. 6:14; 7:4, 10) Hen ase sha kwagh u Noa vea tsombor na yange vea lu ken tso hen shighe la ga ve ma er ve la. Yange gba u vea er kwagh sha shighe vough er Aôndo u ve civir la nahan.

Shigh u Mngerem va sha tar Deemee la karen ka kom er anyom 450 nahan yô, Yehova kaa a tertamen Aberaham ér una mar wan, u Vor u ityendezwa ua due ken tsombor na yô. (Gen. 17:15-17) Aôndo kaa ér á mar Isaka “sha inyom i sha, hen shighe ne nahan.” Tsô í mar Isaka sha shighe la vough kpa? Ruamabera kaa a vese ér: “Sara wa iyav mar Aberaham wannomso er a  bee iyol nahan kpaa, sha shighe u Aôndo lu kaa un la vough.”—Gen. 17:21; 21:2.

Akav nga ken Bibilo kpishi a tesen er Aôndo a eren kwagh sha shighe yô. (Yer. 25:11-13; Dan. 4:20-25; 9:25) Bibilo kaa a vese ér se kegh iyange i ijirigh i Yehova i i lu van ken hemen la. “Shin ia ngôôr” sha mnenge u orumace kpaa, i bum a vese ér “ia va sha shighe u i ver la, a kar ken hemen ga.”—Hab. 2:3, NW.

U Eren Kwagh sha Shighe la Ngu Hange Hange ken Mcivir u Yehova

Yange i gba u Mbaiserael mba nomso cii vea lu hen ijiir i i ver sha u eren “Uiniongo mba TER” la sha shighe. (Lev. 23:2, 4) Shi Aôndo ver ashighe a a naan iniav mbigenev yô. (Eks. 29:38, 39; Lev. 23:37, 38) Kwagh ne tese ér, Aôndo soo ér mbacivir un ve civir un sha shighe ga he?

Ken derianyom u hiihii la, apostoli Paulu wa Mbakorinte kwagh er i doo u vea eren mbamkombo mba Mbakristu yô, nahan a taver ve ishima ér: “I̱ eren akaa cii tsembelee je, sha inja sha inja.” (1 Kor. 14:40) Sha nahan yô, yange gba u Mbakristu vea hiin mbamkombo mba civir Aôndo sha shighe u i ver la. Yehova gema mnenge na u eren kwagh sha shighe la ga. (Mal. 3:6) Tsô kanyi se er ve se kôrcio u lun hen mbamkombo mba Mbakristu sha shighee?

Er Se Kôrcio u Eren Kwagh sha Shighe Yô

Mbagenev nenge ér u vanden wan agoyol tsuaa la hemba wasen ve. (Anz. 21:5) U tesen ikyav yô, aluer gba u se mough hen ijiir yase se za mkombo sha shighe u i ver la, man se gema se mough sha shighe u se za nyôron a nyôr nahan maa a hii mkombo nahan doo kpa? Aluer se mough tsuaa sha er sea za tagher a ma kwagh ugen sha gbenda “abur a bur” je kpa se gba leti ga nahan doo ga he? (Orpa. 9:11, NW) Gumor ugen u a eren kwagh sha shighe yô, iti na ér José. * A kaa ér: “Kwagh u una wase hanma or u zan mkombo sha shighe yô, ka u fan shighe u ka i tôô nan u yemen sha gbenda la.”

Mbagenev yô, alaghga a gba u vea sôr ian i kurun tom tsuaa ve, vea zua a ian i zan mbamkombo mba Mbakristu sha shighe ye. Orshiada ugen ken tar u Etiopia yange er nahan. Yange eren tom hen ijiir i í musan shighe u mbatomov yô. Nahan zum u a nenge ér ashighe a un kurun tom la aa na una gbaan leti ken mbamkombo mba tiônnongo je a kuman miniti 45 yô, a sôr ian vea ikyar-tom na ugen, nahan a̱ luun sha iyange i mkombo yô, ngula a yar faa, un di a gema a zua a ian i kurun tsuaa. Nahan Orshiada ne a gema a seer eren tom ahwa ataankarahar sha ci u ikyar-tom na ne.

Aluer se mba a mbayev mba kiriki yô, a lu se ican kpishi u zan mbamkombo sha shighe. Tom u wan mbayev iyol i zan mkombo la ngu hembe shiren sha ngô, kpa mbagenev hen tsombor vea fatyô u wasen, shi doo u vea er nahan kpaa. Ngô ugen ken tar u Mexico, mba yer un ér Esperanza, ngu nengen sha mbayev anigheni un tswen. Wan na u hiihii ngu anyom 23, u masetyô ngu anyom 5. Esperanza pase er tsombor na ka u nôngo ve u za mkombo sha shighe yô, ér: “Ônov av mba kasev mbaganden mbara ka ve wasem u wan mbakiriki mbara iyol. Kwagh la ka a wasem u eren tom wam u hen ya been shi wan iyol i zan mbamkombo sha shighe u se ver la.” Tsombor ne ver shighe u ka ve mough u yemen mkombo yô, shi hanma or hen tsombor ne yô nan dondon shighe ne.

Zua a Mtsera sha u Zan Mbamkombo mba Mbakristu sha Shighe

Aluer se hen sha mbamtsera mba ka se zua a mi sha u zan mbamkombo mba Mbakristu sha shighe la yô, a hemba gban se ishima u zan mbamkombo sha shighe shi se hemba kangen ishima u eren hanma kwagh u se fetyô cii sha er se zaan mbamkombo sha shighe yô. Gumkwase ugen u a ze mbamkombo sha shighe yô, mba yer un ér Sandra, a kaa ér: “Kwagh u ka a doom u zan mbamkombo tsuaa yô, ka m zua a ian i sughun anmgbianev mba nomso man mba kasev shi lamen a ve, nahan seer fan ve.” Aluer se za hen Iyou i Tartor faa yô, se fatyô u zuan a mtsera sha u ungwan kwagh u tom u mbagenev mba se nyer mkombo a ve imôngo ve eren sha  ishimataver man sha jighjigh u nan la. Shi aluer se mba vea anmgbianev asev mba nomso man mba kasev shi se mba lamen a ve sha gbenda u maan jighjigh ve u nan yô, se ‘taver ve asema u lun a dooshima man aeren a dedoo,’ nahan a wase ve tsembelee je.—Heb. 10:24, 25.

Icam man msen u hiin hanma mkombo u Mbakristu la ka kwagh u hange hange ken mcivir u se civir Aôndo la. (Ps. 149:1) Atsam a ase nga wuese Yehova shi nga umbur se u lun a aeren a dedoo, shi nga taver se ishima u eren tom u pasen kwagh saan saan. Gema msen u hiin mkombo la di ye? Sha ashighe a tsuaa la, Yehova yila tempel na ér “iyou i msen.” (Yes. 56:7) Nyian ne, ka se kohol imôngo ser se sôn Aôndo ken mbamkombo asev. Mba eren msen u hiin mkombo la sha u sônon iwasen i Yehova kua icighan jijingi na tseegh ga, kpa ngu a sôr se asema u ngohol kwaghwan u a lu sha ci wase la kpaa. Doo u se zaan nen mbamkombo asev sha shighe sha er se wa icam i hiin shi se lu her shighe u i lu eren msen u hiin la yô.

Zum u Helen, gumkwase ugen u kuman anyom 23 lu pasen ityôkyaa i un ze mbamkombo faa yô, a kaa ér: “M hen mer ka gbenda u me tese mer Yehova doom ishima je la, gadia ka hen a na akaawan a ken mbamkombo cii a dugh ye, kua icam man msen u hiin mkombo la kpaa.” Se kpa doo u se nengen mbamkombo nahan ga he? Een, doo u se nenge nahan. Sha nahan yô, de se nôngo nen sha afatyô wase cii se lu nen mba eren kwagh sha shighe ken ityom i se eren cii, hemban je yô ken ityom i i gbe i zough a mcivir u Aôndo u mimi u se civir la.

[Ngeren u shin kpe]

[Foto u sha peeji 26]

Vande wan iyol tsuaa

[Foto u sha peeji 26]

Mough tsuaa sha er wea za tagher a ma kwagh sha gbenda “abur a bur” kpa u nyôr sha shighe yô

[Ufoto u sha peeji 26]

Zua a mbamtsera sha u zan mbamkombo faa