Mbampin mba Mbaôron Takerada Ne Ve Pin La

Hii nan ve Yesu fatyô u kaan a kwase ugen u i fa un sha asorabo a eren la ér í de un asorabo a na?—Luka 7:37, 48.

Er Yesu lu yan kwaghyan ken ya u Orfarishi ugen, u i yilan un ér Shimon yô, kwase ugen “va tile Un ken ijime hen angahar a Na.” Kwase ne maa gba vaan nôndon Yesu mliam sha angahar shi esen a sha ice na i sha ityou. Maa a suse angahar a Yesu shi a shighe a mkurem ma human doon. Ngeren u Ivangeli la kaa ér, i fa ‘kwase la ken gar sha asorabo a eren.’ Sha mimi yô, uumace mba ve yen mban cii mba mbaasorabo, kpa Ruamabera ka a yar tom a ishember ne sha u ôron kwagh u or u nan eren asorabo hanma shighe shin i fe nan sha asorabo a eren yô. A shi nan kpa, kwase la lu idyakwase. Ka imba kwase i Yesu kaa a na ér: “I de u asorabo a ou” je la. (Luka 7:36-38, 48) Inja i kwagh u Yesu ôr la ér nyi? Er i lu a na nagh ku ipaan kura ga yô, yange i de kwase ne asorabo a na sha nyi gbenda?

Shighe u kwase la ese Yesu angahar shi shighe un mkurem, kpa Yesu lu a de un kwaghbo na ga la, a ôr Shimon injakwagh sha u pasen un kwagh u vesen ugen. Yesu tôô isholibo kar sha injô i vesen i i̱ gande u kimbin yô, nahan a kaa a Shimon ér: “Or u nan injô lu a mbayan un injô uhar; u môm injô na lu sule deri utaan; ugen la yô, gema lu sule akunduahargber. Man mba fetyô u kimbin ga yô, a de ve mbauhar mbara cii anzô ve. Ken ve yô, ka anti á hemba doon nan a naa?” Shimon gema kaa er: “Beem er ka u i de un i kpishi la yô.” Yesu kaa a na er: “U tôndo vough.” (Luka 7:41-43) Gba u se cii se ungwan imo i Aôndo, nahan ka sea hemba un ato sea er isholibo yô, se kera kimbi Aôndo injô na ga. Ka nahan ve injô yase la ka i seer ye. Nahan kpa, Yehova ngu er or u nan injô u a lumun u den se anzô ase nahan. Ka sha ityôkyaa ne ve Yesu taver mbadondon un ishima ér ve eren msen hen Aôndo ve sônon ér: “De se anzô ase di er se kpaa se deen mba ve gbe anzô hen vese la nahan” ye. (Mat. 6:12) Luka 11:4 tese ér anzô ne ka asorabo.

Sha ayange a tsuaa la, gba u or a er nyi ve Aôndo a de nan asorabo? Er Yehova a er ijir sha gbenda u vough yô, gba u mbaasorabo cii vea kpe. Ka nahan ve, Adam yange kimbi injô i isholibo i er la sha uma na ye. Nahan kpa, sha ikyev i Tindi u Aôndo na ikyurior i Iserael la yô, yange or a er isholibo yô, i gba u nana na Yehova nagh sha ilegh ve a de nan isholibo i nan la ye. Apostoli Paulu kaa ér: “Sha tindi yô, shi kpuaa tsô akaa cii ma i wanger a sha awambe, man aluer á haa awambe ga yô mde u akaabo kpaa una lu ga.” (Heb. 9:22) Mbayuda yange ve fa ma gbenda ugen u zuan a mde u asorabo hen Aôndo ga. Sha nahan yô, kera taver se u kaven er i hii ve ior mba sha ayange a Yesu, mba ve nenge kwagh u Yesu er la huna kwagh u ôr a kwase la ga. Ior mba ve kase kwaghyan a Yesu imôngo mbara lu kaan ken asema a ve ér: “Ka nyi Or ne man asorabo je kpaa A deen ioroo?” (Luka 7:49) Nahan yô, lu sha nyi gbenda man i de kwase u eren asorabo yum ne asorabo na?

Kwaghôron u profeti u Yehova ôr shighe u uumace mba hiihii mbara hemba ato la tese awashima u Yehova lu a mi ér una ver “vor” ugen, u Satan man “vor” na vea cagh u ikishinguhar la. (Gen. 3:15) Yange i cagh vor la ikishinguhar zum u mbaihyomov mba Aôndo wua Yesu la. (Gal. 3:13, 16) Awambe a Kristu a i haa inya la maa hingir nagh ku paan uumace sha ikyev i isholibo man ku. Er kwagh môm a lu u yangen Yehova kwagh u a we ishima u eren ga yô, yange ôron mkaanem ma i nger ken Genese 3:15 la je maa, Aôndo nenge ér i na nagh ku ipaan kura. Lu sha ityôkyaa ne Aôndo lu den mba ve na uityendezwa nav jighjigh mbara cii asorabo ve ye.

Sha ashighe a tsuaa la, uumace mbagenev kpishi lu mbaperapera sha ishigh ki Yehova.  Ken a ve yô, lu Enoki man Noa man Aberaham man Rahabi kua Yobu. Er ve na jighjigh yô, ve lu veren ishima keghen mkur u uityendezwa mba Aôndo. Orhenen Yakobu nger ér: “Aberaham na Aôndo jighjigh nahan A gema kwagh la hingir perapera na je.” Yakobu shi ôr kwagh u Rahabi ér: “Rahabi, agbagakwase la kpaa, kape i na un ishô sha aeren je la.”—Yak. 2:21-25.

Tor Davidi u hemen Iserael sha ayange a tsuaa la yange er asorabo a vesen kpishi, kpa na Aôndo u mimi jighjigh taveraa shi hanma kwa u una er isholibo yô, a gema ishima sha isholibo shon. Kwagh ugen yô, Ruamabera kaa ér: “Aôndo vande veren [Yesu] er A̱ lu iwom i sha jighjigh u nan, sha awambe a Na. Lu sha u Aôndo Una tese perapera Na gadia asorabo a i vande eren tsuaa sha shighe u ishimawan i Aôndo la yô, A kera wa a ikyo ga. Lu sha u Una tese perapera Na hen shighe u ainge ne, sha u Una lu u perapera man shi Una na mba ve lu ken jighjigh u nan ken Yesu la ishô kpaa yô.” (Rom. 3:25, 26) Yehova yange de Davidi asorabo na sha ci u nagh ku ipaan ku lu u Yesu una va na ken hemen la, nahan kpa A vihi ijirôron Na i mimi la ga.

Kwagh ne tese ér, kape kwase u yange shighe Yesu mkurem shin angahar la kpa kwagh na lu je la. Yange lu idyakwase, kpa va gema ishima. Kwase ne yange kav er gba u a yima un sha ikyev i isholibo yô, shi ieren na tese ér a lumun a or u Yehova ver sha u yiman un la sha mimi. Shin er i lu a na nagh kura ga nahan kpa, er injar i nagh ku shon lu kwagh u bunden ga yô, i hii u yaren tom a ku sha u den ior asange asange asorabo a ve, er un nahan. Ka nahan ve Yesu kaa a na ér: “I de u asorabo a ou” ye.

Er avur ne a tese wang nahan, Yesu yange nyaghen mbaasorabo ga. Yange eren a ve doo doo. Heela tseegh ga, Yehova ngu a kegh iyol u den mbaasorabo mba ve gem ishima la cii asorabo a ve. Kwagh ne ka kwagh u doon man u taver se uumace mbaasorabo mban ishima kpishi!

[Foto u sha peeji 7]

Ve lu mbaperapera sha ishigh ki Yehova