Mba Fe Mcivir U Mimi Sha Mzough
Mba Fe Mcivir U Mimi Sha Mzough
“Me zua ve imôngo er iyôngo ken ityôr nahan”—MIK. 2:12.
1. Igbetar tese ikyav ér Aôndo ngu a kwaghfan nena?
ORPASALMI ugen yange kpiligh iyol ér: “Kpash! TERE, ityom You ngi atô kposo kposo, U er i cii sha kwaghfan, tar iv a akaa a U gbe la.” (Ps. 104:24) Se nenge a kwaghfan u Aôndo sha gbenda u a gbe imendenev umiliôn imôngo kua ankaam mba purugh man ankaam mba umav mba i yer ér bacteria la kua inyam i ken tar wase ú akaauma a lu ker kpelegh kpelegh sha gbenda u kpilighyol ne. Man akaa ne cii nga zough a iwasen hen agen sha igbenda kposo kposo. Shi ken iyol you kpa, aveghemakaa a nderan uma a kiriki man a vesen udubu udubu nga a er tom sha igbenda kposo kposo sha er ú lu a ihyogholough iyol ga shi á kpe u iyol kpaa yô.
2. Er foto u sha peeji 13 a tese nahan, er nan ve mzough u hen atô u Mbakristu la yange una lu er ka ivande nahana?
2 Yehova yange gba uumace ér ve wasen ayol a ve. Orumace môm kpa mluashe u nan zua a ugen ga, shi mba a anza kua mbamfe kpa kposo kposo. Heela tseegh ga, yange gba uumace mba hiihii mbara a aeren a lun er a na nahan, a aa wase ve u eren kwagh ken mzough shi wasen ayol a ve yô. (Gen. 1:27; 2:18) Nahan kpa, tar u uumace ne jimin cii ngu paleghaa a Aôndo hegen, shi ma shighe môm kpa, tar cii ngu a fatyô ú er kwagh ken mzough ga. (1 Yoh. 5:19) Sha nahan yô, er nongo u Kristu u sha derianyom u hiihii la lu a anzaaior ker kposo kposo, er Mbaefese mba lun ikpan man kasev Mbagrika mba tagher tagher man nomsombaiorov mba ken Yuda mbafan takerada kua mba ve vande lun mba civir akombo la, kpa ve lu ken mzough yô, kwagh ne yange una lu er ka ivande nahan.—Aer. 13:1; 17:4; 1 Tes. 1:9; 1 Tim. 6:1.
3. Bibilo pase mzough u Mbakristu nena, man kanyi se time sha mi ken kwaghhenen nee?
3 Mcivir u mimi ka a wase ior u lun ken mzough vough er alegh a yolough a ase nahan. (Ôr 1 Mbakorinte 12:12, 13.) Mbampin mbagen mba se time sha mi ken ngeren ne yô, ka: Mcivir u mimi ve a ior ken mzough nena? Er nan ve i lu Yehova tswen a kom u zuan ior umiliôn imôngo mba ken akuraior ciilii? Ka akaa a vihin mzough a nyi Yehova a wasen se u hembana? Man Mbakristu mba mimi kaha kposo a Mbakristu Mbaaiev sha kwagh u mzough nena?
Mcivir u Mimi Ve a Ior ken Mzough Nena?
4. Mcivir u mimi ve a ior ken mzough nena?
4 Ior mba ve lu ken mcivir u mimi yô, ve lumun ér Yehova kuma u hemen tar cii, gadia un a gbe akaa cii ye. (Mpa. 4:11) Shin er Mbakristu mba mimi ve lu sha ajiir kposo kposo shi ve lu ken mbamlu kposo kposo nahan kpa, atindi a Aôndo a ve cii ve kor la nga kwagh môm shi akaawan a Bibilo a ve dondon la kpa nga kwagh môm. Mbakristu mba mimi cii mba yer Yehova vough nahan ér “Ter.” (Yes. 64:8; Mat. 6:9) Sha nahan yô, ve cii mba anmgbianev mba ken jijingi shi vea fatyô u lun ken mzough u dedoo u orpasalmi a pase kwagh na la; a kaa er “Nenge, aluer anmgbianev vea tema imôngo, ishima ve ia lu i môm yô, á doo yum á hôm kpaa.”—Ps. 133:1.
5. Ka ieren i nyi i ne mbacivir Aôndo mba mimi ve lu ken mzough?
5 Shin er Mbakristu mba mimi ve lu vough ga nahan kpa, mba civir Aôndo imôngo ken mzough sha ci u ve hen u doon ayol a ve. Yehova tese ve u doon ayol a ve sha gbenda u mbagenev vea fatyô u eren nahan ga yô. (Ôr 1 Yohane 4:7, 8.) Mkaanem nam kaa ér: “Haa nen mhôônom ma kôron tsung iyol, man shi ieren i dedoo man iyol i gengese ga, man ishima i legh legh man ishima i wan er uicuwan mba Aôndo mba ve lu uicighanmbaiorov mba doon ishima nahan. Waan nen ishima a ayol a en, deen nen ayol a en kwaghbo aluer kwagh á nzughul orgen a orgen yô, er Ter A de ne akaabo nahan, ne kpaa kape eren nen la. Kwagh u a hembe cii yô, haa nen dooshima iyol, ka kwagh u maghen mlu u vough je la.” (Kol. 3:12-14) Dooshima, u a lu kwagh u maghen mlu u vough la, ka ieren i í fe Mbakristu mba mimi a mi jighilii je la. Akaa a mbagenev ve vande eren a we ken mcivir u mimi la wase u u̱ nengen er mzough a lu kwagh u í fe mcivir u mimi a mi la ga he?—Yoh. 13:35.
6. Ishimaverenkeghen i sha kwagh u Tartor la i wasen se u lun ken mzough nena?
6 Shi Mbakristu mba mimi mba ken mzough sha ci u mba veren ashe a Tartor u Aôndo ér ka u tseegh u lu ishimaverenkeghen i uumace ye. Ve fa ér ica ia gba ga tsô, Tartor u Aôndo ua kar a tile sha ityough ki ugomoti mba uumace, shi ua na uumace bem u mimi, u una tsôr yô. (Yes. 11:4-9; Dan. 2:44) Sha nahan yô, Mbakristu mba eren kwagh u Yesu ôr sha mbadondon un la ér: “Ve mba ior i tar ne ga, er Mo kpaa M lu or u tar ne ga nahan.” (Yoh. 17:16) Er Mbakristu mba mimi ve nyer iyol ken ayôôso a tar ne ga yô, ve kôrcio u lun ken mzough kua shighe u mbawanndor a ve ka vea nôngon ityav je kpaa.
Ape Ityesen i ken Jijingi i Dugh Yô
7, 8. Akaawan a ken Bibilo nga wasen se u lun ken mzough nena?
7 Mbakristu mba sha derianyom u hiihii la lu ken mzough sha ci u ve cii ve zuan a ishimataver hen ijiir i môm. Yange ve fa ér Yesu ngu tesen tiônnongo shi ngu hemen un sha ikyev i mbahemenev mba shin tine, ve mba shon yô, lu mbaapostoli man mbatamen mba ken Yerusalem. Ior mba lun a gbashima sha tom mban ve dondon Mkaanem ma Aôndo sha hanma ikyaa i ve kuren cii, shi ve tindin mbatamen mba ningir sha ér ve wase ve u pasen atôônanongo a ken ityar kpishi akaawan a ve. Bibilo ôr kwagh u mbatamen mba ningir sha mban mbagenev ér: “Mba ngur yemen karen sha agar agar yô, ve lu nan atindi a mbaapostoli man mbatamen mba ken Yerusalem ve wa a sha u i̱ eren sha mi la.”—Aer. 15:6, 19-22; 16:4.
8 Nyian kpa, kape Mbahemenev mba Shin Tine mba ve lu anmgbianev mba i shigh ve mkurem la ve lu wasen nongo u Kristu u sha tar cii la sha u ú lu ken mzough je la. Mbahemenev mba Shin Tine mbara mba gberen ityakerada ken ijô kpishi, i taver se asema ken jijingi. Kwaghyan u ken jijingi la har sha Mkaanem ma Aôndo. Sha nahan yô, kwagh u ka i tese la ka hen ior a dugh ga, kpa ka hen Aôndo.—Yes. 54:13.
9. Tom u Aôndo a ne se la ngu wasen se u lun ken mzough nena?
9 Mbakuran mba ken Kristu kpa mba ve a mzough sha u hemen ken tom u pasen kwagh la. Mlu u kôôsôô u ka a lu hen atô u ior mba ve eren Aôndo tom imôngo la taver hemba ikyaryan i ka i lu hen atô u ior mba ken tar ne, mba ka ve gba lun di ken ma mzough u eren gurgur tsô la. Yange i ver tiônnongo u Kristu ér a lu mzough u eren gurgur ga, kpa ér a lu ijiir i civir Yehova shi eren tom u pasen loho u dedoo shi geman ior hingir mbahenen man ijiir i taver mba ken tiônnongo asema. (Rom. 1:11, 12; 1 Tes. 5:11; Heb. 10:24, 25) Sha nahan yô, apostoli Paulu fatyô u kaan a Mbakristu ér: “Ne tile dông, ne mba ken jijingi môm ne mba ishima i môm, ne mba nôngon imôngo sha ci u jighjigh u nan u sha Loho u Dedoo la.”—Fil. 1:27.
10. Ka sha igbenda i nyi nahan ior mba Aôndo ve lu ken mzougho?
10 Er se lu ior mba Yehova yô, se mba ken mzough sha ci u se lumun hemen u Yehova shi anmgbianev asev doo se ishima shi se mba a ishimaverenkeghen sha kwagh u Tartor u Aôndo shi se mba ne ior mba Aôndo a tsough ér ve hemen hen atô wase la icivir. Yehova wasen se u hemban anza agen a una wese se ga yô, ma a vihi mzough wase sha ci u se mba uumace mba vough ga.—Rom. 12:2.
Er u Hemba Ihyagh man Iyuhwe Yô
11. Er nan ve ihyagh i ve a mpavaa, man Yehova wasen se u palegh i nena?
11 Ihyagh i ve a mpav. Or u wan ihyagh ka nan nenge ér nan hemba cii shi ka nana kaan ihyagh sha kpahum nahan, i doo nan je i zua ga. Kpa ashighe kpishi kwagh ne ka a vihi mzough, sha ci u mba ka vea ungwa ihyagh la, ka ve hingir u gban iyuhwe. Apostoli Yakobu kaa a vese wang ér: “Imba ihyagh ne cii ka ifer je.” (Yak. 4:16) Aluer ior mba eren kwagh a mbagenev inja er ve gba kwagh ga yô, kwagh ne tese dooshima ga. Ikyav i Yehova a ver sha u hiden a iyol ijime eren kwagh a uumace mba yinan er se nahan la, ka kwagh u kpilighyol kpishi. Davidi nger ér: “Ishima You [Aôndo] i legh legh [shin “iyol hiden ijime,” NW] erem m gba ikyôr.” (2 Sam. 22:36) Mkaanem ma Aôndo ka ma wase se u den ihyagh, gadia ma tesen se u henen kwagh sha gbir. Jijingi yange mgbegha Paulu pine ér: “Ka an nan ver u u hembee? Ka nyi u lu a mi i u ngohol a ngohol ga? Man aluer u ngohol yô, ka nyi u gengese iyol er u ngohol a ngohol ga nahana?”—1 Kor. 4:7.
12, 13. (a) Er nan ve i lu ican ga u gban iyuhwe? (b) Aluer se mba nengen anmgbianev asev er Yehova a nengen ve la yô, kanyi ia due kere?
12 Iyuhwe kpa ka kwagh ugen u tagher mzough. Er se ye dyako i myen yô, se cii se mba a “iyuhwe i gban” ken a vese, man mba ve lu Mbakristu ica i gbe je kpa, ka ve gba iyuhwe sha ci u mbamlu man aan a tom man mbamfe kua akaa a mbagenev ve lu a mi la. (Yak. 4:5) U tesen ikyav yô, alaghga anmgbian u lun a tsombor nana lu tômon aan a tom a or u pasen kwagh hanma shighe nan lu sha mi la, a hungur nan er or la di kpa alaghga nan lu waren tômon mlu u or u lun a tsombor la yô. Se er nan ve se yange imba kwagh la u vihin mzough wase?
13 Kwagh u una wase se ve se palegh iyuhwe yô, ka u se umbur ser Bibilo tôô Mbakristu mba i shigh ve mkurem la i kar sha alegh a yolough a orumace. (Ôr 1 Mbakorinte 12:14-18.) U tesen ikyav yô, er alaghga ishe you i hembe lun tseer tseer a ishima you nahan kpa, alegh a ahar ne cii nga u a inja ga he? Kape Yehova kpa hanma or ken tiônnongo nan gbe un kwagh je la, shin er ashighe agen alaghga mbagenev vea hemba lun sha aan a tom a vesen a mbagenev nahan kpaa. Nahan yô, de se nengen nen anmgbianev asev er Yehova kpa a nengen ve la. De se wa nen mbagenev ikyo shi se tese ser kwagh ve gba se ishima, a u se gban ve iyuhwe la. Aluer se er nahan yô, se kpa se na mkposo una lu hen atô u Mbakristu mba mimi man mba ken ayou a aduaav a Mbakristu Mbaaiev la.
Mpav Ngee ken Mbakristu Mbaaiev
14, 15. Kwaghaôndo u Mbakristu Mbaaiev yange pav ker nena?
14 Mzough u Mbakristu mba mimi ve lu ker la kaha kposo a inium i nôngon i í lu ken ayou a aduaav a Mbakristu Mbaaiev la. Sha derianyom u sha unyiin la nahan, kwaghaôndo u aiev dumbur je yô, orhemen tartor u Roma u fan Aôndo ga kôr ngohol, gba samber a mi. Tsô anyiman gba duen ciligh ciligh, nahan ityartor i í eren kwaghaôndo u Mbakristu u aiev la pav ker, kera lu vea tartor u Roma ga; ve yem ve za bugh ucôôci mba ityar ve.
15 Ityartor ne kpishi nôngo ityav ayol a ve anyom uderi imôngo. Ken derianyom u sha 17 man u sha18 la, ior mba ken tar u Ingila man u France kua tar u Amerika civir ityar ve kpoghuloo, je yô, ieren i or soon tar u nan hemban u mbagenev la hingir er ka kwaghaôndo nahan. Ken derianyom u sha 19 man u sha 20 la, ieren i or soon tar u nan hemban u mbagenev la iv ken mhen u uumace kpishi. Ken masejime yô, ucôôci mba Mbakristu Mbaaiev pav ker ver ver, man iniongo ve igen kpishi lumun a ieren i or soon tar u nan hemban u mbagenev la. Kwagh u kpilighyol je yô, mbazan adua nôngo ityav a mbazan adua a ve imôngo mba ken ityar igen. Nyian ne, Mbakristu Mbaaiev pav ker sha ci u kwaghaôndo man sha ci u ieren i or soon tar u nan hemban u mbagenev la.
16. Ka atôakaa a nyi nahan a lu van a mpav hen atô u Mbakristu Mbaaieve?
16 Ken derianyom u sha 20 la, ucôôci mba Mbakristu Mbaaiev mbagenev hii u keren gbenda u van a ucôôci cii ken mzough. Shin er ve nenge kwagh ne anyom imôngo nahan je kpa, ka di ucôôci kpuaa tseegh ve ker cio u zuan imôngo ye, shi mbazan adua kanshio u gban zwa môm sha kwagh u ityesen i akaa cii gba duen abu tsô la, man kwagh u iyav mbu vihin man kwagh u nomsoor yaven a nomsoor shin kwase yaven a kwase la, kua kwagh u tseghan kasev ken ucôôci la. Mbahemenev mba aduaav mba ken iniongo i Mbakristu Mbaaiev mbagenev, ka ve nôngo ér vea zua ior mba ken ucôôci kposo kposo sha u ôron kwagh u tesen ér atesen a yange va a mpav sha ayange a karen ken ijime la lu a ikyoogh ga. Nahan kpa, u eren kwagh nahan la ngu a na ior ve lu a jighjigh u nan u ndôhôr shi mayange kwagh la ve a mzough ken iniongo i Mbakristu Mbaaiev ga.
Mcivir u Mimi Hemba Ieren i Or Soon Tar u Nan Hemban u Mbagenev La
17. Yange i tsengaôron ér mcivir u mimi una va a ior ken mzough “sha ayange a masetyô” ne nena?
17 Shin er hegen uumace ve pav ker je i hembe ave atse nahan kpa, mzough u a lu hen atô u mbacivir Aôndo sha mimi la na yô, ve due kposo. Mika, profeti u Aôndo, yange tsenga ôron ér: “Me zua ve imôngo er iyôngo ken ityôr nahan.” (Mika 2:12) Mika yange tsenga ôron ér a kende a mcivir u mimi sha una kar mbamcivir mbagenev cii, a̱ lu u civir mbaaôndo mbaaiev shin u civir tar u or er ka aôndo nahan kpaa. A nger ér: “Sha ayange a masetyô la, á ver uwo u ya u TER sha ityough ki iwoov, á kende a u sha, ua kar agungu; akuraior aa ur yemen her; Gadia ior cii mba zenden hanmô ve ken iti i aôndo u nan, man se yô, sé zende ken iti i TER, Aôndo wase, gbem sha won.”—Mika 4:1, 5.
18. Mcivir u mimi wase se u geman nena?
18 Mika shi pase er mcivir u mimi una zua mba yange ve vande lun mbaihyomov la yô. A kaa ér: “Akuraior kpishi aa za aa kaa er: Va nen, sé za nen sha uwo u TER, hen ya u Aôndo u Yakob, sha u Una tese se igbenda Na man sha u sea zenden sha igbenda Na kpaa; . . . Aa gema usanker mba a, aa var induhar a mi, man awange a ve kpaa aa hingir ahô a sôron ikyon a min; ma ikyurior ia kera tsuwa sanker a ikyur igen ga, man shi aa kera hen ityav kpaa ga.” (Mika 4:2, 3) Mba ve lu undun mcivir u mbaaôndo mba ior ve gbe a gba, shin mcivir u ityar ve sha u civir Yehova la mba ken mzough sha tar cii. Aôndo tesen ve er vea lu a dooshima yô.
19. Mzough u i lu zuan ior umiliôn ken mcivir u mimi la tese ikyav i nyi wang-na?
19 Mzough u Mbakristu mba mimi ve lu a mi sha tar cii nyian la kaha kposo shi a tese ikyav ér Yehova za hemen u suen ior nav sha jijingi na. Er i gbe tar je, ior mba ken akuraior cii mba a lu ken mzough i ngee er ve lu nyian nahan ga. Mzough ne kure kwagh u i ter ken Mpase 7:9, 14 la sha gbenda u kpilighyol, shi a tese ér mbatyomov mba Aôndo mba sôôn pasen “ahumbe” a aa tim botar u hegen ne. (Ôr Mpase 7:1-4, 9, 10, 14.) Mzough u anmgbianev tar sha won cii u se lu ker ne ka se kwagh u icivirigh kpishi ga he? Hanmô wase nana fatyô u eren kwagh u van a mzough la nena? Se time sha kwagh ne ken ngeren u a dondo ne.
U Na Mlumun Wer Nyi?
• Mcivir u mimi ve a ior ken mzough nena?
• Se yange iyuhwe u vihin mzough wase nena?
• Ieren i or soon tar u nan hemban u mbagenev la pav Mbakristu mba mimi ga sha ci u nyi?
[Mbampin mba ngeren u henen]
[Foto u sha peeji 13]
Mbakristu mba sha derianyom u hiihii la yange ve due sha ajiir kposo kposo
[Ufoto u sha peeji 15]
Aluer u wase u maan Ayou a Tartor yô, kwagh ne una va a mzough nena?