‘Aeren a Na Za a Na Ityô’

SHA iyange i Tomatar pepe, Jun 9, 2010, Theodore Jaracz, u a lu môm ken Mbahemenev mba Shin Tine mba Mbashiada mba Yehova la kure tom na shin tar ne. A tsa sha won anyom 84. A undu kwase na, Melita, u ve vôso ayol a ve kuma anyom 53 la. Mbagenev mba a undu yô, ka anngô na u kwase kua ônov mba anngô na shon utar, u nomso môm, mba kasev uhar.

I mar Anmgbian Jaracz sha iyange i Setemba 28, 1925, hen eniel u Pike, ken kpentar u Kentucky, ken tar u Amerika. Yange i er Anmgbian Jaracz batisema sha iyange i Agusutu 10, 1941, shighe u lu anyom 15 yô. Anyom nga kar ahar yô, a hii tom u pania u keke la. Hen shighe la lu anyom 17. Lu hen shighe la kpa hii tom na u pasen kwagh hanma shighe, u a er gbem, i nôngo u kuman anyom 67 la ye.

Ken inyom i 1946, shighe u Anmgbian Jaracz lu anyom 20 la, a za tema klase u sha kwa taankaruhar u Makeranta u Bibilo u Watchtower u Gileadi la. Been makeranta la yô, i na un tom u orkuran u ningir sha hen haregh u Cleveland, ken kpentar u Ohio, ken tar u Amerika. Ken inyom i 1951 la, i na un tom u lun ashe a branci u ken tar u Australia la. Yearbook u Mbashiada mba Yehova, u i gber ken inyom i 1983 la, kaa ér anmgbian Jaracz yange “taver anmgbianev mba ve lu ken tar la cii ishima kpishi, sha gbashima na u a lu a mi sha gbenda u nongo u Yehova u tese ér i eren akaa la kua shi gbenda u injaa u a hemen kwaghpasen la.”

Anmgbian Jaracz hidi yemen ken tar u Amerika yô, a vôso Melita Lasko sha iyange i Disemba 10, 1956. Ivaa ve la hii sha tom u zenden sôron uningir man uharegh u ve er sha gbashima sha ajiir kpishi ken tar u Amerika la. Shighe u inyom i 1974 lu zan u za been la, i yila anmgbian Jaracz ér a za lu môm ken Mbahemenev mba Shin Tine mba Mbashiada mba Yehova.

Er anmgbian Jaracz lu a gbashima shi tile sha mimi hen Yehova shi ver ishima sha ityom i Aôndo a ishima i môm yô, kwagh na una hungur se mayange ga. Lu nom u kwase na doo un ishima shi wa un ikyô kpaa yô, shi lu or u akaa a ken jijingi gba un ishima shi hemba wan akaa a mbagenev ikyô a a na yô. (1 Kor. 13:4, 5) U tesen ér yange hemba wan akaa a mbagenev ikyô sha mimi yô, yange a nenge ér i er a hanmaor cii sha inja man sha mhôôn kpaa. Kwagh ugen yô, gbashima u lu a mi ken tom u pasen kwagh la tese ér yange ior doo un ishima sha mimi shi kwagh ve gba un ishima kpaa.

Shin er ku u anmgbian Jaracz, u̱ er tom kpoghuloo shi lu môm ken tsombor u Betel kua mzough u anmgbianev sha tar cii, u̱ doo se ishima tsung la ú vihi se kpishi nahan kpa, se gema se ember sha mtil u yange tile sha mimi hen Yehova anyom anyom la. Se mba a vangertiôr ser a tile sha ‘mimi zan zan ar ken ku shi i na un tsar u uma’ kpaa. (Mpa. 2:10) Shi se na jighjigh ser ‘aeren a na nga zan a na ityô.’—Mpa. 14:13.