Mbampin Mba Mbaôron Takerada Ne Ve Pin La

Yesu yange kaa a mba lu pasen ve kwagh la ér: “Lu nen vough er Ter wen u Sha A lu vough nahan.” Uumace vea fatyô u ‘lun vough’ nyian nena?—Mat. 5:48.

Saa se fa er i yar tom a ishember i “vough” man i “mlu u vough” la ken Bibilo ve se fatyô u nan mlumun sha mpin ye. Ka hanma kwagh u Ruamabera a kaa ér ngu “vough” una lu vough vindi vindi ga. Kpa Yehova yô, ngu vough vindi vindi je ka u henen a hen ga. Uumace shin akaa agen aa fatyô u lun vough akuma akuma. Asember a ken zwa Heberu man zwa Grika a i gem ér “vough” la ashighe kpishi ka a lu ôron kwagh u a lu “jimin” shin “a vie” shin “mshi a lu sha mi ga” yô. Hanma iyange yô, mba yaren tom a ishember i “vough” la, kpa u ngu wer ka u kaan ér mshi ban sha kwagh u i kaa ér ngu vough la ga. U tesen ikyav yô, or a fatyô u kaan ér “wan ne ngu inja vough.”

Yange i gba Adam man Ifa ve lu a aeren a vough shi ve lu vough ken jijingi kua sha iyol kpaa. Ve lu vough sha mlu u Orgban ve soo ér ve lu la. Kpa ihyembeato na yô, ve va yina sha mlu u i er ve la, nahan ve man tsombor ve cii mlu u vough la kar ve. Sha nahan yô, lu sha Adam je isholibo man mlu u vough ga man ku va sha ior cii ye.—Rom. 5:12.

Nahan kpa, er Yesu yange pase wanger wanger ken Ityesen i sha Uwo la nahan, uumace mba ve lu vough ga ne je kpa vea fatyô u lun vough, kpa u ngu wer vea ban a mshi ga. Ken ityesen la, Yesu tese kwagh u or a er ve nana lu a dooshima u vough shin u jimin yô. Ka imba dooshima u Aôndo a tese hen uumace cii je ne. Yesu kaa ér: “Doo nen a mbaihyomov enev, man shi eren nen msen sha ci u mba ve tev ne a ican yô; sha er né lu ônov mba Ter wen u A lu Sha yô, gadia ka A er iyange Na i̱ due i̱ ta sha mbaaferev kua mbamimi kpaa, man ka A nôô ura sha mbaperapera man mba ve lu mbaperapera ga kpaa.” (Mat. 5:44, 45) Aluer mbahenen mba Yesu mba tesen dooshima sha imba gbenda ne nahan yô, vea lu dondon ikyav i vough i Aôndo la.

Nyian ne, Mbashiada mba Yehova sha tar cii mba nôngon kpoghuloo ér vea za hemen u tesen mbagenev imba dooshima u vough ne. Sar ve u wasen ior cii, ken hanma nongoior man ken hanma ukwaghaôndo cii sha er vea zua a mfe u vough u mimi u Bibilo yô. Nyian ne, Mbashiada mba henen Bibilo a iorov mba hemban 7,000,000, mba i sar ve u fan mimi u Bibilo yô, ken ityar 236.

Yesu yange pine ér: “Aluer ka mba ne doo ve ishima la tsô vea doo ne ishima yô, ka nyi injar ne lu a mini? Mbangoholkpandegh kpaa kape ve eren je la gaa? Man aluer nea sughun anmgbianev enev tseegh yô, ka nyi ne eren i hemban mbagenev a mini? Atôatyev kpaa kape a eren je la gaa?” (Mat. 5:46, 47) Mbakristu mba mimi mba nyaghen ior mbagenev sha ci u ve fa takerada ga shin ve due ijiir i môm ga yum ga; shi mba tesen dooshima ve hen mbara mba vea fatyô u hiden tesen ve dooshima la tseegh kpaa ga. Kpa ka ve wase mbaatsanev man mbauangev, kua mbayev mba kiriki man mbaganden. Sha imba igbenda ne yô, Mbakristu vea fatyô u dondon ikyav i Yehova i dooshima la, nahan lun vough.

A tsa sha won nahan se fatyô u lun ken mlu u vough u Adam yange ta kera la je kpa? Een, aluer uumace mba ve ongo imo i Aôndo la ve na nagh ku ipaan ku Yesu kura jighjigh yô, vea nyôr ken mlu u vough u lun a mshi ga, sha shighe u Anyom Dubu a Hemen u Kristu, zum u ‘Wan u Aôndo una vihi aeren a diabolo kera’ la.—1 Yoh. 3:8.