‘Se Na Nen Yehova Iyua’

OR KA nana tese u erdoo nahan, u wuese nan kpa? Nenge ase er ukurmbautyaav mba ken Iserael yange ve tese iwuese ve, zum u ve nôngo ityav a Mbamidian ve bee kera la. Yange i nôngo ityav mbin shighe u Iserael gba ken isholibo sha kwagh u Baal-Peor la. Aôndo yange na ior nav mhembe ken utya, nahan i kar ishar i í ya la i na mbautyaav 12,000 kua Mbaiserael mbagenev cii. Mbautyaav mbara pande ishar i í na ve la ve na upristi, Mbaiserael mbagenev mbara di pande i ve na Mbalevi, sha iniezwa i Yehova.—Num. 31:1-5, 25-30.

Nahan kpa, ukurmbautyaav mbara soo ér vea er kwagh i hemba nahan. Ve kaa a Mose ér: “Mbayev ou ôr iyenge i mbautyaav mba ve lu sha ikyev yase la, mô wase môm saa ga.” Nahan ve tsua u nan Yehova iyua sha zenaria man akaa hweegh agen. Kohol cii yô, akaa a hweegh a sha zenaria a ve na la, yuhwa hemba ikyaren i kilogram 190.—Num. 31:49-54.

 Nyian kpa, kwagh u Yehova a er sha ci u ior kpishi la ngu a mgbegha ve u wuese un. Heela tseegh ga, ka mbacivir Aôndo mba ve tsegh ayol a ve sha ci na la tseegh ve wuese un ga. Ikyav i tesen yô, nenge ase kwagh u delaba ugen u nahan bôôsu, u yange tôô anmgbianev za a ve mkohol u ityar-ityar, u i kumba hen gar u Bologna, ken tar u Italia, ken inyom i 2009, shi hide a ve la. Er yange naha mato sha tindi shi lu inja kundu kundu yô, anmgbianev mba tôô ve la nger un washika tiônôô u sughun un, shi ve seer un antiônkwagh kua kôpi u takerada u Bibilo Tese Ér Nyi Jimi? la kpaa. Delaba la kpa hide nger ve kaa ér: “M ngohol kaade man takerada wen la a iember, kpa m ngu hiden ne a inyaregh ki ne tindim a mi la sha ci u m soo mer me er iyua sha er ne za hemen a tom u ne eren la yô. Er m lu Orshiada ga nahan kpa, m soo mer me er iyua ne sha ci u m kav er ne eren akaa sha dooshima yô.”

Aluer sar u ape wuese Yehova sha ci u kwagh u a er a we yô, gbenda môm u ú fatyô u tesen iwuese yô, ka sha u eren iyua i suen tom u Mbashiada mba Yehova ve eren tar sha won cii la. (Mat. 24:14) I tese igbenda i mbagenev ve eren iyua yô, ken geren u kiriki u a dondo sha ngeren ne la.

[Ngeren u kiriki u a lu sha peeji 20, 21 la]

IGBENDA I MBAGENEV VE TSOUGH U EREN

IYUA I SUEN TOM U PASEN KWAGH U I LU EREN TAR SHA WON CII NE YÔ

Mbagenev kpishi ka ve er iyua ne sha u veren inyaregh ki vea kenden shin akwati u eren iyua u i nger sha mi ér “Worldwide Work” (Tom u i Lu Eren Tar sha Won Cii La).

Hanma uwer yô, atôônanongo a Mbashiada mba Yehova nga a tindi a inyaregh kin shin afishi a Mbashiada mba Yehova a a lu ken tar ve la. Or nana fatyô u tindin a inyaregh ki nan soo u eren iyua a mi la hen afishi a Mbashiada mba Yehova a hen tar u nan la. Aluer or ngu tindin a cheque yô, nana nger ér i kimbi “Watch Tower.” Or nana fatyô u eren iyua sha akaa a hweegh man akaa a injaa agen. Aluer or ngu tindin a amba akaa ne yô, nana nger kwagh u tesen ér akaa shon ka iyua.

IGBENDA I EREN IYUA

Dugh u eren iyua sha inyar jighilii kera kpa, igbenda igen ngi i or a fatyô u suen tom u Tartor u i lu eren tar sha won cii ne yô. Igbenda shon yô ka:

Ishiôlansi: Or nana fatyô u ngeren ér i na Watch Tower inyaregh ki ishiôlansi shin penshen u nan.

Bam: Or nana fatyô u ngeren ér shighe u nan kpe yô, i na Watch Tower inyaregh ki nan koso ken bam man jindinyar i nan we ken bam nan zough a mtsera sha mi la, er atindi a bamegh a tese la vough shin penshen u nan.

Shia man Mtsera: Or nana fatyô u nan Watch Tower iyua i shia i nan yam vea bam shin kômpeni shin mtsera u nana zua a mi sha anzô a ior ve ngohol hen a nan la.

Inya Shin Ya: Or nana fatyô u nan Watch Tower iyua sha inya shin ya u a fatyô u teen yô. Aluer ka ya u ior ve lu her u or nana lu her zan zan nana kar kpen je kpaa. Kpa a hemba doon aluer u lam a afishi a branci a ken tar wou cii ve u er imba iyua ne yô.

Ngeren u Tesen Kwagh u U Soo Wer i Er Shighe u U Kpe yô man u Nan Orgen Shin ma Nongo Inyaregh Wer Ve Koso: Or nana fatyô u ngeren ér shighe u nan kpe yô, i na Watch Tower akaa a nan lu a mi cii shin inyaregh ki nan. Shin nana fatyô u ngeren ér inyaregh ki nan ne Watch Tower ér a lu nan a mi la a saa a mi shighe u nan kpe yô.

Ishember i “igbenda i eren iyua” ne tese ér aluer gba u or nana er imba iyua ne yô, gba u nana fa igbenda ne vough, nana wa iyol cii ve nana er iyua ne ye.

Aluer u soo u fan seer yô, nger Afishi a Branci a Mbashiada mba Yehova a ken tar u Najeria la sha adereshi u a lu shin heen ne gayô gbidye waya. U fatyô u pinen afishi a branci a a nengen sha tar u ú lu ker la kpaa.

Jehovah’s Witnesses

P.M.B. 1090,

Benin City 300001,

Edo State, Nigeria.

Telephone: 07080662020