Yehova Ongo Mliam ma Mba Asema a Vihi Ve Tsung La

ER SOLOMON, tor u fan kwagh u sha ayange a Iserael u tsuaa la yange kaa nahan, “shighe man aikyôr mba ve sha [a vese] cii.” (Orpa. 9:11) Ma aahe shin ican ia fatyô u nzughul a uma wase. Ikyav i tesen yô, aluer ku wua or u hen tsombor wase kpoo yô, alaghga se zungwe tsung. Ken ukasua man iwer i ia dondo la cii, alaghga ijungwen man lanshima vea ya tor sha or u ku u er nan la. Alaghga a lan nan ishima je, nana hen ér nan kuma u eren msen hen Yehova kpaa ga.

Or u nan nyer ken imba mlu ne yô, a gba u a taver nan ishima shi a tese nan dooshima man ikyoiwan. Orpasalmi Davidi yange wa icam taver se ishima ér: “TER ka A kôr mba ve gbe la cii, kenden a mba ve lu ngugh ngugh la sha.” (Ps. 145:14) Bibilo pase se ér “ashe a [Yehova] nga jingen sha akaa a sha won cii, sha u Una pase agee Na hen mba asema a ve a lu jighelaa her a Na yô.” (2 Kron. 16:9) “Ka A sôr mba asema a vihi ve tsung la, A kange ve avav.” (Pasalmi 147:3) Yehova suen shi surun mba asema a vihi ve tsung la ishima nena?

“Kwaghôron u A Gbe sha Shighe Vough Yô”

Gbenda môm u Yehova a ne se iwasen sha shighe vough yô, ka sha ikyev i anmgbianev mba ken Kristu. I wa Mbakristu kwagh ér ve “taver . . . mba ve yen ishima la asema.” (1 Tes. 5:14) Aluer mba se civir Aôndo a ve imôngo, mba ve zungu mhôônom la, tese dooshima man ikyoiwan ken mkaanem vem a ma or u nan lu ken ican shin nan lu zungwen yô, kwagh la una taver or la ishima. Aluer i ôr mkaanem ma kundun iyol tiônôô je kpa, ma a fatyô u taver or u nan lu zungwen la ishima kpen kpen. Alaghga a lu or u nan kpa yange nan lu ken imba mzungu la, nana ôr mkaanem ma surun orgen ishima man ye. Shin a fatyô u lun ma ijende i i fe kwagh u imba mlu la kpishi yô. Ka sha igbenda ne Yehova a fetyô u taver mba asema a vihi ve tsung la ishima ye.

Nenge ase kwagh u Alex, ortamen ugen ken Kristu u er ivese ica lu a gba ga maa kwase na saa ku sha ci u lu a icôron uange la. Ortamen u ningir sha ugen zaan za ôron Alex mkaanem ma surun un ishima hanma shighe. Un kpa kwase na yange saa ku, kpa a hide a vôso kwase ugen. Ortamen u zenden sha la pase er ijungwen yange i shile sha a na yô. Yange una due kwaghpasen vea mbagenev shi una lu vea ve ken mbamkombo mba tiônnongo yô, i kundu un iyol. Kpa una hiden una va nyôron ken iyou na una wuhen hunda yô, i huan un kpishi. Alex kaa ér: “Yange ishima gbam shimi er m fa mer ijungwen i m lu ker la lu kwaghbo ga shi mbagenev kpa kwagh vande eren ve  nahan yô.” Sha kpôô yô, “kwaghôron u a gbe sha shighe vough yô,” una fatyô u surun or ishima sha shighe u mzeyol.—Anz. 15:23.

Ortamen ugen ken Kristu, u yange hoghor a ior kpishi mba kasev shin noov kpe ve yô, za ôr Alex mkaanem ma nan ishimasurun. Yange tese mhôônom ma zungwen shi pase sha dooshima ér Yehova fa mgbe wase man er i lu se shin ishima la kpaa. Anmgbian la kaa ér, “Aluer iwer shin anyom kar, man u nenge wer gba u ú lu a ikyar ugen ken ivese yô, kwagh u Yehova a er sha dooshima hegen sha ci wou yô, ka u we hiden eren ivese.” Nahan cii kpa, ka hanmaor u kwase shin nom a kpe nan, kpa i va sar nan u hiden eren ivese nana kôrcio ga. Kpa Alex henen sha kwagh u anmgbian ne ôr la yô, a kaa ér, “Ka a̱ umbur we kwagh u Yehova a er sha ci wou ne yô, u kera henen wer aluer u hide u er ivese yô, u er kwagh a ikyar u la sha mimi ga shin u nzughul a mserakaa u sha kwagh u ivesegh u Yehova a ver la ga.”—1 Kor. 7:8, 9, 39.

Orpasalmi Davidi, u yange tagher a atsan man ameen iyol na la kaa ér: “Ashe a TER nga sha mbaperapera, A kegh ato sha u ungwan myer ve kpaa.” (Ps. 34:15) Mimi je, Yehova una fatyô u ungwan mliam ma or u ishima i vihi nan tsung la sha shighe vough, sha u mgbeghan mba se civir Aôndo a ve imôngo, mba ve vie ken jijingi la, u va surun nan ishima sha mkaanem ma kundu kundu kua ma sha kwaghfan. Imba kwagh u Yehova a er sha ci wase ne ka u injaa man u wasen se kpaa.

Se Mba Zough a Iwasen ken Mbamkombo mba Mbakristu

Or ka nana ure yô, nan ngôôr lun a mbamhen mbabov, mba vea fatyô u mgbeghan nan u lun ica a mbagenev ga. Nahan kpa, Anzaakaa 18:1 ta se icin ér: “Or u nan dugh iyol i nan kposo yô, ka isharen i nan iyol i nan, nan keren ye, nahan nan mough num a kwaghfan u mimi cii.” Alex lumun a kwagh ne nahan ér: “Shighe u nomou shi kwase wou a saa ku yô, mbamhen mba kpeegh kpishi ka ve nyôr u ken ishima kpoo.” A umbur kwagh u yange pine iyolna yô, wener: “‘Gbenda ugen ngu u yange ma m er kwagh kposo yôô? Yange ma m seer tesen ikyoiwan kua ishimawan shinii?’ M soo u lun tswen ga. Yange m soo u lun  a kwase shio ga. Ka i taver kpishi u den mhen ne sha ci u hanma iyange yô, ka u umbur wer u ngu tswen.”

U hemban cii yô, gba u or u ishima i vihi nan tsung la nana luun imôngo vea ahuraior a dedoo. Taver u zuan ahuraior a dedoo ne ken mbamkombo mba tiônnongo ga. Ka sea za mbamkombo mban yô, se bugh asema ase sha u se ngohol mbamhen mba Aôndo, mba maan se a maa yô.

Mbamkombo mba Mbakristu ka ve na se kera zungwe sha mlu wase la i kar ikyaa inya ga. Ka sea ungwa a pase avur a Bibilo shi sea gbidye kwar sha mi yô, se har ishima sha akaa a kwagh a hembe gban shami la, ka u̱ paase hemen u Yehova iyol shi tseghan iti na je la, se kera henen sha ican yase tseegh tsô ga. Heela tseegh ga, ka a tesen se kwagh u Yehova ken mbamkombo mba Mbakristu yô, i taver se ishima u fan ér aluer mbagenev fa ican i í tser se ga shin ve fa er i lu se ken ishima ga kpa, Yehova yô lan ga. A fa er “ishima i vihin yô, i ne ishima i yinan” yô. (Anz. 15:13) Aôndo u mimi la soo u wasen se, nahan kwagh ne ngu a mgbegha se shi a na se tahav mbu wan ishima.—Ps. 27:14.

Shighe u mbaihyomov mba Tor Davidi lu kighir un tsung la, a vaa a Aôndo a kaa ér: “Jijingi wam ure ken a mo, ishima kondom ker cii.” (Ps. 143:4) Ashighe kpishi, atsan nga a uma or tahav mbu sha iyol man mbu ken ishima cii, je ishima i nan kpa i kondo ker. Alaghga se nyôr ken ican sha ci u angev shin sha ci u ukorkor mba iyolbeen i ve a mi la. Se fatyô u lun a vangertiôr ser Yehova una wase se u wan ishima. (Ps. 41:1-3) Shin er Yehova a kera been or môm angev sha ivande nyian ga nahan kpa, ngu a na or u nan lu yan ican a angev la kwaghfan man tahav mbu wan ishima a mzeyol u nan la. Umbur wer shighe u Davidi lu ken ican la, a ker iwasen hen Yehova. A wa icam ér: “M umbur ayange a ngise la, m hen kwagh sha aeren a Ou cii, m hen kwagh ken ishima sha tom u ave Ou je.”—Ps. 143:5.

Er Yehova na i nger mkaanem man ken Bibilo yô, tese ér a kav er ka i lu se ken ishima yô. Mkaanem mara ka ibumun i tesen ér ongo uzamber asev. Aluer se lumun iwasen i Yehova yô, ‘Una taver se.’—Ps. 55:22.

“Eren Nen Msen Gbem”

Yakobu 4:8 kaa ér: “Kporom nen hen Aôndo, Un kpaa, Una kporom her a ven.” Gbenda môm u se kporom hen Aôndo yô, ka sha u eren msen. Apostoli Paulu wa se kwagh ér se ‘eren msen gbem.’ (1 Tes. 5:17) Aluer taver se u pasen er i lu se ken ishima la jighilii je kpa, “Jijingi iyol Na ngu eren msen sha ci wase sha mbamkin gande u pasen.” (Rom. 8:26, 27) Sha mimi yô, Yehova kav er i lu se ken ishima yô.

Kwase ugen u a lu kôôsôô a Yehova yô, mba yer un ér Monika, a kaa ér: “Msen u eren man Bibilo i ôron kua kwaghhenen u sha tseeneke wasem u nengen Yehova mer ngu ijende yam i kôôsôô. A hingir mo or jim jim, je yô m nengen a iwasen na ken uma wam hanma shighe cii. M zua a ishimasurun sha ci u m fa mer mea fatyô u pasen er i lum ken ishima la ga je kpa, un yô a lan ga. M fa er erdoo man averen na aa bee sha won ga yô.”

Sha nahan yô, de se lumun mkaanem ma sha dooshima man ma nan or ishimasurun ma Mbakristu mba se civir Aôndo imôngo la, shi se yar tom a kwaghwan u kundu kundu man akaa a i umbur se ken mbamkombo sha u taver jighjigh u nan wase la, shi se pasen Yehova hanma kwagh u a lu se ken ishima la ken msen. Akaa a Yehova a ne se sha shighe vough ne, ka gbenda u a tesen se ér un wa se ikyo je la. Alex ôr kwagh sha mfe u a zough a mi ken uma yô, a kaa ér, “Aluer se nôngo sha afatyô wase cii mba yaren tom a akaa a Yehova a ne sha ci wase sha u se za hemen u lun kôôsôô a na yô, se lu a ‘agee a hemban’ la, nahan se fatyô wa ishima a nyityô ican i se tagher a mi cii.”—2 Kor. 4:7.

[Ngeren u kiriki/Foto u sha peeji 18 la]

Msurshima sha ci u Mba Asema a Vihi Ve Tsung La

Upasalmi mba a mkaanem kpishi ma pasen er ka i lu orumace ken ishima yô, kua ma ma pase kimbir kimbir ér Yehova ongo mliam ma or u ishima i vihi nan tsung sha mbamzeyol mba ken ishima la kpaa. Time ase sha avur a Pasalmi a a dondo heen ne:

‘Ken mkighir u i kighir mo ne, m yila TER, m genger imo, m yila Aôndo wam. A ungwa imo yam ken tempel Na, mliam am ma m vaa a Na la nyôr ken ato Na.’—Ps. 18:6.

‘TER ngu ikua a mba asema a vihin ve la, yem mba ve lu a ishima i zamber yô.’—Ps. 34:18.

‘TER [Yehova] ka A sôr mba asema a vihi ve tsung la, A kange ve avav.’—Ps. 147:3.

[Foto u sha peeji 17]

“Kwaghôron u a gbe sha shighe vough yô” una fatyô u nan ishimasurun sha iyange i ican!