Zua A Averen Sha Ikyev I Tor U Jijingi U Aôndo A Hemen Un la!

“Jijingi u TER Una lu sha a Na.”—YES. 11:2.

1. Mbagenev pase ishimanyian ve sha kwagh u mbamzeyol mba tar ne ér nyi?

 OR U timen sha akaa a sha kwavaôndo ugen, mba yer un ér Stephen Hawking, yange pine ken inyom 2006 la ér: “Ken tar u ayôôso a patii a dumbur, aeren a ior kpaa a lu vihin seer a seer shi ior ve lu vihin uikyasen vev ne nahan, tar ne shi ua fatyô u tsan kuman anyom 100 je he?” Ngeren ugen ken magazin u i yer ér New Statesman la kaa ér: “Se kan shio u been a ican i yan shin van a bem sha tar. Se gema se va a va ican man ityav. U ngu wer se tema a tema ga. Se nôngo se er hanma kwagh u se fetyô cii. Se kar ugomoti kposo kposo, hii sha gomoti u tyemimôngo zan zan gomoti u i lu ior ve nengen sha kpenga u eren ayol a ve la, shi se suur sha Mzough u Ityar Sha Won Cii u i yilan ér League of Nations la ser a yange ityav shi se ombo ikyav mbi utyaav kpishi ser se yange ityav a mi. Se nôngo ‘ityav sha u se bee a ityav mbi nôngon’ kpishi gande u se na jighjigh ser, se fa er se er ve se bee a ityav yô.”

2. Ica a gba ga tsô Yehova una tese ér un ngu a ian i hemen tar ne nena?

² Mba ve civir Yehova yô, mkaanem mara kpiligh ve iyol ga. Bibilo kaa a vese ér i gba uumace sha u ve hemen ayol a ve ga. (Yer. 10:23) Ka Yehova tswen a lu ian i lun Tor wase u Hembancii ye. Sha nahan yô, ngu a ian i wan se atindi shi pasen se awashima u i gbe u se lu a mi ken uma wase la, shi tesen se er se kure awashima shon yô. Heela tseegh ga, ica a gba ga tsô una yar tom a tahav mbu a lu a mi la una kar a iniôngon i uumace ve nenge kpoghuloo ér vea hemen ayol a ve kpa ve kercio ga la kera. Heela tseegh ga, mba ve vende hemen na u sha tindi ve ve gem ve ne uumace ve ze hemen u lun ikpan i isholibo man myen man Satan Diabolo, u a lu “aôndo u tar u ainge ne” la cii, una tim ve kera purututu.—2 Kor. 4:4.

3. Yesaia yange tsenga ôron nyi sha kwagh u Mesiyaa?

³ Yehova una va hemen uumace sha dooshima ken tar u he, u Paradiso la sha ikyev i Tartor u Mesiya. (Dan. 7:13, 14) Yesaia yange tsengaôron kwagh u Tor u Tartor la ér: “Iceren una tser sha ikpughur u Yese, gbaa una due ken amise na, una ume atam je; Jijingi u TER Una lu sha a Na, ka Jijingi u kwaghfan man u mkav, Jijingi u wasen henen kwagh man u ageegh, Jijingi u mfe man u cian TER.” (Yes. 11:1, 2) Ka sha igbenda i nyi nahan Aôndo a yar tom a icighan jijingi na sha u wasen Yesu Kristu, ua lu ‘iceren i i tser sha ikpughur u Yese’ la, ér a kuma u hemen uumacee? Mtemtor na una va a averen a nyi? Man kanyi i gbe u se er ve se zua a averen shono?

Aôndo Wase Yesu Kuma u Hemen

4-6. Ka mfe u hange hange u nyi una wase Yesu u eren tom sha kwaghfan shi lun Tor u zungwen mhôônom man Pristi u Tamen man Orjiri?

⁴ Yehova soo ér uumace mba ve lumun hemen na la ve vese ve ar sha mlu u vough sha ikyev i un u a lu u Tor man Zegepristi man Orjir, u a lu a kwaghfan u mimi shi a zungu mhôônom la. Ka nahan ve Aôndo tsua Yesu Kristu, u lu icighan jijingi na un kuma u eren ityom i i hembe lun hange hange cii la ye.  Time ase sha atôakyaa agen a a ne ve i lu u Yesu una kure ityom i Aôndo a ne un la tsembelee yô.

⁵ Yesu hemba fan kwagh u Aôndo a hanmaor cii. Or môm kpa ngu u nan fe Ter ica i gbe er Wan u môm-môm nahan ga. Alaghga a fa Ter kuma anyom u biliôn imôngo je. Hen shighe la, Yesu fa kwagh u Yehova tsema tsema je i pase kwagh na ér ngu “ibeen i Aôndo u i nengen a Na ga la.” (Kol. 1:15) Yesu iyol na kaa ér: “U nan nenge a Mo yô, nan nenge a Ter je ve.”—Yoh. 14:9.

⁶ Dugh Yehova sha yô, or môm fa kwagh u akaa a i gbe a la cii, kua uumace kpaa tsembelee er Yesu nahan ga. Mbakolose 1:16, 17 kaa ér: “Ka ken a Na man i gbe akaa cii ye, a a lu Sha, man a a lu shin tar kpaa, a i nengen a mi la kua a i nengen a mi ga la kpaa . . . Un vande a akaa cii man ka ken Na a lu zan hemen her ye.” Hen ase sha kwagh ne yôô! Er Yesu lu “or u fan tom” u̱ Aôndo yô, yange wase u gban akaa agen cii. Sha nahan yô, a fa hanma ivurugh ki kwagh sha kwagh u sha man u shin tar, hii sha avur a kwagh u hemban veghem sha won cii u i yer ér atom la zan zan ar sha mhirinim ma orumace ma ma kpilighyol yum la. Sha kpôô yô, ka Yesu jighilii a lu kwaghfan ye!—Anz. 8:12, 22, 30, 31.

7, 8. Icighan jijingi u Aôndo yange wase Yesu ken tom na nena?

⁷ Yange i shighe Yesu mkurem sha icighan jijingi u Aôndo. Yesu kaa ér: “Jijingi u Ter ngu sha a Mo, sha ci u A shighem mkurem, A tindim er M̱ yôô Loho u Dedoo hen mbaatsanev, M̱ yôô, i̱ pase mbakwarev, i̱ tuhwa, i̱ bugh mbaapirashe ashe, man M̱ pase mba i nzughul a ve ve gbe caver yô, M̱ tuhwa, shi M̱ yôô inyom i erdoo u Ter.” (Luka 4:18, 19) Ashi nan kpa, yange mba eren Yesu batisema yô, icighan jijingi wase un u umbur akaa a a hen shighe u lu sha la, kua tom u Mesiya u Aôndo soo ér a er shin tar la kpaa.—Ôr Yesaia 42:1; Luka 3:21, 22; Yohane 12:50.

⁸ Er icighan jijingi na Yesu tahav shi a lu or u vough sha iyol man ken ishima yô, lu or u hemban sha won cii, u lu uma shin tar la tseegh ga, kpa shi lu Ortesen u Hembancii. Sha kpôô yô, mba ve kegh ato a Yesu cii ‘kpiligh ve iyol a ityesen na.’ (Mat. 7:28) Kwagh môm u na ve Yesu hemba sha won cii yô, yange fa akaa a vesen aa na ve uumace ve nyer ken mbamzeyol la, akaa shon yô, ka isholibo man myen man mfe u ve fa Aôndo ga la. Shi yange fa asema a ior, nahan a er kwagh a ve sha mlu ve vough.—Mat. 9:4; Yoh. 1:47.

9. Aluer u gbidye kwar sha akaa a yange er Yesu shin tar la yô, vangertiôr u ú lu a mi ken a na wer ngu Tor la una taver nena?

⁹ Yesu lu orumace shin tar ne. Akaa a yange er Yesu shighe u lu orumace la man mlu u lu kôôsôô vea ior mba yinan la wase un kpishi kuma u lun Tor. Apostoli Paulu nger wener: “Lu u i̱ er [Yesu] A̱ lu kwagh môm a anmgbianev Nav sha akaa cii keng sha u Una hingir zegepristi u zungwen mhôônom man u jighjigh kpaa sha akaa a Aôndo, sha u Una na iwom sha ci u asorabo a ior [yô]. Un iyol Na ican er Un, sha imeen i i lu meen Un la, ka sha ci u nahan man A fetyô u wasen mba i lu meen ve la ye.” (Heb. 2:17, 18) Er ican er Yesu sha “imeen” i í mee un la yô, una fatyô u zungwen mba ve lu yan ican la mhôônom. Mhôônom ma Yesu  mara yange ma due ken igbar shighe u lu eren tom na shin tar ne la. Mbauangev man mbaawanev kua mbaatsanev man mbayev je kpa yange taver ve u van ikyua a na ga. (Mar. 5:22-24, 38-42; 10:14-16) Mbaasemaleghlegh man mba sar ve tsung u fan kwagh u Aôndo la kpa sôsom a na. Kpa, mba moron iyol man mba nengen ér ve hemba gban kwagh a mbagenev kua mba ve lu a ‘dooshima u Aôndo ga’ yô, gema venda un shi kôr un ihyom shi hendan kwagh a na.—Yoh. 5:40-42; 11:47-53.

10. Ka sha gbenda u vesen u nyi nahan Yesu yange tese ér un ngu a dooshima sha a vese?

¹⁰ Yesu na uma na sha ci wase. Alaghga kwagh u hemban cii ua tese ér Yesu kuma u lun Tor yô, lu mlumun u a lumun u va kpen sha ci wase la. (Ôr Pasalmi 40:6-10.) Yesu kaa ér: “Or ngu a dooshima u a hembe ngun ga, je u or nana gbihi uma u nan sha ci u akar a nan” la. (Yoh. 15:13) Er ashighe kpishi uumace mba ve tem tor ka ve lu ken mkpeyol sha iusa i mba ve tem tor sha a ve la nahan kpa, Yesu yô er nahan ga, a na uma na jighilii sha ci u uumace.—Mat. 20:28.

I Na Un Tahav sha u a Va a Mbamtsera mba Nagh Ku Ipaan

11. Er Yesu a lu Oryiman wase yô, se fatyô u lun a vangertiôr ken a na sha ci u nyi?

¹¹ Doo kpishi er i lu Yesu, u a lu Pristi u Tamen la, una hemen sha u van a mbamtsera mba nagh ku ipaan kura sha ci wase nahan! Nahan er Yesu a lu Oryiman wase yô, kwagh u yange er shighe u lu eren tom na shin tar la lu ikyav i kwagh u una er sha shighe u hemen na u anyom dubu la, man aluer se tile sha mimi yô, se fatyô u zuan a mtsera sha kwagh u una er la. Yange bee ior angev shi bee mbaawanev awan a ve shi nder mbakpenev shi koso ikpelaior, shi ahumbe man zegemnger je kpa a yange ve, ve huan ving. (Mat. 8:26; 14:14-21; Luka 7:14, 15) Heela tseegh ga, yange er akaa ne sha u tesen ior tahav nav ga, kpa a er a sha u tesen mhôônom nam ma zungwen man dooshima na. Yange kaa a orimande ugen u zamber a na ér a wanger un yô, ér “M lumun.” (Mar. 1:40, 41) Yesu una tese imba mhôônom ma zungwen mara sha anyom dubu a hemen na la, kpa una er kwagh ne sha tar cii.

12. Mkaanem ma Yesaia 11:9 mara ma a kure nena?

¹² Shi Kristu man mba vea hemen vea na la vea za hemen u eren tom u tesen ior kwagh u Aôndo, ú Yesu hii anyom 2,000 ken ijime la. Vea nguren eren kwagh ne yô, mkaanem ma Yesaia 11:9 mara ma a kure. Ma kaa ér: “Tar ua mgbough a mfe u TER er mngerem ma ngee shin zegemnger nahan.” Ityesen i Aôndo la ia wa u tesen ior er vea nenge sha tar ne man sha akaa agen kpishi a i gbe sha tar la, er i kaa a Adam ér a er sha hiihii la nahan. Anyom dubu la aa been yô, awashima u Aôndo u i nger ken  Genese 1:28 la una kure, shi mbamtsera mba nagh ku ipaan la kpa a zua a mi cii.

I Na Un Tahav Mbu Ôron Ijir

13. Yesu yange tese ér perapera doo un ishima nena?

¹³ Ka Kristu ‘Aôndo a ver Orjir u mbaumav man mbakpenev’ ye. (Aer. 10:42) Ka kwagh u doon kpen kpen er se fe ser Yesu ngu wang, shi perapera man mimi ve lu un er kwange u kange hen uya nahan! (Yes. 11:5) Yange kôr hua u eren man atseregh kua aferakaa agen ihyom, shi a puu mba kwagh cuku gba ve sha ican i mbagenev ga la. (Mat. 23:1-8, 25-28; Mar. 3:5) Heela tseegh ga, Yesu tese ér or nana fatyô u tsughun un sha mluashe u nan ga, “gadia Un iyol Na A fa kwagh u a lu ken or yô.”—Yoh. 2:25.

14. Ka sha nyi gbenda Yesu a lu tesen ér perapera kua ijirôron i mimi doo un ishima hegene, man ka mbampin mba nyi i doo u se pine ayol a ase?

¹⁴ Yesu za hemen u tesen ér perapera kua ijirôron i mimi doo un ishima sha u veren ishima sha tom u pasen ior kwagh shi tesen ve kwagh u Aôndo, u i gbe tar je i lu a vande eren ga yô. Ma or shin ma gomoti u uumace shin ma jijingi u bo una fatyô u yangen tom ne u zan kuren er Aôndo a soo la ga. Sha nahan yô, se fatyô u lun a vangertiôr ser Armagedon una karen sha yô, ijirôron i Aôndo i mimi la ia lu gbem sha won. (Ôr Yesaia 11:4; Mat. 16:27.) Pine iyol you wer: ‘M nengen ior er Yesu nengen ve la shighe u m dugh kwaghpasen kpa? Aluer angev shin mbamlu av mbagenev na m kera fetyô u eren tom er ma m er la ga je kpa, m ngu eren Yehova tom sha afatyô wam cii je he?’

15. Se umbur nyi ve a wase se u civir Aôndo a ishima i mômô?

¹⁵ Aluer se umbur ser tom u pasen kwagh ne ka tom u Aôndo yô, kwagh ne una wase se u civir un a ishima i môm. Ka un a kaa ér i er u ye; shi ka sha ikyev i Wan na a lu tesen er a er tom shon ye; shi ka sha icighan jijingi a ne mba ve lu eren tom shon la tahav kpaa ye. Ian i icivirigh i u lu a mi u shiren tom imôngo vea Aôndo kua Wan na u icighan jijingi a hemen la gba u kwagh kpa? Ka Yehova tseegh una fatyô u mgbeghan ior mba hemban miliôn utaankaruhar, mba kpishi ken a ve i nengen ve ér mba “ior mba fan takerada yum kpaa ga,” u za pasen ior loho u Tartor ken ityar 236 ye.—Aer. 4:13.

Zua Averen sha Ikyev i Kristu

16. Genese 22:18 tese nyi sha kwagh u iveren i Aôndoo?

¹⁶ Yehova yange kaa a Aberaham ér: “Akuraior a sha won cii aa zua a iveren ken tsombor wou, sha ci u, u we imo Yam ikyo yô.” (Gen. 22:18) Kwagh ne tese ér mba ve nenge mcivir u civir Aôndo shi nan Wan na icivir ér ka kwagh u injaa la vea fatyô u lun a vangertiôr ér vea va zua a averen a Vor u Mesiya u a va a mi la. Shi mba eren tom nyian kpoghuloo a averen ne ken ishima.

17, 18. Ka ityendezwa i Yehova i nyi i lu ken Duteronomi 28:2, man kwagh ne ngu se a inja nena?

¹⁷ Kwagen la, Yehova ôr kwagh a vor u Aberaham u sha marami, ka ikyurior i Iserael je la, ér: “Iveren ne cii [er i tese ken Tindi u Ikuryan la nahan] ia va sha a we, ia va kohol we, aluer wea ver ato sha imo i TER, Aôndo wou, yô.” (Dut. 28:2) Mba ve civir Aôndo nyian ne kpa kape kwagh ve a lu je la. Aluer u soo iveren i Yehova yô, “ver ato” sha imo na. Nahan iveren na “ia va kohol we.” Kpa u ‘veren ato’ la wa nyi man nyi kere?

¹⁸ U veren ato la wa u tôôn kwagh u i er ken Mkaanem ma Aôndo man kwaghyan u ken jijingi u a ne se la ser ka beerkwagh ga. (Mat. 24:45) Shi kwagh ne kua u ungwan imo i Aôndo man Wan na. Yesu kaa ér: ‘Ka hanma or u nana kaa a Mo er, Tere! Tere! man nana nyôr  sha tartor u Sha ga, saa u nan eren ishima i Terem u A lu Sha yô.’ (Mat. 7:21) Inja i u ungwan imo i Aôndo yô, ka u or wan iyol i nan sha ikyev i Tiônnongo u Kristu, u Aôndo a ver, a lu a mbatamen mba ve lu “uiyua” la.—Ef. 4:8.

19. Se er nan ve se zua a iverene?

¹⁹ Mbagenev ken ‘ior mba i ne ve lu uiyua’ la, mba Mbahemenev mba Shin Tine, mba ve lu ashe a tiônnongo u Kristu jimin cii la. (Aer. 15:2, 6) Sha mimi yô, gbenda u se eren kwagh a anmgbianev mba Kristu mba ken jijingi la ka kwagh u vesen u a va yar tom a mi u ôron se ijir shighe u zegecan la yô. (Mat. 25:34-40) Sha nahan yô, gbenda môm u se fatyô u zuan a iveren yô, ka sha u suen mba Aôndo a shigh ve mkurem la.

20. (a) Ka tom u vesen u nyi ‘ior mba i ne ve lu uiyua’ la ve lu a mini? (b) Se er nan ve se tese ser anmgbianev mban gba se kwagha?

²⁰ Shi ‘ior mba i ne ve lu uiyua’ la kua Ukômatii Mba Nengen sha Ubranci man Mbakuran mba Ningir Sha man mbatamen mba ken tiônnongo, mba ve cii i lu icighan jijingi a tsough ve la. (Aer. 20:28) Tom u vesen u anmgbianev mban ve lu a mi yô, ka u maan ior mba Aôndo “zan zan se cii sé va kuma sha mzough u ken jighjigh u nan, man mfe u fan Wan u Aôndo man sha mlu u igyandenor man ikyaren i mluyol u m-iv u Kristu la.” (Ef. 4:13) Ka mimi, ve yina er se cii se yen nahan. Nahan cii kpa, aluer se mba ungwan kwaghwan ve u sha dooshima la yô se fatyô u zuan a iveren.—Heb. 13:7, 17.

21. Er nan i hingir torough torough u se ungwa imo i Wan u Aôndoo?

²¹ Ica a gba ga tsô Kristu una tim botar u Satan ne kera. Hen shighe la, uuma asev vea lu sha ikyev i Yesu, sha ci u Aôndo na un tahav mbu hemen “zegeikpelaior” zan a i̱ hen “ambor a mngerem ma umam.” (Mpa. 7:9, 16, 17) Sha nahan yô, de se nôngo nen hegen sha afatyô wase cii se wa ayol a ase sha ikyev i Tor u jijingi u Yehova a hemen un la a iwuese man a mkighir shio.

Ú Hen Nyi ken . . .

• Yesaia 11:1-5?

• Marku 1:40, 41?

• Aerenakaa 10:42?

• Genese 22:18?

[Mbampin mba ngeren u henen]

[Foto u sha peeji 17]

Yesu yange tese wang ér un zungu mhôônom shighe u nder wan u Yairu u kwase shin ku la

[Ufoto u sha peeji 18]

Yesu Kristu ngu hemen tom u vesen u pasen kwagh u i gbe je i lu a vande eren ga yô