Mbampin Mba Mbaôron Takerada Ne Ve Pin La

Mose yange vihi ishima a Eleasar man Itamar, ônov mba Aron mba nomso mbara shighe u ku wua anngôôv vev, Nadabi man Abihu kera la sha ci u nyi, man yange i er nan ve ishima de u vihin unu?—Lev. 10:16-20.

Shighe u i ver nongo u pristi sha ci u tom u ken tabernakel la, Yehova wua ônov mba Aron mbanomso, Nadabi man Abihu sha ci u usu ugen kposo u ve nande nagh a mi sha ishigh Nagh la. (Lev. 10:1, 2) Mose yange kaa a ônov mba Aron mba ve shi her la ér ve de vaan ku u anngôôv vev ga. Kwagh ne er ica lu a gba ga maa ishima vihi Mose a Eleasar man Itamar sha ci u ve vende u yan kpev u nagh ku isholibo kura yô. (Lev. 9:3) Mose yange vihi ishima a ve sha ci u nyi?

Atindi a Yehova yange na Mose la tese ér pristi u nan ne nagh ku isholibo la nana ya ku hen tembe u tenti u kohol ker la. I nengen ieren ne ér pristi la nan ngu tôôn asorabo a mba ve ne nagh la sha ityough ki nan. Nahan kpa, yange a tôô awambe a nagh ku shon a nyôr a mi ken Icighan Ijiir, u lu kpar u hiihii u tempel la yô, i gba u a kera ya nagh ku shon ga, kpa a nande ku a nande.—Lev. 6:24-26, 30.

Ka inja er akaa a vihin tsung ne yange nga eren yô, Mose kav ér doo una ver ishima una nenge ér i kura atindi a Yehova cii nahan. Yange fe ér i nande kpev u i ne nagh ku isholibo a mi la yô, a pine Eleasar man Itamar sha ishimavihin er i hii ve ve ye kpev la er tindi tese la ga yô. A pine ve nahan sha ci u i vande zan a awambe a kpev la sha ishigh ki Yehova ken Icighan Ijiir ga.—Lev. 10:17, 18.

Aron na Mose mlumun sha mpin na la, sha ci u alaghga tsô ônov nav mba ve lu upristi mba ve shi her la ve er kwagh ne sha iniezwa na. Er i wua Aron ônov uhar yô, alaghga yange nenge ér ma pristi nana ya nagh ku isholibo kura sha iyange shon i môm yô, a lu shami ga. Adooga tsô a nenge ér u yan nagh ku shon la a doo Yehova ga, shin er isholibo i Nadabi man Abihu er la lu ibo i mba ve shi uma la jighilii ga nahan kpaa.—Lev. 10:19.

Hemban cii je yô, adooga Aron yange hen ér, er iyange la lu iyange i ônov nav hii eren tom u pristi yô, gba u vea ver ishima zulee sha er vea er kwagh u vihin Aôndo sha akaa a kiriki je kpaa ga yô. Nahan kpa, Nadabi man Abihu hôngor a iti i Aôndo, nahan iyugh i Aôndo sen sha a ve. Nahan, alaghga Aron yange hen ér ken tsombor u ior ve er imba isholibo ne yô, gba u vea kera ya icighan nagh ga.

Alaghga mlumun u anmgbian u Mose na un ne, kuma un ken ato, sha ci u ngeren la kure nahan ér: “Mose ongo nahan yô, doo un.” (Lev. 10:20) Alaghga tsô, Yehova kpa mlumun u Aron na la doo un.