U Ngu Wuese Averen Ou sha Mimi Kpa?

ER I due a ônov mba Iserael ken Igipiti, ken kpan kera sha ivande yô, doo ve sha hiihii la kpishi, er yange ve hingir u civir Yehova sha tseeneke ve yô. (Eks. 14:29–15:1, 20, 21) Nahan kpa, ica i gba ga cii tsô maa, mnenge ve la gema. Ve hii u gban ahon sha kwagh u mlu u ve nyôr ker la. Sha ci u nyi? Sha ci u ve lu hemban henen sha mbamtaver mba ve tagher a mi sha u tsan ken taaikyôngo la, ve kera nenge a kwagh u Yehova er sha ci ve la ga. Ve kaa a Mose ér: “Ka nyi ne dugh a vese ken Igipiti ner, sé va kpe ken deserti nahana? Gadia kwaghyan kpaa ngu ga, mngerem kpaa ma ga; kwaghyan u injaa ga ne [mana], due se ishima.”—Num. 21:5.

Anyom nga karen uderi imôngo yô, Tor Davidi, u ken tar u Iserael u tsuaa la wa icam ér: “Mo yô, m suur sha erdoo Wou; ishima yam ia ember myom Wou. Me wa icam i wuese TER, gadia A er a mo doo kpishi je.” (Ps. 13:5, 6) Davidi yange hungur a erdoo u Yehova tese un sha igbenda kposo kposo la ga. Kpa hanma shighe yô, a shi henen sha erdoo u Yehova tese un kpishi la. (Ps. 103:2) Se kpa Yehova er a vese doo, nahan doo u se nenge ser kwagh u a er sha ci wase la ka beer kwagh ga. Sha nahan yô, de se nenge nen averen a Aôndo agen, a se zough a mi nyian yô.

‘Yehova Ngu a Mba Ve Cie Un Yô’

Orpasalmi wa icam ér: “TER ngu a mba ve cie Un yô.” (Ps. 25:14) Ikyar i uumace mba yinan ve ye a Yehova kôôsôô la ka kwagh u civirigh kpen kpen! Nahan kpa, aluer se tume ityough eren ityom yase i ayange ayange la je se mba kera tôôn shighe eren msen ga ye? Hen er kwagh a lu nahan ve, ikyar i dedoo i se ye a Yehova la ia lu la. Er Yehova a lu ijende yase yô, a soo ér se suur sha a na shi se pase un kwagh u a lu se ken ishima la ken msen, se ôr un akaa a se lu a mciem sha mi la man asaren  a ase kua akaa a nyian se ishima la kpaa. (Anz. 3:5, 6; Fil. 4:6, 7) Nahan doo u se hen sha gbenda u se eren mbamsen asev la ga he?

Zum u gumor ugen, u a lu Orshiada, i yer un ér Paul, hen sha mbamsen nav yô, a kav er i gbe u una seer fan u eren msen sha inja yô. * A kaa ér, “Yange mea eren msen hen Yehova yô, m zer kimbir akaa a m ôron ken msen la gbem.” Er Paul tôv sha itinekwagh i msen la ken takerada u i yer ér Watch Tower Publications Index la yô, a fa er i nger mbamsen ken Bibilo i kom er 180 nahan yô. Man ken mbamsen mban, mbacivir Yehova mba sha ashighe a tsuaa la pase mbamhen mba ken atô u asema a ve. Paul kaa ér: “Er m gbidye kwar sha amba a msen a i nger ken Ruamabera la yô, m fa u eren msen ôron akaa a m lu a mi ken ishima la jighilii. Kwagh ne wasem u pasen Yehova ishima yam. Hegen ka i saan mo iyol kpishi u kporom ikyua a na ken msen.”

“Kwaghyan sha Ashighe Ashighe”

Iveren igen i se zough a mi hen Yehova yô, ka akaa a mimi a se hen ken Ruamabera kpishi la. Er se ye kwaghyan u ken jijingi u a ngee kpishi yum ne yô, ka se ‘wa icam sha ci u iember i ken ishima.’ (Yes. 65:13, 14) Nahan kpa, gba u se lumun ser akaabo a mbagenev ve eren la a na se gba uwer sha kwagh u mimi ga. U tesen ikyav yô, aluer se mba ungwan akaa a mbavendan mimi ve ôron sha avese bagenaa la yô, kwagh la una bende a mhen wase shi una na yô, se kera nenge a iwasen i “kwaghyan” u ken jijingi u “sha ashighe ashighe,” u Yehova a ne se sha ikyev i “wanakiriki u jighjigh man u fan kwagh” la ga.—Mat. 24:45-47.

Mhen u mbavendan mimi yange tsume a orgen u civir Yehova anyom imôngo yô, iti na ér André, man kwagh u er un ne lu kwagh u vihin tsung. Yange nenge ér, aluer un gba ashe hen ijiir i mbavendan mimi, i sha Intanet la kpase yô, kwaghbo una due ker ga. A kaa ér: “Sha hiihii la, lu akaa a mbavendan mimi senge ér ka a mimi, a ve ôron kwagh u a la yange meem ye. Yange mea hide mea gbidye kwar sha alam a ve la dông yô, m hemba nengen mer m ngu a ishô sha u undun nongo u Yehova cii. Kpa, er m va tôv sha akaa a mbavendan mimi waan Mbashiada mba Yehova iyol la yô, m hingir u kaven er mbatesen mba aiev ve lu mbawan atseregh yô. Yange i lu mkaanem ma ve kav inja i ma tsembelee ga la, ma hingir ve ‘Ityôkyaa i vesen’ i wan se ikyaa iyol ye. Tsô m hide m gba ôron ityakerada yase shi zan mbamkombo. Ica gba ga tsô, m kav er kwagh a saam veseghee yô.” Kwagh ka a er i doo yô, André yange hide ken tiônnongo.

‘Mzough u Anmgbianev Cii’

Mzough wase u anmgbianev, u lun a dooshima la, ka iveren i Yehova a ne se yô. (Ps. 133:1) Lu sha ityôkyaa injaa ne man apostoli Peteru yange nger mkaanem man ye. A kaa ér: ‘Anmgbianev cii ve̱ doo ne ishima.’ (1 Pet. 2:17) Er se lu ken mzough u anmgbianev u Mbakristu yô, se mba zuan a iwasen i mbananjighjigh a vese imôngo, mba ve lu er ka  uter man ungô man anmgbianev mba nomso man mba kasev nahan la.—Mark 10:29, 30.

Nahan kpa, ashighe agen akaa kposo kposo aa fatyô u van a mzeyol hen atô wase vea anmgbianev asev mba nomso man mba kasev. U tesen ikyav yô, ka i lu ican ga u vihin ishima sha mbamyen mba orgen shi hunan hanma kwagh u nan er cii. Aluer kwagh ngu nahan yô, doo u se umbur er mbacivir Yehova ve lu a mbamyen vev nahan cii kpa, ve doo un ishima ga he? Heela tseegh ga, “aluer se kaa ser, se mba a isholibo ga yô, se mba tsughun ayol a ase tsô, mimi yô, ngu ken a vese ga.” (1 Yoh. 1:8) Nahan doo u se nôngo kpoghuloo se ‘waan nen ishima a ayol a ase, se deen nen ayol a ase kwaghbo’ ga he?—Kol. 3:13.

Gumkwase ugen, iti ne ér Ann, yange kav mluainja u mzough u anmgbianev la shighe u kwagh er un u vihin la. Yange er imba kwagh u wan u yange undu ter na ken injakwagh i Yesu kpa er la, a undu tiônnongo u Kristu. Shighe kar yô, a kav ibumegh nagh, nahan a cin a hide ken mimi. (Luka 15:11-24) Ann yange hen nyi sha kwagh u er un laa? A kaa ér: “Er m hidi ken nongo u Yehova hegen ne, anmgbian av mba nomso man mbakasev cii gbam kwagh, shin er ve lu a mbamyen nahan kpaa. Ken ashighe a karen la, yange m ngôôr hunan kwagh ve ga. Kpa hegen yô, m kange ishima mer, me de ma kwagh a yangem averen a m lu zuan a mi hen mbananjighjigh a vese imôngo la ga. Kwaghmôm kpa ngu ken tar, u se undu paradiso wase u ken jijingi se yem keren ga.”

Wuese Averen a Ou Hanma Shighe Cii

Ishimaverenkeghen i se lu a mi ser Tartor u Aôndo ua kar a mbamzeyol mba uumace kera la ka kwagh u injaa je gande. Shighe u se zua a ishimaverenkeghen ne hiihii la, yange se wuese i kpen kpen! Yange lu se er or u teen kasua u ken injakwagh i Yesu, u yange ‘zua a tagbede môm u lun ishe kpishi ve yem za tee akaa a a lu a mi la cii, za yam un’ la nahan. (Mat. 13:45, 46) Yesu kaa ér mayange or u teen kasua la de u tesen iwuese sha tagbede la ga. Se kpa, mayange se de nen u tesen iwuese sha ishimaverenkeghen yase i injaa la ga.—1 Tes. 5:8; Heb. 6:19.

Nenge ase ikyav i Jean, kwase ugen u a civir Yehova i hembe anyom 60 hegen yô. A kaa ér: “Kwagh u a wesem u lun a ishimaverenkeghen i Tartor u Aôndo ken ishima gbem yô, ka u ôron mbagenev kwagh u ú. Ka mea nenge a msaanyol ken a ve shighe u ve kav kwagh u Tartor u Aôndo u lu yô, ishima i taver mo. Ka mea nenge mimi u Tartor una gema uma u orhenen Bibilo nahan, m kaa ken ishima yam mer, ‘Nenge m fe akaa a mimi a kpilighyol, u me wase mbagenev a mi sha wono!’”

Se mba a atôakyaa a injaa a wuese averen a ken jijingi, a se zough a mi mgbeghaa la. Er se lu tagher a atsan kpishi, er ahendan man angev man iyolbeen man iuren man ican i inyar shi se zungwen ku u mbadoon se ishima nahan kpa, se fa ser akaa ne cii a saa eren se gbem ga. Ken Tartor u Aôndo la, se va zua a averen agen, a seer sha averen a se vande lun a mi ne. Hanma ican i se lu yan hegen cii, a va kar a i kera ken tar u he la.—Mpa. 21:4.

Er se lu keghen tar u he ne, de se tese nen iwuese sha averen a ken jijingi a se zough a mi la, shi se lu a iwuese vough er orpasalmi u yange wa icam ne la nahan. A kaa ér: “TERE, Aôndo wam, U er akaa a Ou a kpilighyol ngee kua mbamhen Ou mba sha a vese la kpaa; kwagh u á kar un sha a We yô, kera ngu ga. Shin er i sarem u pasen ve, ôron kwagh ve nahan kpaa, ve ngee gande u ôron.”—Ps. 40:5.

[Ngeren u shin kpe]

[Foto u sha peeji 18]

Se mba zough a iwasen i ken jijingi shighe u se nyer ken ican yô