Ngohol Jijingi U Aôndo, I De Lu Jijingi U Taregh ga
Ngohol Jijingi U Aôndo, I De Lu Jijingi U Taregh ga
“Kpa se yô, ka jijingi u taregh se ngohol ga, kpa ka jijingi u A dugh her Aôndo la, sha u se̱ fa akaa a Aôndo A ne se sha mhôôn yô.”—1 KOR. 2:12.
1, 2. (a) Ka sha nyi gbenda Mbakristu mba mimi ve lu ken utya? (b) Ka mbampin mba nyi se time sha mini?
MBAKRISTU mba mimi mba ken utya! Orihyom wase ngu a tahav kpishi shi a wa atseregh shi a fa ityav mbi nôngon vian un. Ngu a ityumugh ki ki hongo a uumace kpishi yô. Kpa ityôkyaa ngi i se tôô ser ikyaa hemba se shin se mba a agee shio ga. (Yes. 41:10) Se mba a kwagh u una fatyô u kuran se sha nyityô num u i te sha a vese cii yô.
2 Ityav mbi se lu nôngon la ka mbi sha iyol ga, kpa ka mbi ken jijingi. Orihyom wase ka Satan Diabolo, man ityumugh nagh ki vesen ki a nenge ityav a mi yô, ka “jijingi u taregh.” (1 Kor. 2:12) Kwagh u vesen u a kor se shighe u a te num sha a vese yô, ka jijingi u Aôndo. Aluer se soo u waren ityav mbin shi taver ken jijingi her yô, a gba u se sôn jijingi u Aôndo shi se ume ityamegh nagh ken uuma asev. (Gal. 5:22, 23) Kpa kanyi i lu jijingi u taregha, man er nan ve a samber wuee yum nahana? Se er nan ve se fa aluer jijingi u taregh ngu hemen se yôô? Man kanyi se fatyô u henen hen Yesu sha kwagh u ngohol jijingi u Aôndo man u hendan a jijingi u taregha?
Er Nan Ve Jijingi u Taregh a Samber Wuee Yum Nahana?
3. Kanyi i lu jijingi u taregha?
3 Jijingi u taregh due hen Satan, u a lu “tor u tar ne” la, man ngu hendan a jijingi u Aôndo. (Yoh. 12:31; 14:30; 1 Yoh. 5:19) Ka mhen u taregh u ka a mgbegha ior u eren kwagh la. Tahav mbun ka mbu tuur uumace ve hingir u eren kwagh kposo a awashima u Aôndo.
4, 5. Er nan ve jijingi u Satan a samber a mi la a hingir wuee yum nahana?
4 Er nan ve jijingi u Satan a samber a mi la a hingir wuee yum nahana? Hiihii yô, Satan yange tsugh Ifa ken sule u Eden. A kaa a Ifa ér una undu Aôndo una lu sha tseeneke na yô, a hemba kpen un iyol, Ifa kpa na un jighjigh. (Gen. 3:13) Ungwa imba aie u Satan er la sha wono! (Yoh. 8:44) Maa a tsugh kwase la sha er una mee nom na kpa a hemba Yehova ato yô. Er Adam hemba ato yô, i tee uumace cii ken isholibo, isharen i kpeegh i dondon jijingi u ihyembeato la maa hingir dyako ve.—Ôr Mbaefese 2:1-3.
5 Satan shi tsugh mbatyomov mbagenev kpishi, nahan ve hingir azôv. (Mpa. 12:3, 4) Mbatyomov mban venda Aôndo shighe wa karen kpuaa cii man Mngerem ma Deemee ma sha ayange a Noa mara va ye. Mbatyomov mbara yange ve na jighjigh ér aluer ve undu aan a i ver ve sha mi sha la, ve yem zendan asaren a ve a sha gbaaôndo ga la shin tar yô, a hemba kpen ve iyol. (Yuda 6) Satan ngu “tsughun tar cii” sha iwasen i azôv, a a kera lu ken iyol i orumace hegen ga la. (Mpa. 12:9) Kpa kwagh er vihi yô, uumace kpishi fa tahav mbu azôv a lu a mi la ga.—2 Kor. 4:4.
Jijingi u Taregh Ngu Hemen Wee?
6. Kanyi tseegh ia na ve jijingi u taregh una hemen se?
6 Ior kpishi fa gbenda u Satan a tsughun ior la ga, kpa se Mbakristu yô se lan ayom a na ga. (2 Kor. 2:11) Jighilii yô, jijingi u taregh una fatyô u hemen se ga, saa se na un ian. De se time nen sha mbampin unyiin mba vea wase se u fan aluer ka jijingi u Aôndo a lu hemen se shin ka jijingi u taregh yô.
7. Ka sha gbenda môm u nyi Satan a nôngon ér una pav se a Yehova?
7 Iemberyolough i m eren la tese ér kanyi i doom ishima? (Ôr Yakobu 3:14-18.) Satan nôngon ér una pav se a Aôndo sha u meen se ér se soo ipila. Satan fa er Yehova a ker or u ipila i doo nan ishima ihyom yô. (Ps. 11:5) Sha nahan yô, Satan ka a nôngon ér una iv se a asaren a iyolough sha ityakerada man ufiim man ityogholough man anumbe a sha kômputa; man anumbe ne agen ka a na i gba u mbaeren a vea er kwagh u tesen ér ve wa idya kpoghuloo shi ve wa tswam kpa kpoghuloo. Aluer kwagh u dedoo doo se ishima, kpa er kwaghbo kpa a doo se ishima je, kuma Satan.—Ps. 97:10.
8, 9. Ka mbampin mba nyi i doo u se pine ayol a ase sha kwagh u iemberyolougho?
8 Kpa Jijingi u Aôndo yô, ka a na mba ve ngohol un la ve lu wang shi ve lu ior mba eren kwagh ken bem man mba lun a mhôônom ma zungwen wuee. Nahan doo u se pine ayol a ase ser, ‘Iemberyolough i í doon mo la ngi wasen mo u lun a aeren a dedoo je he?’ Kwaghfan u a dugh sha la ka ‘u imangeregh ga.’ Mba jijingi u Aôndo a hemen ve la mba pasen mbawanndor a ve kwagh u mlu u wang man bem tseegh, tsô ka gem ka saan ve iyol u hiden za yeren ken ayou a ve nengen ipila man idya i eren sha televishen ga.
9 Yehova soo ér se civir un tswen. Kpa Satan yô, sea gure a gure inya tseegh sha u tesen ser se civir un kpa a kuma un je. (Luke 4:7, 8) Sha nahan yô, se fatyô u pinen ayol a ase ser: ‘Iemberyolough i í doon mo la ngi wasen mo u civir Aôndo tseegh kpa? Iemberyolough ne ka i na i hemba taver mo u hendan a jijingi u taregh shin ka i na i hemba lun mo ican ga u hendan a mini? Gba u ken hemen yô, me va de iemberyolough i m eren laa?’
10, 11. (a) Jijingi u taregh mgbeghan ior u nengen uyôughyôughmbaakaav nena? (b) Mkaanem ma jijingi u Aôndo a ne i nger la ma wasen se u lun a ieren i nyi?
10 M nengen uyôughyôughmbaakaav nena? (Ôr Luka 18:24-30.) Jijingi u taregh kenden a “isharen i ashee” ken ior sha u mgbeghan ve u eren hua shi zendan uyôughyôughmbaakaav ityô. (1 Yoh. 2:16) Jijingi u taregh ne wa isharen i lun mbanyarev la ken ior kpishi. (1 Tim. 6:9, 10) Jijingi la soo ér se na jighjigh ser aluer se ngee a akaa kpishi yô, kwagh la una hingir mkor hen a vese. (Anz. 18:11) Nahan kpa, aluer se de inyaregh kar hemba doon se ishima a Aôndo yô, Satan una hemba se ityav. Doo u se pine ayol a ase ser, ‘Uma wam hemba haren sha u keren akaa a van a msaanyol man mkpeyoloo?’
11 Mkaanem ma Jijingi u Aôndo a ne i nger la yô, ma er jijingi u taregh nahan ga, sha ci u ma taver se ishima ér se lu a isharen i lun mbanyarev ga, kpa ér se eren tom taveraa sha er se kure ugbayol asev man mba tsombor wase yô. (1 Tim. 5:8) Jijingi u Aôndo wasen ior mba ve ngohol un la u dondon Yehova sha u nan mbagenev kwagh mgbeghaa. Amba la i fa ve ér mba ne a na kwagh, mba ngohol a ngohol kwagh ga. Ior hemba gban ve kwagh a akaa a ve lu a mi la, nahan shighe u ve fetyô yô, ka ve pande akaa shon ve na mbagenev saan saan. (Anz. 3:27, 28) Shi mayange mba lumun ér inyaregh ki keren ki hemba gban ve kwagh a mcivir u ve civir Aôndo la ga.
12, 13. Er jijingi u Aôndo a lu kposo a jijingi u taregh yô, una fatyô u wasen se u lun a aeren a dedoo nena?
12 Ieren yam tese ér ka hanma jijingi a lu hemen mo? (Ôr Mbakolose 3:8-10, 13.) Jijingi u taregh samber a aeren a iyolough. (Gal. 5:19-21) Shighe u se fa jijingi u a lu hemen se jighilii yô, ka zum u akaa a lu zan vough la ga, kpa ka zum u akaa a lu zan vough ga la, er shighe u se sugh ma anmgbian u ken Kristu kpa nan ongo se ato shin nan hii se iyongo shin nan er se ma isholibo je kpaa la. Shi shighe u se lu ken ayou a ase se tseegh la kpa, jijingi u a hemen se la una due ken igbar. A doo u se tôv ayol a ase sha gbaa ne. Pine iyol you wer, ‘Ken iwer ataratar i i kar ne, m hemba eren kwagh sha inja i Orkristu shin m hide m gba ken aeren man alam a dang-na?’
13 Jijingi u Aôndo una wase se se “dugh tseor kua aeren a na la kera,” se gema se “haa orhe iyol.” Kwagh ne una wase se se hemba lun a erdoo man dooshima. Se hemba keghen iyol u den ayol a ase kwaghbo, aluer a hii se iyôngo sha ishô yase je kpaa. Shi zum u se nenge ser i er se kwaghbo yô, se kera er kwagh sha “ishima i yuan man ishima i nyoon man iyugh man u zôhôn genger genger man ityuhwanev” ga. Kpa se nôngo kpoghuloo se hingir “mba mhôônom ma ker ve” tsung yô.—Ef. 4:31, 32.
14. Ior kpishi ken tar ne mba nengen Mkaanem ma Aôndo nena?
14 Atindiakaa a Bibilo a sha kwagh u aeren a wang la doom ishima shi m ne a icivir kpa? (Ôr Anzaakaa 3:5, 6.) Jijingi u taregh ne ior mba hendan a Mkaanem ma Aôndo. Mba jijingi ne a hemen ve yô, ka ve nôngor avegher a Bibilo a ve nenge ér a zua sha asaren a ve ga la kera, ve gema ve hemba soon aeren a uter man kwaghfan u taregh. (2 Tim. 4:3, 4) Mbagenev wa a wa Mkaanem ma Aôndo ikyo ga kuaa. Ambaaior la nga nengen ayol a ve ér ve mba mbafankwagh, nahan mba nyiman ér Bibilo ngi a inja ga, shi kwaghôron u i̱ kpa ka u vough ga. Mba kenger atindiakaa a ker la ashe ashe, nahan ve nyôr iyol ken idya i eren man ieren i nomsoor yaven a nomsoor man kwase yaven a kwase la kua ivaa paven kpaa. Mba tesen ér ‘ifer ka kwagh u dedoo, man kwagh u dedoo ka ifer.’ (Yes. 5:20) Jijingi ne bende a vesee? Shighe u se lu tagher a uzayol yô, se mba suur sha kwaghfan u orumace kua mbamhen asevaa? Shin se mba nôngon u dondon kwaghwan u Bibiloo?
15. Gba u se suur sha kwaghfan wase ga, kpa se er nena?
15 Jijingi u Aôndo ka a wase se u lun a icivir sha Bibilo. Se mba nengen Mkaanem ma Aôndo ser ka imenger i angahar a ase man iwanger i gbenda wase, er orpasalmi kpa nengen ma nahan. (Ps. 119:105) Se mba suur sha kwaghfan wase ga, kpa ka se suur sha Mkaanem ma Aôndo ma i nger la vangertiôr sha u wasen se u paven kwagh u dedoo a kwaghbo. Se mba henen u lun a icivir sha Bibilo tsô ga, kpa shi ka se hen u lun a dooshima sha atindi a Aôndo.—Ps. 119:97.
Hen Kwagh sha Ikyav i Yesu La
16. Gba u se er nyi ve se lu a “mhen u Kristu” ken a vese?
16 Gba u se lu a “mhen u Kristu” ve se ngohol jijingi u Aôndo ye. (1 Kor. 2:16) U se lu a ‘mhen u lu ken Kristu Yesu la’ ken a vese yô, gba u se fa gbenda u yange henen kwagh shi eren kwagh la, shi se dondon ikyav na la. (Rom. 15:5; 1 Pet. 2:21) Nenge ase igbenda igen i se er kwagh ne yô.
17, 18. (a) Se hen nyi hen Yesu sha kwagh u msen u erene? (b) Gba u se gba uwer u ‘sônon’ ga sha ci u nyi?
17 Sôn jijingi u Aôndo. Cii ve Yesu tagher a ameen yô, a er msen ér jijingi u Aôndo a wase un. (Luka 22:40, 41) Se kpa gba u se sôn Aôndo icighan jijingi na. Yehova ne mba ve sen un jijingi na a jighjigh u nan la cii mgbeghaa je. (Luka 11:13) Yesu kaa ér: “Sôn nen, á na ne; ker nen, né zua a mi; mande nen uwegh sha katsor á bugh ne. Gadia hanmô u nan sen yô, nan ngohol; u nan keren kpaa, nan zough a mi; u nan manden uwegh kpaa á bugh nan.”—Mat. 7:7, 8.
18 Wea lu keren u zuan a jijingi u Yehova man iwasen na yô, de yen ishima fese, deen u sônon un ga. Alaghga a gba u se hemba eren msen faa faa shi se hemba eren msen shighe naleghaa. Ashighe agen yô, Yehova ka a de ér mba ve lu sônon un la ve tese ér gba ve ishima tsung, shi ve tese ér ve mba a jighjigh u nan sha mimi, ve una ungwa mbamsen vev ye. *
19. Kanyi Yesu yange eren hanma shighe, man gba u se kav un sha ci u nyi?
19 Ungwa imo i Yehova vindi vindi. Yesu yange eren kwagh u doon Ter na hanma shighe cii. Kpa kwa ugen la di tsô yô, kwagh u Yesu soo u eren la lu kposo a kwagh u Ter na soo yô. Nahan cii kpa, Yesu kaa a Ter na vangertiôr ér: “Ka ishima Yam ga, i̱ lu ishima You i̱ er ye.” (Luka 22:42) Pine iyol you wer, ‘M ongo imo i Aôndo, kua shighe u i lu ican u eren nahan la je he?’ U ungwan imo i Aôndo la ka kwagh u hange hange u se er ve se zua a uma yô. Gba u se ungwan imo na vindi vindi sha ci u ka un a er se ye, shi ka un a lu Imbor i uma wase shi ka un a kor uuma asev ye. Kwagh môm kuma sha u ungwan imo i Aôndo ga. Aluer se mba ungwan imo i Aôndo ga yô, mayange una lumun se ga.
20. Uma u Yesu cii yange har sha nyi, man se kav un nena?
20 Fa Bibilo Tsembelee. Shighe u Satan lu karen jighjigh u nan u Yesu la, Yesu lu hendan a na sha u ôron un avur a Bibilo. (Luka 4:1-13) Shighe u Yesu lu lamen a mbahemenev mba kwaghaôndo mba ve hendan a na la, Mkaanem ma Aôndo lu tahav mbu suur sha mi yô. (Mat. 15:3-6) Uma u Yesu cii har sha u fan atindi a Aôndo shi kuren a. (Mat. 5:17) Doo u se kpa se za hemen u henen Mkaanem ma Aôndo, ma ma wasen se u lun a jighjigh u nan taveraa la. (Fil. 4:8, 9) Alaghga a lu se mbagenev ican u zuan a shighe u henen kwagh sha tseeneke wase shin henen kwagh vea tsombor wase. Alaghga a taver se u zuan a shighe, nahan a gba u se ker shighe.—Ef. 5:15-17.
21. Kanyi se dondo ve a wase se u seer fan Mkaanem ma Aôndo shi dondon ma?
21 “Wanakiriki u jighjigh man u fan kwagh” wase se u zuan a shighe u henen kwagh sha tseeneke wase, shi henen kwagh vea tsombor wase, sha u veren aikighe môm u á eren Mcivir u hen Tsombor ken hanma kasua yô. (Mat. 24:45) U ngu dondon kwagh ne kpa? Shighe u ú lu henen kwagh sha tseeneke la, u fatyô u tsuan atineakaa a u soo la timen sha kwagh u Yesu yange tese ior sha atineakaa shon la vighe vighe, sha er a wase u u̱ lun a mhen u Kristu kpa? U fatyô u keren ken takerada u Watch Tower Publications Index la fan ape u zua a iwanger sha ma tinekwagh i u soo u fan kwagh u i seer yô. U tesen ikyav yô, hii ken inyom i 2008 la zan zan 2010, mgber u Iyoukura i nan ior ken won la lu a ungeren 10 mba lun a itinekwagh ér “Kwagh u Se Hen hen Yesu.” U fatyô u timen sha ngeren mban ken kwaghhenen wou. Hii ken inyom i 2006 la je, Awake! lu a ngeren mba lun a itinekwagh ér “How Would You Answer?” (“U Na Mlumun Wer Nyi?”) Ngeren mban mba sha ci u wasen we sha er u seer fan Mkaanem ma Aôndo yô. Er nan u timen sha ngeren mban ken Mcivir u hen Tsombor la ashighe ashighe ga?
Se Fatyô u Hemban Tar
22, 23. Kanyi se er keng ve se hemba tara?
22 Saa se hendan a jijingi u taregh ve jijingi u Aôndo una hemen se ye. U hendan kwagh imba ne la ka kwagh u zange ga. Alaghga a gba u se nôngo kwagh kpoghuloo ve se er kwagh ne ye. (Yuda 3) Kpa se fatyô u hemban! Yesu yange kaa a mbahenen nav ér: “Shin tar ne yô, ican ngi eren ne; kpa taver nen asema, Mo M hemba tar ne.”—Yoh. 16:33.
23 Se kpa se fatyô u hemban tar ne, aluer se hendan a jijingi u taregh shi se er kwagh u se fetyô cii sha er se ngohol jijingi u Aôndo yô. Sha kpôô yô, “aluer Aôndo ta ikyaa ken vese yô, ka an je shi nana hendan kwagh a vese?” (Rom. 8:31) Aluer se ngohol jijingi u Aôndo shi se dondo gbendatesen na er i tese ken Bibilo nahan yô, se zua a mkom man bem man iember, shi se lu a vangertiôr ser se va zua a uma u tsôron ken tar u he, u u mgbôghom ne.
[Ngeren u shin kpe]
^ Wea soo u seer zuan a iwanger sha itinekwagh ne yô, ôr takerada u Bibilo Tese Ér Nyi Jimi la, peeji 170-173.
U Umbur Kpa?
• Er nan ve jijingi u taregh a samber yum nahana?
• Ka mbampin unyiin mba nyi i gbe u se pine ayol a ase?
• Ka akaa atar a nyi se hen hen Yesu sha kwagh u ngohol jijingi u Aôndoo?
[Mbampin mba ngeren u henen]
[Foto u sha peeji 8]
Yange mbatyomov mbagenev hingir azôv nena?
[Foto u sha peeji 10]
Satan ngu hemen ior sha Jijingi u taregh, kpa se fatyô u vendan hemen shon
