Suur Sha Yehova Er Mkur A Lu Mgbôghom ne

“Suur nen sha TER gbem sha won.”—YES. 26:4.

1. Ka mkposo u nyi a lu hen atô u mbacivir Aôndo man ior i tar nee?

 SE MBA ken tar u ior umiliôn umiliôn ve kera fe or u vea suur sha a nan shin kwagh u vea suur sha mi ga yô, sha ci u i bula ve shin i nzughul a ve ngee gande. Nenge er kwagh ve a lu kposo a mbacivir Yehova sha wono! Er kwaghfan u Aôndo a hemen ve yô, ve fa er u̱ suur sha tar ne shin sha “mbatarev” mba u la i lu gbilinkwagh yô. (Ps. 146:3) Nahan ve gema uuma vev cii kua mlu ve u ken hemen la, ve wa sha ikyev i Yehova, sha ci u ve fa ér ve doo un ishima shi kur Mkaanem nam ka bundu ga.—Rom. 3:4; 8:38, 39.

2. Yosua yange er shiada ér Aôndo kuma u se suur sha a na nena?

² Yosua u tsuaa la yange er shiada ér Aôndo kuma u se suur sha a na. Shighe u zulum u una kpe la, a kaa a Mbaiserael mbagenev ér: “Ne kpaa ne fa ken asema a en cii kua ken uuma enev cii kpaa, ma kwagh môm sha akaa a dedoo a TER, Aôndo wen, ter sha a ven la bunde ga, a cii i kure ne a vough, ma kwagh môm bunde ga.”—Yos. 23:14.

3. Iti i Aôndo pase se nyi sha kwagh naa?

 ³ Yehova kur uityendezwa nav sha ci u mbacivir un doo un ishima tsô ga, kpa hemban cii je yô, sha ci u iti na. (Eks. 3:14; 1 Sam. 12:22) Mkaanem ma tan iwanger sha Bibilo i orgen u i yer iti na ér J. B. Rotherham a gem, i yer i ér The Emphasized Bible la ôr kwagh u iti i Aôndo ér: “[Ngi] i hingir ityendezwa i sha mhôôn i hemban cii; ngi a tahav mbu Aôndo, mbu mbu zough sha nyityô mlu man nyityô mtaver man nyityô kwagh i hange hange i í gbe u a er cii yô . . . [Ngi] ityendezwa, . . . man mpase man m-umbur kua iceghzwa. Aôndo una lu jighjigh sha kwagh u iti ne gbem sha won, kunya ua kôr un sha kwagh u i mayange ga.”

4. (a) Yesaia 26:4 wa se kwagh ér se er nyi? (b) Se time sha nyi ken ngeren nee?

⁴ Pine iyol you wer: ‘M fa Yehova vighe vighe kuma u me suur sha a na vangertiôr je kpa? M ngu a vangertiôr mer mlu wam u ken hemen una doo sha ci u Yehova ngu nengen sha a mo kpa?’ Yesaia 26:4 kaa ér: “Suur nen sha TER gbem sha won; gadia TER AÔNDO ka vande u tsôron je.” Shin er Aôndo a kera eren ivande sha u yangen ma kwaghtseren or, er tsuaa la ashighe agen yange a er nahan ga kpa, er a lu ‘Vande u tsôron’ yô, se fatyô u suur sha a na “gbem sha won.” Aôndo wase u jighjigh la wasen mbacivir un sha mimi nyian nena? De se time nen sha igbenda itiar i a eren kwagh ne yô. Gbenda u hiihii yô, ne se agee shighe u se sen un ser a wase se u hendan a imeen yô, u sha uhar yô, suen se shighe u ior ve lu soon u keghen ato a loho wase ga yô shin shighe u i lu hendan a vese yô, u sha utar yô, ne se agee shighe u ishimanyian i ne se hingir u uren yô. Er se lu timen sha igbenda ne la, hen er u hemba suur sha Yehova yô.

Suur sha Aôndo Shighe u I Mee U Ér U Er Kwaghbo Yô

5. Ka hanma shighe nahan alaghga a taver se u suur sha Aôndoo?

⁵ Alaghga se suur sha Yehova sha kwagh u uityendezwa nav sha akaa a se lu veren ashe a mi la, er kwagh u paradiso shin mnder u shin ku nahan. Kpa a hiden sha kwagh u aeren a wang yô, alaghga a taver se u suur sha Yehova, shi lun a vangertiôr ser igbenda na man atindiakaa na ka a vough shi aa na se iember i hemban cii. Tor Solomon yange nger kwaghwan ne ér: “Suur sha TER a ishima you cii, de yier sha mkav wou ga. Umbur Un sha ijende you cii, Un kpaa Una kôôm igbenda you.” (Anz. 3:5, 6) Heen ne i ter “ijende” man “igbenda” yase. Sha kpôô yô, ka sha ishimaverenkeghen yase i Mbakristu la tseegh se tese ser se suur sha Aôndo ga, kpa uma wase jimin cii a tese ér se suur sha a na. Se tese ser se suur sha a na shighe u se tagher a ameen nena?

6. Se za hemen a ishima i se kange ser se venda mbamhen mba bov la nena?

⁶ Kwaghbo u palegh hiin ken ishima. (Ôr Mbaromanu 8:5; Mbaefese 2:3.) Nahan u er nena ve u za hemen a ishima i u kange wer u venda mbamhen mba bov laa? Nenge ase igbenda i itian ne: 1. Sôn Aôndo iwasen ken msen. (Mat. 6:9, 13) 2. Gbidye kwar sha akav a ior  mba i er kwagh ve ken Bibilo, mba yange ve ungwa imo i Yehova ga la kua mba yange ve ungwa la. Ver ishima sha kwagh u yange due ken ieren ve la. * (1 Kor. 10:8-11) 3. Hen sha ican i u er isholibo ve ú ya ken ishima shi mbadoon we ishima kpa vea ya la. 4. Hen er ka i lu Aôndo ken ishima shighe u or u civir un môm ka nana gba ken isholibo i vesen la. (Ôr Pasalmi 78:40, 41.) 5. Hen er ka i saan Yehova iyol kpishi zum u ka una nenge or u civir un sha jighjigh nana venda kwaghbo, nana gema a er kwagh u shami, ken igbar shin ken iuv la. (Ps. 15:1, 2; Anz. 27:11) We kpa u fatyô u tesen wer u suur sha Yehova.

Suur sha Aôndo Shighe u Ior Ve Lu Hendan a We Shin Ve Soo u Keghen Ato a We Ga Yô

7. Ka akaa a nyi yange Yeremia tagher a mi a karen jighjigh na u nan, man ashighe agen yange i lu un ken ishima nena?

⁷ Anmgbianev asev kpishi mba pasen kwagh hen uharegh mba ve tagher a mbamtaver her kpishi yô. Profeti Yeremia yange er tom na u profeti hen imba haregh la, hen tartor u Yuda sha ayange a u a masetyô, a mbamzeyol ngee la. Hanma iyange yô, yange i kar jighjigh na u nan sha ci u lu ungwan imo i Aôndo, yôôn ajiraôron a na. Sha shighe ugen la, akawe na u jighjigh, Baruki je kpa, vaa iyol ér un vôr. (Yer. 45:2, 3) Yeremia de ér iyolkpen i yange un tomoo? Un kpa yange a ure ashighe agen. A kaa ér: “Ifan i̱ kôr iyange i i marem sha i la. Ka nyi je man m shi dugh ase ken uya sha u nengen ican man ishimavihin je ayange am a gbe been kera sha kunya nahana?”—Yer. 20:14, 15, 18.

8, 9. Kanyi se er keng ve se za hemen u umen atam a dedoo, er i tese ken Yeremia 17:7, 8 man Pasalmi 1:1-3 nahana?

⁸ Nahan kpa, Yeremia yina ishima ga. A za hemen u suur sha Yehova. Kwagh ne na yô, mkaanem ma i nger ken Yeremia 17:7, 8 la kure sha profeti u jighjigh ne, ma kaa ér: “Or u nan suur sha TER yô, saan nan iyol, u TER A lu ishuur u nan yô. Gadia nana hingir er kon u i môôr u he kpemnger, u u samber amise a u, a za ar shin kungômnger, u u cie mtsee u iyange ga, kpa ikya i u i lu ndor shough shough; inyom i icegh ki ze kpaa, ishima ia nyian u ga, man shi ua de u umen atam kpaa ga.”

⁹ Mayange Yeremia ‘de u umen atam ga,’ er kon u ú hem gese gese, “u i môôr u hen kpemnger,” shin ikyon i i urun i tsembelee nahan. A de ér mbanahantar mba iferev mba ve kase un la ve yange un tom na ga. Kpa a gema a var a Imbor i “mngerem” ma umam la, shi a dondo hanma kwagh u Yehova kaa un cii. (Ôr Pasalmi 1:1-3; Yer. 20:9) Yeremia ngu ikyav i dedoo hen a vese kpen kpen, hemban cii je yô, se mba se civir Aôndo hen uharegh mba se tagher a mbamtaver her kpishi yô! Aluer kape kwagh wou a lu la yô, za hemen u suur sha Yehova a ishima you cii, nahan una na u ishimawan er u lu “pasen iti Na ken igbar” la.—Heb. 13:15.

10. Ka averen a nyi se lu a mi, man doo u se pine ayol a ase nyi?

¹⁰ Yehova na se akaa kpishi a wasen se u nôngon a mbamtaver mba se tagher a mi ken ayange a masetyô ne. Môm ken akaa shon yô, ka Mkaanem ma Aôndo jimin cii, ma i lu geman vough ken ijô kposo kposo seer a seer la. A na se kwaghyan u ken jijingi mgbeghaa sha ikyev i nongo u wanakiriki u jighjigh man u fan kwagh la. Shi a na se ahuraior kpishi a suen se ken mbamkombo man mbamkohol. U eren tom a akaa ne cii kpa? Mba ve er nahan cii ‘vea wa icam sha ci u iember i ken ishima’ ve la. Nahan kpa, mba ve vende u ungwan imo i Aôndo yô, ‘vea vaa sha ci u ishima i vihin, vea gbire ivaa sha ci u mvihi u i vihi jijingi ve tsung la.’—Yes. 65:13, 14.

Suur sha Aôndo Shighe u Ú Lu Nôngon a Ishimanyian Yô

11, 12. Er mbamzeyol mba tar ne ve lu seer a seer yô, doo u se er kwagh sha kwaghfan u Aôndo nena?

¹¹ Er yange i tsengaôron nahan, uumace mba tagher a mbamzeyol seer a seer. (Mat. 24:6-8; Mpa. 12:12) Shighe u mngerem ma sar avenge  yô, ior kpishi ka ve yevese ve za lu sha ajiir a a tav yô shin ve unde sha tor-yough gayô ve unde sha ma ijiir igen i i tav yô. Er mbamzeyol mba tar ne ve lu ngeen seer a seer la, kape ior umiliôn umiliôn ve lu keren u yeren ken kwaghfan u sangen yeke man iwabuter man mbamzough mba lun a inyaregh man iniongo i patii man i kwaghaôndo, i i lu inja er i tav geng la je la. Kpa ma mzough shin nongo môm u nan ior mkor u mimi kpa ngu ga. (Yer. 17:5, 6) Nahan kpa, mbacivir Yehova yô, mba a ijiir i yeren i vea fatyô u suur sha mi yô, “ka vande u tsôron je” la. (Yes. 26:4) Orpasalmi yange kaa ér: “Ka [Yehova] tseegh A lu vande wam man myem wam kpaa ye; Un ka gôgôyou wam.” (Ôr Pasalmi 62:6-9.) Se er nan ve se gema vande ne ua hingir se ijiir i yerene?

¹² Ka se var a Yehova sha u ungwan imo i Mkaanem nam ma ashighe kpishi ka ma kaha a kwaghfan u uumace la. (Ps. 73:23, 24) U tesen ikyav yô, alaghga ior mba ve dondon kwaghfan u uumace vea kaa ér: ‘U ngu a uma môm tseegh, ya tar a mi sha ishima you.’ ‘Ker tom u dedoo.’ ‘Zua a inyaregh kpishi.’ ‘Yam ingin, man ingila.’ ‘Zende sha, ember uma.’ Kpa kwaghfan u Aôndo yô, zua sha kwaghwan ne: ‘Mba kwagh a zough ve a tar kpaa ve̱ lu er kwagh zua ve a u ga nahan. Gadia mluashe u tar ne ngu karen kera.’ (1 Kor. 7:31) Yesu kpa wa se kwagh ér se veren mcivir u Yehova hiihii hanma shighe cii, nahan se koso ‘akaa a injaa sha ci wase Sha,’ ape ma kwagh a kpoghor a a mayange ga la.—Mat. 6:19, 20.

13. Doo u takerada u Yohane 2:15-17 la ua na se pine ayol a ase ser nyi?

¹³ Ieren you a “tar” man “akaa a [a] lu shin tar” la tese ér u suur sha Aôndo vangertiôr kpa? (1 Yoh. 2:15-17) Akaa a injaa a se zough a mi ken jijingi la man igbenda i se fatyô u seer eren Aôndo tom la hemba gban we kwagh a akaa a tar u ne la kpa? (Fil. 3:8) U veren ‘ishe you dedoo’ kpa? (Mat. 6:22) Kpa u ngu wer Aôndo soo ér we u eren kwagh sha lan shin a ikyo i wan shio ga, hemban je yô aluer u ngu a tsombor u nengen sha mi yô. (1 Tim. 5:8) Kpa a soo ér mbacivir un ve suur sha a na vangertiôr, i de lu sha tar u ú lu timin ne ga.—Heb. 13:5.

14-16. Mbagenev zua a mtsera sha u veren ‘ishe ve dedoo’ shi veren akaa a ken jijingi hiihii nena?

¹⁴ Nenge ase ikyav i Richard man Ruth, mbamaren mbagenev mba lun a ônov utar. Richard kaa ér: “Yange ishima lu kaan a mo ér me fatyô u eren Yehova tom hemban er m lu eren la. Yange m tema kpem iyol, kpa mcivir u m civir Aôndo la lum er m lu nan un kwagh u neer her nahan. Yange se mba eren msen sha kwagh ne shi se mba gbidi kwar sha mi tsembelee yô, mo man Ruth se lumun ser m za kaa orvesen wam u hen tom a pandem tom, m yaren ayange anyiin tseegh ken kasua, shin er shighe la tar wase lu ken zayol u inyar kpoghuloo nahan kpaa. Orvesen wam lumun, nahan m hii eren tom nahala uwer môm.” Richard nenge kwagh ne nena hegene?

¹⁵ A kaa ér: “Mba kera kimbin mo inyaregh er tsuaa la nahan ga, kpa m gema m zua a ayange akunduahar gbilin ken inyom, a lun vea tsombor wam shi yesen mbayev av. M seer shighe wam u pasen kwagh kuma kwa har, shi m seer ingyegh ki mba m henen Bibilo a ve la kuma kwa tar, shi m ngu hemban nengen sha akaa a tiônnongo tsembelee. Shi er m hembe lun her u nengen sha mbayev yô, Ruth tôôn ishuen pania ashighe ashighe. M kange ishima  mer me za hemen u eren akaa am sha gbenda ne nahan gbem er m fetyô la cii.”

¹⁶ Anmgbian ugen u i yer un ér Roy, vea kwase na Petina, mba ve lu a wan u kwase hen ya yô, yange ve pande shighe ve u eren tom sha er vea pasen kwagh hanma shighe yô. Roy kaa ér: “M eren tom ayange atar ken kasua, Petina di eren tom ayange ahar. Shi se due hen ya u se lu her la se za kôr haya hen anyou ugen, nahan se mba hemban nengen sha ijiir ne tsembelee. Yange se vande eren pania cii ve se va mar wan wase u nomso man u kwase la ye, man shighe môm kpa se mba a de u lun a isharen i eren pania ga. Nahan mbayev asev mba va ganden yô, se hide se hii u pasen kwagh hanma shighe. Inyaregh ki se lu a mi ve kia kuma sha averen a se zough a mi la je kpa ki ga.”

“Bem u Aôndo” a Kura Ishima You

17. Er or fe kwagh u kper ga nahan kpa, Icighanruamabera sur u ishima nena?

¹⁷ Mô wase kpa nan fa kwagh u kper una lu ga, gadia “shighe man aikyôr” mba ve sha gbenda wase cii. (Orpa. 9:11) Nahan kpa, gba u se de ser mfe u se fe kwagh u kper ga la, a yange se u lun a mmem nyian, er mba ve ye ikyar a Aôndo kôôsôô ga ka ve lu nahan ga. (Mat. 6:34) Apostoli Paulu nger ér: “Ishima i̱ de nyian ne sha ma kwagh ga, kpa akaa a a gbe ne la, Aôndo A̱ fa a ken hanma kwagh cii sha msen man sha mzamber a ishughun, man bem u Aôndo u a gande hanma mfe wase cii una kura asema a en man mbamhen enev ken Kristu Yesu ye.”—Fil. 4:6, 7.

18, 19. Ka sha nyi igbenda nahan, Aôndo a surun se ishima? Tese ikyav.

¹⁸ Anmgbianev mba nomso man mba kasev kpishi mba ve lu ken mbamlu mba taver yô, ve zua a mmem man bem ken ishima hen Yehova. Anmgbian u kwase ugen kaa ér: “Ortwer ugen yange nôngo acin imôngo ér una tam mciem iyol m lumun awambe a tan. Ishughun na i hiihii yô, lu u kaan ér: ‘Kanyi di ibume i vendan awambe a tan nee?’ Yange m er msen hen Yehova shighe la kua ashighe agen kpaa, nahan m zua a bem na. Yange m tile dông er ka vande nahan. Shin er yange iyol kpem sha ci u awambe yinam iyol nahan kpa, m kôrcio u pasen ityôkyaa i ken Ruamabera, i i ne ve m vende awambe la wang.”

¹⁹ Alaghga ashighe agen Aôndo una sue se sha ikyev i or u nan jighjigh a vese imôngo u va surun se ishima, shin sha u nan se kwaghyan u ken jijingi sha shighe vough. Adooga u vande ungwan anmgbian u nomso shin u kwase nan kaa ér: “ngeren ne zua sha mlu wam vough. I nger un sha ci wam jighilii!” Sha mimi yô, aluer mlu wase shin mgbe wase una lu nan nan je kpa, Yehova una tese se dooshima na, aluer se suur sha a na yô. Kera ga je kpa, se mba “iyôngo” na, shi mba yer se sha iti na.—Ps. 100:3; Yoh. 10:16; Aer. 15:14, 17.

20. Mbacivir Yehova vea tema doo doo shighe u a tim tar u Satan la sha ci u nyi?

²⁰ Sha “iyange i iyugh i [Yehova],” i̱ i̱ lu van iuu la, a tim hanma kwagh u tar u Satan u suur sha mi la cii. Zenaria man azurfa kua akaa a injaa agen aa fatyô u kuran ve cuku tsô kpaa ga. (Sef. 1:18; Anz. 11:4) A lu ‘Vande’ wase “u tsôron” la tseegh ua lu ijiir i yeren her ye. (Yes. 26:4) Nahan yô, de se tese nen ser se mba suur sha Yehova vangertiôr hegen sha u zenden sha igbenda na i perapera man sha u yôôn angwe u loho u Tartor na, shin er i gbe u se tagher a ahendan man ior mba soon u ungwan loho wase ga nahan kpaa, shi se haa akaa a nyian se ishima la cii sha a na. Aluer se er akaa ne yô, mimi je se ‘tema doo doo, ishima ia yôhôr se, se kera lu a mciem ma cian ican la ga.’—Anz. 1:33.

[Ngeren u shin kpe]

U Fatyô u Pasen Kpa?

Se suur sha Aôndo

• shighe u i mee se ér se er kwaghbo nena?

• shighe u ior ve soo u ungwan loho wase ga shin se lu tagher a ahendan nena?

• shighe u se lu nôngon a ishimanyian nena?

[Mbampin mba ngeren u henen]

[Foto u sha peeji 13]

Aluer se mba dondon atindiakaa a Aôndo yô, a saan se iyol

[Foto u sha peeji 15]

‘Yehova ka Vande u tsôron’