Ú Umbur Kpa?

U ôr Iyoukura mba i sember gberen la nahan ve doo u kpa? Nenge ase aluer u fatyô u nan mlumun sha mbampin mban yô:

• Mbakristu mba mimi mba yaren tom a iti i Aôndo er ka kurayol nahanaa?

Ior mbagenev ka ve nenge ma kwagh shin ma ikyav ér ka kurayol, ve tôô ér ka akombo a aa fatyô u kuran ve yô, kpa ior mba Aôndo yô mba nengen iti na nahan ga. Ve na Yehova jighjigh shi mba keren u eren ishima na. Sha nahan yô, mba keren mkor ken iti na. (Sef. 3:12, 13)—1/15, peeji 5-6.

• Yehova yange venda Tor Saulu sha ci u nyi?

Yange gba u Saulu una kegh profeti u Aôndo sha u a va na nagh ku genegh yô, kpa tor hemba ato, kar na nagh kura iyol na. Shighe kar yô, shi a ungwa tindi u i wa un ér a tim ikyurior igen i i lu mbaihyomov mba Mbaiserael kera purututu la ga.—2/15, peeji 22-23.

• Se tese ser se nyagh mvende u vendan atindi la nena?

Se hunden msôrom ga, shi se palegh tsav mbu eren shi se ungwa icin i Yesu ta sha kwagh u aeren a idyaa la kpaa. Ikyav i tesen yô, se palegh u nengen ufoto mba jimbagh kua mbamhen mba vough ga mba ieren ne ia na se fatyô u lun a mi ken asema ase la. (Mat. 5:27, 28) Shi se palegh mba i dugh ve ken mimi kera la kpaa.—2/15, peeji 29-32.

• Yeremia yange lu er kon u i “môôr u hen kpemnger, u u samber amise a u” la nena? (Yer. 17:7, 8)

Shighe môm kpa Yeremia de u umen atam ga, shi yange de ér mbanahantar ve yange un tom na ga. Kpa a suur sha or u a lu Imbor i mngerem ma umam la, lu eren kwagh u Aôndo kaa un la.—3/15, peeji 14.