Ne Icombor I Mbakristu, “Lu Nen Per”

“Se lu nen per geng ge geng.”—1 TES. 5:6.

1, 2. Kanyi ia wase tsombor ua kôrcio u lun per ken jijingii?

 APOSTOLI PAULU yange nger Mbakristu mba ken Tesalonika washika sha kwagh u “iyange i TER i vesen i cieryol” la kaa ér: “Anmgbianev, ne mba ken ime ga, nahan iyange la ia kera va tser ne er ormbaiv nahan ga. Gadia ne cii ne mba ônov mba iwangerev, man shi ônov mba atetan, se kera mba mbautuuv shin mbaimev kpaa ga.” Paulu shi kaa ér: “Nahan yô, se kera hungur nen mnyam er mbagenev nahan ga, se lu nen per geng ge geng.”—Yoel 2:31; 1 Tes. 5:4-6.

² Kwaghwan u Paulu wa Mbatesalonika ne ngu a inja kpishi hen Mbakristu mba ve lu uma “sha shighe u mkur” ne. (Dan. 12:4) Er mkur u botar u Satan ne a lu mgbôghom ne, Satan hôn ishigh sha u danen mbacivir Aôndo mba mimi mba a fetyô cii, sha er ve de u civir Aôndo yô. Nahan doo u se dondo kwaghwan u Paulu, u a kaa ér se lu per ken jijingi la. Cii ve icombor i Mbakristu ia kôrcio u lun per yô, a gba u hanma or hen tsombor nana er tom u nan u Yehova a ne nan, er i pase ken Bibilo nahan la. Nahan ka nyi tom noov man kasev man mbayev ve lu a mi sha u wasen icombor ve u ‘lun pere’?

Ne Noov, Dondo Nen Ikyav i “Orkuranilev u Dedoo” La

3. Kwagh u i pase ken 1 Timoteu 5:8 tese ér tom u nomsoor u nan lu ityough sha ya u nan la wa nyi man nyi kere?

³ Bibilo kaa ér: “Ityough ki kwase . . . ka nom.” (1 Kor. 11:3) Tom u nom, u a lu ityough sha ya la wa nyi man nyi kere? Bibilo ôr kwagh u tom môm u orhemen nan lu a mi yô, ér: “Aluer or nana kera nenge sha ior mba nan ga man jim je yô, ka mba ken ya u nan la, nan nyiman jighjigh u nan ve, nan hemba gban kera a or u nan ne jighjigh ga yô.” (1 Tim. 5:8) Sha mimi yô, gba u nomsoor nana nenge sha ugbayol mba tsombor u nan. Kpa aluer ka u nana wase tsombor u nan u lun per ken jijingi yô, nana er kwagh a hemba di u keren inyaregh kuren ugbayol mba tsombor u nan tsô la. A gba u nana maa ya u nan ken jijingi, nana wase mba hen tsombor u nan cii u seer yan ikyar a Aôndo kôôsôô. (Anz. 24:3, 4) Nana er kwagh ne nena?

4. Kanyi ia wase nomsoor u maan ya u nan ken jijingii?

⁴ Er ‘nom a lu ityough ki kwase di er Kristu kpaa A lu ityough ki nongo Na nahan’ yô, nomsoor u nan er ivese yô nana time sha gbenda u Yesu hemen nongo na la, shi nana dondo ikyav na la kpaa. (Ef. 5:23) Nenge ase er Yesu yange ôr kwagh u mlu na a mbadondon un yô. (Ôr Yohane 10:14, 15.) Aluer nomsoor soo u maan ya u nan ken jijingi yô, kanyi nana er ve nana za ikyura? Kwagh u nana ér yô, ka u timen sha kwagh u Yesu, “orkuranilev u dedoo” yange ôr shi er la, shi ‘dondon Un ijime.’—1 Pet. 2:21.

5. Orkuranilev u Dedoo la fa tiônnongo nena?

⁵ Mlu u hen atô u orkuranilev man iyôngo na la har sha mfe man jighjigh u nan. Orkuranilev ka nan fa iyôngo i nan vindi vindi, shi iyôngo kpa i fa nan shi i na nan jighjigh. Ka i fa ikyenge i nan shi i ungwan imo i nan. Yesu yange kaa ér: “M fa mbi Yav, mbi Yav kpaa fam.” A fa tiônnongo bulana ga. Ishember i ken zwa Grika i í gem heen ér “fa” la tese “mfe u vighe vighe, u or fe kwagh i kom nan yô.” Sha mimi yô, Orkuranilev u Dedoo  la fa iyôngo na asange asange. A fa mbamgbe kua mbamyen man tahav mbu hanma iyôngo na. Orhemen wase lan ma kwagh sha kwagh u iyôngo na ga. Shi iyôngo kpa fa orkuranilev shi i na hemen na jighjigh.

6. Noov vea dondo ikyav i Orkuranilev u Dedoo la nena?

⁶ Gba u nom nana hen u nengen iyol i nan er orkuranilev nahan, shi nana nengen mba ve lu sha ikyev i nan la er ka iyôngo nahan ve nana fatyô u hemen ve er Yesu nahan ye. Nana nôngo nana fa tsombor u nan vighe vighe. Kpa nom nana fatyô u lun a imba mfe la je he? Een, aluer nan ngu lamen a hanma or u hen tsombor u nan tsembelee shi nan ngu keghen ato ungwan akaa a zan ve iyol ken ishima shi nan ngu hemen sha u eren akaa hen tsombor, shi nan ngu tsuan akaa a tsombor ua er la sha inja, er mcivir u hen tsombor man mkombo u zan man u duen kwaghpasen man anumbe a eren man iemberyolough nahan yô. Aluer nom u nan lu Orkristu nan fa mkaanem ma Aôndo shi nan fa tsombor u nan tsembelee sha er nana ver u ikyav shi nana tsua akaa a vea eren la sha inja yô, a hemba lun tsombor la ican ga u lun a vangertiôr ken hemen u nan shi nana zua a mkom sha ci u vea lu gungur môm ken mcivir u mimi.

7, 8. Nom nana dondo ikyav i Orkuranilev u Dedoo la sha u tesen mba ve lu sha ikyev i nan la dooshima nena?

⁷ Shi or u nan lu orkuranilev u dedoo yô, iyôngo i nan ka i doo nan ishima. Ka sea hen kwagh i ityakerada i Ivangeli la i er sha uma u Yesu man tom na u pasen kwagh la yô, se iv a iwuese ken ishima sha dooshima u Yesu yange tese mbahenen nav la. Shi yange “gbihi uma na sha ci u iyôngo” na. Gba u noov vea kaven Yesu sha u tesen dooshima hen mba ve lu sha ikyev ve la. Nom u nan soo ér Aôndo a lumun nan yô, nan eren kwagh a kwase u nan sha nomor ga, kpa kwase u nan ka a doo nan ishima “di er Kristu kpaa, nongo Na u doo Un ishima” nahan. (Ef. 5:25) Gba u nana lamen a kwase u nan kundu kundu man sha ikyo i wan, gadia kwase la kuma icivir.—1 Pet. 3:7.

⁸ Zum u orya nan lu yesen ônov yô, nana dondo atindi a Aôndo keve keve. Nahan kpa, nana de hungur u tesen ônov mba nan dooshima ga. A gba u a na tsaha yô, i̱ na u sha dooshima. Ka i tôô mbayev mbagenev shighe gôgônan u kaven kwagh u i soo ér ve er la i hemba mbagenev. Aluer kwagh ngu nahan yô, ter u nan a hemba wan ishima a nan cii. Nomso ka vea dondon ikyav i Yesu hanma shighe yô, ve na ya ve a lu kundu kundu, hanma or hen ya ve nan tema i kpe nan iyol. Icombor ve ngi i lu a imba mkor u ken jijingi u orpasalmi yange ter ken icam la.—Ôr Pasalmi 23:1-6.

9. Kanyi tom noov mba ve lu Mbakristu ve lu a mi er Noa nahana, man kanyi ia wase ve u eren tom nee?

⁹ Tertamen Noa yange lu uma sha shighe u ayange a masetyô a tar u sha ayange a na la. Kpa Yehova “yima Noa . . . kua ior mbagenev utaankaruhar zum u A va a mngerem deemee sha tar u mba ve vende Aôndo la.” (2 Pet. 2:5) Noa lu a tom u wasen tsombor na ér u war Mngerem ma Deemee. Mbayaav mba ve lu Mbakristu kpa ka tom u ve lu a mi ken ayange a masetyô ne je la. (Mat. 24:37) Nahan ka hange hange u vea time sha ikyav i “orkuranilev u dedoo” la shi vea dondo i kpaa.

Ne Kasev, ‘Maa Nen Iyou Yen’

10. U̱ kwase wan iyol i nan sha ikyev i nom u nan la, inja na ér nyi?

¹⁰ Apostoli Paulu yange nger ér: “Kasev, ungwan nen imo i noov enev er ka Ter nahan.” (Ef. 5:22) Mayange mkaanem man tese ér kasev mba sha ian i civirigh ga ze. Cii ve Aôndo u mimi gba Ifa, kwase u hiihii la yô, a kaa ér: “Doo u or nana lu tswen ga; yô, Me er nan orwasen u lun er nan nahan.” (Gen. 2:18) Tom u “orwasen,” u kwase ka nan wasen nom u nan u nengen sha ityom i hen tsombor la ka tom u civirigh kpen kpen.

11. Kwase u injaa ka nan “maa iyou i nan” nena?

 ¹¹ Kwase u injaa ka nan keren mkpeyol u ya u nan. (Ôr Anzaakaa 14:1.) Ibumekwase ka nan laha hemen u nom u nan, kpa kwase u fan kwagh yô, ka nan tese icivir sha hemen u nom u nan. Nan tesen ieren i hemban ato shi keren u lun sha tseeneke, i i lu ieren i taregh la ga, kpa ka nan ungwan imo i nom u nan. (Ef. 2:2) Ibumekwase ngôôr lamen sha nom u nan geseghee ga, kpa kwase u fan kwagh yô, ka nan keren u seer icivir i nom u nan nan lu a mi sha ishigh ki mbayev mba nan kua ior mbagenev la. Imba kwase la ka i wa ikyo sha er ia laha hemen u nom u nan sha u zeren zôhôn a nan ken igbar shin sendegh ikyaa a nan ga yô. Shi kwagh ugen yô, ka u eren kwagh sha tsoko. Ibumekwase ka nan vihi inyaregh kua akaa agen a tsombor u nan u zough a mi sha ican la dang dang. Kpa kwase u suen nom u nan yô, nan eren nahala ga. Ka nan er kwagh vea nom u nan ken ijoughave sha kwagh u inyar. Nan eren akaa sha kwaghfan man sha tsoko. Nan ze nom u nan iyol ér a er tom shighe gôgônan sha u seer zuan a inyaregh ga.

12. Kanyi kwase nana er sha u wasen tsombor u nan u ‘lun pere’?

¹² Kwase u injaa ka nan wase tsombor u nan u ‘lun per,’ sha u wasen nom u nan u tesen mbayev mba nan kwagh u Yehova. (Anz. 1:8) Ka nan sue Mcivir u hen Tsombor la sha gbashima je. Shi ka nan sue nom u nan shighe u nom a lu wan mbayev kwagh shin a lu tsahan ve yô. Nenge imba er kwagh u ibumekwase a lu kposo la sha wono, gadia ônov mba nan ka ve ya ican sha iyol man ken jijingi!

13. Er nan ve i lu hange hange u kwase nana sue nom u nan ken ityom i nan eren ken tiônnongo kpoghuloo laa?

¹³ Kwase u suen nom u nan ka nana nenge nom u nan una eren ityom ken tiônnongo u Kristu nahan i lu nan ken ishima nena? Ka i saan nan iyol u wasen nom u nan la kpen kpen! Nom u nan ka nana lu diakon shin ortamen shin nana lu ken kômatii u Wasen sha Kwagh u Iyouci shin ma Anmgbian u Wasen Afishi a Nengen sha Tom u Maan Iyou i Tartor kpa, ka i saan nan iyol sha iantom i nom u nan a lu sha mi la. Ka keng a gba u nana nôngo kwagh ve nana sue nom u nan dông sha mkaan man sha ieren ye. Kpa nan fa ér mnyer u nom u nan a nyer iyol ken ityom i ken tiônnongo la una wase tsombor u nan u lun per ken jijingi.

14. (a) Kanyi ia fatyô u taver kwase u injaa u erene, man nana kôrcio u eren kwagh ne nena? (b) Kwase ka nan na tsombor u nan cii u lu ken mkpeyol nena?

¹⁴ Alaghga a taver kwase u suen nom u nan shighe u nom a tsough u eren kwagh u nan lumun a mi ga yô. Nahan kpa, ka nan lu a “ishima i legh legh” kua ieren i “lun ving,” nahan nan er kwagh ken mzough vea nom u  nan sha er kwagh u nan tsough u eren la una za vough yô. (1 Pet. 3:4) Shi kwase u injaa ka nan nôngo u dondon ikyav i kasev mba cian Aôndo mba sha ayange a tsuaa la, er Sara man Rutu man Abigail man Maria, ngô u Yesu nahan, shi nan dondo ikyav ve i dedoo la kpaa. (1 Pet. 3:5, 6) Shi ka nan dondo ikyav i kasev mba ganden mba sha ayange ne, mba ‘mlu ve a kom icivir’ yô. (Titu 2:3, 4) Er kwase u injaa nan ne nom u nan icivir shi nom u nan a doo nan ishima yô, ka nan na ivese ve i doo shi tsombor ve jimin cii u lu ken mkpeyol. Ya u nan ngu a lu ijiir i kundu kundu man i mkor. Or u akaa a ken jijingi a gbe nan ishima yô, kwase u injaa ngu nan a inja kpen kpen!—Anz. 18:22.

Ne Agumaior, ‘Ver Nen Ishima sha Akaa a i Nengen a mi Ga La’

15. Agumaior aa wase mbamaren vev nena ve tsombor ve ua ‘lu pere’?

¹⁵ Ne agumaior ne wase mbamaren enev nena ve tsombor wen ua ‘lu per’ ken jijingii? Hen nen ase sha iyua i Yehova a ver sha ci wen la. Alaghga iyev wen je, mbamaren enev tese ne ufoto mba tesen er uma una lu ken paradiso yô. Er ne lu vesen seer la, a shi nan kpa, ve lu tesen ne mkaanem ma ken Bibilo kua ngeren mba ken ityakerada yase la sha u wasen ne u nengen a foto u uma u ken paradiso la ken asema a en. Aluer ne har ishima yen sha mcivir u Yehova shi ne mba tsuan akaa a ne we ishima u eren ken uma la ken mcivir u Yehova yô, kwagh ne una wase ne u ‘lun per.’

16, 17. Kanyi agumaior aa er ve aa gba ayem a uma la aa kure vough-lo?

¹⁶ Wa nen ikyo sha mkaanem ma apostoli Paulu ma i nger ken 1 Mbakorinte 9:24 la. (Ôr.) Gba ayem a uma la a awashima u yan iyua. Tsua kwagh u ú er ken uma wou ve una wase u u̱ zuan a iyua i uma u tsôron la yô. Ior kpishi de uyôughyôughmbaakaav mba keren dan ve, ve kera ver ishima sha iyua la ga. Nenge imba ibume la sha wono! U haren uma wen cii sha inyaregh ki keren la una va ne a iember i mimi ga. Akaa a inyaregh kia fatyô u yamen la ka a tsan gbem ga. Kpa ne yô, ver nen ishima sha “akaa a i nengen a mi ga la.” Sha ci u nyi? Sha ci u akaa “a i nengen a mi ga la gema ka a tsôron je.”—2 Kor. 4:18.

¹⁷ “Akaa a i nengen a mi ga la” wa averen a Tartor ker. Tsua nen akaa a ne er ken uma ve ne va zua a averen la yô. Aluer ne na uma wen ken mcivir u Yehova yô, ne zua a iember i mimi. U civir Yehova la una bugh ne aan a eren akaa a ne tsough u eren shighe kpuaa, man a ne tsough u eren gbem la. * Aluer ne tsua akaa a ne fatyô u eren yô, kwagh la una wase ne u haren ishima sha u civir Aôndo sha er ne va zua a uma u tsôron yô.—1 Yoh. 2:17.

18, 19. Aluer gumor nan ya ikyar a Yehova kôôsôô yô, nana fa sha nyi?

¹⁸ Ne agumaior, kwagh u hiihii u ne er sha u zan sha gbenda u uma la yô, ka u yan ikyar a Yehova kôôsôô. Ne er kwagh ne vee? Pine iyol you wer: ‘M ngu or u akaa a ken jijingi a gbem ishima kpa, shin saa mbamaren av vea kaam kwagh u me ere? M ngu a aeren a aa na kwagh wam a doo Aôndo ishima kpa? M ngu nôngon kwagh sha er me eren ityom i i gbe i zough vea mcivir u mimi la, er msen u eren ashighe ashighe man kwaghhenen man mbamkombo mba zan man kwaghpasen  nahan hanma shighe kpa? M ngu kporom ikyua a Aôndo sha u yan ikyar a na kpa?’—Yak. 4:8.

¹⁹ Gbidye kwar sha ikyav i Mose la. Shin er i yese Mose ken adini u ikyurior igen nahan kpa, yange hemba soon ér ior ve fa un ér un ngu or u civir Yehova, a u i fa un ér un ngu wan u wantor Farao la. (Ôr Mbaheberu 11:24-27.) Ne agumaior, gba u ne kpa ne kange ishima u civir Yehova sha jighjigh. Ne er nahan yô, ne zua a iember i mimi shi uma wen una hemba doon hegen, shi ne lu a ishimaverenkeghen ner ne va “kôr ave sha uma u a lu uma jim la.”—1 Tim. 6:19.

20. Ka unô vea ya iyua ken ayem a uma laa?

²⁰ Sha ayange a tsuaa la, í lu or u gban ayem môm tseegh nan hemba gesa u ayemegh ye. Kpa ken ayem a uma ne yô, ka nahan ga. Sar Aôndo “u ior cii ve̱ war ve̱ ar sha mfe u fan mimi la.” (1 Tim. 2:3, 4) Ior kpishi vande gban ayem ne kure vough, shi mbakpishiv mba yevese a we imôngo. (Heb. 12:1, 2) Mba ve yen ishima ga la cii vea zua a iyua. Nahan kange ishima wer u ya iyua!

21. Kanyi se time sha mi ken ngeren u dondon nee?

²¹ “Iyange i vesen i cieryol i TER” la ia va kpee, a bunde ga. (Mal. 4:5) Iyange la i̱ de va bulun a bul icombor i Mbakristu ga. Nahan ka hange hange u hanma or hen tsombor nana er tom u nan u Ruamabera a tese ér nan ngu a mi la. Kanyi igen kpa ne fatyô u eren sha er ne lu per ken jijingi shi ne hemba yan ikyar a Aôndo? Ngeren u dondon ne una time sha akaa atar a ka a bende a mlu u tsombor u ken jijingi la yô.

[Ngeren u shin kpe]

Ú Hen Nyi?

• Er nan ve i lu hange hange u icombor i Mbakristu ia ‘lu pere’?

• Nom nana dondo ikyav i Orkuranilev u Dedoo la nena?

• Kwase u injaa nana er nyi ve nana sue nom u nana?

• Agumaior aa wase icombor ve u lun per ken jijingi nena?

[Mbampin mba ngeren u henen]

[Foto u sha peeji 9]

Or u akaa a ken jijingi a gbe nan ishima yô, kwase u injaa ngu nan a inja kpen kpen