Doo u Agumaior Aa Er Batisemaa?

TER ugen ken tar u Philippines, u a lu Orkristu yô, iti na ér Carlos, * a kaa ér: “Doom kpishi er hegen wan wam u kwase a hingir or u civir Yehova nahan, shi m fa mer un kpa doo un.” Ken tar u Grika di, ter ugen nger wener: “Doo kwase wam man mo kpishi er mbayev asev mba utar yange ve er batisema, ve hingir Mbashiada mba Yehova sha shighe u ve lu agumaior la nahan. Mba vesen ken jijingi shi saan ve iyol u civir Yehova kpaa.”

Shighe u mbayev ve er batisema yô, ka i saan mbamaren vev mba ve lu Mbakristu mbara iyol kpishi, kpa ashighe agen ishimanyian ngi i nungwa sha msaanyol ve la. Ngô ugen kaa ér: “Yange saan mo iyol kpishi, shi ishima kpa nyian mo kpishi.” Er nan ve saan un iyol tseegh ga, ishima kpa shi nyian unu? A kaa ér: “Yange m kav er hegen wan wam u nomso a kom u Yehova una pine un kwagh sha akaa a a eren cii yô.”

U civir Yehova vea Mbashiada mbagenev mba ve er batisema la ka kwagh u i gbe u hanma gumor nana tsua u eren yô. Nahan cii kpa, alaghga a za mbamaren mba ve civir Yehova la iyol, vea pine ér, ‘M fa er wan wam a vese ken jijingi yô, kpa a via kuma u una fatyô u palegh aeren a dang, sha er una za hemen u lun wang sha ishigh ki Yehova je kpa?’ Alaghga mbagenev vea pine ayol a ve ér, ‘Aluer wan wam tagher a imeen, sha kwagh u uyôughyôughmbaakaav nahan, una za hemen u civir Yehova saan saan man sha gbashima kpa?’ Sha nahan yô, ka akaawan a Bibilo a nyi aa wase mbamaren vea fa aluer mbayev vev kuma u a er ve batisemaa?

Saa Or Nana Lu Orhenen u Kristu Keng Ve Nana Kuma u Eren Batisema Ye

Mkaanem ma Aôndo tese anyom a or a lu ve nana kuma batisema ga, kpa ma gema ma pase kwagh u or a er ve nana kuma yô. Yesu yange kaa a mbadondon un ér: “Gema nen akuraior cii a̱ hingir mbahenen, eren nen ve batisema.” (Mat. 28:19) Sha nahan yô, batisema ngu sha ci u mba ve vande lun mbahenen mba Kristu mbara.

Inja i orhenen yô ér nyi? Takerada u Insight on the Scriptures la kaa ér: “Ka kwagh u mba ve ne atesen a Kristu jighjigh shi ve lu dondon a dike dike la jighilii je, ishember ne i lu ôron ye.” Agumaior aa a lu iyev her la aa fatyô u lun mbahenen mba Kristu mba mimi je he? Anmgbian u kwase ugen u a er tom u mishen hen vegher  ugen ken tar u Amerika u i yer ér Latin America la, i hembe anyom 40 yô, nger kwagh sha kwagh na man anmgbianev nav mba kasev uhar, a kaa ér: “Yange se vese kuma u se fa ser se soo u civir Yehova shi va lun uma ken Paradiso kpaa. Iyoltseghan yase wase se u tilen dông shighe u se tagher a ameen a agumaior a tagher a mi la. Se vaa afanyô ser yange se tsegha iyol yase sha ci u Aôndo shighe u se lu vesen a vese la ga.”

U er nan ve u fa aluer wan wou hingir orhenen u Kristuu? Bibilo kaa ér: “Wanye kpaa ka nan pase iyol i nan sha aeren a nan je, shin aeren a nan a lu wang man vough kpaa.” (Anz. 20:11) Time ase sha aeren agen a nga a tese ér gumor nan ngu nôngon ér i ‘nenge mzehemen u nan’ u orhenen la yô.—1 Tim. 4:15.

Ikyav i Tesen Ér Wan Wou Ngu Orhenen u Kristu

Wan wou ongo imo you kpa? (Kol. 3:20) Eren ityom i u we un hen ya la kpa? Bibilo ôr kwagh u Yesu shighe u lu anyom 12 la ér: “A lu ungwan imo [i mbamaren nav].” (Luka 2:51) Mimi yô, wanye môm kpa ngu nyian u nana ungwa imo i mbamaren mba nan vough a za bee ga. Kpa gba u Mbakristu mba mimi vea “dondo [Yesu] ijime.” Sha nahan yô, agumaior a a soo ér i er a batisema yô, gba u a fa á sha m-ongo u ve ongo imo i mbamaren vev la.—1 Pet. 2:21.

Time ase sha mbampin mba ve dondo ne: Wan wou pasen kwagh sha u tesen ér ngu ‘vanden keren tartor’ u Aôndo kpa? (Mat. 6:33) Keghen iyol u pasen mbagenev kwagh kpa, shin ka i gba u u taver un ishima kpishi ve una due kwaghpasen shi una lam a ior sha uya uya? Er a lu orpasenkwagh u nan lu a er batisema ga nahan, a fa tom na kpa? Soon u hiden za sôron mba a zough a ve hen haregh wen, ve tese isharen la kpa? Pasen atica man mbakov na mba ken makeranta ér un ngu Orshiada u Yehova kpa?

Nengen mze u zan mbamkombo mba tiônnongo la ér ka kwagh u hange hange kpa? (Ps. 122:1) Ka i doo un u nan mbamlumun ken Iyoukura i Henen man mkombo u Bibilo i Henen ken Tiônnongo la kpa? Ne mbamlumun man akaaôron ken Makeranta u Henen Tom u Hemen u Aôndo la sha gbashima je he?—Heb. 10:24, 25.

Wan wou ngu nôngon ér una lu wang sha aeren a na sha u palegh ujende mba bov ken makeranta kua ajiir agen kpa? (Anz. 13:20) Ka ityogholough man ufiim man akaa a i tesen sha televishen la man anumbe a sha vidio kua akaa agen sha Intanet a nyi nahan a hembe doon unu? Iliam na man ieren na tese ér a soo u dondon atindi a Bibilo kpa?

Wan wou fa Bibilo tsembelee za kighir nena? Una fatyô u ôron kwagh u a hen ken Bibilo la ken mkaanem nam shighe u ne lu eren Mcivir u hen Tsombor wen u aikighe la kpa? Una fatyô u pasen akaa a mimi a ken Bibilo a a taver ga la je he? (Anz. 2:6-9) Ka saren un u ôron Bibilo shi henen ityakerada i wanakiriki u jighjigh man u fan kwagh la je he? (Mat. 24:45) Pin mbampin sha kwagh u avur a Bibilo man atesen a Bibilo kpa?

 Mbampin mban vea wase u u̱ karen fan aluer wan wou ngu vesen ken jijingi yô. U timen sha mbampin mban u been yô, alaghga u kure ikyaa wer gba u una sôr inja sha avegher agen cii ve una er batisema ye. Nahan kpa, aluer uma na tese ikyav ér ngu orhenen shi a tsegha iyol na sha ci u Aôndo yô, u fatyô u den wer a̱ er batisema.

Agumaior aa Fatyô u Wuese Yehova

Mbacivir Aôndo kpishi yange ve tese jighjigh u nan shi ve tile sha mimi shighe u ve lu hian a hia shin ve lu yev la. Hen ase sha kwagh u Yosev man Samuel man Yoshia kua Yesu. (Gen. 37:2; 39:1-3; 1 Sam. 1:24-28; 2:18-20; 2 Kron. 34:1-3; Luka 2:42-49) Shi alaghga ônov mba Filibu mba kasev mba unyiin, mba ve ôron kwaghôron u profeti la kpa yange i yese ve tsembelee shighe u ve lu yev la je.—Aer. 21:8, 9.

Orshiada ugen ken tar u Grika kaa ér: “Yange i erem batisema shighe u m lu anyom 12 la. Mayange m ngu a vaa afanyô sha kwagh u m tsua u eren la ga. Anyom kar 24 hegen. Ken atô u anyom 24 ne, m er tom u pasen kwagh hanma shighe la kuma anyom 23. Dooshima u m lu a mi sha Yehova la yange wasen mo hanma shighe u mea tagher a mbamtaver mba agumaior a tagher a mi la cii. Shighe u m lu anyom 12 la, m fa Ruamabera er hegen nahan ga. Kpa yange m fa er Yehova a doom ishima shi m soo u civir un gbem sha won yô. Doom kpishi er a wasem m ze hemen u civir un nahan.”

Or a lu gumor shin nana bee iyol kpa, aluer nan tese ikyav ér nan ngu orhenen u mimi yô, gba u a er nan batisema. Apostoli Paulu nger wener: “Ka ken ishima ka i na jighjigh sha u zuan a ishô ye, shi ka sha zwa ka i pase sha u zuan a myom ye.” (Rom. 10:10) Gumor u nan hingir orhenen u Kristu la ka nana er batisema u a lu kwagh u hange hange la yô, ka i lu kwagh u vesen je nan kua mbamaren mba nan cii ka ve er ye. Kwagh môm tsô a de yangen we shin mbayev ou u zuan a iember i i lu keghen ne la ga.

[Ngeren u shin kpe]

[Ngeren u kiriki sha peeji 5]

U Lun a Mnenge u Vough sha Kwagh u Batisema

Mbamaren mbagenev ka ve nenge batisema u mbayev vev ér ka kwagh u injaa, nahan cii kpa kwaghbo ngu ker, vough er u zuan laasen u nan or ian i nahan mato kpa i lu nahan. Kpa batisema u eren man u civir Aôndo ka kwagh u bunden mzehemen u or ken hemene? Bibilo na mlumun ér ei. Anzaakaa 10:22 kaa ér: “Iveren i TER ngi ve a inyaregh, tom u nyoonyol seer ma kwagh sha i ga.” Paulu kpa yange nger Timoteu washika kaa ér: “U civir Aôndo man kwagh a kuman we yô, mtsera ngu sha mi vese.”—1 Tim. 6:6.

Mimi yô, u civir Yehova ka kwagh u zange ga. Yeremia yange tagher a mbamtaver kpishi ken tom na shighe u lu profeti u Aôndo la. Nahan cii kpa, a nger kwagh sha kwagh u mcivir na u yange civir Aôndo u mimi la, a kaa ér: “Akaaôron a Ou hingir mo iember man msaanyol ken ishima yam; gadia i yilam sha iti You je, TERE, Aôndo u akum a Sha.” (Yer. 15:16) Yeremia yange fa er u eren Aôndo tom la i lu kwagh u van un a iember yô. Tar u Satan ka kwagh u van a mbamtaver. Gba u mbamaren vea wase mbayev vev u fan mkposo ne nahan.—Yer. 1:19.

 [Ngeren u kiriki/Foto u sha peeji 6]

Doo u Wan Wam Una Tamber Cii Ve Una Er Batisema Yee?

Ashighe agen mbayev ka vea kuma u eren batisema je kpa, mbamaren vev ve kaa ér ve tamber. Ka atôakyaa a nyi nahan alaghga aa na ve vea er nahana?

M ngu cian mer aluer wan wam er batisema yô, alaghga una va gba ken isholibo i vesen ken hemen, nahan a dugh un ken mimi kera. Doo u se na jighjigh ser aluer ma gumor er batisema ga yô, Aôndo una kera pine nan kwagh sha aeren a nan gaa? Solomon yange nger mkaanem man sha ci u agumaior. A kaa ér: “Fa, sha ci u [aeren a ou], Aôndo Una va a we hen ijir.” (Orpa. 11:9) Paulu yange umbur se kwagh ugen u a lu sha ci u mbayev man mbaganden kpaa yô, ér: “Hanmô wase nana va ôr Aôndo kwagh u nan iyol i nan.”—Rom. 14:12.

Aôndo una pine mbacivir un mba ve er batisema man mba ve lu a er ga la cii akaa a ve eren ken uma ve la. I de hungur we er Yehova a kuran mbacivir un ga; kor ve sha u ‘lumun ér i̱ va mee ve i̱ hemba agee a ve ga.’ (1 Kor. 10:13) Aluer ‘mba geng ge geng’ shi mba nôngon a imeen yô, vea fatyô u suur sha Aôndo ér a̱ wase ve. (1 Pet. 5:6-9) Kwasekristu ugen u lun a ônov nger wener: “Mbayev mba ve er batisema yô, hemba mban a atôakyaa a palegh akaabo a taregh. Wan wam u nomso, u a er batisema sha anyom 15 yô, nenge ér batisema ka kwagh u kuran or. A kaa ér, ‘Ka wea er batisema yô, u henen wer u er kwagh u tindi u Yehova a vende ga.’ Batisema ngu a tahav mbu mgbeghan se u eren kwagh u perapera.”

Aluer u tese mbayev ou u ungwan imo i Aôndo sha mkaan shi u ver ve ikyav i dedoo yô, u fatyô u lun a vangertiôr wer vea er batisema kpa, vea za hemen u ungwan imo na her. Anzaakaa 20:7 kaa ér: “Orperapera u nan zenden ken mimi u nan yô, ônov mba nan mba ken ijime kpaa á saan ve iyol!”

M soo mer wan wam a er akaa agen a a tsough u eren la ve. Gba u agumaior aa hen u eren tom, sha er shighe a karen yô, vea fatyô u tilen sha angahar a ve yô. Kpa kwaghbo gema ngu ken ieren i we taver ve ishima wer ve hemba veren ishima sha makeranta u henen kua inyaregh ki keren a mcivir u mimi la. Shighe u Yesu lu ôron kwagh u “ivor” shin kwaghôron u Tartor, u a vese ga la, a kaa ér: “Man u i te ivor hen a nan ken usaa yô, ka u ka nan ungwa kwaghôron la kpa anzughul a tar ne a nyian ishima man icugh i inyar ve va imbishi kwaghôron la, a kera ume atam ga.” (Mat. 13:22) Aluer ma ormaren nan taver wan u nan ishima ér nana hemba veren ishima sha akaa a taregh a i lu u nana er la aa ikyaryan i nan vea Yehova yô, kwagh ne una fatyô u panden isharen i wan la nan lu a mi u civir Aôndo la.

Shighe u anmgbian ugen u fan tom u ortamen tsema tsema lu ôron kwagh u agumaior a a kom batisema kpa mbamaren vev ve lumun ér ve er ga la, a kaa ér: “U yangen ma gumor batisema u eren la una na nana kera soo u zan hemen ken mimi ga, nahan iyol ia kpe nan.” Shi ortamen u sôron atôônanongo ugen kpa nger ér: “Gumor nana fatyô u hiin u henen ér nan yina ken jijingi, shi vangertiôr kpa nana kera lu a mi ga. Nana fatyô u yemen ken tar sha u nana za er kwagh u nana taan ave vanger a mi yô.

[Foto]

Gba u a lu yunivasiti i zan ia lu u kwagh u hiihii yee?

[Foto u sha peeji 3]

Gumor nana fatyô u tesen ikyav ér nan ngu orhenen

[Foto u sha peeji 3]

U wan ago iyol sha mbamkombo shi nan akaaôron kua mbamlumun

[Foto u sha peeji 4]

U ungwan imo i mbamaren

[Foto u sha peeji 4]

U eren tom u pasen kwagh

[Foto u sha peeji 4]

Mbamsen ou