Se Mba Duen a Mgber u Iyoukura i ken Zwa Buter ú Taver Ga

SAAN se iyol u yôôn ser, hii sha mgber u Iyoukura i henen ken tiônnongo ingin ne je, hanma uwer yô, se lu gberen Iyoukura i ken zwa Buter ú taver ga kpaa; se kar eren kwagh ne inyom i môm se nenge. Mgber ne una lu a ngeren mba henen ken tiônnongo, shi aluer ian ngi yô, a wa ngeren mbagenev kpa ker. Se na jighjigh ser kwagh ne una wase Mbashiada mba Yehova kpishi ken jijingi sha gbenda u injaa kpen kpen. Sha ci u nyi?

Zwa Buter ka zwa u anmgbianev asev kpishi ken ityar er Fiji man Ghana man Kenya man Liberia man Najeria man Papua New Guinea kua Solomon Islands nahan ve lamen yô. Shin er alaghga anmgbianev asev mba ken ityar ne vea lamen ijô i hen ityônya shin ijô ve i mar nahan kpa, ashighe kpishi ka ve lam zwa Buter ken mbamkombo mba tiônnongo man ken kwaghpasen kpaa. Nahan kpa, zwa Buter u ve lamen la ka u taver er u se ngeren ken ityakerada yase la nahan ga. Shi ior mba Yehova mbagenev mough yem ken ityar igen, ape í gbe u vea lam zwa Buter keng yô, shin er ve fe u i kom ve ga nahan kpaa. Heela tseegh ga, shi ka u vea fatyô u nyôron mbamkombo ken ijô ve i mar ga.

Ngeren mba se henen ken mkombo u Iyoukura i Henen hanma kasua la, ka gbenda u vesen u ú wasen se u zuan a kwaghyan u ken jijingi sha shighe vough yô. Sha nahan yô, i nger mgber u Iyoukura i ken zwa Buter ú taver ga la sha asember a taver ga man sha gbenda u ua lu or ican u kaven ga kpaa yô, sha er mba ve ze mkombo ne cii vea zua a iwasen kpishi yô. Igbende i Iyoukura i he ne ia lu kposo. Kpa atineakaa a kiriki man akumahiange man mbampin mba hiden saven kwagh kua ufoto yô, vea lu kwaghmôm a mba ken Iyoukura i í gberen kera keke la. Sha nahan yô, hanma mgber u or lu a mi cii nana fatyô u dondon kwagh u i lu henen la shi wan zwa ken mkombo u Iyoukura i Henen la kpaa. Nenge nen ikyav i se tese shin heen sha ikyumhiange i sha 2, i ngeren u henen ken tiônnongo u hiihii ken mgber ne la, sha er ne fa mkposo u asember a ken mbamgber mba uhar mban yô.

Se ver ishima ser Iyoukura i he ne ia wase ior kpishi mba ve lu sônon Yehova ér: “Nam mkav, m̱ hen atindi a Ou” la. (Ps. 119:73) Se mba a vangertiôr ser mba ve fe zwa Buter kpishi ga, kua mbayev mba ve lamen zwa Buter kpa vea hemban wan iyol sha mkombo u Iyoukura i Henen la hanma kasua. Se sugh Yehova kigh kigh, er ‘anmgbianev ve doo un ishima,’ a lu nan kwaghyan mgbeghaa sha ashighe ashighe, sha ikyev i “wanakiriki u jighjigh man u fan kwagh” nahan.—1 Pet. 2:17; Mat. 24:45.

Mbahemenev mba Shin Tine mba Mbashiada mba Yehova