U Wa Ikyo Sha Akaa A Yehova A Te Icin Sha Mi Wang La Kpa?

“Ka gbenda je ne, za nen sha u.”—YES. 30:21.

1, 2. Satan de akaa cii ér saa una er nyi, man Mkaanem ma Aôndo ma wasen se nena?

 IKYAV i tesen gbenda i i ver ishigh vegher ugen kposo yô, ia tsume a tsume a we tseegh ga, kpa ia na ú za tagher a kwaghbo kpaa. Tôô ase wer ma ijende you nan ta u icin ér, iferor ugen musan ikyav i tesen gbenda sha apera ér nana bula mba ve lu zan zende sha gbenda shon, kpa ve fe u tsembelee ga la. Nahan u wa ikyo sha icintan la ga he?

² Sha mimi yô, Satan ka iferor u a de akaa cii ér saa una tsume a vese keng keng yô. (Mpa. 12:9) Aeren a bo a se tim sha mi ken ngeren u se sember henen la cica cii due hen Satan, man a soo ér aeren ne a na se se̱ undu gbenda u zan ken uma u tsôron la. (Mat. 7:13, 14) Kpa kwagh er doo yô, Aôndo wase u lun a erdoo la ta se icin ér se de dondon ‘akav a tesen gbenda’ a Satan, a tsumen a or la ga. Hegen se seer timen sha aeren a bo a Satan agen atar. Er se lu timen sha igbenda i Mkaanem ma Aôndo ma a wase se u palegh ameen a Satan la, alaghga a lu se er Yehova ngu van se ken ijime, shi tesen se gbenda u se za yô, kaan a vese ér: “Ka gbenda je ne, za nen sha u” nahan. (Yes. 30:21) Aluer se mba henen sha akaa a Yehova a te icin sha mi wang la yô, se hemba kangen ishima u wan ikyo sha akaa shon.

De Dondon “Mbatesen mba Aiev” Ga

3, 4. (a) Mbatesen mba aiev mba er ijôr i i̱ om i te ikyembegh nahan sha nyi gbenda? (b) Mbatesen mba aiev mba dugh hana, man kanyi ka ve soo?

³ Tôô wer u ngu karen hen ma iombortar yemen zende. Nahan u ta ashe u nenge a ijôr ken hemen, maa u kar u ngu zan her, u ngu henen wer u za zua a an-mnger shimi u ma imura. Nahan kpa, u za nôô her yô, u nenge ijôr la uma ta ikyembegh. U hide u tile tengemeen kpen kpen! Mbatesen mba aiev mba er ijôr i i̱ om i te ikyembegh la nahan. Hanma or u nan ze hen a ve ér nana za zua a mngerem ma mimi cii yô nana va ahenge tsung. Yehova ta se icin sha kwagh u mbatesen mba aiev la sha ikyev i apostoli Paulu man Peteru. (Ôr Aerenakaa 20:29, 30; 2 Peteru 2:1-3.) Mbatesen mbara nahan ka unô? Mkaanem ma Aôndo na mbaapostoli mba uhar mban nger la wase se u fan ape mbatesen mba aiev ve dugh, man gbenda u ve eren tom la kpaa.

⁴ Paulu yange kaa a mbatamen mba ken tiônnongo u ken Efese la ér: “Her atô wen je kpaa ior vea mough, vea gba ôron akaa a geseghaa.” Peteru kpa yange nger mba ve lu Mbakristu a na imôngo mbara ér: “Ken a ven kpaa mbatesen mba aiev vea va lu.” Nahan yô, mbatesen mba aiev mba dugh hana? Mba dugh ken tiônnongo. Amba la ka mba vendan mimi. * Kanyi ka ve soo? U duen ken tiônnongo u alaghga yange doo ve ishima la kera tseegh yô ka kom ve ga. Apostoli Paulu pase awashima ve ér, ka “sha u vea urugh mbahenen ken ijime ve yô.” Mbahenen mba Paulu a er kwagh ve heen ne ka mbahenen mba Yesu Kristu. Mbatesen mba aiev mban mba za keren mbahenen vev ken won ga, kpa ka ve nôngo ér vea mee mbahenen vea due a ve ken tiônnongo u Kristu kera. Mbatesen mba aiev mban due sha u yan mbahenen mba jighjigh mba ken tiônnongo, sha u vihin jighjigh ve u nan shi nan ér ve undu mimi, er “ugbaseela mba huav” nahan.—Mat. 7:15; 2 Tim. 2:18.

5. Ka igbenda i nyi mbatesen mba aiev ve eren tom a mini?

⁵ Mbatesen mba aiev mba eren tom nena? Igbenda i ve eren tom la tese ayom a ve. Mba vendan mimi ka ve nyôr a mbamhen mba vihin ior ken “myer.” Ka ve nyôr a mbamhen mba vendan mimi ken myer, vough er mbaaferev ka ve mee ve nyôr a akaa ken tar ugen sha tindi ga nahan. Mba vendan mimi ka ve ôr “akaaôron a sha atseregh.” Inja na yô, ka ve nyoho zwa sha er ior a ungwa mbamhen  vev mbaaiev mbara vea na jighjigh ér ka mimi yô, di er mbaaferev mba ka ve er ujebu mba ityakerada sha gbenda u ior vea hen ér ka ityakerada i mimi yô. Ka ve nôngo ér ior kpishi ve dondo ve, man ka ve er kwagh ne sha u samber a atesen a sha “atseregh” shi ka ve ‘kôr akaa agen ken uicighanmbauruamabera ve goom a mi’ sha u i zua sha mbamhen vev yô. (2 Pet. 2:1, 3, 13; 3:16) Kwagh ne tese wang ér, kwagh wase gba mba venda mimi ishima ga. Aluer se dondo ve yô, se undu gbenda u zan ken uma u tsôron la.

6. Bibilo wa se kwagh wang sha kwagh u mbatesen mba aiev ér nyi?

⁶ Se wa ikyo sha kwagh u mbatesen mba aiev nena? Kwagh u Bibilo i we se sha gbenda u se wa ikyo sha kwagh u mbatesen mba aiev la wanger. (Ôr Mbaromanu 16:17; 2 Yohane 9-11.) Mkaanem ma Aôndo kaa ér, “palegh nen ve.” Kwagh la tese ér gba u se lu ica a ve. Icintan i Bibilo ne ngi vough ér icintan i ortwer u nan kaa a we ér u palegh or u nan lu a angev mbu tsaren mbagenev nahan. Ortwer la fa ér aluer angev mbura tsar u yô, u kpe. Icintan na la wanger, nahan u er kwagh u nan kaa u la. Bibilo kaa a vese ér mba vendan mimi mba er or u a lu a angev mbu tsaren la nahan, man ka ve tesen ior akaa a aa na vea gema henen kwagh er ve nahan yô. (1 Tim. 6:3, 4) Yehova ngu er ortwer u dedoo la nahan. Ngu kaan a vese wang ér se de ze ikyua a mbatesen mba aiev ga. Gba u se kange ishima ser se ungwan icintan na la hanma shighe cii.

7, 8. (a) Kanyi ka se er sha u palegh mbatesen mba aieve? (b) U kange ishima u palegh mbatesen mba aiev sha ci u nyi?

⁷ Kanyi ka se er sha u palegh mbatesen mba aieve? Se mba nyer a ve ken ya wase ga, shi se mba sughun ve tsô kpaa ga. Se mba er ityakerada ve kpaa ga, shi se mba nengen akaa a ve eren sha televishen la ga shi se mba ze sha ajiir a ve a sha Intanet shin se mba seer mkaanem asem sha ajiir a ve a sha Intanet la kpaa ga. Se mba eren nahan sha ci u nyi? Hiihii yô, ka sha ci u “Aôndo u mimi” la doo se ishima. Nahan se soo u keghen ato a atesen a aiegh, a a nyiman mimi u ken Mkaanem ma Aôndo la ga. (Ps. 31:5; Yoh. 17:17) Shi se soo nongo u Yehova, u a lu tesen se akaa a mimi a doon tsung sha ikyev i ú la. Ka nongo u Yehova u tese se iti i Yehova man inja i iti shon, man awashima na sha ci u tar ne, man kwagh u ka a er se zum u se kpe la, kua kwagh u ishimaverenkeghen i mnder u shin ku la ye. U umbur er yange saan we iyol shighe u ú hii u henen akaa a mimi ne kua agen la kpa? Nahan yô, de lumun wer mbatesen mba aiev ve na u hingir u undun nongo u Yehova u u tese u akaa a mimi ne la ga.—Yoh. 6:66-69.

⁸ Mbatesen mba aiev vea ôr nyi je kpa, se dondo ve mayange ga! Ma ityôkyaa ngi i se keghen ato a ior mba ve lu er azôr a uman tan ikyembegh la ga. Mba ve keghen ato a ve cii, a saa ve tengemeen. Se kange ishima ser se za hemen u tilen sha mimi hen Yehova kua nongo na. Nongo ne ngu ve se ahenge ga, kpa ngu ne se mngerem ma wang ma mimi u a lu ken Mkaanem ma Aôndo la.—Yes. 55:1-3; Mat. 24:45-47.

De Dondon “Ukwaghhir” Ga

9, 10. Paulu yange ta Timoteu icin sha kwagh u “ukwaghhir” ér nyi, man alaghga Paulu lu a nyi ken ishima? (Nenge ngeren u shin kpe la kpaa)

⁹ Ashighe agen a musan ikyav i tesen gbenda, ia ver ishigh vegher ugen, kpa a lu se ican u kaven ga.  Kpa ashighe agen yô, a taver u kaven. Kape mbaaie mba Satan kpa ve lu je la. Aluer se ver ishima ga yô, una ngôôr tsumen a vese sha mbaaie nav mbagenev ga. Apostoli Paulu ta se icin sha kwagh u mbaaie mban. A yila ve ér “ukwaghhir.” (Ôr 1 Timoteu 1:3, 4.) Ukwaghhir mban kanyi, man se palegh u keghen ato a ve nena? Gba u se fa mbamlumun mba sha mbampin mban sha er se za hemen u lun sha gbenda u zan ken uma u tsôron la yô.

¹⁰ Icintan i Paulu ta sha kwagh u ukwaghhir la ngi ken washika u hii ngeren Timoteu, u lu ortamen ken Kristu la. Paulu yange kaa a Timoteu ér a wanger tiônnongo shi a wase anmgbianev mba nomso man mba kasev ve za hemen u civir Yehova sha mimi. (1 Tim. 1:18, 19) A fatyô u geman ishember i ken zwa Grika i Paulu a yer ér “ukwaghhir” la ér “aie” shin “kwaghalôm.” Takerada ugen kaa ér, ishember ne ngi ôron kwagh u kwaghalôm u kwaghaôndo, u a zough sha kwagh u mimi cuku tsô kpaa ga yô. (The International Standard Bible Encyclopædia) Alaghga Paulu lu henen sha kwagh u mbaaie mba kwaghaôndo mba ior dughun sha ayange a tsuaa, sha u i doo ior u ungwan la. * Paulu kaa ér ukwaghhir mban lu mba bov, sha ci u yange ve va a va a “anyiman a gbilinigh tsô.” Inja na yô, ior mba ve keghen ato a ukwaghhir mban yô, ka ve hii u pinen mbampin sha akaa a a lu a mimi ga la, shi ve vihi shighe ve sha u keren mbamlumun. Satan eren tom a ukwaghalôm man mbaaie mba kwaghaôndo mban sha u nan ér ior ve hungur akaa a a lu a injaa la. Paulu lu wan se kwagh wang ér: De veren nen ato sha ukwaghhir ga!

11. Satan eren tom a kwaghaôndo u aiegh sha ayom sha u tsughun ior nena, man ka icintan i nyi se ungwa ve Satan una tsume a vese ga?

¹¹ Ka ukwaghhir mba nyi se wa ikyo ga ve vea tsume a vese? Se fatyô u kaan ser kwaghhir ka nyityô ityesen i kwaghaôndo i ia na se tôô ato “sha kwagh u mimi la kera” cii, inja na yô, ka ityesen i ia yange se u ungwan mimi je la. (2 Tim. 4:3, 4) Satan wa ayom kpen kpen. Eren tom a kwaghaôndo u aiegh sha u tsughun ior. Ka nahan ve Bibilo i kaa ér ngu a “gema iyol na er ka ortyom u iwanger nahan” ye. (2 Kor. 11:14) U tesen ikyav yô, ukwaghaôndo mba ken Mbakristu Mbaaiev senge ér ve mba dondon Kristu, kpa mba tesen mbaaie, inja er ityesen i Triniti man i igyamusu nahan. Shi ka ve tese ér iyol i or ka ia kpe, kpa uma u nan yô kpen ga. Ior kpishi hen ér Aôndo lumun a Kirimishi man Ista, kpa jighilii yô, akaa a ior ka ve eren sha shighe u uiniongo mban la due ken mcivir u aiegh. Aluer se ungwa icin i Aôndo a te se ér se due ken kwaghaôndo u aiegh kera shi se ‘de benden kwagh u hôngorough ave ga’ la yô, ukwaghhir vea tsume a vese ga.—2 Kor. 6:14-17.

12, 13. (a) Ka mbaaie mba nyi Satan a lu samber a mini, man ka mimi u nyi i pase sha kwagh u mbaaie mban ciilii? (b) Se er nan ve Satan una tsume a vese sha ukwaghhir ga?

¹² Satan ngu samber a mbaaie mbagenev mba se ver ishima ga ve vea tsume a vese yô. Se time sha mbaaie mban utar. Aie u hiihii yô ér: Or ngu a ian i eren hanma kwagh u nan soo cii, a lu kwagh u bo shin u dedoo kpaa. Mba samber a mbaaie mban sha televishen man ken ufiim man ken umagazin man ken upipambaabaver kua sha Intanet kpaa. Er se ongo mbaaie mban hanma shighe cii yô, ka ican ga u se hiin u henen kwagh sha imba gbenda la shi dondon mbamhen mba ijimbagh mba tar ne. Kpa jighilii yô, ka Aôndo i gbe u una ôr se kwagh u a lu u vough shin u a lu u vough ga ye. (Yer. 10:23) Aie u sha uhar yô ér: Aôndo una wa uwegh sha akaa a a lu zan hemen shin tar la mayange ga. Mhen ne na yô, ior mba kera henen sha kwagh u kper ken hemen shin u eren ishima i Aôndo ga. Ka ve henen sha kwagh u vea zua a mi ave ave la tseegh. Aluer se hii u lun a imba mhen ve la yô, se hingir “gbilin shin mbaumen atam ga” ken mcivir u se civir Aôndo ne. (2 Pet. 1:8) Jighilii yô, iyange i Yehova ngi van fefa je, man gba u se keghen i̱. (Mat. 24:44) Aie u sha utar yô ér: Aôndo wa ikyo sha kwagh wou ga. Satan soo ér se hen ser se kuma mba se doo Aôndo ishima ga. Aluer se lumun a aie ne yô, alaghga se de u civir Yehova. Kpa jighilii yô, hanma or u civir Yehova yô nan doo un ishima, shi nan gba un kwagh tsung je.—Mat. 10:29-31.

¹³ Gba u se wa ikyo sha er se henen kwagh er ior mba ken tar u Satan ne nahan ga yô. Ashighe agen  ka i lu inja er mbamhen man alam a ve la ka a mimi nahan. Kpa umbur wer Satan soo u tsumen a vese, man a fa u tsumen a ior hemba cii. Gba u se wa ikyo sha akaa a Bibilo i te se icin sha mi la, aluer se soo ser Satan a tsume a vese sha ukwaghhir ga yô.—2 Pet. 1:16.

De Dondon “Satan” Ga

14. Paulu yange wa kasev mba côgholov mba ve lu a mhem iyol la kwagh ér nyi, man doo u se cii se wa icintan ne ikyo sha ci u nyi?

¹⁴ Tôô ase wer ikyav i tesen gbenda igen ngi kaan ér: “Ka Gbenda u Dondon Satan Je Ne.” Mô wase môm kpa nana dondo ikyav i tesen gbenda la ga. Nahan kpa, Paulu ta se icin sha igbenda kpishi i alaghga Mbakristu mba ve tsegh ayol a ve sha ci u Aôndo je kpa vea “gema [vea] dondo Satan” la. (Ôr 1 Timoteu 5:11-15.) Mkaanem ma Paulu mara yange ma lu sha ci u “kasev mba côgholov mba ve lu a mhem iyol yô,” nahan kpa kwaghwan u a lu ker la ngu sha ci wase cii. Kasev mba côgholov mbara yange ve hen ér mba dondon Satan ga, kpa kwaghôron ve man ieren ve tese ér lu Satan jim jim ve lu dondon ye. Se er nan ve se palegh u dondon Satan ken mlana? Hegen se time sha kwagh u angereke a Paulu ta se icin sha mi la.

15. Kanyi Satan a soo, man kanyi Paulu a pase ér Satan eren tom a mi sha u urugh se ér se er ishima naa?

¹⁵ Satan soo ér se lam sha akaa a se ne jighjigh a mi la ga. A soo ér se de u pasen loho u dedoo. (Mpa. 12:17) A soo ér se tôô shighe wase se er abumeakaa shin se kuhwa ior mba Yehova ve nôngo num ayol a ve. Paulu ter akaa agen a Satan a eren tom a mi sha u nan ér se er kwagh u un soo yô. Paulu kaa ér kasev mba côgholov mba sha shighe na la yange ve ‘lu gbilin, ve gbaa zenden sha uya uya tsô.’ Kasev mba côgholov mban yange ve vihi shighe ve kpishi u za teman vea azende a ve shi lamen sha akaa a injaa ga. Gba u se wa ikyo se palegh ambaakaa la. Ikyav i tesen yô, se fatyô u vihin shighe wase kpishi shi vihin mbagenev kpa shighe sha u tindin ve a ilyoho shi ôron i ve tindi se a mi sha Intanet sha akaa a injaa ga man ashighe agen ka a lu a mimi ga la. Paulu shi kaa ér kasev mba côgholov mbara lu mba “eren angereke.” Ashighe agen mbaangerev ka ve ôr akaa a dang sha iyol i mbagenev. Kwagh ne ka kwaghbo, sha ci u angereke aa fatyô u vihin or iti. Ashighe kpishi kwagh ne ka a va a num hen atô u ior. (Anz. 26:20) Ior mba ve ôron akaa a mimi ga sha iyol i mbagenev la mba er Satan Diabolo nahan, vea fa nahan shin vea fa ga kpaa. * Paulu shi kaa ér kasev mba côgholov mbara lu mba “amber sha akaa.” Yange ve nôngo ér vea tese mbagenev kwagh u vea eren a uuma vev yô. Or môm nan ngu a ian i eren nahan ga. Akaabo ne cii aa fatyô u urugh se ér se de u henen sha tom u injaa u Yehova a ne se ér se er la. Gba u se er tom a shighe wase sha u pasen kwagh u Tartor u Aôndo. Aluer se de u pasen kwagh yô, se hii u dondon Satan je ve. Man aluer se dondo Satan yô, se hendan a Yehova je ve. Gba u hanmô wase nana tsua vegher u nana lu yô.—Mat. 12:30.

16. Se er nan ve se “gema [se] dondo Satan” ga?

¹⁶ Aluer se dondo kwaghwan u Bibilo yô, se “gema [se] dondo Satan” ga. Time ase sha kwaghwan u injaa u Paulu ne. A kaa ér se “eren . . . tom u Ter ngegh je.” (1 Kor. 15:58) Ka sea eren tom ngegh sha ci u Yehova yô, se lu a shighe u eren agbilinakaa, a aa fatyô u gbihin se ken kwaghbo la ga. (Mat. 6:33) Paulu shi kaa a vese ér se ôron kwagh u “doon u una fatyô u maan a maa” mbagenev yô. (Ef. 4:29) Kange ishima wer u ungwa shin u samber a angereke ga. * Na anmgbianev ou mba nomso man mba kasev jighjigh shi naan ve icivir kpaa. Aluer u er nahan yô, u ôron kwagh ve sha gbenda u doon hanma shighe cii. ‘Nôngo nen ngegh je sha u teman ving, lu nen sha kwagh wen  ayol a en.’ (1 Tes. 4:11) Tesen mbagenev wer kwagh ve gba u ishima, kpa eren kwagh ne sha icivir, sha ci u akaa a ve agen vea soo u lamen sha mi shin vea soo ér ior ve fa ga. Shi umbur wer, akaa a i gbe u mbagenev vea tsua ayol a ve u eren la, ka se se tsua a se na ve ga.—Gal. 6:5.

17. (a) Hii nan ve Yehova a pase se kwagh u se dondo ga la wang-na? (b) U kange ishima u eren nyi sha kwagh u gbenda u Yehova a soo ér se za sha u laa?

¹⁷ Se wuese Yehova kpishi er a pase se kwagh u se dondo ga la wang yô! Gba u hanma shighe yô se umbur ser, Yehova ta se icin sha akaa a se tim sha mi ken ngeren ne man u a kar la cii, sha ci u se doo un ishima kpishi. A soo ér Satan a de tsumen a vese, nahan se yaan ican ga. Alaghga gbenda u Yehova a soo ér se za sha mi la ua taver, kpa ka cii gbenda u u ze ken uma u tsôron je la. (Mat. 7:14) Hanma shighe yô, se kange nen ishima u ungwan Yehova zum u a kaa a vese ér: “Ka gbenda je ne, za nen sha u” yô.—Yes. 30:21.

[Ngeren mba shin kpe]

U Na Mlumun Wer Nyi?

U wa ikyo sha akaa a avur a ruamabera ne a te icin sha mi la nena?

• 2 Peteru 2:1-3

• 1 Timoteu 1:3, 4

• 1 Timoteu 5:11-15

[Mbampin mba ngeren u henen]

[Ngeren u kiriki/Ufoto mba sha peeji 19]

 U Tsendan Ingyur sha Ahumbe

Kwaghalôm u Mbayuda ugen, u i te un ica i gbe yô, tese kwagh u angereke a eren ka a va a mi la tsembelee je. I ta kwaghalôm ne sha igbenda kposo kposo, kpa kwagh u kwaghalôm shon a er jighilii yô, ka un ne.

Orgen lu zenden ken gar, vihin orfankwagh u hen gar la iti. Shighe kar yô, a za kav ibo na, nahan a za zamber a orfankwagh la ér a de un kwaghbo na, shi a tôndo zwa u eren nyityô kwagh u i gbe u una er sha u sôron or la iti cii. Orfankwagh la kaa a na ér a er kwagh môm tseegh, a̱ za tôô pilo i í we ingyur ker yô, a bugh, a tsenda ingyur la sha ahumbe. Shin er kwagh u í kaa a orangeregh ne ér a er la taver un nahan kpa, a za er nahan vough, been yô a hide hen orfankwagh la.

A pine orfankwagh la ér: “Hegen u dem kwaghbo wam ga?”

Orfankwagh la kaa a na ér: “Vande za kohol ingyur la cica cii man me de u kwaghbo wou ye.”

A gema a kaa ér: “Man me fatyô je kpa, gadia ahumbe pulugh a mi haa wue wue.”

Orfankwagh la man kaa ér: “Er i taver u za sangen ingyur la nahan, kape i taver u sôron iti yam i dedoo i mkaanem ou ma vihi la je la.”

Kwaghwan ne wanger. Er u kende zwa u er kwagh je, ka i taver kpishi u hiden a mkaanem mara, shi alaghga u fatyô u sôron mnyoon u mkaanem ou ma ve or a mi la ga. Cii man se hii u samber a angereke yô, doo u se tese kwaghfan sha u umbur ser, aluer se er nahan yô, se tsenda ingyur sha ahumbe.

[Foto u sha peeji 16]

Alaghga mbagenev vea lôhô mba vendan mimi hen uya vev nena?