Ú Fatyô U Lun Er Pinehashi Nahan Shighe u Ú Tagher a Mbamtaver la Kpa?

U LUN ortamen ken tiônnongo ka ian i icivirigh kpen kpen. Nahan kpa, mkaanem ma Aôndo tese ér mbatamen mba tagher a mbamtaver. Ashighe agen ka i gba u vea nenge sha akaa a i er shami ga yô, nahan i gba u vea ‘ôr ijir sha ci u Yehova.’ (2 Kron. 19:6) Shin alaghga a na ma orkuran tom u nan nenge ér nan ngu a wa iyol i eren ga yô, er Mose kpa yange lu un shighe u i na un tom ugen nahan, a kaa ér: “Mo m ngu di nyi je u me za hen Farao?”—Eks. 3:11.

Ruamabera u yange i nger sha tahav mbu tomov mbu ka mbu tsua mbatamen la, ngu a akav a injaa a mbakuran mba yange ve nôngo a atsan ve hemba yô. Pinehashi lu wan u Eleasar, wan u Aron, nahan lu sha ian i va hingir pristi u tamen. Akaa atar a yange er ken uma na yô, tese er i gbe u mbatamen vea tagher ishigh a mtaver sha kwaghfan man a ishimataver shi vea har sha Yehova yô.

“A Mough hen Atô u Ior”

Pinehashi lu gumor shighe u Mbaiserael haa afo hen ukpuun-kpuun mba Moabi la. Bibilo kaa ér: “Ior hii u eren idya a ônkasev mba Moabi; . . . ior ve ya, shi ve gure ve civir mbaaôndo vev kpaa.” (Num. 25:1, 2) Yehova haa mba ve er kwaghbo la bouange. U hen er yange a lu Pinehashi ken ishima shighe u ungwa ér ior mba eren kwaghbo, nahan kwagh la va a bouange la kpa?

Bibilo za hemen pase ér: “Yô, orgen u ken Mbaiserael za va a kwase u Midian va nyôr a mi hen anmgbianev nav sha ashe a Mose je kua sha ashe a ior i Mbaiserael cii, er ve lu vaan hen hunda u tenti u kohol ker la je.” (Num. 25:6) Pristi Pinehashi una er nena? Yange lu gumor, kpa Oriserael u lu eren kwaghbo la gema lu orhemen ior ken mcivir.—Num. 25:14.

Kpa Pinehashi lu cian Yehova, lu ior ga. Nahan nengen a ve mbauhar mbara yô, fese je maa a tôô iwange a cir or la ityô, a za nyôr ken tenti a kuma ve uhar cii kar due keera. Yehova nenge ishimataver i Pinehashi man kwagh u er a akperan shio la nena? Fele je maa, Yehova kar a bouange la kera, shi na Pinehashi injar sha u yan ikyur a na ér tsombor na ua er tom u pristi “gbem.”—Num. 25:7-13.

Mba ve lu mbatamen mba ken Kristu nyian la mba eren kwagh sha tswam ga. Nahan kpa, gba u vea kegh iyol u eren kwagh a akperan shio man sha ishimataver, er Pinehashi nahan. U tesen ikyav yô, Guilherme yange er tom ortamen la iwer kpuaa tseegh, maa i wa un ken kômatii u ôron ijiir ken tiônnongo. Or u yange er kwaghbo la lu ortamen u yange wase Guilherme shighe u lu iyev la yô. Guilherme kaa ér: “Yange hagher mo u eren tom ne kpen kpen. M lu fantyô u yaven tugh ga. Tsô m gba gbidyen kwar ken ishima, keren igbenda i me ôr ijir ne er atindi a Yehova a tese la, a kera lu er lum ken ishima la ga yô. Yange m er msen ayange imôngo shi m tôv kwagh ken ityakerada yase.” Kwagh ne taver un ishima u nengen sha ikyaa i taver ne, nahan a  wase anmgbian na u er kwaghbo ne ken jijingi.—1 Tim. 4:11, 12.

Aluer mbatamen mba eren kwagh sha ishimataver shighe u ma kwagh ken tiônnongo a ne i gbe u a er nahan yô, vea lu veren ikyav i jighjigh u nan man mimi. Gba u Mbakristu mbagenev kpa vea er kwagh sha ishimataver, vea pasen isholibo i vesen i or nan er ve fe kwagh sha mi yô. Kape ka i gba u saa or a tile sha mimi ve nana pav a ijende i nan shin anngô u nan u hen tsombor, u i dugh nan ken mimi sha je la.—1 Kor. 5:11-13.

Mkav Yangen Ayôôso

Ishimataver i Pinehashi la yange i lu di ieren i gumor i gban eren kwagh gagher tsô ga. Nenge ase er yange tese mkav, er kwagh tsev tsev man sha kwaghfan, shighe u ibaver igen gba un ken ato yô. Kwe u Ruben man u Gadi kua vegherkwe u Manase yange ve ta atse ikyua a Ifi u Yordan. Mbaiserael mbagenev mba nengen nahan yô, ve kure ikyaa ér ka sha ci u mcivir u aiegh, nahan ve wa iyol u za tan ityav sha a ve.—Yos. 22:11, 12.

Pinehashi yange er nena? Pinehashi vea atiator a Mbaiserael yange ve za lam a mba ve ta atse la sha kwaghfan. Ikwe i i wa i kwagh iyol la pase ér ve ta atse la ka sha ci u “civir TER.” Kwagh la maa yange ayôôso.—Yos. 22:13-34.

Aluer Orkristu ungwa ma kwagh u doon ga sha iyol i Orkristu ugen shin ma ikyaa i i we nan iyol yô, doo u se er kwagh er Pinehashi nahan! Mkav yangen se u vihin ishima shin ôron kwagh sha iyol i anmgbianev geseghee.—Anz. 19:11.

Mkav una wase mbatamen u eren kwagh er Pinehashi nahan nena? Ortamen ugen u a er tom ne i hembe anyom pue yô, mba yer un ér Jaime, a kaa ér: “Shighe u orpasenkwagh nan hii u ôron kwagh u iyongo i nan gbe vea orgen yô, ka m sôn Yehova fese mer a wasem me ta ikyaa a or ga, kpa me na iwasen i í har sha Ruamabera yô. Anmgbian u kwase ugen yange va hen a mo va pasem kwagh u anmgbian u kaven ishigh ken tiônnongo er a na yô. Er anmgbian ne lu ijende yam yô, yange ma taver mo u lamen a na ga. Kpa, mo vea anmgbian u kwase ne se time sha akaawan a Bibilo agen imôngo. Nahan a lumun ér kwagh u una hii eren yô, una za iyol na una za lam a anmgbian la. (Mat. 5:23, 24) Za er nahan kpa, ve hime iyongo la ave ave ga. Nahan m taver un ishima mer shi a nenge sha akaawan a Ruamabera agen. Maa a za er msen sha ikyaa ne, sha u nôngon ér una de anmgbian la kwaghbo la.”

Lu nyi i due ken kwagh nee? Jaime kaa wener: “Iwer ngi kar imôngo yô, anmgbian u kwase la shi va hen a mo. A kaa a mo ér yange shighe karen yô, anmgbian la vaa afanyô sha kwagh u yange ôr la. Anmgbian la sôr ian ve due kwaghpasen imôngo shi wuese anmgbian u kwase la kpishi. Iyongo maa kure. Yange mea we ave sha ikyaa la yum nahan alaghga ma i nenge ér mo m ngu tan ikyaa a  or sha mimi ga, shi kwagh la ma kure sha inja vough nahan ga.” Bibilo wa kwagh ér: “De dugh fefa sha u za ôron ijir ga.” (Anz. 25:8, NW) Mbatamen mba lun a mkav ka ve taver Mbakristu mba iyongo i zough ve yô asema ér ve dondo akaawan a ken Ruamabera sha u keren shi van a bem.

A Pine Yehova

Pinehashi lu a ian i icivirigh i eren tom u pristi sha ci u ior mba Aôndo tsua ve la. Er se vande teren nahan, hii iyev na je, lu a ishimataver man mkav kpishi. Nahan kpa, kwagh u wase un ve nôngo a mbamtaver tsembelee yô, lu sha ci u yange suur sha Yehova.

Shighe u ior mba Gibea mba ve lu kwe u Benyamin yav a kpankwase u Orlevi ugen zan zan ve wuan un la, ikwe i Iserael igen soo u tan num sha Mbabenyamin. (Mbaj. 20:1-11) Ve er msen hen Yehova cii ve ve za ityav ye, kpa acin ahar cii, ityav mbira hemba ve vihi kpen kpen. (Mbaj. 20:14-25) Vea kure ikyaa ér mbamsen mba ve er la wase ga shinii? Mimi je Yehova yange soo ér ve er kwagh sha kwaghbo u i er laa?

Pinehashi u lu pristi u tamen u Mbaiserael hen shighe ne la, lu a vangertiôr ken Yehova her dông; kwa ne kpa shi a er kwagh u due tseer tseer yô. A er msen wener: “M̱ shi m̱ due m̱ za nôngo ityav a anngôm Benyamin, shin m̱ de?” Yehova ungwa msen na la, na Mbabenyamin sha ikyev ve, nahan i nande Gibea hingir ice.—Mbaj. 20:27-48.

Kwagh ne tese se nyi? Mbatamen vea nôngo kwagh kpoghuloo shi vea er msen sha uzayol mbagenev ken tiônnongo je kpa, uzayol mbara vea lu her. Aluer kwagh er nahan yô, doo u mbatamen vea umbur mkaanem ma Yesu man, ma kaa ér: “Sôn nen, á na ne; ker nen, né zua a mi; mande nen uwegh, á bugh ne.” (Luka 11:9) Shighe u i lu inja er Yehova ngu eren kwagh sha msen fele ga je kpa, mbakuran vea fatyô u lun a vangertiôr ér Yehova una er kwagh sha mi sha shighe na.

U tesen ikyav yô, tiônnongo ugen ken tar u Ireland yange soo u maan Iyou i Tartor hange hange, kpa or u lu ityough sha kwagh u nan ior inya hen ijiir ve la gema soo kwagh u anmgbianev mbara ga. Hanma ijiir i yange vea za tsôr ér vea maa Iyou i Tartor cii, or ne a venda. Lu inja er orgen u shi nana fatyô u nan ve ian i maan kwagh yô, lu orvesen u mba nengen sha kwagh u nan ior inya ken tar la cii la nahan. Msen yange wase anmgbianev mban er wase sha ayange a Pinehashi la nahan kpa?

Ortamen u hen ityônya ugen kaa ér: “Se mba eren msen kpishi shi se mba zamber Yehova cii yô, se er zende se za ape orvesen u mba nengen sha kwagh u nan ior inya lu la. Yange i kaam ér alaghga a tôô se ukasua imôngo cii ve se fatyô u nengen a orvesen la ye. Nahan kpa, se nôngo se zua a na, se lam a na ken miniti utaan. Nengen a ufoto mba Ayou a Tartor mba se kpela ser se soo u maan la yô, a na se ian ér se za hemen, man hii hen shighe la je, orvesen u nengen sha kwagh u inyaa hen ityônya la gba wasen se sha afatyô na cii. Kwagh ne yange umbur se er msen a lu a tahav yô.” Yehova una ungwa mbamsen mba mbatamen mba ve suur sha a na la.

Pinehashi yange tôô ikyav ken Iserael u tsuaa la kpishi, kpa ishimataver man mkav man msuur u a suur sha Aôndo la wase un u tagher a mbamtaver shi hemban ve. Yehova yange lumun a gbenda u Pinehashi nengen sha tiônnongo u Aôndo sha gbashima la. Anyom nga kar ér 1000 nahan yô, jijingi mgbegha Esera nger ér: “Pinehashi wan u Eleasar lu or u nengen sha a ve, sha ayange a tsuaa la; TER lu a na imôngo.” (1 Kron. 9:20) Yehova a lu a mba ve hemen ior mba Aôndo nyian la, man jim je yô, Mbakristu mba ve civir un sha mimi la cii.