U Ngu Den Wer Yehova A Lu Kwar Wou Kpa?

“Kpa vande keren nen tartor Na man perapera Na, man akaa ne cii á seer ne a ye.”—MAT. 6:33.

1, 2. (a) “Iserael u Aôndo” u i er kwagh na ken Mbagalatia 6:16 la tile sha ityough ki unô? (b) “Ikwe i Iserael i pue kar ihiar” i í er kwagh u i ken Mateu 19:28 la tile sha ityough ki unô?

 KA WEA ôron Bibilo man wea za asegh sha iti i Iserael la nahan, kanyi ka i va u ken ishima? Ka u hen kwagh u Yakob, wan u Isaka, u yange i gema un iti hingir Iserael laa? Shin ka u hen kwagh u ônov nav, ikyurior i Iserael i tsuaa laa? Man Iserael u ken jijingi la di ye? Ka a ôr kwagh a ter iti i Iserael la sha injakwagh yô, ashighe kpishi ka i lu kwagh u “Iserael u Aôndo,” iorov 144,000, mba i tsegh ve sha icighan jijingi, sha u ve lu utor man upristi sha la. (Gal. 6:16; Mpa. 7:4; 21:12) Kpa nenge er i gem i ter ikwe i Iserael 12 sha gbenda ugen kposo ken Mateu 19:28 yô.

² Yesu kaa ér: “Ne mba ne dondo sha a Mo ne, sha mgbe u he, zum u Wan u or Una tema sha ikyônough Nagh ki torough ki engem la yô, ne kpaa, né tema sha mkônom ma torom pue kar m har, né ôr ikwe i Iserael i pue kar ihiar la ijir.” Ken ivur ne, “ikwe i Iserael i pue kar ihiar la” ka mba vea zua a uma u tsôron ken Paradiso shin tar, mbahenen mba Yesu mba i shigh ve mkurem la vea gema a ôr ve ijir la. Vea zua a iwasen sha tom u pristi, u mba 144,000 mbara vea er la.

3, 4. Ka ikyav i dedoo i nyi mba i shigh ve mkurem mbajighjigh mbara ve vere?

³ Mba i shigh ve mkurem nyian la mba nengen tom u ve eren la ér ka tom u icivirigh, er upristi man Mbalevi mba sha ayange a tsuaa la nahan. (Num. 18:20) Mba i shigh ve mkurem la mba veren ishima ér i na ve ma ijiir  shin tar ne sha u i hingir dyako ve ga. Kpa mba veren ishima keghen u va teman tor vea Yesu Kristu shin lun upristi vea na imôngo. Kwagh u i er ken Mpase 4:10, 11 sha kwagh u mba i shigh ve mkurem shighe u vea lu sha la, tese ér vea za hemen u civir Yehova sha iantom la.—Esek. 44:28.

⁴ Shighe u mba i shigh ve mkurem mbara ve lu shin tar ne her la, gba u vea eren kwagh u tesen ér Yehova ngu kwar ve. Ian ve i civir Aôndo la hemba gban ve kwagh a hanma kwagh ugen cii. Ve na nagh ku ipaan ku Yesu kura jighjigh shi mba dondon un hanma shighe cii, sha nahan yô, mba ‘taver a taver myila u i yila ve la man mtsough u i tsua ve la.’ (2 Pet. 1:10) Mbamlu vev man mbamfe vev mba kwaghmôm ga. Nahan kpa, mba ker ave sha mbamyen vev sha u eren tom akor akor ken mcivir u Aôndo ga. Kpa ka ve hemba veren ishima sha tom u Aôndo a hanma tom ugen cii, ve er u er ve fetyô la. Shi ve ver ikyav i dedoo sha ci u mba ve lu veren ishima u va lun ken paradiso la.

5. Mbakristu cii vea de ér Yehova a lu kwar ve nena, man alaghga kwagh ne una taver sha ci u nyi?

⁵ Sea lu a ishimaverenkeghen i yemen sha shin i lun shin tar ne kpa, a gba u se ‘nyiman iyol yase, se tôô kon wase u mtsaha, se dondo sha Kristu.’ (Mat. 16:24) Ior umiliôn imôngo mba ve lu veren ishima u va lun uma ken Paradiso yô, mba civir Aôndo shi mba dondon Kristu sha imba gbenda la. Ka a lu u vea fatyô u eren tom kpishi yô, tom u eren kpuaa la ngu kom ve ga. Asema mgbegha mbagenev ker u eren akaa ken uma ve akuma a kuma, nahan ve hingir upania. Mbagenev yô, hanma inyom ka ve nôngo ve tôô pania ken iwer igen. Shi mbagenev yô, ve kanshio u eren pania, kpa ka ve pase kwagh kpoghuloo. Amba la nga er Maria, u Aôndo doo un ishima kpishi, u yange haa Yesu mkurem ma human doon sha ityou la nahan. Yesu kaa ér: ‘A erem kwagh u dedoo. . . . A er kwagh u a fetyô yô.’ (Mar. 14:6-8) Ken tar u Satan a ye gom ker ne, alaghga a lu se zange u eren kwagh u se fetyô cii ga. Nahan kpa, ka se nôngo kpoghuloo, se suur sha Yehova. Nenge ase igbenda inyiin i se eren kwagh ne yô.

U Vanden Keren Tartor U Aôndo

6. (a) Ior wuee mba tesen ér kwar ve ngu ken uma ne tseegh nena? (b) Er nan ve i hembe doon u lun a mnenge u Davidi laa?

⁶ Yesu yange tese mba dondon un ér ve vande keren tartor u Aôndo man perapera na. Ior i tar ne mba vanden keren mtsera ve, er ve lu “ior i tar, i kwar ve u lu hen uma ne” yô. (Ôr Pasalmi 17:1, 13-15.) Er kwagh a gbe mbakpishiv a Orgban ve ga yô, ka ve tume ityough keren uma u yôugh yôugh, man u tseren tsombor shi veren u dyako. Kwar ve ngu ken uma ne tseegh. Davidi yô, yange hemba gban un u zuan a “iti i mimi” hen Yehova, er wan na yange va wa kwagh ken masejime ér i er nahan. (Orpa. 7:1), Davidi nenge u yan ikyar a Yehova la hemba lun un kwagh u vesen a u hemban haren ishima sha asaren a na ken uma la, vough er Asav nahan. Yange saan un iyol u zenden vea Aôndo. Sha ayange a ase ne kpa, Mbakristu kpishi hemba veren ishima sha akaa a ken jijingi a tom u ve eren la.

7. Ka averen a nyi anmgbian ugen yange zua a mi sha ci u a ker Tartor hiihii?

⁷ Nenge ase kwagh u Jean-Claude, orgen ken tar u Central African Republic. Ka ortamen u lun a kwase man mbayev utar. Tom taver u zuan a mi ken tar la, nahan ior kpishi vea er nyityô kwagh cii, sha er a de ve tom ga yô. Iyange igen yô, orhemen u hen ijiirtom i Jean-Claude kaa a na ér a gema yaren tom tugh, sha ayange a ataankarahar a ken kasua cii; a hiin tom ahwa 6:30 aikighe. Jean-Claude pase un wener, er un nengen sha ugbayol mba tsombor na nahan, shi gba u una nengen sha mbamgbe mba ken jijingi mba tsombor na kpaa. Shi a kaa ér un ngu a tom u wasen tiônnongo. Orhemen na la er nena? A  kaa ér: “Aluer ikyôr doo u, u zua a tom yô, hungur a kwagh ugen cii, kua kwase wou man mbayev ou man uzayol ou cii. Gba u ú na uma wou cii sha tom wou, kwagh ugen hemba tom wou ga. Tsua kwagh u ú soo la hegen: kwaghaôndo wou shin tom wou.” Í lu we nahan, yange ma u er nena? Jean-Claude kav ér aluer i de un a de tom kpa, Aôndo una nengen sha a na. Una lu eren tom u Aôndo her ngeegh, nahan Yehova una wase un u nengen sha ugbayol mba tsombor na. Nahan ka gbe sha iyange i mkombo i igen ken atô u kasua yô, a za mkombo. Mba been yô, a wa iyol i yaren tom, a̱ lu u a za de un tom kpa lu a fa ga. Maa telefon na gba imo. Yange i de orhemen na la tom, kpa anmgbian wase ne yô, lu a tom na her.

8, 9. Se fatyô u kaven upristi man Mbalevi, sha u den ser Yehova a lu kwar wase nena?

⁸ Í lu er ka mbagenev yange vea lu ken imba mlu la yô, ma ve lu henen ér, ‘Me er nan ve me kure tom wam u nengen sha tsombor wam la sha wono?’ (1 Tim. 5:8) Wea vande lun ken imba mlu la shin wea lu a lu ga kpa, alaghga akaa a a er u ken uma wou la wase u u̱ fan wer mayange Aôndo una kende u ga, aluer ngu kwar wou, shi u wa ian you i civir un la ikyo yô. Shighe u Yesu kaa a mbahenen nav ér vande keren nen tartor Na man perapera Na la, a na ve ibumun ér: “Akaa ne cii á seer ne a.”—Mat. 6:33.

⁹ Hen ase sha kwagh u Mbalevi mba yange i kar tar i na ve ma kwar ga la. Er mcivir u wang lu kwagh u hemban gban ve ishima yô, ve har sha Yehova sha u zuan a kwaghyan, man Yehova kaa a ve ér: “Mo M ngu kwar wou.” (Num. 18:20) Shin er se lu upristi shin Mbalevi ga, shi se lu eren tom ken tempel kpôô kpôô ga nahan kpa, se fatyô u kaven ve, sha u lun a vangertiôr ser Yehova una na se akaa a kwagh a gbe se a mi la. Er ayange a masejime ne a lu been seer a seer ne, ka hemban lun hange hange u se na jighjigh ser Yehova una nengen sha a vese cii.—Mpa. 13:17.

U Vanden Keren Perapera u Aôndo

10, 11. Mbagenev suur sha Yehova sha kwagh u tom ve nena? Tese ikyav.

¹⁰ Yesu yange kaa a mbahenen nav ér ve ‘vande keren perapera u Aôndo.’ (Mat. 6:33) Inja i kwagh ne yô, ka u hemban wan ikyo sha atindi a Aôndo a sha kwagh u vough man u vough ga la, a atindi a ase. (Ôr Yesaia 55:8, 9.) Alaghga ne umbur er ken ijime la, ior mbagenev kahan taav shi ve teen un a tee shi ve tesen mbagenev ityav mbi nôngon shi ve teen ikyav mbi numuv yô. Kpa mba va fe mimi yô, mbakpishiv musan ityom ve, nahan ve kuma u a er ve batisema.—Yes. 2:4; 2 Kor. 7:1; Gal. 5:14.

¹¹ Orgen u i yer un ér Andrew yô, ver ikyav i dedoo sha gbaa ne. Yange un vea kwase na mba fe Yehova yô, ve tsua u civir un. Tom u Andrew doo un ishima kpishi, kpa a undu u. Sha ci u nyi? Sha ci u ijiir i Andrew lu eren tom her la wa ave sha ityav mbi nôngon, man un gema soo u vanden keren perapera u Aôndo, nahan a de tom la. Shighe u Andrew de tom ne la, lu a ônov uhar, lu a ime-mnger ga, shi mase shin a inyaregh ki una vihi ken atô u iwer kpuaa tseegh. Sha mnenge u or yô, lu inja er ngu a ‘kwar’ ga nahan. Yange ker tom a jighjigh u nan ér Aôndo una wase un. Un vea tsombor na ve hide ve hen sha akaa a yange er shighe la yô, ve kaa ér uwegh ku Yehova ku yina ga. (Yes. 59:1) Er Andrew vea kwase na ve we akaa ave hambe hambe ga yô, ve zua a ian i pasen kwagh hanma shighe la je kpaa. A kaa ér: “Ashighe agen mtaver u inyar man ya man angev, kua iyolbeen ka ve na se ishimanyian. Kpa Yehova kende se mayange ga. . . . Se fatyô  u kaan a akperan shio ser, u civir Yehova ka kwagh u hemban doon cii u or nana er yô.” *—Orpa. 12:13.

12. Ka ieren i nyi ia wase se ve se vande keren perapera u Aôndo? Tese akav a hen ityônya.

¹² Yesu yange kaa a mbahenen nav ér: “Aluer nea lu a jighjigh u nan sha inja i ishange i masetadi yô, ma ne kaa a uwo ne ner: Mough heen, hire kaara, kpa ma u mough; man ma kwagh u ne fatyô u eren un ga yô, una kera lu ga.” (Mat. 17:20) U fatyô u vanden keren perapera u Aôndo, aluer u eren nahan la una na u nyôr ken mbamtaver je kpaa je he? Aluer u ngu a akperan yô, lam a anmgbianev mbagenev ken tiônnongo. Uvande-eren mba vea ôr u la, vea na jighjigh u nan wou una seer taver kpeegh.

Lu a Ishughun sha Akaa a ken Jijingi a Yehova A Ne Se La

13. Aluer se mba civir Yehova a ishima yase i môm yô, se fatyô u veren ishima ser nyi sha kwagh u akaa a ken jijingii?

¹³ Aluer ian i u lu a mi i civir Yehova la gba u kwagh yô, fa wer una nenge sha mbamgbe ou mba ken jijingi man mba sha iyol cii, er yange nenge sha Mbalevi nahan. Hen ase sha kwagh u Davidi. Shin er á lu ken bar nahan kpa, yange na jighjigh ér Aôndo a na un akaa a kwagh gba un a mi la. Se kpa se fatyô u suur sha Aôndo sha u a na se akaa a kwagh a gbe se a mi ken jijingi la. Umbur wer lu shighe u Asav nyôr “ken icighanjiir u Aôndo” la, mase kaven kwagh u ishima lu zan un iyol sha mi la ye. (Ps. 73:17) Se kpa, gba u se suur sha Yehova sha u a na se kwagh u una wase se u kuran ikyar i se ye a na la yô. Nahan sea lu ken nyi mlu kpa, se tese iwuese sha ian i icivirigh i se lu a mi i civir Aôndo la. Se er nahan yô, se lu tesen ser Yehova ka kwar wase.

14, 15. Doo u se er nena shighe u i seer tan iwanger sha avur a Bibilo agene, man ka sha ci u nyi?

¹⁴ Ka u er nena shighe u Yehova, u a lu Imbor i iwanger i ken jijingi la, a te iwanger sha “akaacimin a Aôndo” a ken Bibilo laa? (1 Kor. 2:10-13) Apostoli Peteru ver se ikyav i dedoo sha gbenda u yange er kwagh shighe u Yesu kaa a mbaungwan a na ér: “Aluer né yaan iyol i Wan u or, man shi né maan awambe a Na kpaa ga yô, né lu a uma ken ayol a en ga” la. Er mbahenen nav kpishi tôô ér Yesu ngu ôron kwagh u iyol man awambe kpôô kpôô yô, ve kaa ér: “Kwaghôron ne ngu ican je; ka an nana fatyô u veren ato sha mini?” Maa ve “hide ijime, ve kera za a Na ityô ga.” Kpa Peteru kaa ér: “Tere, ka hen an je shi sé zaa? Ka We U lu a mkaanem ma uma u tsôron ye.”—Yoh. 6:53, 60, 66, 68.

¹⁵ Peteru yange kav kwagh u Yesu ôr sha kwagh u yan iyol Na shi man awambe Na la tsembelee ga. Kpa apostoli ne suur sha Aôndo sha u a ta un iwanger i ken jijingi. Ka a seer tan iwanger sha ma kwagh ken Ruamabera nahan, u keren u fan ityôkyaa i ken Ruamabera, i i ne ve i nyôôso kwagh la je he? (Anz. 4:18) Sha derianyom u hiihii la, Mbakristu mba ken gar u Berea lumun kwaghôron u Aôndo “sha gbashima shi ve lu timen ken icighanruamabera ayange ayange.” (Aer. 17:11) Aluer u ngu kaven ve yô, u seer lun a iwuese sha ian i icivirigh i ú lu a mi i civir Yehova la, man er a lu kwar wou la kpaa.

Er Ivese ken Ter Tseegh

16. Aôndo una fatyô u lun kwar wase sha kwagh u tindi u a lu ken 1 Mbakorinte 7:39 la nena?

¹⁶ Vegher ugen u i gbe u Mbakristu vea lu a mbaawashima mba Aôndo ken ishima yô, ka sha u dondon kwaghwan u Bibilo, u a kaa ér i er ivese “ken Ter tseegh” la. (1 Kor. 7:39) Mbakpishiv tsua ér vea lu kwav, a u ve wan ikyo sha kwaghwan u Aôndo ga la. Aôndo ka a nenge sha amba la doo doo. Yange a huan Davidi shi a̱ lu un inja er un ngu a or u wasen un ga yô, a er nena? A kaa ér: “M ngu pasen ican yam sha ishigh [ki Aôndo], m ngu ôron Un zayol wam. Zum u jijingi wam ure  ken a mo yô.” (Ps. 142:1-3) Alaghga Yeremia u lu kwav la kpa, kape yange a lu un ken ishima shighe u civir Aôndo sha jighjigh upuembaanyomov imôngo je la. Wea soo u henen kwagh u ikyav na la yô, ôr ityough ki sha 8 ki takerada u God’s Word for Us Through Jeremiah la.

17. Anmgbian u kwase ugen ka a nôngo a mtswenem ma ka ma kôr un ashighe agen la nena?

¹⁷ Anmgbian u kwase ugen ken tar u Amerika kaa ér: “Í lu je kpa, m ngu a tsua ken ishima mer me saa kwav ga. Aluer m zua a or u injaa yô, me vôso nan. Ngôm u a civir Yehova ga la, yange nôngo ér mo m lumun u vôson hanma or u nan ve cii. M pine un mer a soo ér una ya ibo shighe u ivaa yam i kera ze vough ga yôô? Shighe kar yô, a va nenge er m lu a tom u injaa, m lu nengen sha iyol yam tsembelee, shi saan mo iyol yô. Nahan a de u zan mo iyol.” Ashighe agen mtswenem ka ma kôr anmgbian u kwase ne. A kaa ér: “Ka a lu nahan yô, m suur sha Yehova. Mayange kenden mo ga.” Kanyi i wase un u suur sha Yehovaa? A kaa ér, “Msen ka a wasem u umbur mer Aôndo ngu kpôô kpôô, nahan mayange m ngu tswen ga. Er Uhembansha a ongom yô, a er nan ve me lu a icivir shi a saan mo iyol ga?” Er a lu a vangertiôr ér “u nan a na kwagh hembe saan iyol a u ngohol a ngohol kwagh” yô, a kaa ér: “Nahan ka m na iyol yam sha u wasen mbagenev, m ver ishima mer ve nam kwagh sha iwasen la ga. Ka mea henen mer, ‘kanyi me er sha u wasen via?’ nahan m lu a iember ken ishima kpishi.” (Aer. 20:35) Yehova ka kwar na, nahan saan un iyol a ian i icivirigh i a lu a mi u civir Yehova la.

18. Ka sha nyi gbenda nahan Yehova una gema u ú hingir kwar na?

¹⁸ Hanma mlu u ú nyer ker cii, u fatyô u den wer Yehova a lu kwar wou. U er nahan yô, we kpa a wa u ken ior mba Aôndo mba i saan ve iyol la. (2 Kor. 6:16, 17) Kwagh ne una na yô, u lu kwar u Yehova, er mbagenev kpa vande lun nahan. (Ôr Duteronomi 32:9, 10.) Er ikyurior i Iserael yange i hingir kwar u Yehova ken akuraior cii nahan, we kpa una fatyô u tsuan we, shi una nenge sha a we doo doo.—Ps. 17:8.

[Ngeren u shin kpe]

Ú Na Mlumun Wer Nyi?

U fatyô u den wer Yehova a lu kwar wou

• sha u vanden keren Tartor u Aôndo man perapera na nena?

• sha u tesen iwuese sha kwaghyan u ken jijingi la nena?

• sha u dondon tindi u Aôndo u a kaa ér i er ivese ken Ter tseegh la nena?

[Mbampin mba ngeren u henen]

[Mkaanem ma sha peeji 13]

Mcivir u Yehova ka una hingir kwagh u vesen ken uma wase yô, Yehova a hingir kwar wase

[Foto u sha peeji 15]

Ikyav i Yeremia la taver mo ishima