Angev Mbu De Yangen We Iember Ga

 TÔÔ ase wer u nder pepe, maa u soo wer tugh mbugen shi ma mbu il her ave ave je. Gba u ú nôngo a angev gayô ishimavihin. Alaghga a lu u ken ishima er yange lu Yobu ve ôr mkaanem man nahan, ér: “Ku hembam doon a akuhe am ne.” (Yobu 7:15) Aluer imba mlu ne pever ga zan zan anyom imôngo di ye?

 Ka mlu u Mefibosheti, wan u ijende i Tor Davidi, Yonatan, lu ker je la. Shighe u Mefibosheti lu anyom ataan la, a “osogh, a gba a sombo.” (2 Sam. 4:4) Shighe u i va wa un aie iyol ér a venda u tan ikyaa ken tor, ve shi i ngohol un akaa i kighir sha mi la, a shi nan kpa ishimavihin yange ia na iwan na la ia seer nyoon un. Nahan kpa, yange za hemen u veren ikyav i dedoo sha gbaa u nôngon a iwan man iliam i dang sha iyol na man ahenge a van la, a de ér ambaakaa la a yange un iember ga.—2 Sam. 9:6-10; 16:1-4; 19:24-30.

 Apostoli Paulu kpa kwagh na lu nahan. Yange nger kwagh u “saa ken iyol,” u yange gba u una nôngo a mi yô. (2 Kor. 12:7) Alaghga saa u lu ôron la lu kwaghnyoon u lu zan un iyol gbem yô, gayô alaghga a lu ior mba ve lahan un sha kwagh u apostoli na la yô. A lu nyi cii kpa, zayol la yange tsa a na gbem, nahan lu u una wa ishima a angev mbu shon shin una nôngo a ishimavihin i sha kwagh u angev nav.—2 Kor. 12:9, 10.

 Ishimanyian man uicôronmbauangev mba zan mba civir Aôndo mbagenev iyol nyian. I zua gumkwase ugen u lun anyom 18, u i yer un ér Magdalena yô, a angev mbu i lu ahôm a sôron or iyol ker la je, a hide a ve un a mi yô. A kaa ér: “Yange cier mo iyol kpishi. Shighe kar yô, angev av mbun hemba gban a gba kera, nahan iyolhian seer sha mi, shi iyol yam kera lu ngohol kwaghyan tsembelee ga, avav kpa gbam ken zwa.” Kwase ugen di iti na ér Izabela, un kpa ngu wan ishima a mbamzeyol mba a fetyô u kaan ér ka angev nav jighilii ga yô. A kaa ér: “Ishimavihin ngi a mo hii yev av je. Kwagh ne na yô, ishima ka i nyian mo er me va er kwagh u ibume nahan, shi ashighe agen ka m faantyô u ôôn tsembelee ga, shi iyav mbu zômon mo shimi. Nahan i vôrom iyol kpishi.”

Mbamlu Ou Ve Hoghol We

 Angev man iwan vea na a kera saan we iyol ken uma wou ga. Shighe u kwagh a er u nahan yô, hemba doon u ú hide u tema, u hen sha mlu wou la sha mimi. Alaghga a lu u zange u hoghol a mbamlu ou ga. Magdalena kaa ér: “Angev mbu m lu a mi ne ka mbu mbua tsa a mo shi mbua seer gban a gba kera yô. Ashighe kpishi ka i tumem iyol je m fatyô u moughon hen gambe sha ga. Er m fe shighe u angev av mbua bee ga yô, ka i taver mo kpishi u tsuan kwagh u me va er ken hemen yô. Kwagh u a hembe nan mo ishimavihin cii yô, ka er m kera fetyô u eren akaa a yange m eren ken mcivir u Yehova ga la.”

 Orgen u i yer un ér Zbigniew yô, pase zayol na ér: “Angev mbu sha ujuan mba iyolough tsa a  mo anyom imôngo shi mbu umam mo agee ken iyol shi vihin ujuan mba iyolough av môm môm. Ashighe agen ka mbua nyoon mo yum yô, ankwagh u cuku kpa m fatyô u eren ga. Nahan ishima i vihim kpishi.”

 Ken anyom a karen la, i zua kwase ugen, u i yer un ér Barbara yô, a kyansa i ken ityough. A kaa wener: “Akaa gema ken iyol yam kpoo. Iyol ka i kpem kpishi shi ityough ki nanden mo fele fele, shi i lum ken ishima hang. Er i zoughom a angev mbu hev mbun yô, gba u me hide me kar hanma kwagh cii.”

 Mba se er kwagh ve sha heen mban cii ka mba civir Yehova mba tseen asema. Ve nenge ér u eren ishima na la hemba kan kwagh u hange hange. Mba suur sha Aôndo a ishima ve cii, nahan ngu suen ve.—Anz. 3:5, 6.

Yehova Wasen Se Nena?

 Nyityô uange i se gbe cii, doo u se nenge i ser ka ikyav i tesen iyugh i Aôndo ga. (Ukwe. 3:33) Hen sha kwagh u Yobu yange tagher a mi la, shin er a lu “or u mimi, u perapera” nahan kpaa la. (Yobu 1:8) Aôndo meen ma or sha ifer ga. (Yak. 1:13) Iangev cii, kua uicôronmbauangev man mbamzeyol mba ken ishima kpaa cii, ka dyako u vihin tsung, u mbamaren asev mba hiihii mbara, Adam man Ifa, ve undu se a mi yô.—Rom. 5:12.

 Nahan kpa, Yehova man Yesu vea kende mbaperapera, a u wase ve shio ga. (Ps. 34:15) Ka se nenge er Aôndo a ‘lu ijiir yase i yeren man iyoughutya yase,’ hemban je yô, shighe u se tagher a ican ken uma wase la. (Ps. 91:2) Nahan yô, shighe u ú lu nôngon a mbamzeyol mba gbenda u been a ve fele u lu ga yô, ka nyi ia wase u sha u kwagh la una yange u iember ga?

 Msen: Aluer u dondo ieren i mba civir Aôndo sha mimi mba sha ayange a tsuaa la yô, u fatyô u haan akaa a zan we iyol la sha Ter wase u sha la ken msen. (Ps. 55:22) U er nahan yô, u zua a “bem u Aôndo u a gande hanma mfe wase cii” la. Bem u ken ishima la ‘una kura ishima you man mbamhen ou.’ (Fil. 4:6, 7) Er Magdalena a lu suur sha Aôndo ken msen yô, ngu nôngon a angev nav mbu mbu lu hemban gban a gba kera la. A kaa ér: “Ka mea pase Yehova ishima yam ken msen yô, m zua a mpeveryol shi iember  yam i hide her. Hegen m kav inja i u suur sha Aôndo ayange ayange la jim jim.”—2 Kor. 1:3, 4.

 Yehova una er kwagh sha mbamsen ou, una na u agee sha jijingi na man sha Mkaanem nam man sha ikyev i mzough u anmgbianev mba ken Kristu. De veren ishima wer Yehova a bee u angev sha ivande ga. Gema ver ishima wer a na u kwaghfan man agee, a i gbe u ú lu a mi ve u nôngo a hanma zayol wou la. (Anz. 2:7) Nahan una sue u, shi una na u “agee a hemban la.”—2 Kor. 4:7.

 Tsombor: Mdoo u ú doo mba hen ya wou ishima shi mhôônom ma ker ve a we la una wase u u wan ishima a angev. Kpa gema umbur wer mba doon we ishima mbara kpa mba yan ican. Ve kpa vea vôr er we nahan. Nahan kpa, mba uma sha ci wou, ken ashighe a ican je kpaa. Aluer u ngu eren msen a ve imôngo yô, ishima you ia lu bem bem.—Anz. 14:30.

 Barbara ôr kwagh u wan na u kwase kua agumaukase agen ken tiônnongo ér: “Ka ve wasem sha u m er tom u pasen kwagh la yô. Gbashima ve la nem ishimataver man msaanyol kpaa.” Zbigniew nenge ér kwase na ngu un a iwasen kpishi. A kaa ér: “Ityom i hen ya kpishi ka un a eren ye. Shi ka a wasem u wuhan iyol, shi ashighe kpishi ka a tôôm ikpa se za mkombo, kua shighe u se dugh kwaghpasen kpaa.”

 Mba nan jighjigh a we imôngo: Ka sea lu vea mba nan jighjigh a vese imôngo yô, se zua a ishimataver man ishimasurun. Kpa aluer u kanshio u zan mbamkombo sha ci u angev di ye? Magdalena kaa ér: “Tiônnongo ka a tindim a icer i ungwan a ungwa sha u nengen ér m zua a mtsera ken mbamkombo mba i er la. Ashighe kpishi mba se civir Aôndo a ve imôngo la ka ve yilam sha telefon sha u vea fa mea soo ma iwasen igen kpa vea wasen yô. Shi ka ve ngerem uwashika mba taver mo ishima kpaa. Er m fe mer mba umbur mo shi ve wa ikyo sha kwagh u mkpeyol wam yô, kwagh ne ka a wasem u wan ishima.”

 Izabela, u ishima ka i nyian un shi a ure la, kaa ér: “M ngu a ‘uter’ man ‘ungô’ kpishi ken tiônnongo, mba ka ve kegh ato a mo shi ve ker u fan er i lum ken ishima la yô. Tiônnongo ka tsombor wam, ka heen ka m zua a bem man msaanyol ye.”

  Mba ve lu tagher a atsan atô kposo kposo la, ve̱ palegh u ‘dughun ayol a ve kposo,’ shin lun tswen la. Kpa ve gema ve luun vea tiônnongo. (Anz. 18:1) Sha nahan yô, ka ve taver mbagenev ishima kpishi je. Alaghga hiihii la u soo u pasen anmgbianev mba nomso man mba kasev mbamgbe ou ga. Nahan kpa, aluer u pase mba nan jighjigh a we imôngo mlu wou la sha mimi yô, a hemba doon ve. Kwagh ne maa una na ve ian i tesen ér ve ‘doo ayol a ve ken ishima tsung.’ (1 Pet. 1:22) Er nan u pase ve wer ve fa er u soo wer ve tôô u sha kwaghhendan u za mkombo, shin u soo wer u due kwaghpasen a ve imôngo, shin u soo u lamen iliam i sôngo sôngo a ve ga? Nahan kpa, gba u se gôron ve a gôr ga, se wuese ve a wuese sha iwasen ve la.

 Lu a ishimaverenkeghen: Aluer ka u ú de icôron uange i u lu wan ishima a mi la ia yange u iember, shin ia yange u ga kpa, ngura har sha er u nenge la. Ijungwen kua ishimayinan ia na u hingir u lun a mbamnenge mba kpeegh. Bibilo kaa ér: ‘Jijingi u or una taver nan ken angev mbu nan, kpa jijingi u uren yô, ka an nana taver unu?’—Anz. 18:14.

 Magdalena kaa ér: “Ka m nôngo kpoghuloo sha er me yem u henen sha uzayol av ga yô. Ka m ker gbenda u me ember uma sha iyange i í we taver mo iyol yô. Ka mea ôr uvande-eren mba ior mbagenev mba ve gbe icôronuange kpa ve til her sha mimi la yô, m zua a ishimataver.” Izabela nenge ér un doo Yehova ishima shi un gba kwagh sha ishigh nagh, nahan kwagh la wase un u taver ken jijingi. A kaa ér: “M nenge mer kwagh gba sha a mo, shi m ngu a or u m lu uma sha ci u nan yô. Shi m ngu a ishimaverenkeghen i doon tsung sha mlu wam u ken hemen.”

 Zbigniew kaa ér: “Angev av mbu tesen mo u hiden a iyol ijime shi wan iyol yam sha ikyev i Aôndo. Mbu tesen mo u lun a mkav shi eren kwagh sha kwaghfan man u den or kwaghbo ken atô u ishima yam. M hen u civir Yehova saan saan a ishimavihin shio. Jighilii yô, m zua a ishimataver i zan hemen a mcivir u Yehova.”

 Umbur wer Yehova ngu nengen er u lu tesen ishimataver la vindi vindi. Mhôônom kôr un a we sha ican you la shi ngu nengen sha a we kpaa. ‘Tom wou ua hungur Un ga, shin dooshima u u tese sha ci u iti Na la kpaa ga.’ (Heb. 6:10) Ityendezwa i a er a mba civir un cii ne, i taver we ishima, a kaa ér: “Mayange Me undu u ga, Me kende u kpaa ga.”—Heb. 13:5.

 Shighe u ishima i lu vihin we yô, hemban henen sha ishimaverenkeghen i va lun uma ken tar u he la. Shighe ngu yemen leva leva u ashe a ou aa va nenge a averen a Tartor u Aôndo ua va a mi la yô!

[Ngeren u kiriki/​Foto u sha peeji 28]

Ve Za Hemen u Pasen Kwagh, Shin Er Ve Gbe Icôron Uange Nahan Kpaa

“M kera fetyô u zenden iyol yam ga, nahan kwase wam man anmgbianev mba nomso man mba kasev mbagenev ka ve lu vea mo shighe u i dugh kwaghpasen yô. Ka m kôr avur a Bibilo ken ityou kua igbenda i pasen kwagh.”—Jerzy, ashe nga ze un iyol.

“Dugh u pasen ior kwagh sha telefon sha yô, shi m ngeren uwashika hanma shighe sha u lamen a ior kpuaa mba lun a isharen. Er m lu sha iyouci ne, hanma shighe yô, ka m ver Bibilo kua ityakerada i Mbashiada mba Yehova ikyua a gambe wam. Kwagh la wasem u hiin iliam i dedoo a ior kpishi.”—Magadalena, kwase u i zough un a angev mbu nyoon ujuan shi vihin ikyav mbi ken atô, mbu i yer ér “lupus erythematosus” la.

“Ka m doom u pasen kwagh sha uya uya, kpa shighe u ka a va nyôrom iyol yô, m pasen ior kwagh sha telefon.”—Izabela, ngu a angev mbu i yer ér “clinical depression” la.

“Ka i doom u hiden za sôron ior shi wasen ve u henen Bibilo. Ayange a ka mea zua a guda yô, m soo u zan sha uya uya.”—Barbara, kwase u muran hirinigh.

“Ka m tôô ikpa i wan umagazin ker, i i yoho ga yô. Ka m shi ken kwaghpasen er angev av mbu sha ujuan la mbu nem ian cii.”—Zbigniew, ngu a angev mbu sha ujuan mba iyolough.

[Ngeren u pasen foto u sha peeji 30]

Agumaior man mbabeenyol cii vea fatyô u taver se ishima