Er Nan I Doo U Jijingi U Aôndo Una Hemen se?
Er Nan I Doo U Jijingi U Aôndo Una Hemen se?
“We U ngu Aôndo wam; Jijingi Wou u dedoo la, A̱ za a mo.”—PS. 143:10.
1. Tahav mbu i nengen a mbu ga mbua fatyô u hemen or nena?
IKYAGH ki tomov kigen ki er agogo nahan, mba yer ki ér compass. Ki a anwe u iyôgh, u ka a hôn ken imbusutarimese yô. Ka ki wase or u fan vegher u nan lu her yô, shi nan fa vegher u tar u nan lu zan la u lu kpaa. Aluer u ngu zan zende a ikyagh ki tomov kin yô, hanma vegher u ú gem cii, anwe na u iyôgh la una gema a hôn vegher u ken imbusutarimese la. Kwagh ne una wase u u̱ fan ape u lu zan la, wea lu zan vegher u sha ityoughkitaregh shin ken imbusutariyan shin, vegher u shin ityôtar shin ken imbusutarimese kpa u fa. Kwagh u ka a mgbegha anwe u iyôgh la a gema a tese vegher u ken imbusutarimese yô, ka tahav mbu tar u lu a mi mbu urugh kwagh er mageneeti nahan, mbu i nengen a mbu ga la. Ior er tom a compass sha u fan gbenda, uderimbaanyomov imôngo hegen, zum u ve lu zan zende sha gbenda shin ve lu peren zegemnger yô.
2, 3. (a) Ka tahav mbu ageegh mbu nyi Yehova yange er tom a mi sha uicôronmbaashighev mba karen laa? (b) Doo u se ver ishima ser tahav mbu tomov mbu Aôndo mbu i nengen a mbu ga la mbu hemen se ken uma wase nyian sha ci u nyi?
2 Tahav mbu ken myer mbugen mbu, mbu i hembe doon u mbua hemen se yô. Tahav mbu shon ka nyi? Ka tahav mbu i pase kwagh u mbu ken avur a Bibilo a hiihii la. Takerada u Genese ôr kwagh u Yehova yange vande eren sha uicôronmbaashighev mba karen ken ijime la ér: “Sha hiihii Aôndo gba Sha man tar.” Eren nahan yô, a tindi tahav mbu ageegh, gadia ngeren u pasen kwagh u igbetar la shi kaa ér: “Jijingi u Aôndo gba karen.” (Gen. 1:1, 2) Lu nyi i lu eren tomo? Lu icighan jijingi, u a lu tahav mbu tomov mbu ageegh la. Ka sha jijingi ne Yehova a er se kua ityom na igen cii ye.—Yobu 33:4; Ps. 104:30.
3 Er se lu uma ne, doo u se ver ishima ser tahav mbu tomov mbu Aôndo mbu seer eren tom ken uuma asevaa? Wan u Aôndo iyol na yange fa nahan, sha ci u Yesu kaa a mbahenen nav ér: “Jijingi . . . Una hemen ne Una za a ven ken mimi cii.” (Yoh. 16:13) Ka nyi ia wase se u fan kwagh u jijingi a lu, man er nan i doo u una hemen se?
Kwagh u Icighan Jijingi A Lu La
4, 5. (a) Mba ve ne jighjigh ér Ter man Wan man Icighan Jijingi Ka Aôndo Môm la ka ve hen sha lan ér icighan jijingi ka nyi? (b) Ú pase kwagh u icighan jijingi a lu jim la nena?
4 Alaghga ior mbagenev mba ka u lam a ve shighe u ú dugh kwaghpasen la vea lu a mnenge u Ruamabera sha kwagh u icighan jijingi ga. Mba ve ne jighjigh ér Ter man Wan man Icighan Jijingi Ka Aôndo Môm la ka ve hen sha lan ér jijingi la ka or, shi ka un a lu Ter Aôndo ye. (1 Kor. 8:6) Kpa ityesen i Ter man Wan man Icighan Jijingi Ka Aôndo Môm la zua sha i Ruamabera ga je ka ashe tugh ga.
5 Tsô, kwagh u icighan jijingi a lu la jim ka nyi? Ishember i ken zwa Heberu i í gem ken Genese 1:2 ér “jijingi” la shi a fatyô u geman i ér “ahumbe” kpaa. Shin er se nengen a ahumbe ga nahan kpa, se lan er a benden a vese ga. Er ahumbe a lu kwagh u nengen a mi ga kpa ka a er tahav nahan, kape icighan jijingi u a lu a iyol ga, a lu or kpaa ga shi i nengen a na ga la kpa a eren tom je la. Jijingi ne ka agee a a dugh hen Aôndo, a eren tom ken ior shin akaa agen sha u kuren awashima na yô. Taver u nan jighjigh ér imba utaha i doon tsung ngin nahan i dugh hen icighan Imbor, Aôndo Uhembanshaa? Mayange ga!—Ôr Yesaia 40:12, 13.
6. Lu nyi Davidi sôn Yehova sha gbashima?
6 Yehova una za hemen u eren tom a jijingi na sha u hemen se ken uma wasee? Yange tôndo zwa a orpasalmi ér: “Me pase u, shi Me tese u gbenda u ú za kpaa.” (Ps. 32:8) Lu kwagh u Davidi soo yôô? Een, sha ci u yange sôn Yehova sha gbashima ér: “Tesem, m̱ er ishima You, gadia We U ngu Aôndo wam; Jijingi Wou u dedoo la, A̱ za a mo.” (Ps. 143:10) Doo u se kpa se lu a isharen la shi se kegh iyol ser jijingi u Aôndo a hemen se. Er nan i doo u se er nahana? De se time sha atôakyaa anyiin.
Se Kuma u Hemen Ayol a Ase Ga
7, 8. (a) A iwasen i Aôndo shio yô, se fatyô u hemen ayol a ase ga sha ci u nyi? (b) Pase kwagh u a tese ér se mba cihin se mba keren gbenda wase iyol yase ken tar u ifer ne ga yô.
7 Hiihii yô, gba u se soo ser jijingi u Aôndo a hemen se sha ci u se mba a tahav mbu hemen ayol a ase ga. Inja i ishember i “u hemen” la ér “u tesen or kwagh u nana er yô, shin u tesen or gbenda u nana za yô.” Nahan kpa, Yehova yange gba se a tahav mbu eren kwagh ne ayol a ase ga, hemban je yô, er se lu ken mlu u vough ga ne. Profeti na Yeremia yange nger ér: “TERE, m fa, gbenda u or ngu sha ikyev i nan ga; or u zenden la, mvershigh u iaven i angahar a nan ngu sha ikyev i nan ga.” (Yer. 10:23) Sha ci u nyi? Yeremia ungwa er Aôndo pase ityôkyaa i se yen sha gbaa u hemen ayol a ase la yô. Yehova ôr kwagh sha kwagh u mlu wase u ken ishima la ér: “Ishima i wa atseregh je hemba hanma kwagh cii, i vihi je gande; ka an nana fatyô u fan i?”—Yer. 17:9; Mat. 15:19.
8 Aluer or vande zan ken taaikyôngo ga, kpa nan mough nan tswen, a compass shin or u tesen nan gbenda shio, nan yem ken taaikyôngo fiinii hen ijiir i nan fe i ga nahan, a tese ér nan bume ga he? Er nan fe er ka i nôngo ve i war mlu u vihin u ken taaikyôngo la ga, shi nan lu a mfe u una wase nan u zan nyôron hen ape nan lu zan la iyol ishô ga yô, uma u nan lu sha zongo. Kape or u nan hen ér nana hemen iyol i nan ken tar u ifer ne, a u den ér Aôndo a tese nan gbenda u vough shio la kpa nan lu veren uma u nan sha zongo je la. Gbenda u se kar ve se zende ken tar u ifer ne se due iyol ishô yô, ka sha u sônon Yehova ken msen, er Davidi nahan, ser: “Angahar a am a̱ var sha igbenda You, sha er aa dolough ga yô.” (Ps. 17:5; 23:3, NW) Se zua a imba iwasen ne nena?
9. Er foto u sha peeji 12 la a tese nahan, jijingi u Aôndo una hemen se kpee nena?
9 Aluer se mba mba hiden a iyol ijime shi se soo ser se har sha Yehova yô, una na se icighan jijingi na kpee je, una hemen angahar a ase. Tahav mbu tomov mbura mbua wase se nena? Yesu pase mbaapostoli nav ér: “Orsurunshima, ka Icighan Jijingi je la, u Ter Una tindi ken iti Yam yô, ka Un je, Una tese ne akaa cii, man shi Una umbur ne akaa a M er ne cii kpaa ye.” (Yoh. 14:26) Aluer se mba henen Mkaanem ma Aôndo kua akaaôron a Kristu, aa a lu ker la shi eren msen hanma shighe yô, icighan jijingi una wase se u seer kaven kwaghfan u Yehova, u a ze kweng la, sha er se fatyô u eren awashima na vough yô. (1 Kor. 2:10) Kwagh ugen yô, aluer se za ande sha akahar a gbenda abur abur sha gbenda u zan ken uma u tsôron la kpa, jijingi una za a vese sha gbenda u vough. Una umbur se atindiakaa a Bibilo a se vande henen yô, shi una wase se u fan er se er tom a atindiakaa shon ve se tsua akaa a injaa a se er yô.
Jijingi u Aôndo Hemen Yesu
10, 11. Wan u Aôndo u môm môm la lu a ishimaverenkeghen i nyi sha kwagh u icighan jijingi, man yange nyôr ken mlu u nyi?
10 Ityôkyaa i sha uhar, i i doo u se soo ser icighan jijingi u Aôndo a hemen se yô, Aôndo yange hemen Wan na sha icighan jijingi. Cii man Wan u Aôndo u môm môm la va shin tar yô, yange vande fan kwaghôron u profeti ne: “Jijingi u TER Una lu sha a Na, ka Jijingi u kwaghfan man u mkav, Jijingi u wasen henen kwagh man u ageegh, Jijingi u mfe man u cian TER.” (Yes. 11:2) Nenge er yange a girim Yesu iyol u ngohol iwasen i jijingi u Aôndo, shighe u va lu shin tar la sha wono!
11 Mkaanem ma Aôndo kure sha mi vough. Ngeren u Ivangeli ôr kwagh u yange er, shighe u i er Yesu Batisema i bee la, ér: “Yesu kpaa, iv a Icighan Jijingi, A mough hen Yordan, A hide; tsô Icighan Jijingi yem a Na ken taaikyôngo.” (Luka 4:1) Shighe u Yesu lu ken taaikyôngo la, a hôr kwaghyan, shi lu eren msen, shi gbidyen kwar ken ishima. A shi nan kpa, Yehova yange wa Wan na kwagh shi pase un kwagh u lu keghen un ken hemen yô. Tahav mbu tomov mbu Aôndo lu eren tom ken Yesu, mbu lu hemen un ken mhen na man sha u tsuan akaa a una er yô. Sha nahan yô, Yesu fa kwagh u lu u una er sha hanma ian cii, shi er kwagh u Ter na soo ér a er la vough.
12. Er nan ve i gbe hange hange u se sônon Aôndo ser jijingi na a hemen se?
12 Er Yesu fa tom u injaa u icighan jijingi u Aôndo lu eren ken uma na yô, a tese mbahenen nav er i gbe hange hange u vea eren msen ér icighan jijingi a hemen ve yô. (Ôr Luka 11:9-13.) Gba u se eren nahan keng keng sha ci u nyi? Sha ci u icighan jijingi una fatyô u geman mhen wase, sha u se hingir a imba mhen u Kristu la. (Rom. 12:2; 1 Kor. 2:16) Aluer se de ser jijingi u Aôndo a hemen se ken uma wase yô, se henen kwagh er Kristu kpa a henen nahan, shi se dondo ikyav na la kpaa.—1 Pet. 2:21.
Jijingi u Taregh Una Tsume a Vese
13. Ka nyi i lu jijingi u taregha, man ngu a na ior ve hingir nena?
13 Ityôkyaa i sha utar, i i doo u se soo ser jijingi u Aôndo a hemen se yô, ka sha ci u, a na shio yô, jijingi u a lu icighan ga, u a lu eren tom ken uma ior kpishi nyian la una tsume a vese. Tar ne ngu a tahav mbu kighir ior, mbu ka mbu er kwagh kposo a kwagh u icighan jijingi a eren ken a vese yô. Jijingi u taregh eren tom ken ior sha u ve lu a mhen u Kristu ga, kpa ka a na ve hingir u lun a imba mhen man aeren a tor u tar ne, Satan, a lu a mi la. (Ôr Mbaefese 2:1-3; Titu 3:3.) Or ka nana de ér jijingi u taregh a hemen nan, shi nana hingir u tesen aeren a iyolough yô, kwaghbo a due ker, a yange nan u yan dyako u Tartor u Aôndo.—Gal. 5:19-21.
14, 15. Se fatyô u hendan a jijingi u taregh nena?
14 Yehova wa se ago iyol a hendan a jijingi u taregh. Apostoli Paulu yange kaa ér: “Kwagh ugen yô, taver nen ken Ter sha tahav mbu agee a Na . . . sha u né fatyô u tilen dông sha iyange i ifer yô.” (Ef. 6:10, 13) Yehova we se inya itine sha jijingi na sha u se tile dông, Satan a de fetyô tsumen a vese ga yô. (Mpa. 12:9) Jijingi u taregh ngu a tahav kpishi, nahan se fatyô u palegh un ga. Nahan kpa, gba u se de ser a hôngor se ga. Icighan jijingi hemba un tahav, nahan una wase se!
15 Apostoli Peteru yange ôr kwagh u mba ve undu Kwaghaôndo u Mbakristu ken derianyom u hiihii la ér: “Ve undu gbenda u mimi ve tsume.” (2 Pet. 2:15) Se mba a iwuese kpishi er i lu ‘jijingi u taregh se ngohol ga, kpa i lu jijingi u A dugh her Aôndo la’ yô! (1 Kor. 2:12) Aluer se mba den ser icighan jijingi a hemen se, shi se mba eren tom a akaa a Yehova a ne se la cii sha gbashima sha er se za hemen ken jijingi sha gbenda u vough yô, se fatyô u hendan a jijingi u Satan, u tar u ifer ne.—Gal. 5:16.
Icighan Jijingi Wasen Se u Umen Ityamegh Ki Dedoo
16. Ka ityamegh ki nyi icighan jijingi ka a wase se u umene?
16 Ityôkyaa i sha unyiin, i se soo ser jijingi u Aôndo a er tom ken a vese yô, ka sha ci u ngu a wase mba a hemen ve la u umen ityamegh ki dedoo ken uuma vev. (Ôr Mbagalatia 5:22, 23.) Ka an ken a vese nan soo ér ior ve seer doon nan ishima shi nana seer lun saan saan shi nana seer lun ken bem ga? Ka an ken a vese nan soo ér nana seer lun a ishima i wan shi nana seer lun sar sar shi nana seer lun a mlu u dedoo ga. Ka an ken a vese nana seer lun a jighjigh u nan man ishima i legh legh man iyol i kôron tsaha ve a wase nan ga? Jijingi u Aôndo ka a na se lu a eren a dedoo, a ka a wase se kua mba se lu a ve man mba se civir Aôndo a ve imôngo la yô. Tom u umen ityamegh ki jijingi la ka tom u ú ze hemen ken a vese hanma shighe cii yô, sha ci u i ver a ver ape se ume ityamegh ki jijingi se kighir ga, shi i na se ian i umen ki, i ver ikighir ga.
17. Se fatyô u seer lun a ma vegher u ityamegh ki jijingi nena?
17 Doo u se time sha mbamlu asev vighe vighe sha er mkaanem asem man aeren a ase aa tese ér icighan jijingi ngu hemen se, shi se mba umen ityamegh nagh yô. (2 Kor. 13:5a; Gal. 5:25) Aluer se nenge ser gba u se lu a avegher a ityamegh ki jijingi agen yô, se fatyô u seer dondon gbendatesen u icighan jijingi sha u a wase se u lun a aeren shon yô. Se er kwagh ne sha u timen sha hanma vegher u ityamegh ki jijingi ki Bibilo i er kwagh sha mi yô, man er i tim sha ki ken ityakerada yase i Mbakristu la. Nahan nengen er i gbe u akaa a se eren ken uma wase ayange ayange la aa tese ér se ume ityamegh ki jijingi, maa se za hemen u nôngon sha er se hemba umen ki yô. * Aluer se nenge a atam a tom u jijingi u Aôndo a eren ken uma wase man ken uma u mba Mbakristu mba nan jighjigh a vese imôngo yô, se kav wang er i hii ve i gbe u jijingi una hemen se kpee yô.
U Ngu Lumun Wer Jijingi u Aôndo A Hemen We Kpa?
18. Yesu ver se ikyav i den ér jijingi u Aôndo a hemen un nena?
18 Er Yesu lu vea Aôndo er “or u fan tom” nahan, shighe u lu gban sha man tar la yô, yange fa hanma kwagh sha kwagh u tahav mbu tar u lu a mi mbu urugh kwagh er mageneeti nahan, mbu ka mbu wase uumace u zan hanma ijiir sha tar cii la. (Anz. 8:30; Yoh. 1:3) Nahan kpa, ikyav tese ijiir i môm ken Bibilo ér ma shighe ngu u tahav mbura wase Yesu u zan mape shighe u lu shin tar la ga. Bibilo kaa ér Yesu lu ôr, nahan a kav tahav mbu icighan jijingi u Aôndo ken uma na kpishi. Yange soo ér jijingi la a hemen un, nahan kwagh u jijingi a mgbegh un u eren yô, yange a lumun shi a er kpaa. (Mar. 1:12, 13; Luka 4:14) U ngu eren nahan kpa?
19. Ka nyi i gbe u se er keng ve icighan jijingi u Aôndo una hingir tahav mbu hemen se ken uma wase?
19 Nyian kpa, tahav mbu tomov mbu Aôndo mbu eren tom ken asema a mba ve lumun ér mbu hemen ve la. Ú lumun wer jijingi a er tom a we shi a za a we sha gbenda u vough la nena? Sônon Yehova ken msen hanma shighe wer a tindi u a jijingi na shi a wase u u lumun gbendatesen na. (Ôr Mbaefese 3:14-16.) Er tom sha mbamsen ou sha u keren kwaghwan ken Mkaanem ma Aôndo ma i nger shin inya la, ka Bibilo, i í lu icighan jijingi a nger la je la. (2 Tim. 3:16, 17) Dondo kwaghwan u Bibilo u a lu a kwaghfan ker la, shi i girim we iyol u dondon gbendatesen u icighan jijingi. Eren hanma kwagh a jighjigh u nan wer Yehova ngu a tahav mbu hemen we ken uma wou sha gbenda u vough, ken tar u ifer ne.
[Ngeren u shin kpe]
^ Wea soo u timen sha hanma vegher u ityamegh ki jijingi yô, nenge itinekwagh i i kaa ér “Fruitage of God’s Spirit” man i i kaa ér “List by Aspect” ken takerada u Watch Tower Publications Indexes la.
U Kav Atôakaa a Vesen a ken Kwaghhenen Ne Kpa?
• Icighan jijingi una wase se ken uuma asev nena?
• Atôakyaa a anyiin a i doo u se soo ser jijingi u Aôndo a hemen se la kaa ér nyi?
• Se er nan ve se zua a hanma kwagh sha gbendatesen u icighan jijingii?
[Mbampin Mba Ngeren u Henen]
[Foto u sha peeji 15 la]
Jijingi u Aôndo lu tahav mbu mbu mgbeghan Yesu eren kwagh yô
[Foto u sha peeji 17 la]
Jijingi u Aôndo eren tom ken asema a ior sha u mgbeghan ve shi hemen ve
