Kwagh u Se Er Ve Kwaghhenen Wase Una Maa Se Iyol Shi Una Ume Atam Yô

Se er nan ve a hemba maan se iyol u henen Bibilo? Man se er nan ve kwaghhenen wase una hemba umen atama? De se time sha akaa a injaa atar, a se er ve aa wase se se hemba zuan a iwasen ken kwaghhenen wase u sha tseeneke la yô.

1 ER MSEN: Kwagh u hiihii u se er yô, ka u eren msen. (Ps. 42:8) Sha ci u nyi? Doo u se nenge mhen u henen Mkaanem ma Aôndo la ser ka gbenda ugen u se civir Aôndo yô. Sha nahan yô, gba u se sôn Yehova ser a bugh se asema se ngohol kwagh u se hen la, shi a na se icighan jijingi na kpaa. (Luka 11:13) Kwase mishen ugen u a er tom ne ica i gbe yô, mba yer un ér Barbara, a kaa ér: “Ka m vande eren msen cii ve m hen Bibilo ye. Ka mea eren nahan yô, i lum er Yehova ngu vea mo shi a lumun a kwagh u m lu eren la nahan.” Ka sea er msen cii man sea hen kwagh yô, asema ase a bugh, nahan se ngohol kwaghyan u ken jijingi u se lu a mi mgbeghaa la.

2 GBIDYE KWAR SHA KWAGH U Ú HEN LA: Er ior kpishi ve lu a shighe ga yô, ka ve ôr di a ôr Mkaanem ma Aôndo sha laa laa tsô. Nahan iwasen i vea hen Mkaanem ma Aôndo ve ma ve zough a mi la i kar ve. Orgen u i yer un ér Carlos, a civir Yehova hegen i hembe anyom 50 yô va kav er i lu a inja u tôôn shighe gbidyen kwar sha kwagh u un hen la, sha er kwaghhenen na una ume atam yô. A kaa ér: “Hegen ne ka m ôr Bibilo upeeji kpuaa tseegh, er peeji uhar nahan hanma iyange. Maa m tôô shighe naleghaa m gbidye kwar sha kwagh u m er ken Bibilo la, sha er me hemba zuan a iwasen ken kwaghhenen wam la yô.” (Ps. 77:12) Ka sea tôôn shighe sea gbidyen kwar sha kwagh u se ôron ken Mkaanem ma Aôndo la yô, se hemba kaven awashima u Aôndo.—Kol. 1:9-11.

3 DONDO KWAGH U Ú HEN LA: Ka sea nenge gbenda u ma kwagh u se eren la a bende a vese yô, se hemba zuan a iwasen ker. Bibilo i henen kpa kape i lu vough je la. Gumor ugen u a henen Bibilo hanma shighe yô, mba yer un ér Gabriel, a kaa ér: “Kwaghhenen ka a wasem u nôngon a uzayol mba m tagher a mi ayange ayange la, shi ka a wam agoyol u wasen mbagenev kpaa.” Shi a kaa ér: “Ka m nôngo u dondon hanma kwagh u m hen cii.” (Dut. 11:18; Yos. 1:8) Sha kpôô yô, se fatyô u zuan a kwaghfan kpishi hen Aôndo shi eren tom a mi kpaa.—Anz. 2:1-5.

HIDE TIME SHA KWAGH U Ú HEN LA: Se mba a ian i icivirigh kpishi, i timen sha mfe u a dugh hen Yehova, un u a lu Imbor i hanma kwaghfan la! (Rom. 11:33) Nahan, kwagen u henen kwagh yô, vande eren msen hen Yehova, sôn un wer a bugh u ishima shi a na u jijingi na. Er u lu ôron la, tamber ashighe agen gbidye kwar sha kwagh u ú lu ôron la. Shi dondo akaa a u hen la ken uma wou. Ú er akaa a hange hange ne yô, kwaghhenen wou una maa u iyol kpishi, shi una hemba umen atam kpaa.