Dondo Ikyav I Yesu I Kuran La
Dondo Ikyav I Yesu I Kuran La
“Kuran nen, eren nen msen.”—MAT. 26:41.
Ú NA MLUMUN WER NYI?
Se tese ser se mba kuran sha gbenda u se eren msen la nena?
Ka sha igbenda i nyi nahan se tese ser se mba kuran ken tom wase u pasen kwagh laa?
Ka hange hange u se kuran shighe u i lu meen se la sha ci u nyi, man se er kwagh ne nena?
1, 2. (a) Ka mbampin mba nyi nahan alaghga u pine iyol you sha kwagh u ikyav i Yesu i kuran laa? (b) Ikyav i Yesu i kuran la ngi uumace mba ve yen ne a inja je he? Tese ikyav.
ALAGHGA u pine wer: ‘Or a fatyô u kuran er Yesu nahan je kpa? Gadia Yesu lu or u vough. Heela tseegh ga, ashighe agen Yesu yange a fatyô u nengen a kwagh u una va er ken hemen yô wang, a lu kwagh u una va er anyom udubu imôngo ken hemen je kpaa. Kpa mimi je yange gba u Yesu una kurana?’ (Mat. 24:37-39; Heb. 4:15) De se hii timen sha mbampin mban sha er se nenge er i lu hange hange shi i lu torough torough u se kuran yô.
2 Aluer i ver uumace mba yinan ikyav i vough nahan ia wase ve je he? Een, sha ci u or a fatyô u henen kwagh sha ikyev i ortesen u dedoo man ikyav i nan la. U tesen ikyav yô, tôô ase wer i hii u tesen or ivaan i keren. Nan ngu fantyô u keren ivaan tan kwagh u i tim la ga, kpa nan za hemen u henen shi karen iyol. Nan ver ishima nan dondo ikyav i ortesen u nan, u a fe ivaan i keren tsembelee la, sha er nan kpa nana fa ivaan i keren tsema tsema yô. Orhenen la ver ishima nenge gbenda u ortesen na ka a tile shi a henda ada la. Kure kure tsô, or u henen ivaan i keren, u lun a gbashima ne fa er una urugh kwar a kighir la, shi a̱ lu u ahumbe aa daase a ivaan la kpa a fa, nahan a gba uwer u henen ga. Er a lu dondon ikyav i orvesen na yô, a gema keren ivaan zan ikyua a kwagh u a soo u tan la. Se kpa, aluer se mba dondon akaawan a Yesu kua ikyav na i vough la yô, se hemba lun Mbakristu mba injaav.
3. (a) Yesu yange tese ér gba u una kuran nena? (b) Ka nyi se time sha mi ken ngeren nee?
3 Kpa mimi je, yange gba u Yesu una kurana? Een, yange gba u una kuran. U tesen ikyav yô, hen tugh mbu Yesu mase lun shin tar ne la, a wa mbaapostoli nav mba jighjigh mbara kwagh ér: ‘Kura nen a Mo imôngo.’ Shi a kaa ér: “Kuran nen, eren nen msen sha er né gba ken imeen ga yô.” (Mat. 26:38, 41) Er Yesu lu vanden kuran nahan kpa, yange soo ér una hemba kuran hen shighe u tagher a ikyaren i taver ne sha er una hemba lun ikyua a Ter na u sha la cii yô. Yange fa ér gba u mbahenen nav kpa vea kuran er un nahan, man a lu hen shighe la tseegh ga, kpa vea kura zan zan ken hemen kpaa. Yô, de se nenge nen er i hii ve Yesu a soo ér se kuran yô. Se been yô, se time sha igbenda itiar i se fatyô u dondon ikyav i Yesu i kuran la ken akaa a se eren ayange ayange la yô.
ER I HII VE YESU A SOO ÉR SE KURAN YÔ
4. Er nan ve i gbe u se kurana?
4 Yesu soo ér se kuran sha ci u kwagh u se fe man u se fe ga la. Shighe u Yesu lu shin tar la, yange fa hanma kwagh u una va er ken hemen ciilii? Ei, sha ci u yange hide a iyol ijime, kaa ér: “Kwagh u iyange la man shighe la yô, ma or fa ga, shin mbatyomov mba Shaav shin Wan kpaa ga, saa Ter tseegh.” (Mat. 24:36) Hen shighe la, Yesu, u a lu “Wan” la fa shighe u botar ne una kure jighilii ga. Se nyian di ye? Se fa hanma kwagh u una er ken hemen ciili? Mayange ga! Se fa shighe u Yehova una tindi Wan na ér a va tim botar ne ga. Sea fe yô, ma i kera gbe u se kuran ga. Er Yesu pase nahan, mkur una va gaegh, sha shighe u se ver ishima ga yô; ka nahan ve i gbe u se kuran hanma shighe cii ye.—Ôr Mateu 24:43.
5, 6. (a) Mfe u se fe kwagh u Tartor u Aôndo la wase se u kuran nena? (b) Doo u mfe u se lu a mi sha kwagh u Satan la una na se kange ishima ser se hemba kuran sha ci u nyi?
5 Kpa Yesu gema fa akaa a injaa agen kpishi a aa va er ken hemen, a ior kpishi fa ivurugh ga yô. Mfe wase zurum a u Yesu cuku tsô kpaa ga. Kpa sha iwasen na yô, se fa akaa kpishi sha kwagh u Tartor u Aôndo man kwagh u ica a gba ga tsô ua er la kpaa. Ior kpishi mba ka se lu a ve ken makeranta shin hen ijiirtom shin hen haregh u se pasen kwagh her la fa akaa a injaa ne ga. Ngun kpa ka ityôkyaa igen i í gbe u se kuran je ne. Gba u se luun tsevaa hanma shighe cii, sha er ian i í dugh cii se pase ior kwagh u se fe sha kwagh u Tartor u Aôndo er Yesu nahan yô. Hanma ian i í dugh nahan cii, ngi hange hange, nahan se soo ser ian i môm tsô i kar se ga. Gadia uuma mba iorov mba sha zongo.—1 Tim. 4:16.
6 Shi Yesu yange fa kwagh ugen kpaa, u na ve za hemen u kuran yô. Yange fa ér Satan norom ér una mee un shi una tôv un a ican, shi una na a de u civir Aôndo. Orihyom u bo ne yange lu per lu keghen “shighe ugen” u una mee Yesu yô. (Luka 4:13) Nahan Yesu de u kuran mayange ga. Yange soo ér ma ikyaren i hemba un ga, a lu imeen shin mhendan shin mtev u sha ican kpaa. Kape se kpa kwagh wase a lu la ga he? Se fa ser Satan ngu zenden her “er begha u tan kume nahan, keren or u una ya yô.” Sha nahan yô, Mkaanem ma Aôndo wa Mbakristu cii kwagh ér: “Lu nen geng ge geng shi kuran nen kpaa.” (1 Pet. 5:8) Kpa se lu geng ge geng shi se kuran nena?
ER MSEN A WASEN SE U KURAN LA
7, 8. Yesu wa se kwagh sha kwagh u msen u eren nena, man a ver se ikyav i nyi?
7 Bibilo pase se ér msen u eren ka kwagh u hange hange, u una wase se u lun per ken jijingi shin kuran sha er se vihi mlu wase vea Yehova ga yô. (Kol. 4:2; 1 Pet. 4:7) Yesu yange kaa a mba dondon un ér ve kuran a na imôngo, ôr kwagh ne ica i gba ga maa kaa ér: “Kuran nen, eren nen msen sha er né gba ken imeen ga yô.” (Mat. 26:41) Yange lu wan ve kwagh sha ci u mlu u taver u ve tagher a mi hen shighe la tseeghlee? Ei, kwaghwan na la ka u i gbe u se dondon ayange ayange yô.
8 Yesu yange ver se ikyav i dedoo sha gbaa u msen u eren la. Alaghga u umbur er tugh mbugen la tsa eren msen hen Ter na kaka yô. (Ôr Luka 6:12, 13.) Tôô ase wer ka fam, nahan alaghga Yesu ngu ikyua a geri u Kapernahum. Tugh mbu il yô, a unde sha uwo ugen ikyua a Zegemnger u Galilia. A gema a kenger shin inya, nahan alaghga a nenge amenger nga yeghen iusu muenem muenem ken Kapernahum kua agar agen a a lu ikyua a Kapernahum la. Yesu maa hii u eren msen, man ma kwagh môm dan un er a lu lamen a Yehova la ga. A er msen ahwa imôngo. Er amenger la a lu pirin môm môm, shi er uwer u kar ityough, inyam i utu kpa i lu zenden ken toho eren amo nahan kpa, a ver ishima her ga. A shi nan kpa, ngu eren msen sha kwagh u vesen u i gbe u una er yô. Gba u una tsua iorov 12 mba vea lu mbaapostoli nav yô. Hen ase er Yesu a lu sônon Ter na sha gbashima ér a hemen un shi a na un kwaghfan sha er una tsua mbahenen mba jighjigh mba vea lu mbaapostoli nav la.
9. Ka nyi se fatyô u henen sha ikyav i Yesu i tsa eren msen tugh kaka laa?
9 Ka nyi se fatyô u henen sha ikyav i Yesu laa? Gba u se eren msen shighe gôgônanaa? Ei, sha ci u yange ôr kwagh u mba dondon un ér: “Jijingi yô, lumun, kpa iyol yô, ngi a agee ga.” (Mat. 26:41) Nahan kpa, se fatyô u kaven Yesu. U tesen ikyav yô, se mba lamen a Ter wase u sha la cii man se tsuan ma kwagh u una fatyô u benden a mlu wase u ken jijingi man mlu u ken jijingi u tsombor wase shin u̱ mba civir Aôndo a vese imôngo kpa? Ka sea eren msen nahan, se mba sônon sha ci u anmgbianev asev mba nomso man mba kasev kpa? Ka se pase Aôndo kwagh u a dugh se ken ishima shin ka se zer kimbir kwaghmôm gbeme? Shi fa kpaa wer, iliam i sôngo sôngo i Yesu lamen vea Ter na ve uhar la yange i gba un kwagh kpishi. Ken tar u shighe a ban yum ne, mba ngôôr hungur kwagh u a hembe lun hange hange la ga. Aluer se na shighe kpishi sha u eren msen ken iuv hen Yehova sha kwagh u a dugh se ken ishima yô, se hemba kuran. (Mat. 26:41) Se hemba kporom hen Yehova, shi a hemba maan se iyol u civir un shi palegh u eren ma kwagh u una na se gba uwer u civir un la.—Ps. 25:14.
ER SE KURAN KEN TOM WASE U PASEN KWAGH LA
10. Ka nyi i tese ér Yesu yange keren aan a pasen ior kwagha?
10 Yesu yange kuran ken tom u Yehova na un la. Ityom ngi kpishi i i gbe u ortom nana ver ishima sha mi zulee, nana hen sha ma kwagh ugen kposo shighe u nan lu eren u la ga yô. Nahan kpa, ityom kpishi ka i gba u a hemba veren ishima sha i zulee cii, man kape tom u Mbakristu u pasen kwagh la u lu je la. Yesu yange ver ishima sha tom na zulee, keren aan a pasen loho u dedoo. U tesen ikyav yô, zum u Yesu vea mbahenen nav mough pepe er gôgô zende za ar hen gar u Shikar yô, mbahenen nav yem u za yamen kwaghyan. Yesu tema hen kpejôr, ikyua a gar la, kpa ver ishima zulee, nahan a zua a ian i pasen kwagh. Kwase u ken Samaria ugen za va u kesen mngerem. Yesu yange ma tsua u yaven. Yange ma ker atôakyaa a una lam a or ga yô. Nahan kpa, a hii iliam a kwase la, shi a pase un kwagh kpoghuloo je ior mba ken gar la kpishi na un jighjigh. (Yoh. 4:4-26, 39-42) Se hemba dondon ikyav i Yesu i kuran la sha u seer keren aan a pasen ior mba se zough a ve ayange ayange la kwagh kpa?
11, 12. (a) Yesu yange er nena shighe u ior soo u danen un sha tom na laa? (b) Yesu yange ver ishima sha tom na za kar ikyaa inya ga nena?
11 Ashighe agen ior mba lun a awashima u dedoo yange ve nôngo ér vea dan Yesu sha tom u lu eren la. Shighe u Yesu lu eren uivande ken gar u Kapernahum la, ior soo ér a de yemen ga. Se kav er hii ve, ve soo ér a de yemen ga yô. Nahan kpa, lu “iyôngo i hen ya u Iserael i i saa la tseegh” yange i tindi Yesu ér a za pase i kwagh ye. (Mat. 15:24) Nahan a kaa a ve ér: “Ka u Me ôr Loho u Dedoo u tartor u Aôndo ken agar agen kpaa keng, gadia ka sha ci u nahan je i tindim ye.” (Luka 4:40-44) Kwagh ne tese wang ér Yesu yange har uma na sha tom na u pasen kwagh la, a de ér ma kwagh a dan un ishima ga.
12 Yesu yange ver ishima sha tom na za kar ikyaa inya shin kera wa ikyo sha mkpeyol na kpaa gaa? Yange wa ityough ken tom na je kwagh kera gba un sha mbamgbe mba ior gaa? Ei, Yesu ver ikyav i dedoo i pasen kwagh shi nengen sha mkpeyol na kua u mbagen kpaa. Yange eren akaa a nan msaanyol vea azende a na imôngo. Kwagh u ior yange gba un ishima shi mhôônom kôron un a ve, shi tesen gbar gbar ér kwagh u mbayev mba kiriki doo un ishima.—Ôr Marku 10:13-16.
13. Se dondo ikyav i Yesu i kuran man i pasen kwagh u Tartor karen ikyaa inya ga la nena?
13 Er se lu dondon ikyav i Yesu i kuran la yô, se er nan ve se ver ishima sha tom wase a kar ikyaa inya ga? Se mba den ser tar ne u dan se sha tom wase ga. Alaghga azende a ase man ior mba hen tsombor wase mba kwagh wase a gbe ve ishima yô, vea wa se kwagh ér se pande tom wase u pasen kwagh la, shin se tsua uma u ve nenge ér ka uma u dedoo la. Nahan kpa, aluer se mba dondon ikyav i Yesu yô, se nengen tom wase vough er kwaghyan nahan. (Yoh. 4:34) Tom wase ne ngu wasen se u taver ken jijingi shi ngu ne se msaanyol kpaa. Nahan kpa, mayange se soo ser se er u i za kaa ikyaa inya, nahan i lu inja er se hemba perapera cii, shin se wa ikyo sha mkpeyol wase kpaa ga nahan ga. Se soo ser i saan se iyol shi se lu mba civir “Aôndo u sar sar,” er Yesu nahan.—1 Tim. 1:11, NW.
ER SE KURAN SHIGHE U SE TAGHER A IMEEN YÔ
14. Shighe u se tagher ameen yô, ka nyi i gbe u ia hungur se ga, man ka sha ci u nyi?
14 Er se vande nengen nahan, lu shighe u Yesu tagher a imeen i taver tsung la je yange kaa a mbahenen nav ér ve kuran ye. (Ôr Marku 14:37.) Zum u se tagher a ican yô, a gba u se dondo ikyav na la a hemba ave a tse. Ior kpishi ka vea tagher a ican yô, ve hungur kwagh u mimi, u a lu hange hange je takerada u Anzaakaa u er kwagh sha mi kwa har ne, ér: “Gbenda ugen sha mnenge u or yô, ka u lu vough, kpa mkur u u yô, ka igbenda i kuugh je.” (Anz. 14:12; 16:25) Aluer se har sha mnenge wase, hemban je yô shighe u se tagher a zayol u vesen yô, se lu van a kwaghbo sha ayol a ase kua mba doon se ishima kpaa.
15. Ka imeen i nyi nahan alaghga orya nana tagher a mi shighe u inyaregh ki ban nana?
15 U tesen ikyav yô, alaghga a taver orya kpishi u nengen sha “ior mba nan.” (1 Tim. 5:8) Adooga nana soo u eren tom u ua na nana kera faantyô u zan mbamkombo mba Mbakristu hanma shighe ga, shin hemen mcivir u hen tsombor shi duen kwaghpasen kpaa ga yô. Aluer nan suur sha mhen u or tseegh yô, alaghga a lu nan inja er mhen la doo, shi ngu vough kpaa nahan. Nahan kpa, alaghga ieren i nan la ia na nana kera taver ken jijingi ga, shin nana de u civir Yehova kuaa. Nenge i hembe doon u se dondo kwaghwan u a lu ken Anzaakaa 3:5, 6 ne sha wono! Solomon kaa ér: “Suur sha TER a ishima you cii, de yier sha mkav wou ga. Umbur Un sha ijende you cii, Un kpaa Una kôôm igbenda you.”
16. (a) Yesu ver se ikyav sha gbaa u suur sha kwaghfan na ga, kpa suur sha kwaghfan u Yehova la nena? (b) Mbayaav kpishi mba dondon ikyav i Yesu ver la sha u suur sha Yehova ken ashighe a ican nena?
16 Shighe u i lu meen Yesu la, yange venda u suur sha mkav na. Nenge ase yô, orfankwagh u hemban sha tar cii ne tsua u suur sha kwaghfan na shighe u lu hendan a imeen la ga. U tesen ikyav yô, shighe u Satan lu meen Yesu la, hanma kwa yô Yesu a kaa ér: “I nger ér.” (Mat. 4:4, 7, 10) Yange suur sha kwaghfan u Ter na sha u hendan a imeen, nahan tese iyol i hiden a mi ijime, ieren i Satan a ban a mi shi a soo i̱ ga la. Se mba suur sha kwaghfan u Yehova la kpa? Orya u nan dondon ikyav i Yesu i kuran la yô, ka nan lumun ér Mkaanem ma Aôndo ma hemen nan, hemban je yô, shighe u nan tagher a imeen yô. Mbayaav udubu imôngo mba eren nahan sha tar cii. Mba vanden keren Tartor u Aôndo ken uuma vev, shi mcivir u mimi hemba gban ve kwagh a inyaregh ki keren. Kwagh ne na yô, mba hemban nengen sha icombor ve. Yehova ngu a ver iniôngon ve la doo doo, sha u nan ve akaa a kwagh a gbe ve sha mi la, er Mkaanem nam ma tende zwa nahan.—Mat. 6:33.
17. Ka nyi i ne ve u soo u kuran er Yesu nahana?
17 Yesu ver se ikyav i hemban doon i kuran je ka u henen a hen ga. Ikyav na la ngi se a iwasen kpishi, shi ia fatyô u waren uma kpaa. Umbur wer, Satan soo ér we u vôr ken jijingi shi jighjigh u nan wou a de kera taver ga shi we u de u civir Yehova sha gbashima shi we u de kera til sha mimi ga. (1 Tes. 5:6) De ne un ian wer a hemba u ga. Za hemen u kuran er Yesu kpa kuran nahan. Kuran sha u eren msen man sha u pasen kwagh man sha u hendan a ameen. Aluer u ngu eren nahan yô, hegen u mkur u botar ne a mgbôghom ne je kpa, a saan we iyol shi uma wou una hemba lun we a inja shi u zua a mkom ken uma wou kpaa. Aluer u ngu kuran yô, shighe u Yesu una va sha u va timin botar ne kera la, una kohol we per, u lu civir Aôndo sha gbashima. Er u lu civir Yehova sha mimi yô, a doo un kpishi u nan we injar.—Mpa. 16:15.
[Mbampin Mba Ngeren u Henen]
[Foto u sha peeji 6 la]
Yesu pase kwase ugen kwaghaôndo hen kpejôr. U keren aan a pasen kwagh hanma iyange kpa?
[Foto u sha peeji 7 la]
Aluer u ngu wasen tsombor wou u civir Yehova sha gbashima yô, u lu tesen wer u ngu kuran
