Ngeren u Pasen Yiase Yase

‘Ikyekye i Tôôn Ityakerada la Yange I̱ Na Ior Fa Er M Lu Or u He Yô’

Shighe u Anmgbian u kwase ugen, u i yilan un ér Charlotte White, u eren tom u pasen kwagh hanma shighe la za nyôr ken gar u Louisville, ken kpentar u Kentucky, ken tar u Amerika, lu kpelan ikyekye i tôôn ityakerada yô, ior kpishi lu kenger un.

LU KEN inyom i 1908 la, Anmgbian u kwase White lu kpelan ikyekye i tôôn ityakerada i i yilan ér “Millennial Dawn,” i í sember duen a mi la ve ior mba hen gar la kpishi lu kenger un ye. Anmgbian u kwase ne kaa ér: “Yange ior ôr kwagh u ikyekye i tôôn ityakerada la, nahan i hingir u fan er m lu or u he yô.”

Mbahenen Bibilo (iti i í yilan Mbashiada mba Yehova tsuaa la yô) yange ve nenge ér, doo u vea pase mbagenev akaa a injaa a ve lu timen ken Ruamabera sha gbashima ve, ve lu zuan a mi la. Ior kpishi yange ve zua a mfe u Bibilo sha u ôron ityakerada i Millennial Dawn, (i i va gema yilan í ér Studies in the Scriptures) la. Mbakristu mba ve lumun shi ve lu a tahav mbu wasen yô, yange ve zenden sha ugeri mba vesen man mba kiriki kua ken agar, ve naan ior mba sar ve kpishi u ôron ityakerada i í yilan ér “Helping Hands for Bible Students” (Ityakerada I Wasen Mba Henen Bibilo u Kaven Kwagh u I Er La) yô.

Ken inyom i 1908 la, Charlotte White man mba pasen loho u Tartor mba tseen asema mbagenev naan ior ityakerada i Millennial Dawn la sha ishe i inyaregh ki Amerika, dola môm man kwagh. Mbapasenkwagh u Tartor mba tseen asema mban yange ve naan mbayaav ityakerada ne her ave ave ga, kpa ve kohol iyenge i ior ve pin la cii ve yem a mi, a̱ luun sha iyange i kimbin inyaregh yô, ve hide ve va na ior mba ve pin la ityakerada ne sha ishe i í gber ityakerada shon la vough. Orgen u hendan kwagh a mbapasenkwagh mbara yange gba ijir ér ior yange vea ngohol ityakerada la yô, ve na inyaregh sha mi i ndahar yum.

Anmgbian u kwase ugen, iti na ér Malinda Keefer, a kaa ér hanma kasua yô, yange i gba u una tôô ityakerada ia kuma deri uhar shin utar nahan, una za na ior mba ve  pin í la. Er ior soo u ôron ityakerada i Millennial Dawn la nahan kpa, gema lu kwagh u ican kpishi u za nan ve ityakerada ne. Gadia tihi u sha ataratar u takerada ne tseegh kpa yange u lu upeeji 740! Iyoukura igen kaa ér, “Ityakerada ne akunduahargber tseegh kpa yange i yuhwa kuma ukilogram 18,” nahan “i lu ican kpishi” u tôôn í za nan ior, anmgbianev mba kasev je yô, i hemba taver ve cii.

Nahan Anmgbian ugen i yilan un ér James Cole yô, var ikyekye i a fatyô u huren i yô, wa akaver ahar sha mi, shi i̱ lu a teran u a fatyô u haren ikpa sha mi yô, sha er a kera lu ican u tôôn ityakerada ne ga yô. Er kera lu u mbapasenkwagh vea tôôn ityakerada ne ken ukôtôn mba yuhwan ga yô, anmgbian u yange var ikyekye i ne la iyol na kpa hôm kwagh kaa ér: “Me kera yôhôr kwende wam sha u tôôn ityakerada ga.” Yange due a ikyekye i tôôn ityakerada ne sha mkohol u vesen u Mbahenen Bibilo zua ken gar u Cincinnati, ken kpentar u Ohio, ken inyom i 1908 la, nahan doo mba ve lu hen mkohol la kpen kpen. Yange i nger sha ikyekye ne ér Dawn-Mobile, sha ci u kwagh u yange na ve i er ikyekye ne yô, lu sha u tôôn ityakerada i Millennial Dawn la. Yange or a kar tôôn ityakerada ne sha ikyekye ne shighe kpuaa tseegh kpa, nan fa u kuran ityakerada kpishi sha ikyekye ne, kpelan i uwegh môm tseegh. Yange i er ikyekye ne sha gbenda u orpasenkwagh nana fatyô u seer i̱ ityaven shin panden yô, shi i er i sha gbenda u akaver a i aa fatyô u karen sha igbendatoho yô. Yange or a pase kwagh a bee yô, nan hule akaver a ikyekye ne, nan kôr er ka ikpa nahan, nan gba yemen ken ya u nan sha angahar shin sha mato.

Yange i na anmgbianev mba kasev mba ve eren tom u pasen kwagh hanma shighe la ikyekye i tôôn ityakerada ne gbilin. Mbagenev cii yô, ve yam i sha inyaregh ki Amerika dola uhar man tiôn. Anmgbian u kwase u i yilan un ér Malinda Keefer, u i tese foto na heen ne, yange fa u eren tom a ikyekye i tôôn ityakerada la je yô, a wa ityakerada ken ikpa i sha ikyekye ne poo, a kpelan i uwegh môm, shi a kôr ikpa igen ken uwegh kugen, a ityakerada ker. Zough a ior mba ve soo u ôron ityakerada ne hen angar ugen, u i dughun akaa a injaa shin inya her, ken kpentar u Pennsylvania, ken tar u Amerika yô, yange a per tsar u ifi u Allegheny kwa tar shin kwa nyiin sha iyange i nan ityakerada la, a za na ve.

Ken inyom i 1987 la, orgen u nahan igirgi i purugh var ikpa i kpelan a kpela i lun a akaver, i ior ve zenden a mi hen utashan mba agirgi a purugh man sha godobi ken geri nyian la. Nahan kpa, anyom deri môm a karen la, a shi nan kpa yange i doo Mba Henen Bibilo mba tseen asema er ior kenger ve sha ci u ikyekye i tôôn ityakerada i Millennial Dawn, i ve zenden ve lôôn ivor i mimi u Bibilo a mi la, yange i na ve due tseer tseer yô.

[Mkaanem ma sha peeji 32 la]

Anmgbian u kwase, Malinda Keefer yange a per tsar u ifi u Allegheny kwa tar shin kwa nyiin, sha iyange i za nan ityakerada la, a za na ve ityakerada

[Mkaanem ma sha peeji 32 la]

“Ikyekye la yange i bee a ican i tôôn ityakerada i Millennial Dawn la”